Капитан ныл (Пушкин)/6
| ← V люкетэз. Яратон | Капитан ныл VI люкетэз. Пугачёвщина Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
VII люкетэз. Крепостез басьтон → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 40—49. |
Пугачёвщина
Кылске али тӥ, пинал егитъёс,
Мар мадём ми, пурысь пересьёс.
Кырӟан
Ас синмыным адӟем паймоно ужъёсты гожъяны кутскемлэсь азьло, кӧня ке кылын, 1773 арлэн пумаз Оренбургской губернялэн уж тусъёсыз сярысь верано луоз.
Та паськыт но узырлыко губерняын трос пӧртэм векчи выжы, ӝыныё дикарьёс кадесь, калыкъёс уло вал. Российской государьлэн ки улаз соос кемалась ик ӧвӧл шедемын. Соослэн туж ӵем дыръя бугыръяськыса улэмзы, гражданской улонлы но законъёслы дышымтэзы, ужъёссы шоры капчи визьмын учкемзы но лек сямлыксы, соосты кылскытыны но ки улын возьыны понна правительство ласянь вис карытэк эскерыса воземез кулэ каре. Умойгес интыосын крепостьёс пуктылэмын вал. Ӵем дыръя со крепостьёсын улыны кемалась дырысен Яик шур кузя улӥсь казакъёсты ысъяллязы. Нош яицкой казакъёс, та улоскын порядокез но бугыръяськытэк улонэз возьмано луо ке но вал, ог дырысен соос асьсэос но правительстволы кышкытэсь подданойёс луизы. 1772 арын соослэн главной городазы бугыръяськон ӝутскиз. Со бугыръяськон генерал-майорлэн, Траубенберглэн, казакъёсыз кылскытыны понна чурыт мераос кутэмезлы чидамтэенызы ӝутскизы. Соку казакъёс Траубенбергез виизы но со интые асьсэлэсь управленизэс пуктӥзы. Та бунт картечъёсын но мукет чурыт наказаниосын зӥбломытэмын вал.
Вылӥ верам ужъёс мынам Белогорской крепосте вуэмелэсь кӧня ке гинэ азьло вылӥллям. Котырак чус кариськемын кадь вал ини, оло сыӵе адске гинэ вал. Мятежникъёслэн раскаяться каремзылы начальство туж капчиен оскиз, нош соос, ас лексэс ватыса, бугыръяськон ӝутыны умой дырез витьыса уло вылэм.
Табере аслэсьтым мадёнме азьланьтӥсько.
Одӥг пол ӝыт (та уж 1773 арын, октябрьлэн нырысь нуналъёсаз вал) мон гуртам огнам пукисько но, сӥзьыл тӧллэсь вузэмзэ кылзӥськыса, бызись пилемъёс но толэзь шоры укноетӥм учкисько. Комендант дорысь ыстэм адями монэ ӧтьыны лыктӥз. Мон соку ик комендант доры кошки. Комендант дорын Швабрин, Иван Игнатьич но казакъёслэн урядниксы вал. Комнатаын Василиса Егоровна но Марья Ивановна но ӧй вал. Аслэсьтыз мур малпаськись туссэ возьматыса, комендант монэным ӟечбур кариз. Со ӧсэз куриказ, милемыз, ӧс дорын сылӥсь урядникез сяна, ваньмес пукон вылэ пуктӥз но, кисыысьтыз бумагазэ поттыса, милемлы тазьы шуиз: «Важной выль иворъёс вань, господа офицеръёс! Кылске, мар гожтэ генерал». Собере со очкизэ син вылаз понӥз но лыдӟиз:
«Белогорской крепостьлэн господин комендантэзлы
Миронов капитанлы.
Шарае поттонтэм вылысь.
