Капитан ныл (Пушкин)/12

From Wikisource
Jump to navigation Jump to search
Капитан ныл
XII люкетэз. Сирота
Автор: Александр Сергеевич Пушкин
Удмурт кылэ берыктэмез: Пётр Михайлович Усковлэн
Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 83—89.
XII люкетэз
Сирота

Милям улмопумылэн
Йылыз но ӧвӧл, улваез но;
Милям княгинюшкамылэн
Бубыез но ӧвӧл, мумыез но,
Кин сое чебер дӥсялоз?
Кин благословить кароз?

Сюанын кырӟан

Кибиткамы комендантлэн корказь азяз дугдӥз. Калык Пугачёвлэсь гырлы куаразэ тодмаз но уллёен ми сьӧры бызё. Швабрин самозванецез корказяз потыса пумитаз. Со казак дӥсен дӥсяськемын, тушсэ но лэзем. Изменник Пугачёвлы кибиткаысь потыны юрттӥз, ас шумпотэмзэ, ӟеч мылкыдзэ подлой манеръяськыса возьматӥз. Монэ адӟыса, со ӧжыт ёрмиз, собере ӝоген тупатскыса, мыным кизэ мычиз: «Тон но-а милям? Кемалась озьы кулэ вал!» — шуиз со. — Мон солы мышкин берытски, пумитаз номре но ӧй вера.

Кемаласен тодмо комнатае пыреммы бере, мынам сюлмы ик вӧсь луиз. Борддорын вием комендантлэн дипломез, азьло сямен ик, ошемын улэ, со табере ортчем дырлы эпитафия кадь адске. Пугачёв диван вылэ пуксиз. Со диван вылын Иван Кузьмич кышноезлэсь зулемъёссэ кылскыса нурылоз вал. Швабрин ачиз Пугачёвлы вина сётӥз. «Его благородиез но секта» — шуиз Пугачёв одӥг рюмка юэм бераз, мон шоры возьматыса. Ас подносэныз Швабрин мон доры лыктӥз; мон солы нош мышкин кариськи. Со ассэ ачиз валантэм вожзэ вае. Со валась мурт, Пугачёв солы малы ке вожзэ поттэ шуыса шӧдскиз. Со азьын со кышка, нош мон шоры оскытэк учкылэ. Крепостьын ужъёс кыӵе мыно, неприятельлэн войскаосыз сярысь мар кылӥське но мукет пӧртэм ужъёс сярысь юалляськем бере, Пугачёв солэсь малпамтэ шорысь юаз:

— Вера, братец, кыӵе нылэз тон ас дорад караулэн возьмаса возиськод? Возьматы-ай мыным сое.

Швабрин, кулэм мурт кадь, кӧсэктӥз.

— Государь, — шуиз со куалекъясь куараен… — Государь, со караул улын ӧвӧл… со висе… со нимаз висъетын кылле.

— Бен, ну монэ со доры, — интыысьтыз султыса, шуиз самозванец. Пыкиськыны луоно ӧй вал. Пугачёвез Швабрин Марья Ивановналэн висъетаз нуиз. Мон но соос сьӧры ик мынӥсько.

Тубат вылысен Швабрин дугдӥз.

— Государь! — шуиз со. — Мар ке мылыд потэ, сое косыны тынад власед вань; нош, пожалуйста, мынам кышноелэн кӧлан висъетаз муртэз пыраны эн лэзе.

Мон куалекъяны кутски.

— Иське тон кышнояськемын! — шуи мон Швабринлы, сое кесяны дасяськыса.

— Каллен! — дугдытӥз монэ Пугачёв. — Соиз мынам уже. Нош тон, — Швабрин шоры вазиз со, — лекос трос эн тодэмъяськы но эн быдӟияськы: кышноед-а со тынад ӧвӧл-а, нош мон кинэ ке мылы потэ, сое со доры пырто. Ваше благородие, ойдо сьӧрам.

Висъет ӧс доры вуыса, Швабрин нош дугдӥз но викышъясь куараен вазиз:

— Государь, пыремедлэсь валлё ик тонэ тодытӥсько: со белой горячкаен висе, куиньметӥ нуналзэ ни дугдылытэк уйбыртыса вераське.

— Усьты! — шуиз Пугачёв.

Швабрин кисыосысьтыз утчаськыны кутскиз, собере усьтонэ бордам ӧвӧл шуиз. Пугачёв ӧсэз пыдыныз ӵыжиз но; тунгонэз тэтчиз, ӧс усьтӥськиз; ми пырим.

Мон учки но — кулоно кадь луи. Пол вылын, огшоры кесяськем крестьян дӥсен, Марья Ивановна пуке: йырсиез тугаськемын, ачиз кӧсыт, восьтэт. Солэн азяз вуэн кувшин, кувшин вылын шорем нянь. Монэ адӟыса, со куалектӥз но кеськиз. Мар монэным собере луиз — уг ни тодӥськы.

