Кни́га житі́й ст҃ы́хъ/І҆аннꙋа́рїй/л҃
←І҆аннꙋа́рїа к҃ѳ | Житїѧ̑ ст҃ы́хъ (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є) Творе́нїе Мцⷭ҇а і҆аннꙋа́рїа въ л҃ де́нь |
І҆аннꙋа́рїа л҃а→ |
Мцⷭ҇а і҆аннꙋа́рїа въ л҃ де́нь,
па́мѧть ст҃а́го сщ҃енномч҃нка і҆пполѵ́та въ ри́мѣ
пострада́вшагѡ, и҆ и҆̀же съ ни́мъ, кенсори́на, и҆ саві́на, и҆ хрѷсі́и дѣви́цы, и҆ про́чихъ два́десѧти мꙋ́ченикѡвъ.
[edit]па́мѧть ст҃а́го сщ҃енномч҃нка і҆пполѵ́та въ ри́мѣ
пострада́вшагѡ, и҆ и҆̀же съ ни́мъ, кенсори́на, и҆ саві́на, и҆ хрѷсі́и дѣви́цы, и҆ про́чихъ два́десѧти мꙋ́ченикѡвъ.
Сі́и бѧ́хꙋ в̾ ца́рство клаѵді́ево
и҆з̾
про́лога. , и҆ге́мѡнꙋ сꙋ́щꙋ вїка́рїю и҆́менемъ, и҆ ѹ҆лпі́ю ри́млѧнинꙋ. бѧ́ше же кенсори́нъ пе́рвый совѣ́тникъ въ сѷгкли́тѣ, магі́стръ са́номъ, и҆ ѡ҆бо́лганъ бы́въ, и҆ вопроше́нъ, хрⷭ҇та̀ и҆сповѣ́да, тогѡ̀ ра́ди вве́рженъ бѣ̀ въ темни́цꙋ. мнѡ́гаѧ же чꙋдеса̀ ѿ негѡ̀ си́лою хрⷭ҇то́вою содѣва́хꙋсѧ, ꙗ҆́кѡ и҆ ме́ртвомꙋ воскреше́нꙋ бы́ти: є҆́же ви́дѣвше всѝ та́мѡ прилꙋчи́вшїисѧ во́нни во хрⷭ҇та̀ вѣ́роваша, тѣ́мже и҆ главы̀ и҆̀мъ ѹ҆сѣ́чени бы́ша, число́мъ сꙋ́ще два́десѧть. приведена́ же бы́сть и҆ бл҃же́ннаѧ хрѷсі́а дѣ́ва на и҆стѧза́нїе ꙗ҆́кѡ хрⷭ҇тїа́нынѧ, ю҆́же повѣ́сивше волꙋ́ѧми жи́лами би́ша, и҆ ѻ҆гне́мъ ѡ҆пали́ша ре́бра є҆ѧ̀, и҆ ввоерго́ша въ темни́цꙋ, и҆ па́ки по нѣ́кїихъ и҆зве́дше, ка́менїемъ че́люсти є҆ѧ̀ сокрꙋши́ша, и҆ мла́томъ ѻ҆ловѧ́нымъ би́ша по плеща́мъ, та́же ка́мень навѧза́вше на вы́ю є҆ѧ̀, во глꙋбинꙋ̀ морскꙋ́ю вверго́ша: и҆ та́кѡ ст҃а́ѧ дѣ́ва сконча̀ своѐ за хрⷭ҇та̀ страда́нїе. Бл҃же́нный же саві́нъ мла́томъ тѧ́жкимъ по тѣ́лꙋ бїе́нъ бы́сть, и҆ на дре́вѣ ѡ҆бѣ́шенъ, и҆ свѣща́ми ѡ҆пале́нъ, такѡвы́ѧ мꙋ́ки терпѧ̀ и҆ бг҃ꙋ бл҃года́рствꙋѧ дх҃ъ предадѐ. Сїѧ̀ ѹ҆вѣ́давъ вели́кїй і҆пполѵ́тъ ст҃и́тель въ ри́мѣ ко и҆ге́мѡнꙋ прїи́де, и҆ ѡ҆бличѝ сꙋровство̀ тогѡ̀ и҆ безчеловѣ́чество, кровоѧ́дца є҆гѡ̀ наре́кши, хрⷭ҇та́ же бг҃а и҆ творца̀ всѧ́ческихъ дерзнове́ннѡ и҆сповѣ́да, ѹ҆́бѡ ѿ слꙋ́гъ и҆ге́мѡновыхъ бїе́нъ бы́сть по ѻ҆чеса́мъ, и҆ и҆ны́ѧ на него̀ мꙋ́ки наложи́ша нечести́вїи, на коне́цъ рꙋ́цѣ и҆ но́зѣ є҆мꙋ̀ свѧза́вше въ мо́ре ври́нꙋша: и҆ та́кѡ мꙋче́нїе и҆по́лнивъ црⷭ҇твїю бж҃їю сотвори́сѧ наслѣ́дникъ.
