Кни́га житі́й ст҃ы́хъ/Ма́ртъ/к҃и

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Ма́рта к҃з

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а ма́рта въ к҃и де́нь

Ма́рта к҃ѳ→

[…] […] […]

Въ то́йже де́нь,
по́вѣсть ѡ҆ таѯїѡ́тѣ во́инѣ
и҆з̾ ме́ртвыхъ воскре́сшемъ.

Въ карѳагі́нѣ а҆фрїкі́йстѣмъ гра́дѣ бы́сть мꙋ́жъ нѣ́кїй и҆́менемъ таѯїѡ́тъ, са́номъ во́инъ, то́й въ вели́кихъ грѣсѣ́хъ жи́знь свою̀ провожда́ше. сме́ртемъ же мнѡ́гимъ бы́вшымъ въ карѳаге́нѣ, прїи́де въ стра́хъ и҆ въ чꙋ́вство таѯїѡ́тъ, и҆ пока́ѧсѧ ѡ҆ грѣсѣ́хъ свои́хъ, и҆ и҆зше́дши и҆з̾ гра́да съ жено́ю свое́ю сѣ́де на селѣ̀ въ молча́нїи. По нѣ́коемъ же вре́мени дѣ́йствомъ дїа́волскимъ впадѐ въ прелюбодѣѧ́нїе съ жено́ю земледѣ́лца своегѡ̀ съ ни́мъ на селѣ̀ жи́вшагѡ. и҆ минꙋ́вшымъ немнѡ́гимъ дне́мъ по согрѣше́нїи то́мъ ѹ҆ѧде́нъ бы́сть ѕмїе́ю, и҆ ѹ҆́мре. Мнⷭ҇ты́рь же бѣ̀ въ разстоѧ́нїи по́прища ѿ села̀ тогѡ̀, и҆ те́кши та́мѡ жена̀ таѯїѡ́това ѹ҆молѝ мона́хи, да прише́дше во́змꙋтъ тѣ́ло ѹ҆ме́ршагѡ, и҆ погребꙋ́тъ въ цр҃кви: погребо́ша ѹ҆̀бо є҆го̀ въ тре́тїй ча́съ днѐ. є҆гда́ же бы́сть ча́съ девѧ́тый, ѹ҆слы́шасѧ ѿ гро́ба во́пль глаго́лющь: поми́лꙋйте мѧ̀, поми́лꙋйте мѧ̀. и҆ пристꙋпи́вше ко гро́бꙋ, и҆ гла́съ погребеннагѡ слы́шаще ско́рѡ возгребо́ша є҆го̀, и҆ ѡбрѣ́тше мертвеца̀ жи́ва, ѹ҆дивлѧ́хꙋсѧ со ѹ҆́жасомъ. и҆ вопроша́хꙋ того̀, хотѧ́ще ѹ҆вѣ́дати, что̀ є҆мꙋ̀ бы́сть, и҆ ка́кѡ ѡ҆живѐ; ѻ҆́нъ же не могі́й повѣ́дати ѿ мно́гагѡ пла́ча и҆ рыда́нїѧ, молѧ́ше и҆̀хъ, да ведꙋ́тъ є҆го̀ къ рабꙋ̀ бж҃їю тара́сїю є҆пⷭ҇кпꙋ, и҆ веде́нъ бы́сть къ томꙋ̀: є҆пⷭ҇кпъ же трѝ днѝ нꙋ́дѧше є҆го̀, да повѣ́сть є҆мꙋ̀, что̀ та́мѡ ви́дѣлъ; и҆ є҆два̀ въ четве́ртый де́нь возмо́же гл҃ати. со мно́гими ѹ҆̀бо слеза́ми повѣ́да сїѐ: а҆́зъ є҆гда̀ ѹ҆мира́хъ, ви́дѣхъ нѣ́которыѧ мꙋ́рины предстоѧ́щыѧ мѝ, и҆́хже зра́къ ѕѣлѡ̀ стра́шенъ: и҆ ви́дѧщи тѣ́хъ дꙋша̀ моѧ̀ мѧтѧ́шесѧ. та́же ѹ҆зрѣ́хъ два̀ ю҆́ношы ѕѣлѡ̀ кра́сны, и҆ вскочѝ дꙋша̀ моѧ̀ въ рꙋ́цѣ и҆́хъ, и҆ а҆́бїе ѿ землѝ а҆́ки летѧ́ще восхожда́хомъ на во́здꙋхъ въ высотꙋ̀, и҆ ѡ҆брѣто́хомъ мыта́рства стрегꙋ́щыѧ восхо́да и҆ ѹ҆держава́ющыѧ всѧ́кагѡ чл҃вѣ́ка дꙋ́шꙋ, и҆ ко́еждо мыта́рство ѡ҆ ѻ҆со́бномъ грѣсѣ̀ и҆стѧ́зоваше, ѻ҆́во ѡ҆ лжѝ, дрꙋго́е ѡ҆ за́висти, и҆но́е ѡ҆ го́рдости, и҆ кі́йждо грѣ́хъ своѧ̀ и҆спыта́тели и҆́мать на воздꙋ́сѣ. и҆ ви́дѣхъ а҆́зъ въ ковче́жцѣ ѿ а҆́гг҃лѡвъ держи́момъ всѧ̀ дѣла̀ моѧ̀ до́браѧ, и҆ взима́юще та̀ а҆́гг҃ли примѣ́риша къ дѣла́мъ мои́мъ ѕлы́мъ, и҆ та́кѡ мыта́рства минова́хомъ. є҆гда́ же приближа́ющесѧ ко врата́мъ нбⷭ҇нымъ прїидо́хомъ на мыта́рство блꙋ́дныхъ, ѹ҆держа́ша менѐ та́мѡ стрегꙋ́щїи, и҆ и҆зноша́хꙋ всѧ̀ моѧ̀ плотска́ѧ дѣла̀ блꙋ́днаѧ, ꙗ҆̀же сотвори́хъ ѿ дѣ́тства моегѡ̀ и҆ досе́лѣ. и҆ реко́ша водѧ́щїи мѧ̀ а҆́гг҃ли: всѧ̀ ꙗ҆̀же во гра́дѣ сотвори́лъ є҆сѝ тѣле́сныѧ грѣхѝ, прости́лъ тебѣ̀ бг҃ъ, поне́же пока́ѧлсѧ є҆сѝ ѡ҆ тѣ́хъ. и҆ глаго́лаша мѝ сопроти́вницы моѝ: но по и҆зше́ствїи и҆з̾ гра́да, на селѣ̀ со жено́ю земледѣ́лца твоегѡ̀ соблꙋди́лъ є҆сѝ. и҆ слы́шавше то̀ а҆́гг҃ли, не ѡ҆брѣто́ша до́брагѡ дѣ́ла чи́мъ ѿмѣ́рити грѣ́хъ то́й, и҆ ѡ҆ста́влше мѧ̀ ѿидо́ша. Є҆́мше ѹ҆̀бо менѐ лꙋка́вїи дꙋ́си бїю́ще сведо́ша до́лꙋ, и҆ разсѣ́дшейсѧ землѝ снидо́хъ вводи́мый ѹ҆́зкими вхо́ды свкозѣ̀ сква́жины тѣ́сныѧ и҆ смра́дныѧ, да́же до преиспо́днихъ темни́цъ а҆́довыхъ, и҆дѣ́же дꙋ́шы грѣ́шныхъ затворе́ни сꙋ́ть во тмѣ̀ вѣ́чной, и҆дѣ́же нѣ́сть жи́зни человѣ́кѡмъ, но мꙋ́ка вѣ́чнаѧ и҆ пла́чь неꙋтѣ́шимый и҆ неисповѣди́мый скре́жетъ зꙋбѡ́въ. та́мѡ всегда̀ вопїю́тъ во́племъ ве́лїимъ, глаго́люще: го́ре на́мъ, го́ре! ѹ҆вы̀ ѹ҆вы̀! и҆ нѣ́сть возмо́жно и҆зглаголати бѣ́дъ та́мѡ сꙋ́щихъ, нижѐ мо́щно и҆зрещѝ мꙋ́къ и҆ болѣ́зней тѣ́хъ, ꙗ҆̀же та́мѡ ви́дѣхъ, сто́нꙋтъ ѿ се́рдца, и҆ никто́же ѡ҆ ни́хъ милосе́рдствꙋетъ: пла́чꙋтъ, и҆ нѣ́сть ѹ҆тѣша́ющагѡ: мо́лѧтъ, и҆ нѣ́сть послꙋ́шающагѡ ни и҆збавлѧ́ющагѡ. и҆ затворе́нъ бы́хъ съ ни́ми и҆ а҆́зъ въ те́мныхъ тѣ́хъ мѣ́стѣхъ и҆ въ тѣснотѣ̀ посажде́нъ, и҆ бы́хъ пла́часѧ и҆ рыда́ѧ го́рькѡ держи́мый ѿ тре́тїѧгѡ часа̀ до девѧ́тагѡ. та́же ѹ҆зрѣ́хъ сїѧ́нїе ма́ло, и҆ а҆́гг҃лы два̀ прише́дшыѧ та́мѡ, и҆ нача́хъ моли́ти и҆̀хъ прилѣ́жнѡ, да и҆зведꙋ́тъ мѧ̀ ѿ бѣды̀ тоѧ̀, ꙗ҆́кѡ да пока́юсѧ бг҃ꙋ. и҆ глаго́лаша мѝ а҆́гг҃ли: безвре́меннѡ мо́лишисѧ, никто́же бо ѿсю́дꙋ и҆схо́дитъ, до́ндеже всѣ́мъ бꙋ́детъ воскрⷭ҇нїе. мнѣ́ же велмѝ просѧ́щꙋ и҆ молѧ́щꙋсѧ и҆ пока́ѧтисѧ ѡ҆бѣщава́ющꙋсѧ, глаго́ла є҆ди́нъ а҆́гг҃лъ къ дрꙋго́мꙋ: порꙋча́ешисѧ ли за него̀, ꙗ҆́кѡ пока́етсѧ, ꙗ҆́коже ѡ҆бѣщава́етъ ѿ всегѡ̀ се́рдца; и҆ речѐ дрꙋгі́й: порꙋча́юсѧ. и҆ ви́дѣхъ, ꙗ҆́кѡ дадѐ є҆мꙋ̀ рꙋ́кꙋ порꙋ́чникъ. тогда̀ є҆́мше мѧ̀ и҆зведо́ша ѿтꙋ́дꙋ на зе́млю во гро́бъ къ тѣ́лꙋ моемꙋ̀. и҆ глаго́лаша мѝ: вни́ди, ѿню́дꙋже ѿличи́лсѧ є҆сѝ. и҆ ви́дѣхъ а҆́зъ дꙋше́вное моѐ є҆стество̀ а҆́ки би́серъ свѣтѧ́щеесѧ, тѣ́ло же ме́ртво а҆́ки ти́на смердѧ́щее и҆ че́рно, и҆ гнꙋша́хсѧ вни́ти въ нѐ. и҆ рѣ́ша мѝ а҆́гг҃ли: невозмо́жно є҆́сть тебѣ̀ пока́ѧтисѧ, а҆́ще не съ тѣ́ломъ и҆́мже согрѣши́лъ є҆сѝ. а҆́зъ же молѧ́хсѧ, дабы̀ мѝ не входи́ти въ тѣ́ло. и҆ глаго́лаша а҆́гг҃ли: вни́ди, а҆́ще же нѝ, то̀ па́ки ѿведе́мъ тѧ̀ та́мѡ, ѿню́дꙋже взѧ́хомъ. тогда̀ внидо́хъ, и҆ ѡ҆жи́хъ, и҆ нача́хъ взыва́ти: поми́лꙋйте мѧ̀. глаго́ла же є҆мꙋ̀ ст҃и́тель тара́сїй: вкꙋсѝ бра́шна. и҆ не хотѧ́ше вкꙋси́ти, но ѿ цр҃кви до цр҃кви ходѧ̀ па́даше на лицѣ̀ свое́мъ и҆сповѣ́даѧсѧ бг҃ꙋ со слеза́ми и҆ воздыха́нїемъ. и҆ глаго́лаше ко всѣ́мъ: го́ре согрѣша́ющымъ, ꙗ҆́кѡ мꙋ́ка вѣ́чнаѧ жде́тъ и҆̀хъ. го́ре нека́ющымсѧ, до́ндеже и҆́мꙋтъ вре́мѧ. го́ре ѡ҆сквернѧ́ющымъ своѐ тѣ́ло. пребы́сть же таѯїѡ́тъ по воскрⷭ҇нїи свое́мъ четы́редесѧть дне́й, и҆ ѡ҆чи́стивсѧ покаѧ́нїемъ, ѹ҆вѣ́да ча́съ сконча́нїѧ своегѡ̀ пре́жде тре́хъ дне́й, и҆ ѿи́де къ бг҃ꙋ премлⷭ҇рдномꙋ и҆ чл҃вѣколюби́вомꙋ, низводѧ́щемꙋ во а҆́дъ и҆ возводѧ́щемꙋ, и҆ всѣ̑мъ спасе́нїе подава́ющемꙋ, є҆мꙋ́же сла́ва во вѣ́ки, а҆ми́нь.

Бꙋдді́йскаѧ і҆кѡ́на а҆́да, вѣ́къ ѳ҃і.