Капитан ныл (Пушкин)/10

From Wikisource
Jump to navigation Jump to search
Капитан ныл
X люкетэз. Городэз котыртон
Автор: Александр Сергеевич Пушкин
Удмурт кылэ берыктэмез: Пётр Михайлович Усковлэн
Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 66—73.
X люкетэз
Городэз котыртон

Возьёсты но гурезьёсты со басьтӥз.
Гурезь йылысен, орёл кадь, кар шоры учкиз
Косӥз со пушка пуктон инты лэсьтыны,
Пушкаосты отчы ватыса, уйин каре вайыны.

Херасков

Оренбург доры матэ вуон азьын ми мычем йыро но палачлэн корт кисъёсыныз шӧтэм карем ымныро каторжникъёсты адӟим. Соос крепостез юнматон котырын ужало, пегӟемзылэсь соосты гарнизонной инвалидъёс возьмало. Кудӥз крепость котыртӥ котыртэм гуысь жуг-жагез уробоосын поттыло, мукетъёсыз лопаткаен музъемез копало; из бордын ужасьёс крепостной вырйылэ кирпич нулло — карез котыртэм борддорез тупатъяло. Ӟезьы дорын сылӥсь часовойёс милемыз дугдытӥзы, милесьтым паспортъёсмес куризы. Белогорской крепостьысь мынэсьтым вуэмме сержант кылӥз-мараз но соку ик монэ пырак генераллэн корказ нуиз.

Мон вуон дыръя генерал аслаз садаз вал. Сӥзьыл вуэмъя гольык кылем улмопуосты эскере вал. Пересь, садовникен ӵош соос улмопуэз шуныт куроен биняло. Ымнырыз солэн басыл сямзэ, тазалыксэ но лякыт адями луэмзэ возьматэ. Мынам вуэмелы со шумпотӥз но мынам адӟем кышкыт ужъёсы сярысь юалляськыны кутскиз. Мон солы ваньзэ мади. Мынэсьтым верамъёсме пересь туж умой кылскиз, пумен ачиз улмопуослэсь куасьмем улвайёссэ вандылэ. «Куанер Миронов! — шуиз со, секыт иворъёсты мон верам бере. — Жаль, умой офицер вал. Мадам Миронова но лякыт адями вал, губиосты туж ческыт сылалтэ вал. Нош капитанлэн нылыз, Маша, соиз мар ни?» Маша крепостьын, попадья доры кылемын — шуыса, мон солы верасько. «Ай-яй-яй! — шуиз генерал. — Туж умойтэм, туж умойтэм. Разбойникъёслэн дисциплиназылы нокызьы но оскыны уг лу. Мар гинэ луоз ини со куанер ныллы?» Мон солэн пумитаз ас малпамъёсме верасько. Белогорской крепосте татысен кыдёкын ӧвӧл, отысь куанер улӥсьёсты мозмытыны понна, его превосходительство, наверно, войсказэ ыстонэн уз ӝегатскы дыр, шуисько. Осконтэм туссэ возьматыса, генерал йырзэ сэзъяз. «Адӟом, адӟом, — шуиз со. — Со сярысь вераськыны асьмеос вуом на. Мон доры чашка чай юыны лыкты: туннэ мон доры военной совет люкаськоз. Пугачёв бездельник сярысь но солэн войскаез сярысь, тон милемлы туж шонер иворъёс вераны быгатод. Нош али, мын шутэтскы».

Мон мыным сётэм кунокуае мынӥ. Отын Савельич хозяйничать каре вал ни. Военной советэ мыныны тупатэм дырез чидатэк витисько. Со военной советэ мон ӝегатскытэк мынӥ шуыса, лыдӟисьёс асьсэос но шӧдско ни дыр: отын, угось, мынам азьлань улонам бадӟым инты басьтӥсь ужпум сярысь кенешозы. Тупатэм часэ мон генерал доры вуи.