Таин тӥледлы ивортӥсько: караул улысь пегӟем донской казак но раскольник, Емельян Пугачёв, ассэ ачиз кулэм императорлэн Пётр III-лэн нимыныз нимаменыз вераны луонтэм дерзость лэсьтыса, котыраз злодейской шайка люкаса, яицкой гуртъёсын калыкез бугыръяськыны ӝутӥз но, олокӧня крепостьёсты басьтӥз. Котькытын ик грабить карылэ но калыкъёсты виылэ. Соин ик, та гожтэтме басьтэм бере, тон, господин капитан, чик ӝегатскытэк кулэ мераос кут, сыӵе злодейлы но самозванецлы пезьдэт сёт, нош со ас кужымзэ тыныд оскыса сётэм крепость вылэ куштӥз ке, тон сое луоно ке, быдты».
— Кулэ мераос кут! — шуиз комендант, очкизэ басьтыса но бумагазэ куасалляса. — Вераны со капчи. Злодей кужмо, видно, нош асьмелэн ваньмыз сю куамын мурт гинэ. Со лыдэ мон казакъёсты уг пыртӥськы, соос вылэ оскон ичи, тонэ кур каронтэм вылысь верасько, Максимыч (урядник мынектӥз). Мар карод на, господа офицеръёс! Сак улэ, караулъёс но уйин дозоръёс пуктылэ. Крепость выламы вуизы ке, ӟезьыосты пытсалэ но салдатъёсты поттэ. Тон, Максимыч, ас казакъёстэ зол эскерыса ул. Пушкаез умой эскере но сузялэ. Ваньзэ та верамъёсме шарае поттытэк возе, дырызлэсь азьло та сярысь нокин но медаз тоды.
Та косонъёссэ люкылыса, Иван Кузьмич милемыз гуртамы лэзиз. Кылем ужъёс сярысь вераськыса, ми Швабринэн ӵош потӥм. «Кызьы тон малпаськод — маин та уж быроз?» — юай мон солэсь. «Инмар мед тодоз, — шуэ со, — адӟом али. Ужлэсь уродзэ мон номре но уг адӟиськы на. Нош марысь мар ке…» Соку со малпаськыны кутскиз но француз кырӟан гуръёсын шуланы ӧдъяз.
Та вераськонъёсмы туж лушкем ке но ортчизы, Пугачёвлэн матэ вуэмез сярысь ивор быдэс крепосте вӧлскиз. Иван Кузьмич аслэсьтыз кышнозэ туж ке но яратэ вал, служба ласянь сыӵе лушкем ужъёсты ноку но солы ӧй шараясал. Генераллэсь бумагазэ басьтэм бере, со туж визьмын Василиса Егоровназэ коркасьтыз келяны быгатӥз. Отец Герасим, пе, мар ке туж интересной иворъёс Оренбургысь басьтыса, соосты нокинлы вератэк лушкем возе шуыса, вераз со кышноезлы. Василиса Егоровна соку ик попадья доры куное мыныны мылкыд кариз. Иван Кузьмичлэн ӵектэмезъя, Маша мӧзмыса медаз улы шуыса, сое но бӧрсяз басьтӥз.
Огназ кылем бераз, Иван Кузьмич соку ик милемыз ӧтьыны ыстӥз но, вераськеммес нокин но медаз тоды шуыса, Палашкаез чуланэ пытсаз.
