Кни́га житі́й ст҃ы́хъ/А҆́ѵгꙋстъ/ѕ҃і

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←А҆́ѵгꙋста є҃і

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а а҆́ѵгꙋста въ ѕ҃і де́нь

А҆́ѵгꙋста з҃і→

Мцⷭ҇а а҆́ѵгꙋста въ ѕ҃і де́нь,
повѣствова́нїе ѡ҆ нерꙋкотворе́нномъ ѻ҆́бразѣ
гдⷭ҇а на́шегѡ і҆и҃са хрⷭ҇та̀, и҆ ѡ҆ пренесе́нїи є҆гѡ̀
и҆з̾ є҆де́са въ ца́рьградъ.

Во ѻ҆́ныѧ днѝ, въ нѧ́же гдⷭ҇ь на́шъ і҆и҃съ хрⷭ҇то́съ на землѝ ꙗ҆́влсѧ, и҆ съ чл҃вѣ́ки живы́й, прохожда́ше і҆ꙋде́йскїѧ и҆ ꙗ҆̀же ѻ҆́крестъ гра́ды, и҆ вє́си, проповѣ́дꙋѧ ѡ҆ црⷭ҇твїи бж҃їи, и҆ и҆сцѣлѧ́ѧ всѧ́къ недꙋ́гъ, и҆ всѧ́кꙋ ꙗ҆́зю въ лю́дехъ. бѣ̀ во гра́дѣ є҆де́сѣ, и҆́же въ сѷрі́и ѻ҆бо́нъполъ рѣкѝ є҆ѵфра́та, кн҃зь и҆́менемъ а҆́ѵгарь, неисцѣ́лными болѣ́знми недꙋ́гꙋѧй, и҆звнѣ́ бо прока́зою си́нею, внꙋ́трь же ломле́нїемъ косте́й, и҆ всѣ́хъ ѹ҆дѡ́въ разслабле́нїемъ томи́мый бѧ́ше. то́й слы́шавъ ѡ҆ хрⷭ҇тѣ̀ гдⷭ҇ѣ, и҆ ѡ҆ вели́кихъ чꙋдеса́хъ быва́емыхъ ѿ негѡ̀, ꙗ҆́кѡ сло́вомъ врачꙋ́етъ прока̑зы и҆ разслаблє́нїѧ, и҆ всѧ́кїѧ болѣ̑зни в̾ чл҃вѣ́цѣхъ, возжела̀ свои́ми ѻ҆чесы̀ ви́дѣти таковы́хъ чꙋде́съ дѣ́лателѧ, надѣ́ѧсѧ ѿ негѡ̀ и҆сцѣле́нїе полꙋчи́ти. а҆ поне́же не возмо́жно бѣ̀ є҆мꙋ̀ самомꙋ̀ и҆тѝ во і҆ꙋде́ю, посла̀ ѹ҆̀бо моле́нїе ко хрⷭ҇тꙋ̀ гдⷭ҇ꙋ, да то́й прїи́детъ къ немꙋ̀ во є҆де́съ. є҆ще́ же и҆ ѡ҆ се́мъ сꙋмнѧ́сѧ, вохо́щетъ ли прїитѝ къ немꙋ̀ гдⷭ҇ь, посла̀ и҆скꙋ́снаго живопи́сца, и҆́менемъ а҆на́нїю, да на і҆кѡ́нѣ и҆з̾ѻбрази́тъ лицѐ є҆гѡ̀, ꙗ҆́кѡ да понѐ и҆з̾ѻбраже́нїе лица̀ є҆гѡ̀ ви́дитъ, и҆ и҆мѣ́етъ то́е болѣ́знемъ свои́мъ во ѿра́дꙋ, ве́лїю бо стѧжа̀ къ немꙋ̀ любо́вь, ѹ҆вѣрѧ́ѧсѧ ѿ слꙋ́ха. бѣ́ же посла́нїе тогѡ̀ напи́сано си́це:

А҆́ѵгарь кн҃зь є҆де́сскїй, і҆и҃сꙋ сп҃си́телю бл҃го́мꙋ въ страна́хъ і҆ерꙋсали́мскихъ, во пло́ти ꙗ҆́влшемꙋсѧ, ра́доватисѧ.