Мон лыктыку, со дорын одӥг городской чиновник пуке вал ни, ӧй ке вунэты, со — таможнялэн директорез вал, зӧк мугоро, ӵыжыт ымныро пересь, вылаз зарни но азвесь укоосын пужъятыса вурем дарали кафтан дӥсямын. Со мынэсьтым Иван Кузьмичлы мар луэм сярысь юалляськыны кутскиз, сое со кум шуыса нима. Мынэсьтым веранме со ӵем дыръя уретылыса, выльысь юанъёс сётъя, валэктӥсь, дышетӥсь ӵектылонъёс вера. Озьы вераськемезъя, сое военной ужез туж ик валась адями шуыны уг ке но лу, нош визьмо но шӧдскись адями луэмез шараяське. Со куспын ӧтем калык люкаськиз. Ваньмыз интыосазы пуксем бере но котыр чашка чай ваемзы бере, генерал ужпумез тупен-тупен туж валамон вераз. «Табере, господа, асьмелы решить карыны кулэ, — вераськонзэ со азьланьтэ, — мятежникъёслы пумит мар кароно асьмелы: наступать-а кароно, либо обороняться-а кароно? Кыкнаизлэн ик та амалъёслэн ас понназы ӟечлыксы но уродлыксы но вань. Наступать каронлэн тушмонъёсыз ӝоггес быдтыны луоно ласянь ӟечлыкез вань; обороняться карон — туж шонер амал, кышкытэз но ичигес… Иське, законлэн верамезъя, радызъя куараостэс люканы кутском, мукет сямен вераса, почи чинъёс вылысен кутском. Господин прапорщик! — мон шоры вазьыса, со ас ужзэ азьланьтэ. — Вералэ милемлы ас малпамдэс».

Мон султӥ но, вакчияк кылъёсын Пугачёв но солэн шайкаез сярысь верам берам, шонер пуктэм военной ужлы пумит самозванец ӧй чидасал шуыса, туж оскытыса верай.

Мынэсьтым верамме чиновникъёс мылкыдатэк пумитазы. Мынэсьтым верамме соос егит муртлэн чик малпатэк лӧптыса верамен лыдъязы. Соос, куспазы шыпыртыку, кинлэн ке лушкемгес: молокосос, шуэм кылыз но мынам пелям кылӥськиз. Генерал нош, мон шорам вазьыса, пальпотыса тазьы шуиз: «Господин прапорщик! Военной советъёсын нырысь куараос ӵем дыръя наступательной движение понна сётэмын луыло; со законной порядок. Табере куараосты люкан ужпуммес азьлань нуоме. Господин коллежский советник! вералэ ас малпамдэс!»

Дарали кафтанэн дӥсяськем пересь мурт, зол гинэ ромен сурам чайзэ куиньметӥ чашказэ дыртысагес юиз но, генераллы тазьы вераз: «Мынам малпамея, ваше превосходительство, наступать карыны но, обороняться карыны но уг яра».

— Кызьы озьы луоз, господин коллежский советник? — абдраменыз пумит вазиз генерал. — Военной тактика мукет амалъёсты уг тоды: либо оборонительной ужпум кутоно, либо наступательной…

— Ваше превосходительство, подкупательно азьлань мынэлэ.

— Э-хе-хе! тӥляд малпамды туж визьмо. Подкупательной азьлань мынон амалэз тактика уг палэнты, ми но тынэсьтыд та кенештэ дырыз дыръя ум вунэтэ. Бездельниклэн йырыз понна сӥзёно луоз… сизьымдон манет, либо сю манет… Секретной коньдон пӧлысь…

— Тӥни соку, — таможнялэн директорез кыл куспы пыриз, — со воръёс ас атаманзэс, пыдъёссэ но киоссэ жильыяса, асьмелы сётозы. Озьы ке ӧз каре, медам луы мон коллежской советник, киргизской така мед луо.

— Та сярысь асьмеос собере малпалом но вераськом на, — шуиз генерал. — Однако, военной мераос но кутытэк уг лу. Господа, законлэн порядокезъя ас куараостэс сётэлэ.

Ваньмызлэн малпамъёссы мынам малпамелы пумит луизы. Войскоосмы осконоесь ӧвӧл, удача уз лу дыр, эскерысагес ужпум кутоно но мар шуыса, ваньмыз чиновникъёс верасько. Крепостьлэн туж юн из борддоръёсыз сьӧры сайулскыса, пушкаос сьӧры ватскыса кылид ке, паськыт кыр бусыын ож кивалтослэсь шудзэ утчамлэсь ортчод дыр шуыса, ваньзы малпало. Ваньмызлэсь малпанъёссэс кылскем бере, генерал чильымысьтыз пеньзэ курткиз но тазьы вераз:

— Государьёсы тӥ мынам! мон тӥледлы ивортоно луисько: ас малпамея мон господин прапорщиклэн вераменыз огкылысь луисько; малы ке шуоно, солэн малпамез тактикалэн валэктэмезъя луэ, нош тактика наступать каронэз оборонительной ужпумъёс сярысь умоен лыдъя.