Номыре но выль иворъёсты попадьялэсь кылытэк Василиса Егоровна гуртаз берытскиз но, со ветлон сьӧркытӥ Иван Кузьмичлэсь кенеш люкамзэ но, Палашкаез воземзэ тодэм. Кузпалызлэсь пӧямзэ шӧдыса, солэсь со допрос лэсьтыны кутскиз. Нош Иван Кузьмич сыӵе ужлы дасяськемын вылэм. Со одӥг но ӧз ыштӥськы но аслаз котьмае тодыны яратӥсь кышноезлы тазьы вераз: «Кылскы али тон, матушка, асьмелэн кышноосмы гуръёссэс куроен эстыны кутскиллям. Сыӵе ужъёс бордысь кышкытъёс медам потэ шуыса, гуръёссэс куроен эстонтэм вылысь, улваен но кӧс пуэн мед эстозы шуыса чурыт приказ сётӥ». — «Нош малы тыныд Палашкаез чуланэ пытсаны кулэ луиз? — юа комендантша. — Мар понна куанер ныл ми бертытозь чуланын пукиз?» Сыӵе юанъёслы Иван Кузьмич дасяськымтэ вал. Со мар вераны ик ёрмиз но бык-мак карыса оломар супыльтӥз. Кузпалызлэсь пӧялляськыса вераськемзэ Василиса Егоровна шӧдӥз но, солэсь шонерзэ нокызьы но тодыны уд быгаты шуыса, сылалтэм огречъёс сярысь вераськыны кутскиз. Акулина Памфиловна туж ӟеч сылалтыны, пе, быгатэ. Василиса Егоровна уйбыт умме ӧз усьы. Мар гинэ солы верантэм ужъёс кузпалызлэн йыраз пыремын со сярысь нокызьы но тодэмез уг лу.
Ӵуказеяз обедняысь бертыкуз, со Иван Игнатьичез адӟиз. Иван Игнатьич соку пушкаысь отчы нылпиосын тырем ӟустыриосты, кӧльыосты, шелепъёсты но мукет жуг-жагъёсты сузя вал. «Мар таӵе ожмаськыны дасясько? — малпа комендантша, — киргизъёслэсь асьме вылэ вуэмзэс витё, шат? Нош, неужто Иван Кузьмич сыӵе пустякез мынэсьтым ватыса возьысал?» Ас кышномурт мылкыдзэ бугыръясь мае ке одно тодыны вылысь со Иван Игнатьичлы вазиз.
Иван Игнатьич медаз шӧдскы шуыса, Василиса Егоровна нырысь ик солы хозяйство ужъёс сярысь кӧня ке кылъёс вераз. Озьы со, ӟеч судья сямен, кыдёкысен котыръяськыса, ас ужез котыре кутскиз. Собере, кӧня ке минут вераськытэк улыса, туж мур лулскиз но, йырыныз шонаса, тазьы шуиз: «Господи, боже мой! Кыӵе выль иворъёс! Мар гинэ луоз ини?»
— Э-э, матушка! — Иван Игнатьич пумитаз вазе. — Инмар уз сёт; салдатъёсмы асьмелэн тырмымон, порохмы трос, пушкаез мон сузяй ини. Оло Пугачёвлы пезьдэт сётыны быгатом. Инмар ке ӧз сёт, парсь уз си!
— Нош кыӵе мар адями со Пугачёв? — юаз комендантша.
Соку Иван Игнатьич аслэсьтыз мултэс вераськемзэ шӧдӥз но кылзэ пинь сьӧраз куртчиз. Нош бер вал ни. Василиса Егоровна ваньзэ та ужъёсты сое вератӥз, тодэм ужъёс сярысь нокинлы уг вера шуыса, кыл сётӥз.
Василиса Егоровна сётэм кылзэ быдэстӥз: попадьялы сяна нокинлы но ӧз вера. Попадьялы но ӧй верасал дыр но, солэн искалэз кырын ветлэ вал, тушмонъёслэн ки улазы медаз шедьы шуыса верано луиз.
Ӝоген ваньмыз вераськонъёс Пугачёв сярысь гинэ мыныны кутскизы. Кылпумъёс пӧртэмесь вал. Комендант урядникез, ӟечгес эскерыны косыса, котырысь гуртъёстӥ но крепостьёстӥ ветлыны ыстӥз. Кык нунал ӵоже ветлэм бераз, урядник берытскиз но, степын, крепость дорысен ог куатьтон иськемын, туж трос тылъёсты адӟи но, башкиръёслэн вераськемзыя, отысен вераны луонтэм бадӟым кужым лыктэ шуыса, со вераз. Солэсь трос номре но со ивортыны ӧз быгаты, малы ке шуоно, отӥяз мыныны со ачиз но кышкам.