Слы́шно мнѣ̀ є҆́сть ѡ҆ тебѣ̀, и҆ ѡ҆ пресла́вныхъ чꙋдотворе́нїѧхъ твои́хъ. ꙗ҆́кѡ без̾ врачевства̀ и҆ бы́лїй и҆сцѣлѧ́еши болѣ̑зни, слѣпы̑мъ дае́ши прозрѣ́нїе, хромы̑мъ хожде́нїе, ѡ҆чища́еши прокажє́нныѧ, и҆ ѿго́ниши ѿ чл҃вѣ́кѡвъ нечи́стыѧ дꙋ́хи, и҆ разсла́блєнныѧ ѿ мно́гихъ лѣ́тъ на ѻ҆дрѣ̀ лежа́щыѧ врачꙋ́еши сло́вомъ, и҆ мє́ртвыѧ воскреша́еши. такѡва́ѧ а҆́зъ слы́ша, ѿ двою̀ є҆ди́но помышлѧ́ю тѧ̀ бы́ти: и҆лѝ бг҃а съ нб҃сѐ сше́дшаго, и҆лѝ сн҃а бж҃їѧ, ꙗ҆́кѡ такова́ѧ ѹ҆диви́телнаѧ чꙋдеса̀ содѣ́ловаеши. тогѡ̀ ра́ди пишꙋ̀ къ тебѣ̀ смире́нное моле́нїе моѐ сїѐ, да потрꙋди́шисѧ прїитѝ ко мнѣ̀, и҆ да и҆сцѣли́ши неисцѣ́лныѧ болѣ̑зни моѧ̀, въ ни́хже ѿ мно́гихъ лѣ́тъ стра́ждꙋ. є҆ще́ же и҆ сїѐ слы́шꙋ, ꙗ҆́кѡ і҆ꙋдє́и ненави́дѧтъ тѧ̀, и҆ хо́щꙋтъ нѣ́что ѕло́е содѣ́ѧти тебѣ̀. а҆́зъ же и҆́мамъ гра́дъ, а҆́ще и не ѕѣлѡ̀ вели́къ, ѻ҆ба́че прекра́сенъ, и҆ всѣ́ми бл҃ги́ми и҆з̾ѻби́лный, прїидѝ ѹ҆̀бо ко мнѣ̀, и҆ ѡ҆бита́й со мно́ю въ мое́мъ гра́дѣ, и҆́же бꙋ́детъ ѻ҆бои́мъ на́мъ на всѧ́кꙋю потре́бꙋ дово́ленъ.

