Капитан ныл (Пушкин)/2

From Wikisource
Jump to navigation Jump to search
Капитан ныл
II люкетэз. Сюрес возьматӥсь
Автор: Александр Сергеевич Пушкин
Удмурт кылэ берыктэмез: Пётр Михайлович Усковлэн
Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 10—19.
II люкетэз
Сюрес возьматӥсь

Шаере тон, мынам шаере,
Тодмостэм шаере!
Мон ачим-а тон вылэ вуи,
Урод вал-а тон вылэ вуттӥз:
Вуттӥз монэ татчы, егитэз,
Сэзь етӥз мылкыдэ
Но кабаклэн капчиятэмез.

Вашкала кырӟан

Сюрес вылын малпанъёсы мынам сокем шулдыресь ӧй вал. Коньдонлэсь соку дыръя дунзэ чаклано ке, мынам келяме шӧдскымон ик вал. Симбирской трактирын мынам ужъёсы туж умойтэмесь луо шуыса, ас поннам малпасько, Савельич азьын но ас виноват луэмме шӧдӥсько. Тӥни сыӵе чакланъёс монэ курадӟыто. Савельич, мыным мышкин кариськыса, номре куаретытэк кибиткаын пуке, дырын-дырын ӝуштылэ гинэ. Кызьы ке но мынам соин одно уръяськеме потэ, мар бордысен кутскыны гинэ уг валаськы. Берлогес ини мон солы шуи: «Я, я, Савельич! тырмоз, уръяськом, виноват; виноватме ачим но адӟисько. Толон мон шузияськи, тонэ токма шорысь обиде уськытӥ. Азьпала табере визьмогес улыны, тынэсьтыд кылскыны кыл сётӥсько. Я, вождэ эн вай; уръяськом».

— Эх, батюшка, Пётр Андреич! — туж пыдлось лулскыса, вазиз со пумитам. — Аслым мынам воже потэ; мон ачим виноват. Малы мыным тонэ огнадэ трактире кельтоно вал! Мар карод? Сьӧлык канжаз: дьячиха доры пыраса, кумаеным адскеме потӥз. Озьы тӥни: пыри кума доры, вуи тюрьма доры. Беда, эке!.. Кызьы мон господаослэн син азязы возьматско на? Пизылэсь юэмзэ но шудэмзэ тодӥзы ке, мар шуозы соос мыным?

Куанер Савельичез буйгатыны понна азьпала дыръя, солэсь юатэк-вератэк, одӥг копейка но коньдон уг быдты шуыса, кыл сётӥ. Савельич пумен буйгатскиз, дырын-дырын гинэ йырзэ сэзъяса: «Сю манет! капчи-а сое вераны!» — шуыса, ялан ас понназ нургетӥз.

Мон служить карон интыелы матэ но матэ вуисько ни. Котыртӥ выръёсын, нюк-гопъёсын пужыям, мӧзмыт кыр инты вӧлскемын. Котырак юг-юг тӧдьы лымыен шобыртэмын. Шунды пуксён дыр. Кибитка сюбег сюрес кузя, шонергес вераса, крестьянъёслэн дӧдьыосынызы лёгем сюрес кузя мынэ. Озьы мынон сямен, ямщике котыр эскериськыны кутскиз. Мае ке адӟем кадь кышкам туссэ возьматӥз. Эскеръяськиз, эскеръяськиз но, изьызэ басьтыса, мон пала берытскыса, вазиз: «Барин, берлань берытскыны уд-а кос?»

— Малы?

— Куазь осконтэм: тӧл пумен ӝутскыны кутске; адӟиськод-а кыӵе со лымыез пельтэ.

— Бен, мар умойтэмез!

— Нош тӥни мар со адӟиськод-а? (Ямщике сюлоеныз ӵукпала возьматӥз.)

— Тӧдьы кырез но чылкыт инэз сяна, мон номре но уг адӟиськы.