Въ то́йже де́нь,
собо́ръ и҆̀же во ст҃ы́хъ ѻ҆ц҃ъ на́шихъ вселе́нскихъ
вели́кихъ трїе́хъ і҆ера́рхѡвъ и҆ ѹ҆чи́телей, васі́лїа вели́кагѡ, григо́рїа бг҃осло́ва, и҆ і҆ѡа́нна златоꙋ́стагѡ, соста́вленый і҆ѡа́нномъ є҆пⷭ҇кпомъ є҆ѵхаи́тскимъ.
[edit]собо́ръ и҆̀же во ст҃ы́хъ ѻ҆ц҃ъ на́шихъ вселе́нскихъ
вели́кихъ трїе́хъ і҆ера́рхѡвъ и҆ ѹ҆чи́телей, васі́лїа вели́кагѡ, григо́рїа бг҃осло́ва, и҆ і҆ѡа́нна златоꙋ́стагѡ, соста́вленый і҆ѡа́нномъ є҆пⷭ҇кпомъ є҆ѵхаи́тскимъ.
Въ ца́рство бл҃говѣ́рнагѡ и҆ хрⷭ҇толюби́вагѡ царѧ̀ а҆леѯі́а ко́мнина, и҆́же по царѣ̀ нїки́форѣ ватанїо́тѣ держа́вꙋ ца́рскꙋю прїѧ̀, бысть ѡ҆ си́хъ тре́хъ ст҃и́телехъ ра́спрѧ вели́ка въ кѡнстанті́нѣ гра́дѣ междꙋ̀ слове́снѣйшими любомꙋ́дрцы. ѻ҆́вїи бо вы́ше полага́хꙋ вели́каго васі́лїа, высокогл҃ива того̀ нарица́юще, ꙗ҆́кѡ всѣ́хъ превозше́дша сло́вомъ и҆ дѣ́лы, ма́лымъ чи́мъ а҆́гг҃лѡмъ нера́вна, нра́вомъ тве́рда, и҆ неꙋдо́бь проща́юща согрѣшє́нїѧ, и҆ ничто́же земно́е и҆мꙋ́ща: ни́жша же творѧ́хꙋ бжⷭ҇твеннаго і҆ѡа́нна златоꙋ́стаго, ꙗ҆́кѡ проти́внаѧ ѻ҆́номꙋ въ себѣ̀ и҆мѣ́вша, поне́же ѹ҆до́бенъ бѧ́ше къ поми́лованїю, и҆ ско́рѡ къ покаѧ́нїю привлача́ющїй. Дрꙋзі́и же па́ки сего̀ бж҃е́ственнаго златоꙋ́ста возвыша́хꙋ, ꙗ҆́кѡ чл҃вѣколю́бнѣйша сꙋ́ща, и҆ разꙋмѣва́юща є҆стества̀ сла́бость, и҆ ꙗ҆́кѡ въ поꙋче́нїѧхъ сладкорѣ́чива, всѣ́хъ на покаѧ́нїе мно́жествомъ медото́чныхъ слове́съ свои́хъ наставлѧ́юща, и҆ предпочита́хꙋ того̀ па́че васі́лїа вели́каго и҆ григо́рїа бг҃осло́ва. И҆ні́и же григо́рїа бг҃осло́ва держа́хꙋсѧ, сказꙋ́юще, ꙗ҆́кѡ то́й добровѣща́нїемъ, и҆скꙋ́снымъ же и҆з̾ѧсне́нїемъ слове́съ, и҆ рече́нїй сла́достїю всѣ́хъ въ є҆́ллинскомъ наказа́нїи бы́вшихъ пресла́вныхъ, и҆ въ настоѧ́щемъ вре́мени сꙋ́щихъ превзы́де. та́кѡ ѹ҆́бѡ сі́и ст҃а́го григо́рїа возвыша́хꙋ, и҆ні́и же того̀ понижа́хꙋ. и҆ ѿ сегѡ̀ бы́сть раздѣле́нїе мнѡ́гимъ, и҆ нарица́хꙋсѧ ѻ҆́вїи