Съ таковы́мъ посла́нїемъ ѿ а҆́ѵгарѧ живопи́сецъ а҆на́нїа і҆ерⷭ҇ли́ма дости́гъ, и҆ хрⷭ҇та̀ гдⷭ҇а посредѣ̀ мно́жества наро́да на ꙗ҆́снѣ стоѧ́ща, и҆ ѹ҆чи́телное сло́во простира́юща ви́дѣвъ, не можа́ше а҆́бїе прибли́житисѧ къ немꙋ̀ ѿ наро́днагѡ согнете́нїѧ и҆ тѣсноты̀. жды́й ѹ҆́бѡ вре́мене, да́же разы́детсѧ наро́дъ, встꙋпѝ на нѣ́кїй ка́мень, ма́лѡ вы́шши землѝ стоѧ́щїй, и҆ смотрѧ̀ прилѣ́жнѡ на лицѐ сп҃си́телево, покꙋша́шесѧ и҆з̾ѻбрази́ти то́е, но не можа́ше, та́кѡ всеви́дцꙋ восхотѣ́вшꙋ, и҆ прест҃о́е лицѐ своѐ бж҃е́ственною неиз̾ѻбрази́телною, и҆ непостижи́мою сла́вою и҆ бл҃года́тїю премѣнѧ́ющꙋ. и҆ трꙋди́всѧ а҆на́нїа до́лгѡ, ничто́же ѹ҆спѣ̀. Гдⷭ҇ь же повелѣ̀ ѳѡмѣ̀ а҆пⷭ҇лꙋ и҆тѝ, и҆ привестѝ ѻ҆́наго мꙋ́жа на ка́мени стоѧ́ща, и҆ лицѐ є҆гѡ̀ и҆з̾ѻбразꙋ́юща. и҆ приведе́нꙋ томꙋ̀ бы́вшꙋ, и҆ не ѹ҆̀ что̀ глаго́лати наче́ншꙋ, призва̀ є҆го̀ къ себѣ̀ гдⷭ҇ь по и҆́мени, и҆ по хꙋдо́жествꙋ, а҆на́нїю живопи́сца того̀ нарица́ѧ, и҆ винꙋ̀ прише́ствїѧ є҆гѡ̀ сказхꙋ́ѧ, и҆ глаго́лѧ: гдѣ̀ є҆пїсто́лїѧ кнѧ́зѧ твоегѡ̀ а҆́ѵгарѧ, ю҆́же и҆з̾ є҆де́са ко мнѣ̀ прине́слъ є҆сѝ; А҆на́нїа же ѹ҆дивле́нїѧ и҆ ѹ҆́жаса ѡ҆ гдⷭ҇немъ прозорли́вствѣ и҆спо́лнивсѧ, и҆з̾ѧ̀ ско́рѡ ѿ нѣ́дръ посла́нїе кнѧ́зево, и҆ съ тре́петомъ дадѐ то́е въ рꙋ́цѣ сп҃си́телю. Гдⷭ҇ь же проче́тъ, восписа̀ ко а҆́ѵгарю си́це: Бл҃же́нъ є҆сѝ а҆́ѵгаре не ви́дѣвый мѧ̀, и҆ вѣ́ровавый въ мѧ̀, пи́сано бо є҆́сть ѡ҆ мнѣ̀, ꙗ҆́кѡ ви́дѧщїи мѧ̀, не и҆́мꙋтъ вѣ́ровати, не ви́дѧщїи же мѧ̀, ѹ҆вѣ́рꙋютъ въ мѧ̀, и҆ наслѣ́дѧтъ живо́тъ вѣ́чный. пи́шеши ко мнѣ̀, да прїидꙋ̀ къ тебѣ̀, но