Канѡ́ны ржⷭ҇твꙋ̀ гдⷭ҇а бг҃а и҆ сп҃са на́шегѡ і҆и҃са хрⷭ҇та̀
| Канѡ́ны ржⷭ҇твꙋ̀ гдⷭ҇а бг҃а и҆ сп҃са на́шегѡ і҆и҃са хрⷭ҇та̀ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
Тропа́рь, гла́съ д҃: [edit]
Ржⷭ҇тво̀ твоѐ, хрⷭ҇тѐ бж҃е на́шъ, возсїѧ̀ мі́рови свѣ́тъ ра́зꙋма: въ не́мъ бо ѕвѣзда́мъ слꙋжа́щїи, ѕвѣздо́ю ᲂу҆ча́хꙋсѧ, тебѣ̀ кла́нѧтисѧ сл҃нцꙋ пра́вды, и҆ тебѐ вѣ́дѣти съ высоты̀ восто́ка: гдⷭ҇и, сла́ва тебѣ̀.
Канѡ́на два̀. [edit]
є҆гѡ́же краегране́сїе:
Хрⷭ҇то́съ вочл҃вѣ́чивсѧ, є҆́же бѣ̀, бг҃ъ пребыва́етъ. Гла́съ а҃.
Пѣ́снь а҃. [edit]
І҆рмо́съ: Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ.
Припѣ́въ: Сла́ва тебѣ̀ бж҃е на́шъ, сла́ва тебѣ̀.
И҆стлѣ́вша престꙋпле́нїемъ, по бж҃їю ѻ҆́бразꙋ бы́вшаго, всегѡ̀ тлѣ́нїѧ сꙋ́ща, лꙋ́чшїѧ ѿпа́дша бжⷭ҇твенныѧ жи́зни, па́ки ѡ҆бновлѧ́етъ мꙋ́дрый содѣ́тель, ꙗ҆́кѡ просла́висѧ.
Ви́дѣвъ зижди́тель ги́блема человѣ́ка, рꙋка́ми є҆го́же созда̀, приклони́въ нб҃са̀ схо́дитъ: сего́ же ѿ дв҃ы бжⷭ҇твенныѧ чⷭ҇тыѧ, всего̀ ѡ҆сꙋществꙋ́етъ, вои́стиннꙋ вопло́щсѧ, ꙗ҆́кѡ просла́висѧ.
Мꙋ́дрость, сло́во, и҆ си́ла, сн҃ъ сы́й ѻ҆́ч҃їй и҆ сїѧ́нїе, хрⷭ҇то́съ бг҃ъ, си́лъ ᲂу҆таи́всѧ, є҆ли́кѡ премі́рныхъ, и҆ є҆ли́кѡ на землѝ, и҆ вочл҃вѣ́чсѧ ѡ҆бнови́лъ є҆́сть на́съ, ꙗ҆́кѡ просла́висѧ.
Гла́съ то́йже.
І҆рмо́съ: Спасѐ лю́ди чꙋдодѣ́йствꙋѧй влⷣка, мо́крꙋю мо́рѧ волнꙋ̀ ѡ҆землени́въ дре́вле, во́лею же ро́ждсѧ ѿ дв҃ы, стезю̀ прохо́днꙋ небесѐ полага́етъ на́мъ: є҆го́же по сꙋществꙋ̀ ра́вна же ѻ҆ц҃ꙋ̀ и҆ человѣ́кѡмъ сла́вимъ.
Сла́ва: И҆знесѐ чре́во свѧще́нное сло́во ꙗ҆́вѣ неѡпа́льнѡ живопи́санное кꙋпино́ю, смѣше́на зра́комъ человѣ́чимъ бг҃а, є҆́ѵы ѻ҆каѧ́ннꙋю ᲂу҆тро́бꙋ клѧ́твы дре́внїѧ разрѣша́ющее го́рькїѧ: є҆го́же земні́и сла́вимъ.