— Нош тӥни — тӥни: со пилемез.

Умойгес учкыса, инлэн пумаз ик мон тӧдьы пилемез адӟи, мон сое нырысь вырйыл шуыса учкисько вал. Сыӵе пилем буран луон азьын луэ шуыса, ямщик мыным валэктӥз.

Та интыосын куазьлэн лек пельскылэмъёсыз сярысь мынам азьвыл но кылылэме вал. Зол пельскыкуз, быдэс обозъёсты лымы улэ соге. Савельич, ямщиклэн малпамъёсыныз одӥг кылысь луыса, берлань берытскыны ӵектэ. Нош, мон сямен, тӧлыз лек ик уг тӧлскы кадь; тӧл ӝутскытозь матысь станцие вуом дыр шуыса, мон ямщиклы валъёсты ӝоггес улляны косӥ.

Ямщик ворттӥз; нош ачиз ялан ӵукпала учкылэ. Валъёс но, мае ке шӧдэм кадь, ӟеч мыно. Тӧл нош ялан кужмо но кужмо луэ. Ӵукпалась тӧдьы пилем, вылэ но вылэ ӝутскыса будэ но, паськыт вӧлскыса, быдэс инэз шобыртэ. Пичи пырыен лымыяны кутскиз. Собере малпамтэ шорысь ӟольгыри быдӟаен усьылыны ӧдъяз: тӧл вузэ, куазь зол пельскыны кутскиз. Син куспын сьӧд ин тӧдьы зарезен огъя сураськизы. Номре но адӟыны уг лу. «Ну, барин, — черетскиз ямщик, — беда: буран!»…

Мон кибиткаысьтым йырме мычи: котыр пеймыт но поръясь сильтӧл. Тӧллэн оло лулыз вань кадь, сокем со лек пельтэ но вузэ. Савельичез но, монэ но лымыен шобыртӥз. Валъёс вамыштыса мыно — собере чылкак дугдӥзы. «Малы тон мынэмысь дугдӥд?» — чидатэк юасько мон ямщиклэсь. «Ма, мар мынонэз? — интыысьтыз султыса, пумитам вазиз со, — сотэк но олокытчы пырим, сюрес ӧвӧл, котыр пеймыт». Мон сое куаретыны кутскем вал но, Савельич солы дурбасьтӥз: «Оломалы кылзӥськемед ӧз поты, — лек вера со, — берытскы вал постоялой дворе но отын чай юысал, ӵукнаозь номре чаклатэк шутэтскысал. Со куспын куазь но пельскемысь дугдысал, собере асьмеос азьлань мынысалмы. Кытчы гинэ дыртӥськом? Сюанэ коть луысал ке!» Савельич туж шонер вераз ке но, мар карод на. Лымы усе но усе. Кибитка котыре со быдэс гурезен ӝутске. Валъёсмы, йырзэс ошыса, дырын-дырын мугорзэс дыр-дыр выретыса сыло. Ямщикмы кибитка котыртӥ ветлэ, ужтэк улэмлэсь валъёслэсь кыткетъёссэс тупатъя. Савельич нырулаз супыльтэ. Мон котырак эскеръяськисько, кытысь ке сюресэз, либо коркаосты уг-а меда адӟы, шуыса малпасько но, куазьлэсь синтэм-пельтэм пельскемзэ сяна, номре но уг адӟиськы… Шӧдтэк шорысь мон мар ке сьӧд мае ке адӟи. «Эй, ямщик! — кеськи мон, — учкы али: мар со отын сыӵе сьӧд адске?» Ямщик умой-умой учкыны кутскиз. «А кин тодэ, барин, — шуиз со, ас интыяз пуксён сямен, — воз ке шуоно — воз ӧвӧл кадь, писпу ке шуоно — писпу ӧвӧл кадь, нош выре кадь адске. Улэп мар ке дыр: либо со кион, либо адями».