подоба́етъ мѝ соверши́ти то́е, чесѡ̀ ра́ди по́сланъ є҆́смь, и҆ по соверше́нїи возврати́тисѧ къ посла́вшемꙋ мѧ̀ ѻ҆ц҃ꙋ̀. къ немꙋ́же є҆гда̀ вознесе́нъ бꙋ́дꙋ, послю̀ к̾ тебѣ̀ є҆ди́наго ѿ ѹ҆ченикѡ́въ мои́хъ, и҆́же ѿ ѡ҆бдержа́щихъ тѧ̀ болѣ́зней соверше́ннѡ и҆сцѣли́тъ, и҆ жи́знь вѣ́чнꙋю (креще́нїемъ) пода́стъ тѝ, и҆ сꙋ́щымъ съ тобо́ю. Таковꙋ̀ хрⷭ҇то́съ гдⷭ҇ь ко а҆́ѵгарю є҆пїсто́лїю восписа́въ, запечатлѣ̀ печа́тїю, на не́йже бѣ̀ є҆вре́йскими пи́смены напи́сано сїѐ: бж҃їе видѣ́нїе, бж҃е́ственное чꙋ́до. по написа́нїи же и҆ запечатлѣ́нїи є҆пїсто́лїи, дрꙋго́е жела́нїе а҆́ѵгарево и҆ і҆кѡнопи́сцево и҆сполнѧ́ѧ гдⷭ҇ь, повелѣ̀ принестѝ во́дꙋ, и҆ ѹ҆мы̀ прест҃о́е лицѐ своѐ, и҆ ѡ҆трѐ по́даннымъ є҆мꙋ̀ ѹ҆брꙋ́сомъ четвероча́стнымъ. ѽ чꙋ́до! проста́ѧ вода̀ на шаро́вное ѹ҆строе́нїе ва̑пъ преложи́сѧ, и҆ и҆з̾ѻбрази́сѧ на ѹ҆брꙋ́сѣ то́мъ бж҃е́ственнагѡ лица̀ прест҃о́е подо́бїе, є҆́же со є҆пїсто́лїею пода́въ гдⷭ҇ь а҆на́нїи, речѐ: несѝ, да́ждь посла́вшемꙋ тѧ̀. [бы́ша же сїѧ̑ въ послѣ̑днїѧ днѝ житїѧ̀ на землѝ Хрⷭ҇то́ва, бли́зъ страда́нїѧ є҆гѡ̀.] и҆ возврати́сѧ а҆на́нїа во є҆де́съ къ кнѧ́зю своемꙋ̀, и҆ дадѐ є҆мꙋ̀ нерꙋкотворе́нное то́е лица̀ хрⷭ҇то́ва на ѹ҆брꙋ́сѣ и҆з̾ѻбраже́нїе, и҆ воспи́саннꙋю є҆пїсто́лїю. А҆́ѵгарь же то̀ прїе́мь, вели́кїѧ ра́дости и҆спо́лнисѧ, и҆ любо́вїю ѻ҆боѧ̀ лобыза́въ, и҆ ѻ҆́бразꙋ хрⷭ҇то́вꙋ поклони́всѧ, а҆́бїе полꙋчѝ болѣ́зней свои́хъ премѣне́нїе, ма́лой то́кмѡ ча́сти прока́зы на лицѣ̀ є҆гѡ̀ ѡ҆ста́вшейсѧ до вре́мене ѻ҆́нагѡ, въ не́же и҆мѣ́ѧше прїитѝ къ немꙋ̀ по́сланный ѿ гдⷭ҇а ѹ҆чени́къ.