Крепостьын казакъёс пӧлын но мар ке бугырскем тус шӧдскыны кутскиз: соос, ульчаосын люкаськыса, куспазы мар ке лушкем верасько но, драгунэз либо гарнизонной салдатэз адӟыса, кошкыло. Соосты эскерыны лазутчикъёс ыстэмын вал. Православной вӧсе пыртэм Юлай нимо казак комендантлы важной ивор вераз. Солэн верамезъя, урядник комендантэз пӧяса, пе, верам. Эскеръяськыса ветлэмысьтыз бертэм бераз, та кескич казак ас эшъёсызлы тазьы, пе, ялӥз: мон, пе, бунтовщикъёс дорын вал, соослэн самой кивалтӥсьсы доры пырай, кизэ но кутылӥ, туж кема соин вераськи. Комендант урядникез соку ик караул улэ пытсаз но, Юлаез со интые уряднике пуктӥз. Та выль иворез казакъёс вожпотонэн пумитазы. Иван Игнатьич, комендантлэсь косэмъёссэ быдэстӥсь мурт, казакъёслэсь куспазы вераськемзэс ас пельыныз кылэм: «Шедёз али тыныд, гарнизонной комаклы!» — шуыса, пе, верасько казакъёс. Комендант аслаз арестантэзлэсь со нуналэ ик допрос лэсьтыны малпа вал но, урядникез пегӟем, солы одӥг кылысь луисьёс юрттӥзы, вылды.
Выль луэм уж комендантлы нош трос сюлмаськон сётӥз. Туж чидантэм урод ужъёс сярысь гожтэм бумага листъёсын башкирез кутӥзы. Таӵе уж луэм бере, комендант, нош аслэсьтыз офицеръёссэ люканы малпаса, Василиса Егоровназэ нош ик мар ке мугъёсын палэнтыны малпа вал. Иван Кузьмич, шонер адями луэменыз, аслэсьтыз та ватыса возён мугъёссэ вуж дышем сямъёсыныз ортчыны кутскиз.
«Кылскы али, Василиса Егоровна, — кызон вискытӥз шуиз со кышноезлы. — Отец Герасим городысь…» — «Тырмоз пӧялляськыны, Иван Кузьмич, — вераськонзэ ӝыныё карыса, комендантша солы пумитаз вазиз, — тон совещание люканы но монтэм дыръя Емельян Пугачёв сярысь вераськыны малпаськод шӧдске, нош монэ пӧяны уд ни быгаты». Иван Кузьмич синъёссэ паськыт усьтӥз. «Ну, матушка, — шуиз со, — тон вань ужез тодӥськод ни бере, пожалуй кыль, ми тон азьын ик вераськом». — «То-то, батька, — шуэ со, — тыныд-а кескичъяськыны; ысты офицеръёстэ ӧтьыны».
Ми нош люкаським. Иван Кузьмич кышноез азьын милемлы Пугачёвлэсь калыклы гожъям гожтэтсэ лыдӟиз. Гожтэтэз кыӵе ке ляб дышетскем казакен гожъямын. Разбойник милям крепость выламы ӝоген лыкто шуыса ялэ, казакъёсты, салдатъёсты аслаз шайкаяз ӧте, нош командиръёсты пумит эн кариське шуэ, пумит кариськисьёссэ ваньзэ казнить каро шуэ. Гожтэтэз лек но туж чурыт кылъёсын гожъямын. Сыӵе гожтэт огшоры калыклэн мылкыдаз пыӵалоз гинэ.
«Кыӵе мошенник! — кеськиз комендантша. — Кызьы озьы гожъяны со дӥсьтэ! Солэн пумитаз потыны но пыд азяз знамяез поныны! Ах, со пуны пи! Уг-а мар-а тоды со: веть ми ньыльдон ар ӵоже службаын ини, инмарлы тау, котькыӵе ужъёсты адӟемын ини! Неушто сыӵе разбойниклэсь кылскись командиръёс но вань?»
— Луыны кулэ ӧвӧл кадь но, — Иван Кузьмич солэн пумитаз вера. — Нош злодей троссэ крепостьёсты басьтэм ини шуыса кылӥське.
