Колхозонь эряф/1940/07/Кемгафтувоста фкя

←Волянкса

Колхозонь эряф (1940), № 7 Июль edited by Игнатьев Г. А., Дурнов Ф. С. Кемгафтувоста фкя

Валпрякс→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 7 Июль 1940. — с. 73—77

 

 

КЕМГАФТУВОСТА   ФКЯ

Фкя велеса эрясь горлопан атя. Сонь кемгафтува цёрацоль. Фкя цёрац кяжи, а омбоцесь сядонга кяжи. Синь салсесть шинек-венек ломанень парши, лама ломань пикссесть и лама шавондсть скрось. Кодамовок суд тейст ашесть тие, пельсь эздост сембе велесь. Атясь пяк козяль, и тейнза знакомайхтельхть ся маласта сембе начальникне. Синь вельдест сон сембе цёранзон итцезень солдатонь службада.

Атять кемгафтувоце цёрац Петясь пяк ёнюволь и сятяволь. Вот састь сонь кизонза молемс службав. Аляц тейнза корхтай:

— Тят канзеде, цёрай, ярмаконе тонь идемксотка сатыхть.

А Петясь тейнза и мярьги:

— Аляй, кда монь примасамазь солдатокс, то мон молян служама. Ату визькс веле кувалма ётамс. Хотя кивок мезевок аф корхтай, а ванондыхть лангозон ширем сельмот. Лучи ярмакнень тяйть юмафне. Мон молян служама, улян честнай солдатокс, и кивок монь аф апрякасамань.

— Шава пря... честнайкс ёрат арамда. Аф ули тонь лацот, — конянц алга ванць атясь цёранц лангс.

Вов Петянь тердезь комиссияс и примазь солдатокс. Ушедсть сонь прважамонза. А аляц, кода зверь, врьгятсь сонь лангозонза, фатязе кргада и ёразе пондамс. Но патянза сонь нельгозь. Аляц ушедсь Петять сюдомонза:

— Архт, аеркс пона! Тов пильге сурхне, сей кочкярятне! Кда саят меки кудозон, то пакшкянь-пакшкя сязенте.

Но тядянцты Петясь пяк ужялель. Зверь-атять эзда салаване сон макссь Петянь мархта гостинецт и ярмаконя, и сон тусь служама.

Петять кельгозь ротаса сембе солдаттне. Салаване атять эзда тядяц Петяти кучсесь ярмаконят и сёрманят. Но мзярда содазе тянь атясь, сон бабать пяк пиксозе и гразязе, што кда оду тяфта тии, то шавсы куломс. Вов тяни Петясь кудста кулят ашезь получандакшне, и сон ушедсь канзедема: думандась, што кудса оцю несчастия. Тяфта сон служась кемоньшка киза. А мяльстонза кудсь афи лисендсь, сон лажадсь патянзонды и сембода пяк тядянцты.

Петясь кармась анцема пря куду, и сонь нолдазь отпускс Фкя ков.

Вов иляденди сась Петясь эсь велезост. Ваны сон — кудснон аньцек вастоц. Синь вакссост эрясь Петять алянц брадоц. Сон сувась патянц пяли и эняльгодсь, штоба нолдалезь сонь удома. Патяц сонь ломанць ульсь добрай. Петять хоть сон ашезе сода, но сякокс нолдазе удома. Бабанцты сон мярьгсь срхкафтомс ярхцама и озафтозе Петять мархтонза ужнама. Лихтсь винанявок, и аф ламода копордасть. Солдатсь ушедсь кизефнема:

— Щеняй, службас ётамстон мон няине, тинь вакссонт ульсть цебярь кутт, мес тяни ашет тяса, — кизефнесь патянц эса Петясь.