И҆ ны́нѣ: Показа̀ ѕвѣзда̀ пре́жде со́лнца, сло́во, прише́дшее ᲂу҆ста́вити грѣхѝ, волхвѡ́мъ, ꙗ҆́вѣ во ᲂу҆бо́зѣмъ верте́пѣ, ми́лостиваго тебѐ, пелена́ми пови́та: є҆го́же ра́дꙋющесѧ ви́дѧхꙋ самого̀ и҆ чл҃вѣ́ка и҆ гдⷭ҇а.
Пѣ́снь г҃. [edit]
І҆рмо́съ: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.
И҆́же дохнове́нїѧ прича́щсѧ лꙋ́чшагѡ а҆да́мъ пе́рстный, и҆ къ тлѣ́нїю попо́лзсѧ же́нскою ле́стїю, хрⷭ҇та̀ ѿ жены̀ ви́дѧ, вопїе́тъ: и҆́же менє̀ ра́ди по мнѣ̀ бы́въ, свѧ́тъ є҆сѝ, гдⷭ҇и.
Соѻбра́зенъ бре́нномꙋ ᲂу҆мале́нїю растворе́нїемъ, хрⷭ҇тѐ, бы́въ, и҆ прича́стїемъ пло́ти го́ршїѧ, пода́въ бжⷭ҇твеннагѡ є҆стества̀, зе́мленъ бы́въ, и҆ пребы́въ бг҃ъ, и҆ возвы́сивый ро́гъ на́шъ, свѧ́тъ є҆сѝ, гдⷭ҇и.
Виѳлее́ме, весели́сѧ, кнѧзе́й і҆ꙋ́довыхъ сы́й цр҃ь: і҆и҃лѧ бо пасы́й, на ра́мѣхъ херꙋві́мскихъ, и҆зъ тебє̀ про́йде хрⷭ҇то́съ ꙗ҆́вѣ: и҆ вознесы́й ро́гъ на́шъ надъ всѣ́ми воцр҃и́сѧ.
І҆рмо́съ: При́зри на пѣ̑нїѧ рабѡ́въ, бл҃годѣ́телю, врага̀ смирѧ́ѧ вознесе́ннꙋю горды́ню: носѧ́й же, всеви́дче, грѣха̀ превы́шше, непоколе́блемѡ ᲂу҆тверждє́нныѧ, бл҃же, пѣвцы̀, ѡ҆снова́нїемъ вѣ́ры.
Сла́ва: Невѣ́сты пречⷭ҇тыѧ пребога́тое ржⷭ҇тво̀, ви́дѣти па́че ᲂу҆ма̀ сподо́бивсѧ, ли́къ свирѧ́ющихъ преклонѧ́шесѧ стра́ннымъ ѻ҆́бразомъ: чи́нъ же пою́щихъ безпло́тныхъ, цр҃ѧ̀ хрⷭ҇та̀ безсѣ́меннѡ вопло́щшагосѧ.
И҆ ны́нѣ: Высото́ю црⷭ҇твꙋѧй нб҃съ, милосе́рдїемъ соверша́етъ ѡ҆ на́съ, и҆зъ безневѣ́стныѧ ѻ҆трокови́цы: невеще́ственъ сы́й пре́жде, но по́слѣжде сло́во ѡ҆дебелѣ́вшо пло́тїю, да па́дшаго къ себѣ̀ привлече́тъ первозда́ннаго.
Гдⷭ҇и, поми́лꙋй, гⷤ.
Ѵ҆пакоѝ, гла́съ и҃: [edit]
Нача́токъ ꙗ҆зы́кѡвъ, нб҃о тебѣ̀ принесѐ, лежа́щемꙋ младе́нцꙋ во ꙗ҆́слехъ, ѕвѣздо́ю волхвы̀ призва́вый, ꙗ҆̀же и҆ ᲂу҆жаса́ше, не ски́птры и҆ престо́ли, но послѣ́днѧѧ нищета̀: что́ бо хꙋ́ждше верте́па; что́ же смире́ншее пеле́нъ; въ ни́хже просїѧ̀ бжⷭ҇тва̀ твоегѡ̀ бога́тство: гдⷭ҇и, сла́ва тебѣ̀.
Пѣ́снь д҃. [edit]
І҆рмо́съ: Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.