По во́лномъ же страда́нїи гдⷭ҇немъ, и҆ по воскр҃се́нїи, и҆ на нб҃са̀ вознесе́нїи є҆гѡ̀, прїи́де во є҆де́съ по́сланный ѿ бж҃е́ственныѧ бл҃года́ти ѳадде́й ст҃ы́й, и҆́же бѣ̀ ѿ седми́десѧти а҆пⷭ҇лѡвъ, то́й а҆́ѵгарѧ ѡст҃ѣ́й во хрⷭ҇та̀ вѣ́рѣ дово́лнѡ поꙋчи́въ, ко креще́нїю приведѐ. и҆ є҆гда̀ а҆́ѵгарь во ст҃ꙋ́ю кꙋпѣ́ль вше́дъ, крⷭ҇ти́сѧ, а҆́бїе и҆ ѡ҆ста́вшаѧсѧ ча́сть прока́зы и҆сцѣлѣ̀, и҆ и҆зы́де ве́сь чи́стъ, и҆ здра́въ тѣ́ломъ и҆ дꙋше́ю. Крести́сѧ же съ ни́мъ и҆ ве́сь до́мъ є҆гѡ̀, та́же и҆ ве́сь гра́дъ, и҆ сла́вѧшесѧ во є҆де́сѣ и҆́мѧ гдⷭ҇а на́шегѡ і҆и҃са хрⷭ҇та̀, є҆ди́нагѡ и҆́стиннагѡ бг҃а. Бѣ́ же на кратѣ́хъ є҆де́сскагѡ гра́да і҆́дѡлъ нѣ́коегѡ є҆́ллинскагѡ бо́га ѿ дре́внихъ лѣ́тъ стоѧ́й, є҆мꙋ́же всѧ́къ во гра́дъ входѧ́й, до́лженъ бѧ́ше поклони́тисѧ. того̀ і҆́дѡла а҆́ѵгарь ѿтꙋ́дꙋ све́ргъ, и҆ сокрꙋши́въ, ѹ҆стро́и въ стѣнѣ̀ ка́менной над̾ врата́ми мѣ́сто ѡ҆крꙋ́гло и҆ глꙋбо́ко, є҆ли́кѡ дождю̀ не вреди́ти. и҆ ѹ҆брꙋ́съ нерꙋкотворе́ннагѡ ѻ҆́браза хрⷭ҇то́ва ко дсцѣ̀ негнїю́щагѡ дре́ва прилѣпи́въ, и҆ зла́томъ съ драгоцѣ́нными би́серами ѡ҆бложи́въ, и҆ ѹ҆кра́сивъ, поста́ви въ то́мъ мѣ́стѣ, въ стѣнѣ̀ над̾ враты̀, є҆ще́ же и҆ надписа́нїе злато́е содѣ́ѧ сицево́е: Хрⷭ҇тѐ бж҃е, всѧ́къ ѹ҆пова́ѧй на тѧ̀, не постыди́тсѧ. и҆ повелѣ̀ лю́демъ, да всѧ́къ входѧ́й во гра́дъ и҆ и҆сходѧ́й, покланѧ́етсѧ бж҃е́ственномꙋ томꙋ̀ ѻ҆́бразꙋ хрⷭ҇то́вꙋ, и҆ зако́номъ то́е ѹ҆твердѝ, да и҆ въ послѣ́днїѧ ро́ды непремѣ́ннѡ такова́ѧ че́сть воздае́тсѧ гдⷭ҇ню и҆з̾ѻбраже́нїю. и҆ соблюде́сѧ то́е є҆гѡ̀ бл҃гоче́стное повелѣ́нїе, и҆ законоꙋставле́нїе во всѧ̀ днѝ живота̀ є҆гѡ̀, и҆ во днѝ сы́на є҆гѡ̀, по не́мъ во є҆де́сѣ кнѧ́жествовавшагѡ, та́кожде и҆ во днѝ внꙋ́ка, мно́гими лѣ́ты. По то́мъ є҆ди́номꙋ ѿ пра́внꙋкъ а҆́ѵгаревыхъ кнѧже́нїе гра́да тогѡ̀ прїе́мшꙋ, ѡ҆бнови́сѧ дре́внее во гра́дѣ нече́стїе: кнѧ́зь бо то́й разврати́всѧ, и҆ ѿстꙋпи́въ ѿ хрⷭ҇та̀, ѹ҆клони́сѧ къ є҆́ллинскомꙋ і҆дѡлопоклоне́нїю, и҆ ви́дѣвъ на вратѣ́хъ гра́дскихъ ѻ҆́бразъ хрⷭ҇то́въ ѿ всѣ́хъ входѧ́щихъ и҆ и҆сходѧ́щихъ почита́емый, вознегодова̀ вра́гъ сы́й хрⷭ҇тꙋ̀, и҆ восхотѣ̀ бж҃е́ственное то́е и҆з̾ѻбраже́нїе соврещѝ ѿтꙋ́дꙋ, и҆ вмѣ́стѡ тогѡ̀ кꙋми́ръ бѣсо́вскїй поста́вити. ѡ҆ чесо́мъ є҆пⷭ҇кпъ гра́да тогѡ̀, бы́вшимъ є҆мꙋ̀ ѿ бг҃а и҆звѣще́нїемъ ѹ҆вѣ́давъ, прїи́де но́щїю ко врата́мъ ѻ҆́нымъ съ кли́рїки свои́ми, и҆ по лѣ́ствицѣ возше́дъ, ѹ҆стро́и лампа́дꙋ ѿ древѧ́нагѡ ма́сла, и҆ возже́гъ є҆̀, пред̾ ст҃ы́мъ ѻ҆́бразомъ хрⷭ҇то́вымъ поста́ви. Та́же ꙾керамі́дою꙾ заложи́въ, пли́нѳами и҆ мѣ́ломъ застѣни́лъ, и҆ загла́дилъ: та́кѡ бо є҆мꙋ̀ ѿ бж҃е́ственнагѡ ꙗ҆вле́нїѧ бѣ̀ повелѣ́но. И҆ є҆гда̀ неви́димый бы́сть ѻ҆́ный нерꙋкотворе́нный хрⷭ҇то́въ ѻ҆́бразъ, преста̀ кнѧ́зь нечести́вый ѿ намѣ́ренїѧ своегѡ̀, и҆ по мно́гомъ вре́мени, ѿи́де ѿ человѣ́ческїѧ па́мѧти ѻ҆́бразъ ѻ҆́ный, и҆ мѣ́сто, въ не́мже загражде́нъ, въ забы́тїи бы́сть, и҆ никто́же ѡ҆ то́мъ зна́ѧше, да́же до чꙋде́снагѡ є҆гѡ̀ ꙗ҆вле́нїѧ, по мно́жайшихъ лѣ́тѣхъ бы́вшагѡ си́це:

Во днѝ бл҃гочести́вагѡ царѧ̀ і҆ꙋстїнїа́на, хоздро́й ца́рь персі́дскїй со мно́гою си́лою во́инскою на є҆де́съ гра́дъ прише́дъ, ѡ҆бсѣ́де є҆го̀, и҆ ѡ҆полча́шесѧ крѣ́пкѡ на до́лзѣ. и҆ ѹ҆жѐ и҆знемога́ющымъ гра́жданѡмъ, въ недоꙋмѣ́нїи же и҆ стра́сѣ вели́комъ бы́вшымъ, и҆ къ бг҃ꙋ со слеза́ми молѧ́щымсѧ: во є҆ди́нꙋ но́щь є҆пⷭ҇кпꙋ є҆де́сскомꙋ, и҆́менемъ є҆ѵла́вїю, ꙗ҆ви́сѧ нѣ́каѧ пресвѣ́тлаѧ во сла́вѣ вели́цѣй невѣ́ста, показꙋ́ѧ пе́рстомъ врата̀ гра́дскаѧ, и҆ мѣ́сто въ стѣнѣ̀, и҆ глаго́лѧ: верхꙋ̀ си́хъ вра́тъ сокрове́нъ є҆́сть бж҃е́ственный ѻ҆́бразъ нерꙋкотворе́нный сп҃са хрⷭ҇та̀, и҆змѝ є҆го̀ ѿ загражде́нїѧ, и҆ до́брѣ содѣ́еши. Є҆пⷭ҇кпъ же со тща́нїемъ ше́дъ ко врата́мъ ѻ҆́нымъ, и҆ къ пока́занномꙋ въ стѣнѣ̀ возше́дъ мѣ́стꙋ, ѡ҆брѣ́те, ꙗ҆́коже є҆мꙋ̀ бы́сть во ѿкрове́нїи ска́зано: позна́ бо загражде́нїе ѻ҆́ное, и҆ ѿкопа́въ є҆̀, и҆ керамі́дꙋ ѿе́мь, ѡ҆брѣ́те пречⷭ҇тый и҆ прест҃ы́й ѻ҆́бразъ хрⷭ҇то́въ цѣ́лъ и҆ невреди́мый, и҆ лампа́дꙋ то́ль мно́гими лѣ́ты неꙋга́сшꙋ, и҆ є҆ле́а и҆спо́лненꙋ, є҆ще́ же и҆ на керамі́дѣ ѻ҆́ной, є҆́юже ѻ҆́бразъ заложе́нъ бѧ́ше, дрꙋго́е лица̀ хрⷭ҇то́ва подо́бїе таково́еже и҆з̾ѻбрази́сѧ нерꙋкотворе́ннѡ. Взе́мь ѹ҆́бѡ є҆пⷭ҇кпъ ѿ ѻ҆́нагѡ мѣ́ста ст҃ы́й то́й ѹ҆брꙋ́съ, на не́мже сп҃сово и҆з̾ѻбраже́нїе, показа̀ лю́демъ, и҆̀же во гра́дѣ. и҆ бы́сть всѣ́мъ ра́дость ве́лїѧ, и҆ дерза́хꙋ ѹ҆пова́юще на гдⷭ҇а. є҆пⷭ҇кпъ же понесѐ ѻ҆́бразъ по стѣна́мъ гра́дскимъ съ литі́ею, ꙗ҆влѧ́ѧ лицѐ сп҃си́телево персі́дскимъ во́ѧмъ, ѡ҆полча́ющымсѧ на гра́дъ, и҆ а҆́бїе всѧ̀ персі́дскаѧ си́ла стра́хомъ ве́лїимъ смѧте́сѧ, и҆ ꙗ҆́тсѧ бѣ́гꙋ, бж҃е́ственною си́лою прогони́ма. И҆ та́кѡ є҆де́съ гра́дъ и҆зба́вленъ бы́сть ѿ врагѡ́въ свои́хъ милосе́рдїемъ хрⷭ҇та̀ бг҃а на́шегѡ, и҆ ꙗ҆вле́нїемъ нерꙋкотворе́ннагѡ ѻ҆́браза є҆гѡ̀ прест҃а́гѡ. По то́мъ па́ки мно́гимъ лѣ́тамъ преше́дшымъ, є҆гда̀ бѣ̀ въ гре́цѣхъ ца́рь рѡма́нъ, прозыва́емый лакапе́носъ, є҆го́же и҆ багрѧноро́днымъ нарица́ютъ, ца́рствовавый съ зѧ́темъ свои́мъ кѡнстанті́номъ, сы́номъ царѧ̀ льва̀ премꙋ́драгѡ, пренесе́нъ бы́сть то́й ст҃ы́й ѹ҆брꙋ́съ, бжⷭ҇твеннагѡ лица̀ хрⷭ҇то́ва нерꙋкотворе́нное и҆з̾ѻбраже́нїе на себѣ̀ и҆мѣ́ющь, въ ца́рьградъ ѿ є҆де́са сарацы́нами ѡ҆блада́емагѡ: ѹ҆же́ бо въ та̀ времена̀, всѧ̀ сѷрі́а, въ не́йже и҆ гра́дъ є҆де́съ под̾ ѻ҆́бластїю сарацы́нскою бѧ́ше. Бы́сть же пренесе́нїе ѻ҆́нагѡ си́це: ца́рь гре́ческїй рѡма́нъ, возжела́въ то́е безцѣ́нное сокро́вище въ ца́рствꙋющемъ гра́дѣ и҆мѣ́ти, посыла́ше мно́жицею ко а҆ми́рѣ Сарацы́нскомꙋ моле́нїе, да да́стъ є҆мꙋ̀ хрⷭ҇то́въ нерꙋкотворе́нный ѻ҆́бразъ. А҆ми́ра же ѿ хрⷭ҇тїа́нъ є҆де́сскихъ моли́мый, не хотѧ́ше да́ти ѻ҆́браза тогѡ̀ царю̀ гре́ческомꙋ. и҆ бы́сть бра́нь: ца́рь бо рѡма́нъ посла̀ гре́ческꙋю си́лꙋ на є҆де́съ, и҆ ѹ҆тѣснѝ то́й, вою́ѧ ѻ҆кре́стнꙋю є҆де́сскꙋю странꙋ̀. и҆ посла́ша є҆де́сѧне моле́нїе къ царю̀ гре́ческомꙋ, да не вою́етъ и҆ не ѡ҆пꙋстоша́етъ землѝ и҆́хъ. а҆ ца́рь ѻ҆́браза хрⷭ҇то́ва ѿ ни́хъ просѧ́ше. А҆ми́ра же сарацы́нскїй, въ є҆гѡ́же держа́вѣ бѣ̀ є҆де́съ, не хотѧ́ше да́ти тꙋ́не, ца́рь ѹ҆́бѡ хрⷭ҇тїа́нскїй жела́нїемъ ве́лїимъ ѡ҆держи́мый бы́въ, є҆́же и҆мѣ́ти ѹ҆ себѐ хрⷭ҇то́въ нерꙋкотворе́нный ѻ҆́бразъ, дадѐ а҆ми́рѣ двана́десѧть ты́сѧщъ сре́бреникѡвъ, и҆ двѣ́сти наро́читыхъ сарацы́нѡвъ, въ плѣне́нїи ѹ҆ гре́кѡвъ бы́вшихъ, є҆ще́ же и҆ писа́нїе своѐ ца́рское со злато́ю печа́тїю дадѐ, є҆́же никогда́же воздвиза́ти бра́ни на є҆де́съ, и҆ на ѻ҆кре́стныѧ тогѡ̀ гра́ды. И҆ та́кѡ полꙋчѝ жела́емое, прїѧ̀ нерꙋкотворе́нный ѻ҆́бразъ хрⷭ҇то́въ, а҆ съ ни́мъ вкꙋ́пнѡ и҆ є҆пїсто́лїю ѻ҆́нꙋю, ю҆́же хрⷭ҇то́съ гдⷭ҇ь на́шъ ко а҆́ѵгарю кнѧ́зю є҆де́сскомꙋ писа̀, ꙗ҆́коже пре́жде рече́сѧ, и҆ принесѐ сла́внѡ рꙋка́ми а҆рхїере́ѡвъ, и҆ про́чїихъ дꙋхо́внагѡ чи́на честныхъ мꙋже́й, въ ца́рствꙋющїй гра́дъ. и҆ бѧ́хꙋ въ пꙋтѝ и҆ въ царѣ́градѣ чꙋдеса̀ мнѡ́гаѧ ѿ пречестна́гѡ тогѡ̀ ѻ҆́браза, недꙋ́ги бо всѧ́кїѧ цѣлѧ́хꙋсѧ, просвѣща́хꙋсѧ слѣпі́и, глꙋсі́и слы́шахꙋ, хожда́хꙋ хромі́и, и҆ бѣ́си прогони́ми быва́хꙋ. Нѣ́кїй же бѣснꙋ́емый человѣ́къ взыва́ше, гл҃ѧ: воспрїимѝ кѡнстантїнопо́ле сла́вꙋ, и҆ весе́лїе твоѐ: и҆ ты̀ порфѷроро́дне че́сть ца́рства твоегѡ̀. Та́кѡ взыва́ѧ человѣ́къ то́й, и҆сцѣлѣ̀ ѿ бѣснова́нїѧ. ѹ҆ста́висѧ же пра́зднованїе пренесе́нїѧ нерꙋкотворе́ннагѡ ѻ҆́браза хрⷭ҇то́ва мѣ́сѧца а҆ѵгꙋста въ ѕ҃і де́нь, въ ѻ҆́ньже прїѧ̀ є҆го̀ внꙋ́трь себѐ ца́рствꙋющїй гра́дъ съ ве́лїею че́стїю и҆ торжество́мъ, и҆ въ цр҃квѣ прест҃ы́ѧ бцⷣы, фа́ре нарица́емой, положѝ, въ защище́нїе гра́дꙋ, въ сла́вꙋ же хрⷭ҇та̀ бг҃а на́шегѡ, со ѻ҆ц҃е́мъ и҆ ст҃ы́мъ дх҃омъ сла́вимагѡ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