Мон со тодмотэм арбери шоры валъёсты чортыны косӥ. Соку ик тодмотэм арбери но милям пумитамы матэтскыны кутскиз. Ог кык минутъёс куспын ми адямиен пумиським. «Эй, ӟеч малпась адями! — ямщике со шоры черетскиз. — Вера-ай, уд-а тодӥськы кытын сюрес?»

— Сюрес татын; мон татын чурыт интыын сылӥсько, только мар пайдаез? — вазиз пумитамы шедем мурт.

— Кылзӥськы али, мужичок, — шуи мон солы, — тодӥськод-а тон тапал улосэз? Уд-а басьтӥськы тон монэ кӧлон кунокаозь келяны?

— Тапал улос мыным тодмо, — шуэ сюресмурт, — инмарлы тау, кузяла но ваменак но ветлэмын ини татӥ. Нош, асьтэос адӟиськоды, куазь кыӵе: ӵапак йыромыны учыртод. Лучше татчы дугдыса витёно, оло буран дугдыса, пилемъёс но ортчозы: соку сюресэз кизилиосъя шедьтом.

Солэн куалектытэк вераськемез мынэсьтым но мылкыдме ӝутӥз. Асме ачим инмарлэн ки улаз кельтыса, мон тулкымъяськись кыр шорын уез ортчытыны малпасько ини вал но, малпамтэ шорысь, сюресмурт кибитка ныре пуксиз но ямщик шоры вазиз: «Ну, инмарлы тау, гурт кыдёкын ӧвӧл; бурпала кожыса, валъёстэ улля».

— Нош малы мыным бурпала мыноно? — ямщик йыркурен кадь солэсь юа. — Кытысь тон сюресэз адӟиськод? Небось: валъёс муртлэн, сиес муртлэн, улля ӝоггем. — Мынам сямен но ямщик шонерзэ вера кадь. «Зэмзэ ик, — шуи мон, — гурт матын шуыса, малы малпаськод?» — «Тӧл со палась лыктэ, — шуэ сюрес мурт, — ӵын зынэз вайиз; гурт матын, дыр». Солэн зынэз шӧдэмезлы мон чылкак пайми. Ямщикез мыныны косӥ. Мур лымыетӥ валъёсмы туж секыт мыно. Кибиткамы каллен азьланьске, либо лымы гурезе тубе, либо уллань лэзьке, урдэскысь урдэсказ буре но паллянэ шонаське. Тулкымъяськись зарезетӥ пароходлэн мынэмезлы уша. Савельич ӝуштэ, кибиткалэн шоналскемезъя мынам урдэсъёсам мырышкылэ. Кибиткалэсь азьпал шобретсэ лэзьыса, мон шубаеным бинялски но, верттаськыса кадь каллен мынэмъя, пельскись тӧллэн кырӟамезъя умме уси.

Мон вӧтай. Со вӧтме ноку но уг вунэты. Ас улонам луэм паймымон дыръёсыз чакласько ке, вӧтаме тунасьлэн азьпала улонэз тодыса верамез кадь потэ. Лыдӟись мыным вожзэ медаз вай: малы ке шуоно, ӵем дыръя нокыӵе осконлыкъёсын герӟаськымтэ адями, сыӵе осконлыкъёс шоры синазькылен учкисез но куддыръя ӵемтыны шедьылэ, ӧвӧлтэм осконъёс улэ пачкалля. Таӵе ужъёсты тӥ ас улэм-вылэмысьтыды но кудӥз тодӥськоды, дыр.