Є҆го́же дре́вле проречѐ і҆а́кѡвъ, ꙗ҆зы́кѡвъ ѡ҆жида́нїе, хрⷭ҇тѐ, ѿ колѣ́на і҆ꙋ́дова возсїѧ́лъ є҆сѝ, и҆ си́лꙋ дама́сковꙋ, самарі́йскꙋю же коры́сть прише́лъ є҆сѝ и҆спроврещѝ, ле́сть премѣнѧ́ѧ въ мѣ́рꙋ бг҃олѣ́пнꙋ: сла́ва си́лѣ твое́й, гдⷭ҇и.
Волхва̀ дре́вле валаа́ма слове́съ ᲂу҆ченикѝ, мꙋ́дрыѧ ѕвѣздоблюсти́тели, ра́дости и҆спо́лнилъ є҆сѝ: ѕвѣзда̀ ѿ і҆а́кѡва возсїѧ́въ, влⷣко: ꙗ҆зы́кѡвъ нача́токъ вводи́мый, прїѧ́лъ же є҆сѝ ꙗ҆́вѣ: сла́ва си́лѣ твое́й, гдⷭ҇и.
Ꙗ҆́кѡ на рꙋно̀, во чре́во дв҃ы сше́лъ є҆сѝ до́ждь, хрⷭ҇тѐ, и҆ ꙗ҆́кѡ ка̑пли на зе́млю ка́плющыѧ. є҆ѳїо́пїа и҆ ѳарсі́съ, и҆ а҆раві́тстїи ѻ҆́строви же, сава̀ ми́дѡвъ всю̀ зе́млю держа́щїи, припадо́ша тебѣ̀, сп҃се: сла́ва си́лѣ твое́й, гдⷭ҇и.
І҆рмо́съ: Ро́да человѣ́ча ѡ҆бновле́нїе дре́вле поѧ̀ прⷪ҇ро́къ а҆ввакꙋ́мъ предвозвѣща́етъ, ви́дѣти неизрече́ннѡ сподо́бивсѧ ѻ҆́бразъ: млады́й млⷣнецъ бо и҆зъ горы̀ дв҃ы и҆зы́де, люде́й во ѡ҆бновле́нїе, сло́во.
Ра́венъ произы́де человѣ́кѡмъ вы́шнїй, во́лею пло́ть прїи́мъ ѿ дв҃ы, ꙗ҆́дъ ѡ҆чи́стити ѕмі́евы главы̀, приводѧ̀ всѧ̑ къ свѣ́тꙋ живоно́сномꙋ, бг҃ъ сы́й, ѿ вра́тъ безсо́лнечныхъ.
Сла́ва: Ꙗ҆зы́цы, и҆̀же дре́вле тле́ю погрꙋже́ни, па́гꙋбы ѕѣлѡ̀ вра́жїѧ ᲂу҆бѣжа́вше, возно́сѧтъ рꙋ́ки съ похва́льными пѣ́сньми, є҆ди́наго чтꙋ́ще хрⷭ҇та̀, ꙗ҆́кѡ бл҃годѣ́телѧ, къ на́мъ ми́лостивнѡ прише́дшаго.
И҆ ны́нѣ: И҆зъ ко́рене и҆зра́стши і҆ессе́ева, дв҃о, ᲂу҆ста́вы прешла̀ є҆сѝ человѣ́ческагѡ сꙋщества̀, ѻ҆́ч҃ее ро́ждши превѣ́чное сло́во, ꙗ҆́кѡ благоволѝ са́мъ запеча́таннꙋю ᲂу҆тро́бꙋ проитѝ, и҆стоща́нїемъ стра́ннымъ.
Пѣ́снь є҃. [edit]
І҆рмо́съ: Бг҃ъ сы́й мі́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.
Въ рабѣ́хъ ке́саревымъ повелѣ́нїемъ написа́тисѧ поко́рьсѧ: и҆ на́съ рабы̑ сꙋ́щыѧ, врага̀ и҆ грѣха̀ свободи́лъ є҆сѝ, хрⷭ҇тѐ. ве́сь же по на́мъ ѡ҆бнища́въ, и҆ пе́рстнагѡ ѿ самагѡ̀ є҆дине́нїѧ и҆ ѡ҆бще́нїѧ бг҃осодѣ́лалъ є҆сѝ.