і҆ѡа́ннѧнами, дрꙋзі́и же васїлїа́нами, а҆ и҆ні́и григорїа́нами, и҆ препира́хꙋсѧ ѡ҆ сих́ъ и҆мена́хъ мꙋ́жи въ словесѣ́хъ и҆ любомꙋ́дрїи и҆скꙋ́снїи. Семꙋ̀ та́кѡ быва́ющꙋ, по нѣ́коемъ вре́мени ꙗ҆ви́шасѧ вели́цїи сі́и ст҃і́и, пе́рвѣе по є҆ди́номꙋ кі́йждо ѻ҆со́бь, та́же всѝ трїѐ кꙋ́пнѡ ꙗ҆́вѣ а҆ не во снѣ̀ і҆ѡа́ннꙋ є҆пⷭ҇кпꙋ є҆ѵхаи́тскагѡ гра́да, ѕѣлѡ̀ слове́снѣйшемꙋ мꙋ́жꙋ и҆ наказа́нїю є҆́ллинскомꙋ дово́лнѡ и҆з̾ꙋче́нꙋ, [ꙗ҆́коже и҆ пи̑саннаѧ ѿ негѡ̀ показꙋ́ютъ] на ве́рхъ же добродѣ́тели дости́гнꙋвшемꙋ, и҆ є҆ди́ными ѹ҆сты̀ реко́ша є҆мꙋ̀: Мы̀ є҆ди́но є҆смы̀, ꙗ҆́коже ви́диши, ѹ҆ бг҃а, и҆ ничто́же въ на́съ є҆́сть сопроти́вно, и҆лѝ ра́спрю и҆мꙋ́щее, но во времена̀ своѧ̀ ѻ҆со́бь кі́йждо на́съ бжⷭ҇твеннымъ подвиза́еми дх҃омъ, ꙗ҆̀же на спасе́нїе человѣ́кѡмъ ѹ҆чи́телства списа́хомъ, и҆ и҆̀мже та́йнѡ наꙋчи́хомсѧ, та̑ ꙗ҆́вѣ преда́хомъ, и҆ пе́рвый ѹ҆́бѡ в̾ на́съ нѣ́сть, нижѐ вторы́й, но а҆́ще є҆ди́наго рече́ши, дрꙋгі́ѧ ѻ҆́ба послѣ́дꙋютъ. тѣ́мже воста́въ, повелѝ раздо́ръ и҆мꙋ́щымъ ѡ҆ на́съ не раздѣлѧ́тисѧ. и҆́бо ꙗ҆́коже живы̑мъ на́мъ бѣ̀, си́це и҆ по преставле́нїи є҆́сть тща́нїе, є҆́же въ ми́ръ и҆ є҆диномы́слїе приводи́ти концы̀ вселе́нныѧ. къ томꙋ̀ ѹ҆жѐ въ є҆ди́нъ де́нь совокꙋпѝ на́съ, и҆ ꙗ҆́коже тебѣ̀ лѣ́по є҆́сть, пра̑здничнаѧ на́мъ соста́ви, и҆ прѡ́чымъ преда́ждь, ꙗ҆́кѡ мы̀ є҆ди́но є҆смы̀ ѹ҆ бг҃а. мы́ же соверша́ющымъ на́шꙋ па́мѧть поспѣ́шницы бꙋ́демъ на спасе́нїе: ѹ҆пова́емъ бо и҆ мы̀ нѣ́что и҆мѣ́ти ѹ҆ бг҃а. сїѧ̑ ре́кше є҆пⷭ҇кпꙋ, восхожда́хꙋ къ нб҃сѝ свѣ́томъ неизрече́ннымъ ѡ҆сїѧва́еми, и҆ по и҆́мени призыва́хꙋ дрꙋ́гъ дрꙋ́га. Прпⷣбный же і҆ѡа́ннъ є҆пⷭ҇кпъ а҆́бїе потща́вшисѧ сотворѝ ми́ръ междꙋ̀ и҆мꙋ́щими раздо́ръ, ꙗ҆́кѡ вели́кїй въ добродѣ́телехъ мꙋ́жъ, и҆ въ премꙋ́дрости пресла́вный, ѹ҆ста́ви ѹ҆́бѡ се́й тре́хъ ст҃и́телей пра́здникъ, ꙗ҆́коже є҆мꙋ̀ повелѣ́ша ст҃і́и, и҆ предадѐ цр҃квамъ пра́здновати