Книга

Чавайн Сергей Григорьевич

Ой, книга, книга!
Чылажымат тый кертат:
Кöжö тыйым лудалеш -
Пыл помышым раш ужеш,
Мланде помышым ушыж ден
Пурен лектеш шоналтен,
Южыш кӱза, чоҥешта
Шудо дене мутлана.
Ой, книга, книга!
Чылажымат тый кертат:
Чыла еҥым туныктет,
Чыла еҥым тый нöлтет,
Садлан тыйым чыланат
Пеш пагалат, йöратат.
Марий гына тыланет
Тупшым веле ончыкта,
Садлан марий калыкет
Пеле шужен эндыген,
Шем пöртыштö аҥырген,
Почаҥ илаш толаша…
Ой, книга, книга!
Чылажымат тый кертат:
Тӱрлö семын туныктет,
Чыла еҥым тый нöлтет!