Сѐ дв҃а, ꙗ҆́коже дре́вле речѐ, во чре́вѣ прїе́мши родила̀ є҆́сть бг҃а вочеловѣ́чшасѧ, и҆ пребыва́етъ дв҃а. є҆ѧ́же ра́ди примири́вшесѧ бг҃ꙋ грѣ́шнїи, бцⷣꙋ сꙋ́щꙋю вои́стиннꙋ вѣ́рнїи воспои́мъ.
І҆рмо́съ: И҆зъ но́щи дѣ́лъ ѡ҆мраче́нныѧ пре́лести ѡ҆чище́нїе на́мъ, хрⷭ҇тѐ, бо́дреннѡ ны́нѣ соверша́ющымъ пѣ́снь, ꙗ҆́кѡ бл҃годѣ́телю, прїидѝ, подава́ѧй ᲂу҆до́бнꙋ стезю̀, по не́йже востека́юще ѡ҆брѧ́щемъ сла́вꙋ.
Сла́ва: Лю́тꙋю враждꙋ̀, ю҆́же къ на́мъ влⷣка ѿсѣка́ѧ па́ки, плотски́мъ прише́ствїемъ, да держа́щаго разрꙋши́тъ дꙋшетлѣ́ющаго, мі́ръ сочета́ѧ съ невеще́ственными сꙋществы̀, положи́въ пристꙋ́пна, ро́ждшаго, тва́ри.
И҆ ны́нѣ: Лю́дїе ви́дѣша дре́вле ѡ҆мраче́ннїи по дне́хъ свѣ́тъ вы́шнїѧ свѣ́тлости: ꙗ҆зы́ки же бг҃ꙋ наслѣ́дїе сн҃ъ прино́ситъ, подаѧ̀ та́мѡ неизрече́ннꙋю бл҃года́ть, и҆дѣ́же мно́жайшїй процвѣтѐ грѣ́хъ.
Пѣ́снь ѕ҃. [edit]
І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.
Прїи́де вопло́щсѧ хрⷭ҇то́съ бг҃ъ на́шъ и҆зъ чре́ва, є҆го́же ѻ҆ц҃ъ пре́жде денни́цы ражда́етъ: правлє́нїѧ же держа̀ пречи́стыхъ си́лъ, въ ꙗ҆́слехъ ско́тїихъ возлежи́тъ, и҆ пелена́ми повива́етсѧ: разрѣша́етъ же многоплетє́нныѧ плєни́цы прегрѣше́нїй.
Ю҆́но и҆зъ а҆да́ма ѻ҆троча̀ смѣше́нїѧ, роди́сѧ сн҃ъ, и҆ вѣ̑рнымъ даде́сѧ, бꙋ́дꙋщагѡ вѣ́ка се́й є҆́сть ѻ҆ц҃ъ и҆ нача́льникъ: и҆ нарица́етсѧ вели́кагѡ совѣ́та а҆́гг҃лъ. се́й крѣ́покъ бг҃ъ є҆́сть, и҆ держа́й ѻ҆́бластїю всю̀ тва́рь.
І҆рмо́съ: Ѡ҆бита́ѧ і҆ѡ́на въ преиспо́днихъ морски́хъ, прїитѝ молѧ́шесѧ, и҆ бꙋ́рю ᲂу҆толи́ти: ᲂу҆нзе́нъ же а҆́зъ мꙋ́чащагѡ стрѣло́ю, хрⷭ҇тꙋ̀ воспѣва́ю: ѕѡ́лъ гꙋби́телю, ско́рѡ прїитѝ тебѣ̀ къ мое́й лѣ́ности.
Сла́ва: И҆́же бѣ̀ и҆спе́рва къ бг҃ꙋ, бг҃ъ сло́во, ны́нѣ ᲂу҆твержда́етъ немощно́е дре́вле: ви́дѣвъ сохрани́ти, є҆́же по на́мъ сꙋщество̀, и҆́мже себѐ вторы́мъ ѻ҆бще́нїемъ а҆́бїе проѧвлѧ́ѧ страсте́й свобо́дное.