— Со видно зэмзэ ик кужмо, — шуиз Швабрин.
— А вот али ми тодомы солэсь кужымзэ, — шуиз комендант. — Василиса Егоровна, вай мыным кенослэсь усьтонзэ. Иван Игнатьич пыдсам башкирецез татчы вай али, собере Юлаез татчы ньӧр вайыны кос.
— Сыл али, Иван Кузьмич, — интыысьтыз султыса, шуиз комендантша. — Вай али мон Машаез коркасьтым кытчы ке отчы келяло, а то со кесяськем куараез кылыса кышкалоз. Шонер ке верано, мон ачим но сыӵе ужъёс шоры учкыны мыло-кыдо ик ӧвӧл. Ӟеч луэ.
Вашкала дыръёсы пытка (ньӧран но мукет сыӵе вӧсь карон ужъёс) суд ужпумъёсы туж зол пыӵамын вал. Сыӵе ужъёсты быдтон пумысь поттэм указ но туж кема бумага вылын гинэ улӥз. Преступниклэн ассэ ачиз виноватэ уськытэмзэ туж кулэ ужен лыдъяло вал, суд ужпумын номырлы ярантэм малпан со: малы ке шуоно, суд улэ пачкам мурт виноват луэмезлэсь сезьке ке, солэн виноват луымтэезлы уг оско. Озьы бере адямилэн ассэ ачиз виноватэ уськытэмезлы но оскыны уг яра. Таӵе варварской сямъёсты токма быдтэм сярысь али но куд-ог вуж судьяослэсь жаляса верамзэс кылылӥсько. Ми дыръя нош ньӧранэз но, мукет сыӵе курадӟытон сямез но нокин но кулэтэмен уг лыдъя вал — судьяос но суд улэ пачкам муртъёс но. Соин ик комендантлэн та сётэм приказэз нокинэ но ӧз абдраты. Иван Игнатьич кеносысь пыдсаса возем башкирецез вайыны кошкиз. Кӧня ке минут ортчыса, сое комендантлэн азь корказ вуттӥз. Комендант сое ас дораз пыртыны косӥз.
Башкир ӧс кусып вамен мырдэм вамыштыны быгатӥз (солэн пыдъёсаз колодкаос понэмын вал). Аслэсьтыз ӝужыт изьызэ басьтыса, ӧс доры султӥз. Мон со шоры учки но куалектӥ. Ноку но со адямиез уг вунэты. Солы сизьымдон ареслэсь но уно кадь. Солэн нырыз но пельёсыз ӧвӧл. Йырыз мычемын, тушез интые кӧня ке пурысь гонъёсыз гинэ пештырскемын. Мугорын со лапег гинэ, туж восьтэт но губырес. Озьы ке но, сюбегесь синъёсыз тылъёсын ӝуало на. «Эге! — шуиз комендант, кышкано кадь тодмет пусъёсыз шоры учкыса. 1741 арын наказать карем бунтовщикез тодмаз со. — Тынад йырыд сокем вольыт мычемын бере, тон видно пересь кион, милям капканъёсамы шедьылэм маке. Тон видно нырысьсэ гинэ бунтовать уд кариськы ни. Лык али матэгес; вера, кин тонэ татчы ыстӥз?»
Пересь башкир уг вазьы, номре валасьтэм тусын комендант шоры учке. «Малы тон номре но уд вераськы? — Иван Кузьмич нош солэсь юа, — ӟуч сямен бельмес шат, номре но уд валаськы? Юлай, юа али солэсь асьтэ сямен, кин сое асьме крепосте ыстэм?»
Иван Кузьмичлэсь юанъёссэ Юлай бигер кылын вераз. Нош башкирец, одӥг кыл но вератэк, азьло сямен ик учкыса сылэ.
— Якши, — шуиз комендант, — тон мынам вераськод али. Пиналъёс! кыле со вылысь та шузи гожмо дӥсьсэ но тыбыр вылзэ пужъятэ. Смотри, Юлай, ӟечгес котырзэ пыж!