— О, цёрай, ся кудть ланга монь аф сай корхтамазевок. Улеза проклятай сон. Тяса эрясь монь оцю брадозе. Сонь ульсть кемгафтува цёранза, и сембе зверькс кяжихтельхть. Сембе велесь авардсь синь эздост. Тяни синь аляснон мархта тусть вири разбойничендама. Киндиге пощада аф макссихть. А вов ёлма цёрац Петясь ульсь пяк ёню и сятяв, кельгольхце сонь сембе велесь. Тяни сон тонь лацот служай. Мон сонь пяк кельголине. Сонь эрь шиня сашендоль пялон. Праважамонзовок якань. А тяни вага аф содаса, кода эряй. Адресонцка аф содаса. Ужяль цёрась... — атясь сяда ламос ашезь корхтав, и тусть сельмоведенза.

— Патяй! Кода ашемайть сода?! Мон племянникцян самай, Петясь!

Синь ашкодсть фкя-фкянь перьф и сельмоведень пачк палсесть. Атясь кандсь четверть вина и ушедсть симондема.

Патянц пяле Петясь гуляндакшнесь недяляшка. Добрай атясь мярьгондсь тейнза ётафтомс пялонза сембе ковть, но Петясь ашезь согласинда. Сон арьсесь молемда роднойнзон варжама. Стак афи молель, но пяк ужялель тядяц.

— Молян тядязень варжама, катк, сталбыть, шавсамазь, вднать монь паваззе тяфтама.

Патяц кильдсь алаша, ускозе Петять вирь краи, азозе, куване молема, и Петясь тусь. Мольсь, мольсь вирьге, ваны — вирь кучкаса ащихть мазы кутт, крыленця лангса озаф бабаня. Петясь содазе тядянц. Петясь кодак ушедсь нежедема куттнень малас, увазевсть пинетне и врьгятсть сонь лангозонза.

— Тядяй! — утькстсь сон.

Бабась комотсь вастстонза и ласьксь цёранц каршес, сонь кандозе бта кати-кодама вий, ашезе маря пильгалдонза модать. Сон ашкодсь Петять кргас, сельмоведенза шудесть кафта шудерьксокс, палсесь цёранц эса: „Петинька!“, „цёраняй!“ валда башка тейнза мезевок ашезь азов. Сувафтозе сонь куду. Озафтозе шрать ваксс, кандсь инголенза мази вина, всякай закускати кармась угощандамонза. Но аф ламос ащезь, бабась аварьгодсь оцю вайгяльса. Петясь таяскодсь и кизефтезе тядянц, мес сон аварди.

— Кода аф авардемс, цёраняй? Сать, кандоть тейне пяк оцю радость, но кемоньксть сяда оцю горя. Курок сай аляце патятнень мархта и керсетядязь пакшкянь-пакшкянь.

Шись кармась шоподема. Вдруг увазевсть пинетне. Вирьса кайгсь разбойникнень морама вайгяльсна. Бабась панчсь фкя цебярь комната, сувафтозе тоза цёранц и пякстазе замокса.

— Тя вага добыча! Тя тейнек питни золоттонга и серебрадонга, — корхтась атясь куду сувамстонза. Мельганза сувасть кемгафтува мази стирь, кефкие цёранза. Стирьхнень кундазь луга лангста, мзярда синь лисендсть городста тоза панчфонь сязендема.

Курок сембе озсесть шра ваксс и ушедсть симома-ярхцама, а стирьхнень кошардозь кштима-морама.

— Радостсь, атя, оцю, а кда тяни улель ётксонк ёлма цераньке, Петясь, месенделеть мархтонза? — кизефтезе бабась атять.

— Эх, дурак баба. Месть кизефнят? Кармалеме колма кофт пировандама, вага месенделень. Тон чайндат — тейне аф ужяль сон? Ужяль. Пине пинеда аф ярхцай. Зря тись, но мезе тият. Тяни, пади, сонцьке шарьхкодсь, да поздна: тоста курок аф нолдасазь.

Бабанясь башка комнатаста нолдазе Петять, и сон лиссь ктшихнень-морайхнень ёткс. Петясь цёрась ульсь пяк мази, и мзярда сонь няезь стирьхне, синь вельф кенярдсть и дивандасть сянди, кода вдруг разбойникнень ёткс эвондась солдат.