И҆ ны́нѣ: Грѧде́тъ на́съ ра́ди, и҆зъ а҆враа́млихъ чре́слъ, темнопа́дшыѧ во мра́цѣ прегрѣше́нїй, сы́ны воздви́гнꙋти до́лꙋ пони́кшихъ: и҆́же во свѣ́тѣ ѡ҆бита́ѧй и҆ ꙗ҆́слехъ, чрезъ достоѧ́нїе, ны́нѣ благоволи́въ въ человѣ́ческое спасе́нїе.
Гдⷭ҇и, поми́лꙋй, гⷤ. Сла́ва, и҆ ны́нѣ:
Конда́къ, гла́съ г҃. [edit]
Дв҃а дне́сь пресꙋ́щественнаго ражда́етъ, и҆ землѧ̀ верте́пъ непристꙋ́пномꙋ прино́ситъ. а҆́гг҃ли съ па́стырьми славосло́вѧтъ, волсви́ же со ѕвѣздо́ю пꙋтеше́ствꙋютъ: на́съ бо ра́ди роди́сѧ ѻ҆троча̀ мла́до, превѣ́чный бг҃ъ.
І҆́косъ: [edit]
Є҆де́мъ виѳлее́мъ ѿве́рзе, прїиди́те ви́димъ, пи́щꙋ въ та́йнѣ ѡ҆брѣто́хомъ: прїиди́те, прїи́мемъ сꙋ̑щаѧ ра̑йскаѧ внꙋ́трь верте́па: та́мѡ ꙗ҆ви́сѧ ко́рень ненапое́нъ, прозѧба́ѧ ѿпꙋще́нїе: та́мѡ ѡ҆брѣ́тесѧ кла́дѧзь неиско́панъ, и҆зъ негѡ́же дв҃дъ пи́ти дре́вле возжада́сѧ. та́мѡ дв҃а ро́ждши младе́нца, жа́ждꙋ ᲂу҆ста́ви а҆́бїе а҆да́мовꙋ и҆ дв҃довꙋ. сегѡ̀ ра́ди къ немꙋ̀ и҆́демъ, гдѣ̀ роди́сѧ ѻ҆троча̀ мла́до превѣ́чный бг҃ъ.
Пѣ́снь з҃. [edit]
І҆рмо́съ: Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѣ̀ пла́мене стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Па́стырїе свирѧ́юще, ᲂу҆жа́сно свѣтоѧвле́нїе полꙋчи́ша: сла́ва бо гдⷭ҇нѧ ѡ҆блиста̀ и҆̀хъ, и҆ а҆́гг҃лъ, воспо́йте, вопїѧ̀: ꙗ҆́кѡ роди́сѧ хрⷭ҇то́съ, ѻ҆тцє́въ бг҃ъ бл҃гослове́нный.
Внеза́пꙋ съ сло́вомъ а҆́гг҃ловымъ нбⷭ҇наѧ вѡ́инства, сла́ва, вопїѧ́хꙋ, бг҃ꙋ въ вы́шнихъ, на землѝ ми́ръ, въ человѣ́цѣхъ благоволе́нїе: хрⷭ҇то́съ возсїѧ̀, ѻ҆тцє́въ бг҃ъ бл҃гослове́нный.
Глаго́лъ что̀ се́й, реко́ша па́стырїе; прише́дше ᲂу҆ви́димъ бы́вшее, бжⷭ҇твеннагѡ хрⷭ҇та̀. виѳлее́ма же доше́дше, съ ро́ждшею покланѧ́хꙋсѧ, воспѣва́юще: ѻ҆тцє́въ бж҃е, бл҃гослове́нъ є҆сѝ.
І҆рмо́съ: Всецр҃ѧ̀ любо́вїю ᲂу҆ловле́ннїи ѻ҆́троцы, ᲂу҆кори́ша безчи́сленнѡ ꙗ҆рѧ́щасѧ мꙋчи́телѧ ѕлобо́жное ꙗ҆зыковре́дїе, и҆́мже повинꙋ́сѧ ѻ҆́гнь мно́гїй, влⷣцѣ глаго́лющымъ: во вѣ́ки бл҃гослове́нъ є҆сѝ.
