Кинлэн бен уз пот улэмез
Такем шулдыр шаерын,
Киров эшлэн верамез
Ваньмыз берга йырвизьмын.
Кытысь шедьтод табере,
Горд кунысь шимес сэрегез —
Ваньмыз пужъятэ улонэз,
Ваньмыз сутэ тушмонэз,
Сю куатьтон турлы калыкъёс
Гурлась палэп муш кадь уж дурын.
Соослы вормонтэм секытъёс
Ӧвӧл нокытын, нокытын.
Йӧ гурезь пыр пото кӧбертэк,
Стальёсыз кырӟато асьмея.
Ин пыртӥ лобало кышкатэк,
Котькытын уж шудэ, серекъя…
Уг чида тушмон, ӝуалтэ,
Пиньзэ сыске, гизьыртэ
Улон вапумез кекамысь.
Синтэм-пельтэм ӟырдыт ужаку,
Кин ке чапкиз кадь пелям.
Верасько но сюлмы уг оскы:
Киров эшез вииллям.
Борддорысь суредзэ учкисько,
Учконъям чебер серектэ…
Нош газет чуръёсыз лыдӟисько…
Сюлэмез ӝожомон кекатэ.
Сокем дано, сокем дуно,
Сокем кужмо,
Паськыт гадьем, пельпумъем.
Тюрьмаез,
капитал дуретэз
Тӥяса пыр потэм
Пересь большевик
Сергей Миронович быриз-а?
Э-эх, кыӵе секыт,
Куалекъя ук суйпыд вожпотэмен.
Сисьмем суйпыдо,
Зынмем ымныро
сьӧськабен
Вождь… Киров эш быдтэмын.
Ум, ум вунэтэ
Мироновичез,
Нимзэ но, ужзэ но чебер
утёмы.
Урмыса ашкынэм
вирюисез
Ужлэн кужыменыз
Юдыса, пезьдэт сётомы.