Собере со дугдӥз но чильымаз тамак тырыны кутскиз. Мынам мылкыды лӧптӥз. Мон вылтӥяськыса чиновникъёс шоры учки. Соос ас куспазы мар ке лушкем верасько, сюлмазы тупамтэзэс возьмато.

— Озьы ке но, мынам государьёсы, — пыдлось лулскыса, пумен нап тамак ӵынзэ лэзьыса, ас вераськонзэ генерал азьланьтэ, — её императорской величествоен, мынам всемилостивейшей государыняеным, мыным оскыса сётэм улосъёсыз шуге-леке вуон дыръя, со быдӟа ответственностез мон ас вылам басьтыны уг дӥсьтӥськы. Озьы бере, мон но куараослэн троссы палан луисько, соослэн верамзыя, осадаез витьыса, город пушкын улӥд ке, визьмогес но луоз, кышкытэз но ичигес, нош неприятельлэсь нападенизэ артиллериен но (быгатоно кадь ке луиз) кыре потыса палэнтоно.

Ас черодазы табере чиновникъёс мон шоры серемес карыса учкизы. Совет быриз. Дано воинлэн лябытэз мыным жаль потӥз, малы ке шуоно, со ас малпамезлы пумит, военной ужез тодӥсьтэм калыклэн малпамзыя кариськиз.

Та сӥё-дано совет бере, кӧня ке нунал ортчыса, Пугачёв Оренбурглы матэ вуэ ини шуыса, ми тодӥм. Кар борддор вылысен мон мятежникъёслэсь войскозэс адӟи. Мятежникъёслэн войскозы, берло приступ дыръя адӟеме сярысь ог дас пол унолы йылэмын кадь потӥз мыным. Пугачёвен почи крепостьёсысь басьтэм артиллериязы но бордазы вань. Советлэсь пуктэмзэ тодам вайыса, Оренбургской крепость пушкын кема пуконо луэмез шӧдыса, ӧжыт гинэ уг бӧрдӥськы.

Оренбургской осада сярысь мон уг гожъя, со историлэн ужез, нош мынам та гожъяме семья куспын ужен герӟаськемын. Вакчияк гинэ верало: та осада дыръя, интыысь начальникъёслэн малпатэкгес ужаменызы сэрен, городын улӥсьёс сютэк улоно но трос пӧртэм курадӟонэз адӟоно луизы. Оренбургын чидантэм секыт вал. Котькудӥз ас улон-вылонэзлэсь йылзэ-пумзэ секыт ӝожконъёсын витьыса улэ, котьмар вузъёс дурыстэм дуно луэмен, ваньмыз ӝуштылӥзы. Татын улӥсьёс азбаръёсазы вуылӥсь ядроослы но дышизы; Пугачёвлэн крепость вылэ приступен вуылэмез но табере соосты уг ни паймыты. Мон чидантэм мӧзмыны кутски. Дыр ортче. Белогорской крепостьысь гожтэтъёс мон ӧй басьтылы. Ваньмыз сюресъёс пыдсаськемын. Марья Ивановнаен люкиськыса улэммы мыным чидантэм луыны кутскиз. Мар солы луэмез тодымтэе монэ курадӟытэ. Вал вылын ворттылонэн гинэ мон ас мылкыдме ӧжыт капчиятылӥ. Пугачёвлэн мыным ӟеч лэсьтэменыз сэрен, мынам табере ӟеч валэ вань. Аслэсьтым начар сиён-юонме мон со валэным шори карылӥ, нуналлы быдэ город сьӧры потаса, Пугачёвлэн вал вылын ворттылӥсьёсыныз ваче пумит ыбылӥськи. Ваче ыбылӥськонъёсын котьку ик ӟеч вало, тыр но кудӟем злодейёс милемыз вормыло вал. Городлэн восьтэт конницаез соосты вормыны уг быгаты. Дырын-дырын милям сютэм улӥсь пехотамы но бусые поталляз; нош лымы мур луэмен сэрен, пазяськем наездникъёсты номыре карыны ӧз быгатылы. Крепостной вырйыл вылысен артиллерия но токма гудыръяз, нош бусыын — вые, собере ляб, жуммем валъёс сое нуллыны уг вормо. Тӥни сыӵе вал ожмаськон ужмылэн тусбуез! Сое тӥни Оренбургской чиновникъёс визьмо но эскерысагес ужамен нимало вылэм!