Кык кузя инвалидъёс башкирецлэсь дӥсьсэ кыльыны кутскизы. Шудтэм адямилэн ымнырыз ик воштӥськиз. Пиналъёсын кутэм пичи пӧйшур сямен, эскеръяське. Одӥгез инвалид солэсь киоссэ аслаз чырты котыртӥз понӥз но пересь муртэз пельпум вылаз ӝутӥз. Юлай ньӧръёс кутыса шуккыны дасяськиз. Соку башкирец ляб куараен ӝуштӥз но, йырыныз шонаса, ымзэ усьтӥз. Ым пушказ, кыл интые, вакчи сӥль юдэс гинэ выретске.
Та уж мон улон даурын луэмез тодам вайисько ке, собере Александр императорлэн зӥбыт царствовать каремез дырозь улэмме чакласько ке, адямиез гажаса улонлэн но югдытонлэн таӵе ӝог азинскемезлы паймисько. Егит адями! мынам гожтэтъёсы тынад ки улад шедизы ке, тодад вай: улон вошкем соку гинэ азинлыко но юн луэ, куке со эриктэм карытэк улон сямъёс вошкем вамен пӧрме.
Ваньзы абдразы. «Ну, — шуиз комендант, — видно асьмеос талэсь номре пайдазэ поттыны ум быгатэ. Юлай, ну та башкирецез кеносэ. Нош асьмеос, господа, марке-марке ӧжыт кенешом на».
Ми куспамы ас ужмы сярысь кенешыны кутским, ӵапак соку тӥни комнатаямы шок потыса, туж зол кышкам тусын Василиса Егоровна пыриз.
— Мар тыныд сыӵе луиз? — паймыса юаз комендант.
— Беда, батюшка! — пумитаз Василиса Егоровна вазиз. — Нижнеозёрноез туннэ ӵукна басьтӥллям. Отец Герасимлэн работникез али гинэ отысь бертӥз. Кызьы басьтэмзэс ик адӟем со. Комендантсэс но вань офицеръёсты ошылӥллям. Ваньзэ салдатъёссэс полонэ басьтӥллям. Со злодейёслэсь татчы вуэмзэс гинэ учкыса ул на.
Малпамтэ шорысь ивор монэ туж зол абдратӥз. Нижнеозёрной крепостьысь комендант, туж каньыл но лякыт егит адями, мыным тодмо мурт вал: ог кык толэзьёс азьло со, аслаз егит кышноеныз Оренбургысь бертыкуз, Иван Кузьмич доры дугдылӥз. Милям крепостьмы дорысь Нижнеозёрной крепость ог кызь вить иськемъёс луоз. Соин ик, часлы быдэ Пугачёвлэсь татчы вуэмзэ витьыны усе. Соку дыръя Марья Ивановналы мар луэмзэ мон син азям кадь адӟисько. Сюлмы мынам жугиськемысь ик дугдӥз кадь.
— Кылске али, Иван Кузьмич! — шуи мон комендантлы. — Крепостьмес асьмеос лулмы потытозь возьмано луиськом, сыӵе асьмелэн долгмы; со сярысь вераськонэз ик ӧвӧл. Нош нылкышноосты та кышкытлэсь палэнтон сярысь малпано луоз. Сюресэз ке буш на, келялэ соосты Оренбурге либо кыдёкысь, оскымонгес, злодейёслы вуонтэм крепосте.
Иван Кузьмич, кышноез пала берытскыса, тазьы шуиз:
— Кылскы али тон, матушка, ми татын бунтовщикъёсты вормытозямы, оло зэмзэ ик тӥледыз татысь кыдёкегес келяно луоз.
— Ма токмазэ вераськод! — шуиз комендантша. — Кытын, бен, сыӵе пуляос пыронтэм крепость вань? Белогорской крепость маин осконтэм? Инмарлы тау, кызь кыктэтӥ арзэ татын улӥськом ини. Башкирецъёсты но киргизъёсты но адӟылӥм ни: авось Пугачёвлэсь но татын ик пукыны быгатом.