Аляц и патянза фкя-фкянь ётазь ашкорясть Петять перьфканза. Стирхне весяласта ушедсть морама. Пирсь, кода мярьгондихть, крьвязсь.

Аляц Петяти мярьгсь кочкамда стама стирь, конац туй мялезонза. И сон кочкась сембода мази стирть.

— Молодецат, — корхтай аляц Петяти, — сельмотне карьхциганонь, муйть конац эряви.

Тяда меле пирсь аделавсь. Сембе цёратне кунцезь кядьта кочкаф стирьснон и тушендсть башка комнатава. А атять мархта бабась радовакшнесть сянди, конашкава синь павазуфт и козят, а сембодонга радостнайхтельхть сяс, мес тяни перьфкаст сембе цёрасна.

Петясь ламос гуляндакшнесь алянц пяле. Но вов сась ся времась, мзярда тейнза эряволь ни тумс меки службас. Петясь азозе тянь алянцты. Тя кулять эзда атясь арась зверькс. Сон фатязе кинжалонц и врьгятсь Петять лангс. Но патянза сонь ашезь нолда. Эста атясь тердезе оцю цёранц эсь комнатазонза и ушедсь мархтонза кати-месть корхнема.

Бабаняти тага прась оцю горя. Сон салаване мольсь кенкш фталу и кулхцондсь.

— Цёрай, — корхтась атясь, — тонь лангозт сембода надиян. Няйсак, сон туй шобдава. Тязк аделамс, начас кеподи скандал, и ушеттама минцьке фкя-фкянь печксема, да тядяцевок эводемать эзда кулы. Шобдава тон ластясак алашацень, мархтот сяват вернай Тюльпанть и молят прважамонза. Пачкодят лотка сюроти и матсайть кафцьконь, цёранек-стирнек. Тянь содак аньцек тонць. Варжак, тят гастя.

— Тиф ули! Уш монь кядезе ни аф трнатозеви! — чаказе клокса мяштенц цёрась.

Кенкш фтала бабанясь сокодсь эводемать эзда. Инголи сон ашезе сода, месендемс. Тейнза сембе цёранза ульсть ужяльхть. Вдь кона сурцень тят суска, сон маряй. Но Петя цёрац тейнза арась сембодонга ужялькс, и тяни думандась, кода идемс сонь куломать эзда. Сон ушедсь Петять кис срхкафтомонза. Мархтонза макссь лама всякай гостинецт, лама ярмак, а прважамстонза салаване пилезонза тошкась, мезе сон кульсь и карманозонза тонгсь ляцема.

— Спасиба, тядяй, — мярьгсь Петясь, — кда стане, монь солдатонь кядезе ёфси аф трнатозеви.

Петясь стясь шобдава, срхкась, прощандась, озась стиренц мархта виндеркав и тусь. Оцю патяц, прважайсна, мольсь фтала. Петясь стиренц мархта арьсесть, кода эряви тиемс. Мольсть ни синь оцю васта, вот-вот пачкодихть ни лотка сюроти.

Петясь валгсь виндеркаста, нежедсь ластя молить ваксс, венептезе кяденц тейнза и корхтась:

— Но, патяй, спасиба прважамдон. — Сонць ся ёткова таргазе карманцтонза револьверонц и гайнефтсь прважайть конязонза. Алашась вархцодсь шири, стясь тубушком и тусь куд пяли, а шавфть ускозе пильгта стремять эса. Сонь оцю ронгоц то кепсесь вяри, то прашендсь модати, а алашась шятнесь сонь лангозонза и пупорясь. Тюльпанць кавкснезь ардсь инголи и тя мархта пачфнесь куля вирьста эряйхненди бедать колга. Атясь кулезе орта лангса пинеть тревожнай увама вайгяленц и шарьхкодезе, мезе лангса ащи тевсь. Цёранзонды макссь приказ куроконе ластямс алашаснон, и синь вихорькс тусть Петять мельге. Но сон ульсь ни ичкозе и ашезь сатов.