Одӥг пол милемлы кызьы ке трос гинэ люкаськем мятежникъёсты пазяса улляны кылдӥз. Соку мон эшъёсызлэсь кылем казакез сутӥ но аслам турецкой сабляеным сое шуккыны киме ик урдэм вал ини. Со куспын казак изьызэ басьтӥз но малпамтэ шорысь мыным кеськиз:

— Ӟечбур, Пётр Андреич! Кыӵе тӥледыз инмар уте?

Мон учки но асьмелэсь урядникмес тодмай. Вераны луонтэм солы шумпотӥ.

— Ӟечбур, Максимыч, — шуи мон солы. — Кемалась-а Белогорскойысь?

— Кемалась ик ӧвӧл, батюшка Пётр Андреич; толон гинэ берытски. Мынам бордам тӥледлы гожтэт но вань.

— Кытын бен со? — быдэсак гордэктыса, кеськи мон.

— Ас бордам, — кизэ пияз поныса, Максимыч мыным вера. — Кызьы ке но та гожтэтэз тӥледлы вутто шуыса, Палашалы мон кыл сётӥ. — Соку со мыным куасаллям бумага сётӥз но, ачиз ури-бери тэтчыса кошкиз. Мон бумагазэ сэрттӥ марай но, куалекъяса, тазьы гожтэмез лыдӟи:


«Малпамтэ шорысь, монэ инмарлэн мумытэк но бубытэк но кельтэмез потӥз. Табере музъем вылын мынам нокыӵе родняе но, дурбасьтӥсе но ӧвӧл ни. Мыным котьку но ӟеч малпамдэс, котькыӵе адямилы юрттыны дась луэмдэс тодыса, тӥледлы гожъясько. Та гожтэтэ тӥ доры мед вуоз вал шуыса, инмарлы вӧсяськисько. Максимыч тае тӥледлы вутто шуиз. Палаша Максимычлэсь таӵе ивор но кылэм: тӥледыз, пе, со кыдёкысен, вылазка дыръя, ӵем адӟылӥсько, тӥ, пе, астэс чик эскерытэк возиськоды, тӥ понна синвуоссэс жалятэк инмарлэсь утёнзэ курисьёс сярысь одӥг но уд малпаське. Мон туж кема висьыса улӥ, нош бурмем берам кулэм бубы интыын командовать карись Алексей Иванович отец Герасимез, Пугачёвен кышкатыса, монэ кужмысь ас дораз сётытӥз. Мон асьмелэн коркамы караул улын улӥсько. Алексей Иванович монэ кужмысь аслыз бызьыны эриктэма. Монэ, пе, со кулонлэсь мозмытӥ, Акулина Памфиловналэсь пӧямзэ ӧй шарая, монэ племянница шуыса злодейёс азьын верамзэ лушкемен вози шуэ. Нош Алексей Иванович кадь адямилы кышно кариськытозь, кулыса мыным капчигес луысал. Номре жалянэз валатэк, со монэ туж урод возе. Ӧй ке, пе, визьмаськы, солы кышно кариськыны ӧй ке тупа, монэ злодейлэн лагераз нуыса, Лизавета Харловаез сямен ик, исамес карозы шуыса, кышкатэ. Алексей Ивановичлэсь мон ӧжыт малпаны дыр кури. Со куинь нунал ӵоже витьыны дыр сётӥз; нош куинь нунал ортчем бере мон солы ӧй ке бызьы, соку ӟечез возьманэз ик ӧвӧл. Батюшка Пётр Андреич! тӥ гинэ мынам дурбасьтӥсе; юрттэ мыным, куанерлы. Татчы ми доры ӝоггес войска мед ыстозы шуыса, генераллэсь но командиръёслэсь сюлворыса куре но, луоно ке, асьтэос но лыктэ. Тӥлесьтыд кылскись куанер сирота

Марья Миронова».