Пугачёв Швабрин шоры учкиз но курыт серем пыр вераз:

— Лазаретэд тынад умой вылэм! — Собере Марья Иванов на доры мыныса: — Вера мыным, гыдыке, мар понна тынад кузпалыд тонэ тазьы курадӟытэ? Мар виноватэд тынад со азьын вань?

— Мынам кузпалэ! — шуиз ныл. — Со мынам кузпалэ ӧвӧл. Мон ноку но солэн кышноез уг лу! Монэ ӧз ке мозмытэ, мон лучше куло.

Пугачёв Швабрин шоры лек учкиз: «Тон монэ пӧяны дӥсьтӥд! Тодӥськод-а, бездельник, мар кулэ тыныд со понна?»

Швабрин пыдес вылаз усиз… Соку мынам адӟонтэм карон мылкыды йыркурме но вожпотонме но согиз. Пегась казаклэн пыд азяз лошъяськись дворянин шоры мон, маке юрӟым шоры кадь, учкисько. Пугачёв небӟиз.

— Таяз мон тонэ миловать карисько, — шуиз со Швабринлы, — нош тодыса ул: нырысь маке янгыше усьыкуд ик, таиз но уз вуны.

Собере небыт куараен Марья Ивановналы вазиз:

— Пот, чебер ныл; тыныд эрик кузьмасько. Мон государь.

Марья Ивановна ӝогак со шоры учкиз но, солэн азяз, солэсь бубы-мумызэ виись сылэ шуыса шӧдскиз. Кык киыныз ик со ымнырзэ ӵоксаз но номыр валантэм луыса усиз. Мон со доры мынӥсько вал но со куспын, туж дӥсьтыса, мынам вуж тодмое, Палаша висъетамы пыриз но ас барышнязэ утялтыны кутскиз. Пугачёв та висъетысь потӥз но ми куиньнамы гостиное ваським.

— Мар ни, ваше благородие? — серекъяса вазиз Пугачёв. — Чебер нылэз мозмытӥм. Кызьы тон малпаськод: попез шат ӧтьыны ыстоно но сое ас племяницазэ венчать карыны косоно. Мон, пожалуй, бубы интые тӧроын пуко, Швабринэз сюанчи каром; юмшалом но юом ӟезьымес пытсалом!

Малэсь мон кышкаса улӥ, со ик кылдӥз. Пугачёвлэсь сыӵе ӵектэмъёссэ кылыса, Швабрин ассэ ачиз возьыны ӧз ни быгаты.

— Государь! — визьтэммыса кадь, кеськиз со. — Мон виноват, мон тыныд шонерзэ ӧй вера, нош Гринёв но тонэ пӧя. Та нылмурт татысь поплэн племяницаез ӧвӧл: со крепостез басьтон дыръя казнить карем Иван Мироновлэн нылыз.

Пугачёв аслэсьтыз ӝуась синъёссэ мон вылам чӧлтӥз.

— Таиз мар на таӵе? — паймыса юаз со мынэсьтым.

— Швабрин шонерзэ тыныд вераз, — шуи мон, чик кышкатэк.

— Тон мыным та сярысь номре но ӧд вера, — шуиз вожпотэм ымныро Пугачёв.

— Ачид малпа али, — мон солы шуисько, — Мироновлэн нылыз улэп шуыса, луэ-а вал тыныд калыкед азьын вераны. Соос йырйысалзы ук сое. Нокызьы сое кельтыны ӧй луысал ни!

— Соиз но зэм, — шуиз Пугачёв, серекъяса. — Куанер нылэз мынам пьяницаосы ӧй жалясалзы. Попадья-кумушкалэн соосты пӧямез туж умой.

— Кылскы али, — солэсь ӟеч мылкыдзэ шӧдыса, веранме нуйтӥсько. — Кызьы тонэ нимало — уг тодӥськы, собере тодэме но уг пот… Нош инмар адӟе, тынад ӟеч ужъёсыд понна, мон ас улонме но ӧй жалясал. Нош маке мынам сӥ-данэлы но христианской осконлыклы пумит луэ, сое гинэ мынэсьтым эн кур. Тон — мынам ӟеч лэсьтӥсе. Кызьы ке кутскид, озьы ик йылпумъя: лэзь монэ со куанер сиротаен кытчы ке милем инмар сюрес возьматоз. Нош тон котькытын мед луод, котьмар тонэныд мед луоз, тынэсьтыд сьӧлыко лулдэ инмар мед жалялоз шуыса, ми нуналлы быдэ вӧсяськом…

Пугачёвлэн чурыт сюлэмыз вырӟиз кадь. «Иське тынад сямен ик мед луоз! — шуиз со. — Казнить ке казнить, жаловать ке жаловать кароно: сыӵе мынам сямы. Басьты аслэсьтыд чебер нылдэ аслыд, кытчы ке нуэмед потэ отчы сое ну, куспады тупаса улон, огдэс огды гажан тӥледлы инмар мед сётоз!»