Буран лекъяське но, ми лымыен шобыртэм кыр кузя йыромыса ветлӥськом шуыса, вӧтасько мон… Малпамтэ шорысь мон ӟезьы адӟи но асьме усадьбамылэн барской азбараз пыри. Нырысь ик мон, тазьы малпамтэ шорысь гуртэ вуэме понна, бубылэн йырыз кур медаз лу вал, солэсь косэмъёссэ юри санэ уг понӥськы шуыса, медаз лыдъя вал шуыса, малпай. Керпотыса кибиткаысьтым тэтчисько но, корка азьын сылӥсь нэнэме адӟисько. Со туж мур ӝоже усем тусо. «Шыпытгес, — шуэ со мыным, — бубыед, кулоно кадь, висе, тонэ проститься кариськыны вите». Туж кышкаса мон нэнэ сьӧры бубылэн изён висъетаз мынӥсько. Адӟисько, висъетэз ляб югытамын; валес дораз ӝоже усем ымныро калык сылэ. Мон каллен гинэ валес дораз лыктӥсько. Нэнэе валеслэсь возъетсэ ӝутыса, тазьы шуэ: «Андрей Петрович, Петруша бертӥз; со, тынэсьтыд висемдэ тодыса, берытскем. Благословить кар сое». Мон пыдесъяськи но висись шоры учки. Мар бен?.. Бубые интыын, валес вылын сьӧд тушо мужик кылле, капчи тусэн мон шорам учке. Паймеменым мон нэнэелы тазьы шуисько: «Мар таӵе та? Та бубые ӧвӧл. Малы мон мужиклэсь благословение куром?» — «Пӧртэмез ӧвӧл, Петруша, — шуэ мыным нэнэ, — та тыныд выль кутэм бубы луэ; чупа солэсь кизэ но, со тонэ благословить мед кароз…» Мон ваменскисько. Соку мужик, валес вылысьтыз султыса, мышкысьтыз тӥрзэ кутӥз но, тӥреныз котыр шонаськыны кутскиз. Мон пегӟыны малпасько вал… но, ӧй быгаты; комната кулэм мугоръёсын тырмиз; мон кулэм мугоръёс вылэ ӵемтылӥсько но пыдъёсы вир вылтӥ нискылско… Кӧшкемано кадь мужик мусояса монэ дораз ӧте: «Эн кышка, лык мон доры, благословить каро» — шуэ. Кышканэн но паймонэн абдрай мон… Тӥни ӵапак соку мон сайкай. Валъёс сыло. Савельич монэ суйтӥм кутыса возе но шуэ: «Пот ини, сударь: вуим».

— Кытчы вуим? — юай мон, синъёсме ӵушылыса.

— Постоялой дворе вуим. Инмар юрттӥз, шонерак забор вадьсаз учыраськеммы. Ойдо сэрытгес пот, сударь, но шунскы.

Мон кибиткаысь потӥ. Куазь ӧжыт каньылскем ке но буран пельске на. Коть синмад донгы, сыӵе пеймыт. Хозяин, сӧзы улаз фонарь возьыса, милемыз ӟезьы дорын пумитаз но монэ горницаяз пыртӥз. Горницаез пичи ке но, чылкыт гинэ, чаг тылын югыт возё. Борддорын винтовка но казакъёслэн нуллон ӝужыт изьызы ошемын.

Ачиз хозяин яицкой казак. Арлыдэз солэн ог куатьтон арес пала луоз ини, озьы ке но со таза но етӥз тусо на. Мон бӧрсям Савельич сиён-юон котыръёсты пыртӥз но чай быректытыны тыл куриз. Али кадь, ноку но мон со чаез сокем кулэ уг кариськы вал. Хозяинмы ачиз но юрттыны вуиз.

— Нош кытын сюрес возьматӥсьмы? — юай мон Савельичлэсь.