— Ну, матушка, — пумит вазиз Иван Кузьмич, — ас крепостьмылы тон сокем оскиськод бере, пожалуй, кыль. Нош Машаен асьмеос мар каром? Крепостьмес возьманы ке быгатӥм, либо палэнысь юрттон кужым ыстэмзэс витьыса ке вуттӥм, соку ярасал но, нош крепостьмес басьтӥзы ке?
— Ну, соку… — Василиса Егоровна веранзэ быдэстыны ӧз ни быгаты, мур ӝоже усем туссэ возьматыса дугдӥз.
— Ӧвӧл, Василиса Егоровна, — оло улытозяз нырысьсэ со ас кылъёсызлэсь кышноез азьын кужымзэ шӧдыса, комендант веранзэ азинтэ. — Машалы татчы кыльыны уг яра. Сое Оренбурге кирос мумиз доры келялом: отын войскоос но, пушкаос но трос, крепостьсылэн борддорез но из. Соин ӵош тыныд но отчы ик мыныны ӵектысал мон. Тон ини пересь ке но, нош крепостьмес приступен басьтӥзы ке, тонэныд мар луэмзэ ачид адӟод.
— Ярам, — шуиз комендантша, — Машаез келялом, мед луоз тынад сямен. Нош монэ уйвӧтад но эн куры: уг мыны. Мае чакласа мон пересь арлыдам тонэныд люкиськом, аслым огнамлы шайгу сьӧрлось утчалом. Ӵош улыны, ӵош ик кулыны.
— Соиз но умой, — шуиз комендант. — Ну, ӝегатскыны уг яра. Мын, Машаез сюрес вылэ дася. Ӵуказе ӵукна ӟар потыку ик, сое келялом но, калыкмы мултэсэз ӧвӧл ке но, кӧня ке конвой сётом. Нош кытын Маша?
— Акулина Памфиловна дорын, — комендантша вера. — Нижнеозёрноез басьтэмзы сярысь иворез кылӥз но, солы мар ке секыт луиз, висьыны кутскемезлэсь кышкасько. Господи владыко, кыӵе улон дыре асьмеос вуимы!
Василиса Егоровна нылзэ сюрес вылэ дасяны кошкиз. Комендант дорын вераськон ялан мынэ ке но, мон вераськон кыл куспазы но уг пыриськы, вераськемзэс но уг кылскиськы. Марья Ивановна ӝытсэ сиськон азьын туж ӟаректыса но бӧрдэм тусын вуиз. Сиськонмес ми номре вераськытэк ортчытӥм. Ӝӧк сьӧрысь огшорылэсь ӝоггес султӥм. Быдэс семьяеныз проститься кариськем бере, ми ас кунокаосамы кошким. Нош мон юри вунэтыса шпагаме кельтӥ но со понна берытски: Марья Ивановнаез огназэ шедьто дыр шуыса, сюлмы шӧдскиз. Зэмзэ ик, Марья Ивановна монэ ӧс дорын ик пумитаз но мыным шпагаме сётӥз. «Ӟеч лу, Пётр Андреич! — шуиз со мыным, синвуоссэ пачыл кисьтыса. — Монэ Оренбурге келяло. Ӟеч но шудо-буро мед улод, лулэн мед кылёд. Оло инмар асьмелы огмес огмы адӟыны но кылдытоз на. Нош ӧз ке кылды…» Со зар-зар бӧрдыны кутскиз. Мон сое ӟыгыртӥ. «Ӟеч лу, мынам ангелэ, — шуи мон, — ӟеч лу, мынам гажанэ, мынам яратонэ! Монэным котьмар мед луоз но мынам берпум малпанъёсы но мынам берпум молитваосы тон сярысь гинэ луозы!» Маша, мынам гадь вылам йырзэ поныса, бӧрдэ. Мон пӧсь мылкыдэн сое чупай но комнатаысь дыртыса потӥ.