Йылтэм, пумтэм, пыттэм паськыт
Камшур туннэ сайказ, вырӟиз.
Одӥг огзэс донгылыса,
Мылысь-кыдысь ву вылытӥ
Паськыт йӧос улэ васько.
Кымыс йӧос, зӧк буржуйёс,
Мынэ, кошке, ӝоггем бызе!
Бадӟым Камлэсь ӟильтыр вузэ,
Шулдыр кылзэ, выль улонзэ
Тӥ пытсаса возьылӥды.
Камшур вылэ шунды усе,
Тулыс вуэз со шуныттэ.
Талы котькин туж шумпотэ.
Луд ӵӧжъёс но туннэ нунал
Зол кырӟало, праздник утё.
Дасо-кызё, ӵошен соос
Камшур вадьсын лобылыса,
Олань-талань мыно, ветло,
Сэбре Камшур вылэ пуксё;
Пласько, шудо, нош ик лобӟо.
Нош ик лобӟо, нош ик пуксё;
Ульча вылын пиналъёс кадь
Соос шудо шулдыръяса;
Ӵӧж куараен юн мадьыса,
Шумпотэмзэс мыным ысто.
Камшур уськиз, дунне вошкиз!
Пеймыт, пачкам секыт дыръёс
Тулыс йӧ кадь быризы ни.
Ултӥяса возем калык
Пеймыт гуысь султӥз ини.
Уд калыке!
Плугдэ кутса,
Музъем пушкысь
Выль улондэ
Мургес копа.