«Татын, ваше благородие», — пумитам вылысен солэн куараез кылӥськиз. Полать вылэ учки но котырес сьӧд тушсэ но кык чилясь синъёссэ адӟи. «Кыӵе, кынмид-а, брат?» — «Та урод армяк коже гинэ кызьы уд кынмы! Мар сьӧлыкез ватыса возёд? Вал мынам тулупе но, мон сое толон целовальниклы заложить кари: куазь но туж кезьыт ик ӧй вал кадь». Со куспын хозяин быректӥсь самоварен пыриз. Мон сюрес возьматӥсьмылы ӵаша чай ӵектӥ но, со полатьысьтыз васькиз. Вылтусыз солэн мыным, ог эсэп адямилэн сярысь, мукетгес адске. Арлыдэн со ог ньыльдон арес, ӝуждалаез шоро-куспо, кӧсэггес но паськыт пельпумо. Котырес сьӧд тушаз солэн одӥг-ог тӧдьы гон но пырем ини. Паськыт синъёсыз туж сэзесь, дугдылытэк олань-талань бергало. Ымнырыз солэн лякыт тусо ке но, кыӵе ке кескич адске. Йырсиез котыр вандыса ӵышкемын. Вылаз лусьтыр-ласьтыр кесяськем армяк но паськыт бигер шаравар дӥсямын. Мон солы ӵашаен чай сётӥ. Со ӧжыт шӧмъяз но ымнырзэ кисыртӥз. «Ваше благородие, лэсьты сыӵе милость, — мыным одӥг стакан вина сётыны кос вал; чай со — казаклэн юонэз ӧвӧл». Мон соку ик солэсь куремзэ быдэстыны косӥ. Хозяин, шкапысьтыз графин но стакан кутыса, со доры лыктӥз но солэн ымныраз учкиз: «Эхе, — шуиз со, — тон нош милям палъёсы вуид! Кытысен, бен, инмар вуттӥз?» Мынам сюрес возьматӥсе синзэ кыньылыса тодытон сётӥз но, мадён кылъёсын вераз: «Бакчаостӥ лобай, кенэм кокчай… Нош тӥляд кыӵе, мар?»

— Мар, бен, милям! — кыдёкысен котыръяськыса, кылпум нуонзэс азьланьтыса, хозяин солэн пумитаз вазе. — Вечерняе гырлы жугыны кутскемзы вал но, попадья ӧз лэзьы: поп, пе, куноын, чортъёс шай вылын.

«Эн ни куареты, дядя, — хозяинлы пумит вазиз мынам бродягае, — зор ке луиз, губиос но луозы; губиос ке луизы, куды но шедьтом. Али нош (бродягае нош ик синзэ кымыртӥз) тӥрдэ куспулсад пон: лесничой ветлэ. Ваше благородие! тынад тазалыкед понна!» Та кылъёссэ вераса, со стаканзэ кияз кутӥз но, кирос карыса, одӥг гучыкен кымаса юиз. Собере мыным йыбырскыса, нош полатяз тубиз.

Воръёс мактал вераськемысьтызы, мон соку номре но ӧй вала. Бервылаз гинэ мазэ-созэ валаны кутски. Яицкой войскалэн ужъёсыз сярысь вераськонзы мынэ вылэм. 1772 арын соос бунт лэсьтӥзы но со бунт соку гинэ дугдытэмын вал. Вераськемзэс Савельич туж кырыж учкыса кылскиз, со то хозяин шоры, то сюрес возьматӥсь шоры учкылэ. Постоялой двор, отын сямен нимамзыя, умет, гуртъёслы кыдёкын урдсаз, кырын сылэ. Соин ик со йыртэмасьёслэн пузкарзылы туж тупа. Озьы ке но, мар карод на? Азьлань мынон сярысь малпанэз ик ӧвӧл. Савельичлэн кышкаса кадь эскеръяськемезлы мынам серем потэ. Кӧня ке улыса, мон ӟус вылэ изьыны выдӥ. Савельиче мынам гур вылэ каръяськиз, нош хозяинмы пол вылэ выдӥз. Ӝоген быдэс коркамы соргетыны кутскиз но, мон но, кулэм мурт кадь, умме уси.

