Кодлыкӧ... Кодлы ачым ог тӧд
Арся пемыд войяс локтӧ,
Гажтӧм, шуштӧм войяс...
Югыд тувсов войяс коли,
Гожӧм — сы бӧр вӧтчис.
Но мукӧддырйи арын сёрӧн
Овлӧ сэтшӧм здукъяс,
Мый он тӧд тэ, ар-ӧ, тулыс —
Югыд, шоныд рытъяс.
Со и талун. Ывла югыд,
Быттьӧ тувсов войся:
Лӧнь да шоныд, тӧлысь югыд,
Енэж вылыс восьса.
* * *
Пукала ме ӧшинь дорын,
Кывза войлысь мойд.
Чарла-тӧлысь енэж шӧрын,
Кымӧр абу войт.
Пемыд вӧрыс шемӧс пӧрӧм,
Оз лысьт шуны кыв.
Тӧлысь сылысь синсӧ пӧртӧм,
Мекӧд кывзӧ — чӧв.
Кӧнкӧ кӧлӧкӧла кылӧ —
Мунӧ пара вӧв.
Шыыс муртса пельӧдз волӧ,
Вайӧдыштлӧ тӧв.
Друг мем дум вылӧ сэк уси
Зэв нин важсятор,
Муртса юр сэрӧгнам судзи
Вунлӧм вӧвлӧмтор.
Кыдзи ӧтчыд, тадз жӧ арын,
Мунлім тэкӧд ми
Пара вӧлӧн Сыктывкарсянь
Школа съезд бӧрти.
Кыдзи пӧрлім канаваӧ
Додьсянь улӧ юр.
Кыдзи кӧрталін сэк шальнад
Менсьым доя юр.
Кыдз тай сэсся шойччанінын
(Югыд вӧлі вой)
Тӧлысь югӧр, енэж биӧн
Юлім тэкӧд тшай.
Войбыд дурин, эн лэдз узьны
Меным сэки тэ:
Юрлӧсъясӧн менӧ шӧтлін, —
Аслыд вӧлі теш.
Кыдзи сэсся, водзӧ муніг,
Доддьын ышмин пыр,
Юрсияснад менӧ дзуглін
Сьылі гӧгӧр — шырк.
Долыд серам миян петліс —
(Сӧстӧм вӧлім сэк)
Тэныд дум вылад эз усьлы,
А ме вӧлі йӧй:
Весиг ӧтчыдтӧ эг окышт
Тэнӧ, дзоридзӧй.
Мисьтӧм казьтыштан эг кольышт
Тэкӧд ветлӧм туй...
Сы вӧсна тай миян вирным
Лӧсявлылӧма.
Олӧм йылысь миян думным
Вӧлі ӧтсяма.
Бур тӧварышӧс моз тэнӧ
Индіс меным ёрт.
Пӧдругаыд шуис тэнад:
«Сійӧ — миян морт»...
Тӧда, кыдзи лэптін китӧ
Коми йӧзладор,
Кор ме «вопрос» съездлы пукті —
«Коми кыпӧдтор»...
Сідзжӧ шуисны тэ йылысь:
«Поднадзорнӧй тож...
Тӧдсьӧ политика йӧзкӧд...
Мун да тӧдмась, зон».
Сэсся, кор сёрнивыв воим,
Лӧсявлім быд кыв,
Ӧнісянь оландырйӧн
Вӧлі сьӧлӧм тыр.
...................................
Тадзи казьтывла ме ӧні
Важся вӧвлӧмтор,
Сӧмын ачыд, ог тӧд — кӧні,
Видза олан он.
Гашкӧ, ань нин, мам нин ӧні
Уна челядьлӧн.
Важӧн нин ӧд сійӧ вӧлі,
Буретш дас нёль во!..
Весиг нимыд тэнад вунӧм,
Ог тӧд, кыдзи-мый.
Ноко, ачыд отсышт меным —
Висьтав, шыась вай!
* * *
Тадзи мойдіс ӧшинь дорын
Арся пемыд вой,
Казьтывліс мем важся томдыр,
Дас ӧтикӧд во.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1939 году и был посмертно реабилитирован в 1956 году, соответственно эта работа выйдет в России в общественное достояние в 2027 году.
The author died in 1939, so this work is also in the public domain in countries and areas (outside Russia) where the copyright term is the author's life plus 80 years or less. |