Собере со Швабрин пала берытскиз но солэн власть улаз луись котькыӵе крепосте но заставаосы мыным пропуск сётыны косӥз. Швабрин, прочсэ ултӥе усеменыз, гуньдэм мурт кадь, сылэ. Пугачёв крепостез эскерыны потӥз. Швабрин со сьӧры мынӥз, нош мон кошкыны дасяськон муген юри кыли.

Мон Марья Ивановналэн висъетаз бызи. Ӧсэз курикамын вал. Мон йыгаськи. «Кин со?» — Палаша юаз. Мон нимме верай. Ӧс сьӧрысь Марья Ивановналэн гажано куараез кылӥськиз. «Ӧжыт вите, Пётр Андреич. Мон дӥсьме гинэ вошто. Акулина Памфиловна доры мынэ, мон али ик отчы вуо».

Мон кылски но отец Герасимлэн корказ мынӥ. Со ачиз но, попадьяез но мынам пумитам потӥзы. Савельич соосты ивортыны вуэм ини. «Ӟечбур, Пётр Андреич, — попадья шуэ. — Нош инмар асьмелы адскыны кылдытӥз. Кыӵе мар улӥськод? Нош ми тонэ нуналлы быдэ тодамы вайылӥм. Тонтэк мынам дыдые, Марья Ивановна, котькыӵе курадӟонэз адӟиз… Нош вера-ай, Пётр Андреич, кызьы тӥ Пугачёвен куспады тупатскиды? Кызьы гинэ со тонэ быдтытэк кельтӥз? Ярам, коть со понна но тау злодейлы». — «Дугды ини, пересь, — отец Герасим уретӥз. — Ваньзэ тодэмдэ пӧяськыса эн быдты. Трос вераськыса спасение уг лу. Батюшка Пётр Андреич! пыре, милости просим. Кемалась, кемалась ӧм адскылэ ни».

Маке инмар сётэм, соин попадья монэ кунояны кутскиз, ачиз нош со куспын дугдылытэк вераське. Кызьы Швабрин соосты Марья Ивановнаез солы сётыны эриктэм кариз; кызьы Марья Ивановна соосын люкиськемез потымтэен бӧрдӥз; кызьы Марья Ивановна соосын кусыпсэс Палашка вамен пыр герӟаса возиз (та Палашка туж етӥз ныл, со урядникез но ас мылпотэмезъя эктытэ); кызьы со Марья Ивановналы мыным гожтэт гожтыны визь-кенеш сётӥз но мукет пӧртэм ужъёс сярысь но ваньзэ вераны вуиз. Ас пумысьтым мон солы вакчияк гинэ ас улэм-вылэме сярысь мади. Соослэсь пӧяса верамзэс Пугачёв тодэ ни шуыса кылӥзы но соку ик попен попадья вӧсяськыны кутскизы. «С нами сила крестная! — шуэ Акулина Памфиловна. — Та сьӧд пилемез инмар мед ортчытоз. Ну, бен, Алексей Иваныч, мар веранэз: адями вылэм!» Ӵапак со минутэ ӧс усьтӥськиз но, кӧсэктэм ымныраз серем тусын, Марья Ивановна пыриз. Аслэсьтыз крестьян дӥськутсэ со воштэм но, азьвыл сямен ик, огсыр тупано кадь дӥськутсэ дӥсям.