Ӵукна, бер гинэ султыса, мон буранлэсь дугдэмзэ адӟи. Шунды шулдыр пиштэ. Син сузёнтэм кыр вылтӥ, синэз мальдытӥсь юг-юг тӧдьы лымы кылле. Валъёсмы кыткемын вал ни. Мон хозяинлы кунока дун тыри. Со милесьтым кунока дун туж шоро-куспо басьтӥз. Куремезлы Савельич но ӧз пумитъяськы, споръяськытэк тыриз, котьку кадь вузкарыса ӧз улы. Кунока кузё сярысь толон умойтэм малпанъёсыз но йырысьтыз бырем шӧдске. Мон сюрес возьматӥсез дорам ӧти, юрттэмез понна тау кари но Савельичез, солы вина юыны понна, полтинник сётыны косӥ. Савельич пештырскиз. «Полтинник вина юыны! — шуиз со, — мар понна? Сое ассэ постоялой дворе ваемед понна, шат? Ачид тодӥськод, сударь: мултэс полтинникъёсмы асьмелэн ӧвӧл. Котькинлы вина юыны полтинникен сётъяны кутским ке, ӝоген ачид сютэм улон дыре вуод». Савельичен мон, ӧй ни кереты. Мынам кыл сётэмея, коньдонэн табере со кузёяське. Нош монэ, бедаысь ке но ӧвӧл, туж шуге-леке вуэм ужысь поттэмез понна, адямилы коть полтинникен ке но тау карыны быгатымтэелы сюлмы куректэ. «Яралоз, — шуи мон лякытэн гинэ, — полтинникез ке сётэмед уг поты, соку мынам дӥськутэ пӧлысь мае ке сое потты. Со туж урод но капчи дӥсяськемын. Сёт солы мынэсьтым кечку тулупме».

— Помилуй, батюшка Пётр Андреич! — шуиз Савельич. — Мар кароз со тынад кечку тулупеныд? Нырысь кабакын ик сое та, пуны, юыса быдтоз.

— Соиз сярысь, пересь, тынад ужед ӧвӧл, — шуиз мынам бродягае, — юыса быдто-а мон уг-а. Его благородие ас пельпум вылысьтыз шубазэ мыным сётэ: отын солэн аслаз барской воляез, нош тынад, холоплэн, ужед споръяськытэк баринлэсь верамъёссэ кылскон.

— Инмарлэсь уд кышкаськы тон, разбойник! — лек куараен вера солэн пумитаз Савельич. — Адӟиськод тон — барин егит на, улон радэз уг вала на, нош тон сое качаны дась. Малы кулэ тыныд баринлэн пичи тулупез? Тон сое аслад окаянной пельпумъёсад дӥсяны но уд быгаты.

— Трос визьмояськыса эн ул, — шуи мон дядькаелы, — али ик татчы тулупез вай.

— Остэ инмаре! — бӧрдыса кадь лулӟиз Савельиче. — Кечку тулуп чылкак выль кадь ик на! Коть умой адямилы ке луысал, а то веть гольыке вуэм пьяницалы!

Озьы ке но кечку тулупе вуиз. Сюрес возьматӥсь соку ик сое вылаз мертаны кутскиз. Тулуп солы ӧжыт сюбеггес. Со тулупез кызьы но озьы, вурысъёстӥз ӟезьыса но мар, дӥсяз ик. Вурысъёсызлэсь ӟезькемзэс кылыса, Савельич бӧрдоно кадь кариськиз. Мынам кузьымелы бродяга туж шумпотӥз. Со монэ кибитка дорам ик келяса лыктӥз но туж улэ йыбыртыса, тазьы шуиз: «Туж тау, ваше благородие! Тынад та ӟеч каремед понна инмар мед берыктоз. Та ӟеч каремдэ тынэсьтыд кулытозям уг вунэты». Со аслаз сюресэз кузя кошкиз, мон нош азьлань мынӥсько, Савельичлэн вожпотэмез шоры уг ик чакласькы. Куазьлэсь толон пельскемзэ но, сюрес возьматӥсез но, аслэсьтым кечку тулупме но ӝоген вунэтӥ.