Петясь стиренц мархта пачкодсь ни городу, коса сон служай. Сон лоткафтозе казармать инголи алашать, валгсь виндеркаста. Петясь ульсь аф ламода комляв, эвотьф и тятярдсь. Сонь няезе фельдфебельсь, нежедсь малазонза да кодак керсы сонь кядь лапшса щёка ланга. Петясь тятярдезевсь.

— Мон тонафтте тонь! Кие тейть мярьгсь симондемда? Местеме эцят казармав иредста? Арестовандамс! — ювадсь фельдфебельсь солдаттненди.

— Аш праваце пикссемс солдатть, — корхтась стирсь. — Сон аф виноват.

— Ах, сука, стама-тяфтама, — зярякодсь фельдфебельсь сонь лангозонза и керозе соньге щекати.

Стирсь няйсы, што тевсь кальдяв, эрязста озась виндеркав, вархцодезень вожиятнень, и алашатне тусть резга.

А тя стирсь ульсь полковникть, конань видеса служась Петясь. Стирсь лоткафтозень алашатнень орта лангозост и сувась куду. Крыленцяса радостень сельмоведь мархта васьфтезе сонь тядяц. Аляц кудса ашель. Аф ламос ащезь, сась полковникське. Ваны, орта лангсонза баяронь виндерка. „Кие конакокс сась ширезон?“ — арьсесь эсь пачканза сон. Сувась куду, тяса стирец. Радостти ашель пе. Стирец азондозе тейнза, коза сон повондсь, кода сонь идезе солдат и кода фельдфебельсь синь кафцьконь апряказень и пиксозень. Кяжиясь полковниксь. Сон эстокиге тертьфтезе денщиконц и кучезе тюри фельдфебельть инкса. Афлама минутада меле сон струнакс ащесь полковникть инголе, варжакстсь стирть лангс, и пильгонза трнатозевсть.

— Тон мезенди пиксыть солдатть? Мон тейть макссень права? Аш.

— Виноватан, ваше высокоблагородия.

— А стирезень мезенди пиксыть? — цяткофтсь полковниксь.

— Мон ашине сода. Ваше высо-о-о... Фельдфебельть ашезь шарфтов кялец, и ащесь келес куркт.

— А, значит, аф содафнень лангса можна наругамс? — нинге сяда пяк кяжиясь полковниксь.

Фельдфебельть сон арестовандазе и максозе судс. Сяда меле ширезонза тертьфтсь Петять. Тона ёфси эводсь. „Но тяни полковниксь, наверна, куломс шавсамань“, — арьсесь молемстонза Петясь. Сувась полковникть шири.

— Честь имею явиться, ваше высоко...

— Вольна, вольна, Петя, — отвечась весяласта полковниксь. Петясь талмаськодсь, вдь сон учсесь аф тянь.

Марусясь, стирсь, ласьксь ваксозонза, каяфтозе лангстонза шинеленц, и озафтозь сонь шрать ваксс. Шра лангса марафоль всякай пища, всякай вина. Тяса ашель аньцек нармонь лофца.

— Петя, минь эсь ёткованк корхтаме ни и арьсеме максомс тейть рьвакс Марусять. Кодама тонь мяльце? Петясь ашезе маря алдонза диванть, ашезь веронда эсь пилензонды.

— Ваше высокоблагородия, вдь мон шобда ломанян, а тинь Марусясь...

— Лиянди киндиге аф максса стирезень, сон ули тонь, геройть, сонь идиенц.

— Петя, тейне, тондедот питни, тондедот кельгови светса кивок аш, саза симомон хоть сонць оцязорсь, мон аф молян.

Тяфта тевсь ладявсь, и Петять мархта Марусясь венцяндасть.

Сёрмадозе Чекашкин Я. К.
Порапа велеса, Ковылкинань р-ца.

---

---

Редколлегиясь:   Ф.  Дурнов,   Г.   Игнатьев,    (ответредакторсь)
А.  Карасев,  С.  Потапкин,  А.  Чекашкин.