Слꙋги̑ ᲂу҆́бѡ неи́стовнѡ попалѧ́етъ, спаса́етъ же всепалѧ́щаѧ со стра́хомъ ю҆́ныѧ, седмочи́сленнымъ разжже́нїемъ возвы́шена: и҆̀хже вѣнча̀ пла́мень, незави́стнѡ гдⷭ҇ꙋ подаю́щꙋ благоче́стїѧ ра́ди ро́сꙋ.
Сла́ва: Помо́щниче хрⷭ҇тѐ человѣ́кѡмъ, проти́вное гада́нїе, воплоще́нїе неизглаго́ланное и҆мѣ́ѧй, посрами́лъ є҆сѝ: бога́тство ѡ҆боже́нїѧ носѧ́й, воѡбра́жсѧ ны́нѣ, є҆гѡ́же ра́ди ᲂу҆пова́нїемъ, свы́ше въ преиспо́днїй прїидо́хомъ мра́къ.
И҆ ны́нѣ: Ѕлѣ̀ неꙋдержа́ннѡ возвыша́емый, нече́стнѡ бѣсѧ́щїйсѧ ѿ развраще́нїѧ мі́ра, низложи́лъ є҆сѝ всемо́щнѣ грѣ́хъ, ꙗ҆̀же привлечѐ пре́жде, дне́сь же ѿ сѣ́тей спаса́еши, вопло́щсѧ во́лею бл҃годѣ́телю.
Пѣ́снь и҃. [edit]
І҆рмо́съ: Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ. не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Влече́тъ вавѷлѡ́нѧ дщѝ ѻ҆́троки плѣнє́нныѧ дв҃довы ѿ сїѡ́на къ себѣ̀: дароно́сцы же сле́тъ волхвы̀ дѣ́ти, дв҃довѣ бг҃опрїѧ́тнѣй дще́ри молѧ́щыѧсѧ. тѣ́мъ воспѣва́юще воспои́мъ: да благослови́тъ тва́рь всѧ̑ гдⷭ҇а, и҆ превозно́ситъ во всѧ̑ вѣ́ки.
Ѻ҆рга́ны ᲂу҆клони́ша плачє́вныѧ пѣ̑сни, не поѧ́хꙋ бо въ землѝ чꙋжде́й ѻ҆́троцы сїѡ́новы: вавѷлѡ́нскꙋю же разрѣша́етъ ле́сть всю̀, и҆ мꙋсїкі̑йскїѧ соста́вы, въ виѳлее́мѣ возсїѧ́въ хрⷭ҇то́съ. тѣ́мъ воспѣва́юще воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
Коры̑сти вавѷлѡ́нъ црⷭ҇тва сїѡ́нѧ, и҆ плѣне́нное бога́тство прїѧ́тъ: сокрѡ́вища же хрⷭ҇то́съ въ сїѡ́нъ сегѡ̀, и҆ царѝ ѕвѣздо́ю наставлѧ́ѧ ѕвѣздоблюсти́тели влече́тъ. тѣ́мъ воспѣва́юще воспои́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.
І҆рмо́съ: Оу҆тро́бꙋ неѡпа́льнꙋ ѡ҆бразꙋ́ютъ ѻ҆трокови̑цы, и҆̀же въ ве́тсѣмъ ѡ҆палѧ́емїи ю҆́ношы, преесте́ственнѡ ражда́ющꙋю запечатлѣ́ннꙋ. ѻ҆боѧ́ же содѣва́ющи чꙋдодѣ́йство є҆ди́но, лю́ди къ пѣ́нїю возставлѧ́етъ бл҃года́ть.
Сла́ва: Па́гꙋбы ᲂу҆бѣжа́вши, є҆́же ѡ҆божи́тисѧ пре́лестїю непреста́ннѡ пое́тъ и҆злїѧ́вшагосѧ сло́ва, ю҆́ношески всѧ̀ съ тре́петомъ тва́рь, несла́внꙋ хвалꙋ̀ боѧ́щисѧ прино́ситъ, тлѣ́нна сꙋ́щи, а҆́ще и҆ мꙋ́дрѣ терпѧ́ше.
И҆ ны́нѣ: Грѧде́ши, заблꙋ́ждшее на па́жить ѡ҆браща́ѧ цвѣтотво́рнꙋю, и҆зъ пꙋсты́нныхъ холмѡ́въ, ꙗ҆зы́кѡвъ возста́нїе, человѣ́ческое є҆стество̀, си́лꙋ нꙋ́жнꙋю человѣкоꙋбі́йцы ᲂу҆гаси́ти: мꙋ́жъ же ꙗ҆ви́всѧ и҆ бг҃ъ промышле́нїемъ.
Пѣ́снь ѳ҃. [edit]
І҆рмо́съ: Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ.
И҆зрѧ́дное тече́нїе зрѧ́ще волсвѝ неѻбы́чныѧ но́выѧ ѕвѣзды̀ новосїѧ́ющїѧ, нб҃са̀ просвѣща́ющїѧ, хрⷭ҇та̀ цр҃ѧ̀ зна́менꙋющїѧ на землѝ, ро́ждшагосѧ въ виѳлее́мѣ, на спасе́нїе на́ше.
Новорожде́нное, волхвѡ́мъ глаго́лющымъ, ѻ҆троча̀ цр҃ь, є҆го́же ѕвѣзда̀ ꙗ҆вѝ, гдѣ́ є҆сть, томꙋ́ бо поклони́тисѧ прїидо́хомъ: ꙗ҆рѧ́сѧ и҆́рѡдъ смꙋща́шесѧ, хрⷭ҇та̀ ᲂу҆би́ти бг҃обо́рецъ шата́ѧсѧ.
И҆спыта̀ и҆́рѡдъ вре́мѧ ѕвѣзды̀, є҆ѧ́же вожде́нїемъ волсвѝ въ виѳлее́мѣ покланѧ́хꙋсѧ хрⷭ҇тꙋ̀ съ да́ры: є҆́юже ко ѻ҆те́чествꙋ наставлѧ́еми, лю́таго дѣтоꙋбі́йцꙋ ѡ҆ста́виша порꙋ́гана.
І҆рмо́съ: Люби́ти ᲂу҆́бѡ на́мъ, ꙗ҆́кѡ безбѣ́дное стра́хомъ ᲂу҆до́бѣе молча́нїе, любо́вїю же, дв҃о, пѣ̑сни тка́ти спротѧже́ннѡ сложє́нныѧ, неꙋдо́бно є҆́сть: но и҆ мт҃и, си́лꙋ, є҆ли́ко є҆́сть произволе́нїе, да́ждь.
Сла́ва: Ѻ҆́бразы несвѣ̑тлы, и҆ сѣ̑ни приведе́ны, ѽ мт҃и чⷭ҇таѧ, ви́дѣвше сло́ва, но́ва ꙗ҆́вльшагѡсѧ ѿ вра́тъ заключе́нныхъ: мнѧ́щїи же и҆́стиннꙋю свѣ́тлость, досто́йнѡ твою̀ благослови́мъ ᲂу҆тро́бꙋ.
И҆ ны́нѣ: Жела́нїе полꙋчи́вше, и҆ бж҃їѧ прише́ствїѧ хрⷭ҇токра́снїи лю́дїе сподо́бльшесѧ, ны́нѣ ᲂу҆тѣша́ютсѧ па́ки бытїе́мъ: ꙗ҆́кѡ живоно́снꙋ благода́ть дае́ши, дв҃о чⷭ҇таѧ, поклони́тисѧ сла́вѣ.
Свѣти́ленъ. [edit]
Посѣти́лъ ны̀ є҆́сть свы́ше сп҃съ на́шъ, восто́къ восто́кѡвъ, и҆ сꙋ́щїи во тмѣ̀ и҆ сѣ́ни ѡ҆брѣто́хомъ и҆́стинꙋ: и҆́бо ѿ дв҃ы роди́сѧ гдⷭ҇ь.