Оренбурге вуэм бере, мон шонерак генерал доры мынӥ. Ӝужыт мугоро пересь арлыдэныз губырскем пиосмуртэз адӟи мон. Кузь йырсиосыз солэн копак тӧдьы луэмын. Вуж, бездэм мундирез Анна Иоанновна дыръя вылэм воинэз тодэ вайытэ, нош вераськон кылыз солэн, немецъёслэн кылзы пала шонтэ. Мон солы бубылэсь гожтэм гожтэтсэ сётӥ. Бубылэсь нимзэ кылыса, со соку ик мон шоры учкиз: «Поже мой! — шуиз со. — Кемалась ик ӧвӧл кадь, Андрей Петрович тынад арлыдъёсад гинэ вал. Табере учкы — мар быдӟа солэн пиез! Ах, фремя, фремя!» Гожтэтэз со конвертысь поттӥз но ӝыны куараеныз лыдӟыны кутскиз, лыдӟон куспаз малпамъёссэ но вера. «Милостивый государь Андрей Карлович, надеюсь, что ваше превосходительство»… Это что за серемоний? Фуй, как не софесно! Конечно: дисциплина — первое дело но так ли пишут к старому камрат?.. «ваше превосходительство не забыло»… гм… «и… когда… покойным фельдмаршалом Мин… походе… также и… Каролинку»… Эхе, брудер! так он ещё помнит стары наши проказ? «Теперь о деле… К вам моего повесу»… гм… «держать в ежовых рукавицах»… Что такое ешовы рукавиц? Это, должно быть, русска поговорк… Что такое «держать в ешовых рукавицах?» — юаз со мынэсьтым.

— Со значит, — шуисько мон солы, номыре шӧдонтэм вылысь, — монэ сокем чурыт возёно ӧвӧл, тросгес эрик сётоно, со луэ тӥни держать в ежовых рукавицах.

— Гм, понимаю… «и не давать ему воли»… нет, витно ешевы рукавицы значит не то… «При сем… его паспорт»… Где ж он? А, вот… «отписать в Семёновский»… Хорошо, хорошо: всё будет сделано… «Позволишь без чинов обнять себя и… старым товарищем и другом» — а! наконец догадался… и прочая, и прочая… «Ну, батюшка, — шуиз со, гожтэтсэ лыдӟем бераз, мынэсьтым паспортме палэнэ понон пумен, — ваньмыз лэсьтэмын луоз: тонэ *** полке офицерен перевести каром. Дырдэ токма быдтонтэм понна, тон ӵуказе ик Белогорской крепосте мыноно луод. Отын тон Миронов капитанлэн командаяз луод. Со лякыт но честной адями. Отын тон, настоящой службаын луыса, дисциплиналы но дышод. Татын Оренбургын тыныд ӝеганы кулэ ӧвӧл, егит адямилы дырез ужтэк ортчытыны уг яра. Ну, а туннэ мон тонэ ас дорам кунолыкес ӧтисько».

«Вылысьтыз вылаз умойтэм луэ! — шуыса, ас поннам малпасько, — нэнэлэн кӧтпушказ дыръям ик мон гвардие сержантэн гожтэмын вал ке но, мар пайдаез луиз солэн! Кытчы мон вуи? *** полке но киргиз-кайсацкой кыръёслэн (степьёслэн) гож дурысьтызы кыршам крепосте!..» Андрей Карлович дорын ми куинь кузя обедамы, куиньметӥез солэн вуж адъютантэз вал. Солэн ӝӧк сьӧраз немецъёслэн чурытаськон сямзы син азе пуксе. Ӝӧк сьӧраз мултэс куно вуылэмлэсь кышкаменыз, монэ но сокем ӝог дыртыса гарнизонэ ыстэ шуыса, малпасько мон. Ӵуказеяз мон генералэн проститься кариськи но аслам выль служить карон интыям кошки.