Кодзувкотъяс
| Кодзувкотъяс (1926) by |
| Гижан кад: 1926, Йӧзӧдан во: 1926. Ӧшмӧс: Школаын лыддянтор. Сыктывдінкар, 1926. |
Прокӧ Пилякӧд кайисны тшак вотны. Ветлӧдлӧны быд пу костӧд, быд мыр бердӧд, корсялӧны сьӧд гобъяс, гӧрд гобъяс. Вывті уна тшакыс петӧма, оз вевъявны весиг вотнысӧ бур йӧз. Со, муртсаӧн пестеръястӧ, чуманъястӧ тыртісны Пиля Прокӧкӧд.
«Сэсся пӧ позьӧ куритчыштны», шуӧны найӧ. Вель дыр пукалісны куритчигмозныс. Сэсся бара тшак корсявны мӧдӧны, асьныс шыбитісны кок уланыс чигарка помнысӧ. Сэні вӧлӧма кодзувкот поз. Чигарка помсьыд кос лысъясыд да ув торъясыд ӧзйисны. Кодзувкотъяс шызисны: котралӧны ӧтарӧ-мӧдарӧ. Бикӧд оз позь шмонитны. Тӧдӧны ӧд, налӧн керканыс вӧчӧма дзоньнас кос лысъясысь, коръясысь, ньӧръясысь, вермас ӧти дукӧн кушӧдз сотчыны. Сӧмын кодзувкотъяс абу полысьӧсь. Ставныс ӧтвылысь уськӧдчисны чигарка пом вылад, веськыда би вылас. Мырсьӧны, кусӧдчӧны мӧда-мӧд вежмӧн, горзӧны: «энӧ пӧ полӧ, вокъяс, эн лэдзӧ бисӧ паськавны!»
Уна кодзувкот ассьыс ловсӧ сэтчӧ пуктіс. Коді коктӧм, коді синтӧм коляліны повтӧмъяс. Керканыс ӧд дзонь жӧ коли, немтор эз лэдзны сотчыны.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 97 years or less since publication.
Public domainPublic domainfalsefalse