Та гожтэтэз лыдӟем берам, мон ӧжыт гинэ ӧй визьтэммы. Аслэсьтым куанер валме жалятэк шпоръёсыным зырӟылыса, мон городэ ворттӥ. Куанер нылэз мозмытон сярысь, городэ мынон сяменым мон озьы но, тазьы но малпаськи но нокыӵе умой визьнод шедьтыны ӧй быгаты. Городэ вуэм бере, мон шонерак генерал доры мынӥ, бызьыса со доры пыри.

Генерал, чильымзэ кыскыса, ас висъетаз олань-талань лёгаське вал. Монэ адӟем бераз, ветлэмысьтыз со дугдӥз. Мынам тусбуе, лэся, сое паймытӥз; мар муген сокем дыртыса лыктэме сярысь сюлмысь юалляське.

— Ваше превосходительство, — шуи мон солы, — ас бубые доры сямен, тӥ доры лыктӥсько; инмар понна ке но мынэсьтым куремме эн палэнтэ: быдэс улон-вылонэлэн шудэз сярысь уж мынэ.

— Мар сыӵе, батюшка? — юаз паймем пересь. — Мар лэсьтыны быгато мон тон понна? Вера.

— Ваше превосходительство, одӥг рота салдатъёстэ, ӝыны сю казакъёстэ мыным сётыны косэ но монэ Белогорской крепостез мятежникъёслэсь сузяны лэзе.

Монэ визьтэммем кожаса, вылды, генерал мон шоры мертчытскыса ик учке (сыӵе малпамез шонер гинэ луысал).

— Кызьы озьы? Белогорской крепостез сузяны? — шуиз со, кӧня ке улыса.

— Пайда луонэзлы мон ручаться карисько, — шуыса, мон солы пӧсь мылкыдме возьматыса верасько. — Только монэ лэзе гинэ.

— Уг, егит адями, — шуиз со, йырзэ сэзъяса. — Со быдӟа куспын неприятель тӥлесьтыд главной военной пунктэн герӟаськондэс висъялоз но, тӥледыз капчиен вормыны быгатоз. Герӟаськон сюрес вандэмын ке…

Воевать карон ужпумъёс сярысь вераськонэн мылкыдаськемзэ шӧдыса, мон кышкай но та вераськонзэ ӝыныё карыны дыртӥ.

— Миронов капитанлэн нылыз, — шуи мон солы, — мыным гожтэт гожтӥз: со юрттэт куре; Швабрин сое аслыз бызьыны эриктэма.

— Зэм-а? О, со Швабрин — туж бадӟым шельма. Мынам ки улам гинэ мед шедёз, мон сое 24 час куспын судить карыны косо но, асьмеос сое крепостьлэн ӝужыт борддор вылаз ыбом! Нош али чиданы кулэ…

— Чиданы! — кеськи мон, асме ачим возьыны быгатытэк. — Нош со куспын со Марья Ивановнаез кышно кароз!..

— О! — пумит вазиз генерал. — Со эшшо беда ӧвӧл на: ог эсэплы Швабринлэн кышноез луыны солы умойгес луоз; али сое Швабрин возьманы быгатоз. Нош куке сое асьмеос ыбим ке, соку, инмар ке ӧз кушты, Мироновалы кузпалъёс шедёзы. Яратоно кадь чебер палкышноос ныл вылын кема уг пуко, мукет сямен вераса, палкышно аслыз кузпал нылъёслэсь но ӝог шедьтоз, шуыны ӧдъясько вал мон.

— Мон ӝоггес кулыны соглаш луо, — урмем мурт сямен, шуи мон солы, — нош сое Швабринлы уг сёт!

— Ба, ба, ба, ба! — шуиз пересь. — Табере валасько ини: тон, видно, Марья Ивановнаез яратӥськод. О, соиз мукет уж! Куанер егит! Озьы ке но, мон тыныд рота салдатъёсты но ӝыны сю казакъёсты нокызьы но сётыны уг быгатӥськы. Сыӵе войскаен мынон уж — визьмо уж уз лу; та ужлэсь ответственностьсэ мон ас вылам басьтыны уг быгатӥськы.

Мон йырме оши, мар карыны но уг ни валаськы. Вдруг мынам йырам мар ке выль малпан шедиз: мар малпан со вал, вашкала романистъёслэн верамзы сямен, лыдӟисьёс сое азьпала люкетысь тодозы.