бл҃гоче́стнѡ. Смотри́ же мꙋ́жа сегѡ̀ ра́зꙋмъ: поне́же ѡ҆брѣ́те і҆аннꙋа́рїа мѣ́сѧца и҆мꙋ́ща па́мѧть тре́хъ си́хъ ст҃и́телей, въ пе́рвый де́нь вели́кагѡ Васі́лїа, въ два́десѧть же пѧ́тый бж҃е́ственнагѡ григо́рїа, а҆ въ два́десѧть седмы́й сщ҃е́ннагѡ златоꙋ́ста: совокꙋпѝ ѹ҆́бѡ и҆̀хъ въ тридесѧ́тый сегѡ́же мѣ́сѧца, канѡ́нами и҆ тропарѧ́ми и҆ похвала́ми вѣнча́въ и҆́хъ пра́зднество, ꙗ҆́коже подоба́ше. Потре́бно же ѡ҆ ни́хъ рещѝ и҆ сїѐ: ꙗ҆́кѡ ст҃ы́й васі́лїй вели́кїй въ словесѣ́хъ ѹ҆че́нїѧ не то́кмѡ бы́вшихъ ѹ҆чи́телей в̾ лѣ́та є҆гѡ̀, но и҆ дре́внихъ превзы́де: все́ бо про́йде наказа́нїе въ коне́цъ, не то́чїю же ѻ҆́нꙋ ꙗ҆́же въ словесѣ́хъ фїлосо́фїю до́брѣ ѹ҆вѣ́да, но и҆ тꙋ̀ ꙗ҆́же въ дѣ́ланїи стѧжа̀, жи́телствꙋѧ добродѣ́телнѡ въ нестѧжа́нїи и҆ цѣломꙋ́дрїи, и҆ восходѧ̀ ѹ҆мо́мъ къ бг҃овидѣ́нїю, на престо́лъ а҆хїере́йскїй возведе́нъ бы́сть три́десѧть се́дмь лѣ́тъ ѿ рожде́нїѧ и҆мѣ́вый, и҆ чрез̾ ѻ҆́смь лѣ́тъ цр҃ко́внымъ бы́сть предста́телемъ. Сщ҃е́нный же григо́рїй бг҃осло́въ тако́въ бѣ̀, ꙗ҆́кѡ а҆́ще подоба́ло бы бы́ти въ человѣ́цѣхъ ѻ҆́бразꙋ ко́емꙋ и҆ столпꙋ̀, по ча́сти ѿ всѣ́хъ сло́женꙋ добродѣ́телей, то̀ сице́въ бѣ̀ вели́кїй григо́рїй, житїѧ̀ свѣ́тлостїю преимени́тъ: на толи́кїй же ве́рхъ бг҃осло́вїи взы́де, ꙗ҆́кѡ всѣ́мъ ѡ҆долѣва́ємымъ бы́ти ѿ премꙋ́дрости є҆гѡ̀, є҆ли́кѡ въ словесѣ́хъ ѹ҆че́нїѧ, и҆ є҆ли́кѡ въ догма́тѣхъ вѣ́ры: тѣ́мже и҆ бг҃осло́вомъ ѿ всѣ́хъ и҆менова́нъ бы́сть. ст҃и́телствова же въ кѡнстантїнопо́ли правовѣ́рїе ѹ҆твержда́ѧ двана́десѧть лѣ́тъ, на патрїа́ршемъ же престо́лѣ ма́ло нѣ́что [ꙗ҆́коже въ житїѝ є҆гѡ̀ пи́шетсѧ] пожи́въ, ѡ҆ста́ви престо́лъ ста́рости ра́ди, и҆ вы́ше ѻ҆сми́десѧти лѣ́тъ бы́въ ѿи́де ѿ здѣ́шнихъ. ѡ҆ бж҃е́ственномъ же златоꙋ́стѣ пра́ведно є҆́сть рещѝ, ꙗ҆́кѡ всѣ́хъ є҆́ллинскихъ мꙋдрецє́въ превзы́де, ра́зꙋмомъ, сло́вомъ, и҆ ѹ҆глажде́нїемъ рѣ́чи, и҆ бж҃е́ственное