Мон солэсь кизэ кутӥ но кема ӵоже пал кыл но вераны ӧй быгаты. Сюлэмъёсмы тыр луэмен, ми кыкнамы ик вераськытэк сылӥськом. Кунока кузёосмы, та дыръя соосын йырин ӧвӧлэз шӧдыса, потӥзы, милемыз ваче кусып кельтӥзы. Ми ваче кылим. Ваньмыз вунэмын вал. Ми вераськыса ум тыриське. Крепостез басьтэм дырысен ик асэныз мар луэмзэ Марья Ивановна ваньзэ мадиз: жоб Швабрин кызьы сое курадӟытӥз, кыӵе кышкыт ужъёс доры вуттылӥз. Ортчем шудо дыръёсмес но ми тодамы вайим… Кыкнамы ик бӧрдӥськом… Бервылаз мон аслэсьтым малпамъёсме солы ӵектыны кутски. Пугачёвлэн власть улаз но Швабринлэн ки улаз луись крепосте солы нокызьы но кыльыны уг лу. Осада улэ шедемен сэрен курадӟон улэ ӝимем Оренбург сярысь но малпанэз ик ӧвӧл. Югыт дуннеын солэн одӥг мурт но ӵыжы-выжыез ӧвӧл. Мон солы аслам бубы-мумыосылэн гуртазы мыныны ӵектӥ. Нырысь со паймиз: бубылэсь солы пумит луэмзэ тодэмез сое кышкатэ. Мон сое буйгатӥ. Бубылэсь сямзэ мон тодӥсько, отечество понна бырем муртлэсь, заслуженной воинлэсь сирота нылзэ утёнэз со бадӟым шудэн лыдъялоз. «Мусо Марья Ивановна! — шуи мон солы бератаз. — Мон тонэ аслам кышноеным лыдъясько. Паймымон учыръёс асьмемыз люкиськонтэм герӟазы: дунне вылысь нокин но номыр но асьмемыз люкыны уз ни быгаты». Мынэсьтым та кылъёсме Марья Ивановна огшоры умой кылзӥськиз, возьытэ усён, либо пумитъяськон нерге сямзэ ӧз возьматы. Солэн адӟонэз монэн герӟаськемзэ со шӧдэ. Озьы ке но, мынам буби-муми тупам бере гинэ со мыным кышно луыны кылзэ сёто шуыса нош вераз на. Мон солы пумит ӧй кариськы. Ми пӧсь мылкыдын чупаським, озьы тӥни кусып ужмес йылпумъям.

Одӥг час ортчыса, урядник мыным Пугачёвлэн урод ӵабъям букваосыныз гожкем пропуск вайиз но Пугачёвлэн нимыныз монэ со доры ӧтиз. Отчы вуыса, мон сое сюрес вылэ потыны дасен шедьтӥ. Мон понна сяна, ваньмызлы калыкъёслы та кышкыт адямиен, изверген но злодеен люкиськон дыръям кыӵе вал мылкыды ачим но вераны уг валаськы. Малы шонерзэ уд вера? Соку дыръя мынам сое жалян мылкыды со борды монэ кыске вал. Ас кивалтоно злодейёсыз пӧлысь мынам сое кызьы ке но поттэме потэ вал, дырыз дыръя йырзэ быремлэсь мозмытэме потэ вал. Швабрин но ми котыре люкаськем калык ас сюлмысьтым малпамъёсме вераны люкетӥзы.

Ми соин, эшъёс кадь, люкиським. Калык пӧлысь Акулина Памфиловнаез адӟыса, Пугачёв солы чиньыеныз сэзъяз но синъёссэ кыньыртӥз. Собере кибиткаяз пуксьыса, ямщиксэ Берд пала мыныны косӥз. Валъёсыз вырӟем бере, со нош, кибиткаысьтыз йырзэ мычыса, мыным кеськиз на: «Ӟеч лу, ваше благородие! Оло куке соку адскыны но кылдоз на». Зэмзэ но ми соин адским на, нош ку но кыӵе ужъюгдуръёс дыръя!..

Пугачёв кошкиз. Тӧдьы кыр вылтӥ солэн ортчись тройкаез шоры учкыса, мон кема сылӥ. Калык кошкылӥз. Швабрин ватскиз. Мон поплэн корказ бертӥ. Милемлы кошкыны ваньмыз дасямын вал ини; мынам ӝегатскеме уг пот вал. Ваньмыз милям ваньбурмы комендантлэн вуж повозкаяз тыремын. Ямщикъёс валъёсты ӝог гинэ кыткизы. Марья Ивановна черк сьӧрын ватэм бубы-мумизлэн гу вылазы йыбыртыны кошкиз. Мон но сое келяса мыныны ӧдъясько вал но, со монэ огназэ лэзьыны куриз. Кӧня ке минут ортчыса, куаратэк бӧрдэм синвуосын вуиз со. Повозка дась. Отец Герасим но солэн кышноез корказе потӥзы. Кибиткае ми куиньнамы пуксим: Марья Ивановна Палашкаен но мон. Савельич дӧдьы ныре пуксиз. «Ӟеч лу, мынам гыдыке, Марья Ивановна! Ӟеч лу, мынам гажано соколэ Пётр Андреич! — лякыт попадья милемлы вазе. — Сюресты шудо мед луоз, кыкнадылы ик тӥледлы инмар шудбур мед сётоз!» Ми кошким. Комендант коркалэн укно дораз сылӥсь Швабринэз мон адӟи. Ымныраз солэн ӝожпыр лек тус пуксемын. Тушмонъяськыса улэм адямиез вормемен ушъяськем кадь медаз лу шуыса, мон со шорысь синъёсме мукет пала берыктӥ. Бервылаз ми крепость ӟезьы пыртӥ потӥм но ноку берытсконтэм вылысь Белогорской крепостез кельтӥм.