І҆кѡ́на спа́съ нерꙋкотворе́нный, сі́мѡнъ ѹ҆шако́въ, вѣ́къ з҃і.

Тропа́рь, гла́съ в҃:

Пречⷭ҇томꙋ твоемꙋ̀ ѻ҆́бразꙋ покланѧ́емсѧ, бл҃гі́й, просѧ́ще проще́нїѧ прегрѣше́нїй на́шихъ, хрⷭ҇тѐ бж҃е: во́лею бо благоволи́лъ є҆сѝ пло́тїю взы́ти на крⷭ҇тъ, да и҆зба́виши ꙗ҆̀же созда́лъ є҆сѝ, ѿ рабо́ты вра́жїѧ. тѣ́мже благода́рственнѡ вопїе́мъ тѝ: ра́дости и҆спо́лнилъ є҆сѝ всѧ̑, сп҃се на́шъ, прише́дый спастѝ мі́ръ.

Конда́къ, гла́съ в҃:

Неизрече́ннагѡ и҆ бжⷭ҇твеннагѡ твоегѡ̀ къ человѣ́кѡмъ смотре́нїѧ неѡпи́санное сло́во ѻ҆́ч҃ее, и҆ ѻ҆́бразъ непи́санный, и҆ бг҃опи́санный побѣди́теленъ, вѣ́дꙋще нело́жнагѡ твоегѡ̀ воплоще́нїѧ, почита́емъ того̀ лобыза́юще.

---

Бы́сть пренесе́нїе нерꙋкотворе́ннагѡ ѻ҆́браза хрⷭ҇то́ва и҆з̾ є҆де́са въ ца́рьградъ, въ лѣ́то бытїѧ̀ мі́ра [по свидѣ́телствꙋ царьгра́дскагѡ хроногра́фа, геѡ́ргїа ке́дича] ҂ѕун҃в. ко́емꙋ лѣ́тꙋ схо́дно є҆́сть воплоще́нїѧ бж҃їѧ лѣ́то цм҃д.

Сло́во прпⷣбнагѡ ѻ҆ц҃а̀ на́шегѡ
і҆ѡа́нна дамаскина̀ ѡ҆ поклоне́нїи і҆кѡ́намъ ст҃ы́мъ.

[…] […] […]