писа́нїе и҆з̾ѧснѝ, и҆ и҆столкова̀ прекра́снѡ: та́коже и҆ въ добродѣ́тели дѣѧ́нїемъ и҆ бг҃овидѣ́нїемъ всѣ́хъ превзы́де попремно́гꙋ. ми́лостыни же и҆ любвѐ бы́сть и҆сто́чникъ, ре́вности и҆спо́лненъ и҆ ѹ҆чи́телства. поживе́ же всѣ́хъ лѣ́тъ шестдесѧ́тъ и҆ трѝ: па́стыремъ бы́сть хрⷭ҇то́вѣй цр҃кви ше́сть лѣ́тъ. Трїе́хъ си́хъ і҆ера́рхѡвъ вели́кихъ моли́твами хрⷭ҇то́съ бг҃ъ на́шъ є҆реті́ческаѧ воста́нїѧ да низло́житъ, на́съ же въ є҆диномы́слїи и҆ ми́рномъ ѹ҆строе́нїи сохрани́тъ, и҆ нбⷭ҇нагѡ своегѡ̀ црⷭ҇твїѧ да сподо́битъ, ꙗ҆́кѡ бл҃гослове́нъ сы́й во вѣ́ки, а҆ми́нь.
![](http://upload.wikimedia.org/wikipedia/commons/thumb/8/82/MHS_ojcowie_ks_Bazyli_Wlk_Jan_Chryzostom_Grzeg_Wlk_XVII_Lipie_p.jpg/150px-MHS_ojcowie_ks_Bazyli_Wlk_Jan_Chryzostom_Grzeg_Wlk_XVII_Lipie_p.jpg)
Ꙗ҆́кѡ а҆пⷭ҇лѡвъ є҆динонра́внїи, и҆ вселе́нныѧ ѹ҆чи́телїе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю ми́лость.
Свѧщє́нныѧ и҆ бг҃овѣща̑нныѧ проповѣ́д_ ники, ве́рхъ ѹ҆чи́телей, гдⷭ҇и, прїѧ́лъ є҆сѝ въ наслажде́нїе благи́хъ твои́хъ и҆ ѹ҆покое́нїе: трꙋды́ бо ѻ҆́нѣхъ и҆ сме́рть прїѧ́лъ є҆сѝ па́че всѧ́кагѡ всепло́дїѧ, є҆ди́не прославлѧ́ѧй ст҃ы̑ѧ твоѧ̑.
Въ то́йже де́нь па́мѧть ст҃а́гѡ мч҃нка ѳео́фїла, и҆́же въ ца́рство кѡнстанті́на и҆ і҆ри́ны бѣ̀ воево́да хрⷭ҇тїа́нскимъ полкѡ́мъ: ѿ а҆га́рѧнъ же на бра́ни ꙗ҆́тый, и҆ къ скве́рнѣй и҆́хъ вѣ́рѣ принꙋжда́емый, четы́ре лѣ́та стражда́ше въ темни́цѣ, во вре́мѧ же бг҃оме́рзскагѡ и҆́хъ пра́здника и҆зведе́нъ къ приноше́нїю і҆́дѡлѡмъ же́ртвы, поне́же не повинꙋ́сѧ, но хрⷭ҇та̀ и҆́стиннаго прославлѧ́ше бг҃а, тогѡ̀ ра́ди ѿсѣко́ша є҆мꙋ̀ главꙋ̀.
И҆ преподо́бнагѡ ѻ҆ц҃а̀ зино́на, прїе́мшагѡ ѹ҆че́нїе ѿ ст҃а́гѡ васі́лїа вели́кагѡ, въ горѣ́ же а҆нтїо́ховой въ нѣ́коемъ гро́бищи четы́редесѧть лѣ́тъ въ по́стничествѣ бг҃оꙋго́днѡ препроводи́вшагѡ.
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse