Казаков - Кокымшо кинде

Кокымшо кинде
почеламут

Миклай Казаков

Пареҥге - кокымшо кинде
Туддеч посна кузе илет?
Устел воктек унам от шынде,
Огеш лий тутло кочкышет.
Коча-влакна моктен ойленыт:
«Пареҥге - тиде роколма».
Чынак вет, еҥын вийже дене
Рок помышешак тӱзлана.
Ончал пареҥге нурыш таче:
Еҥ толкын куткыла шолеш;
Копалке, савырен йымачын,
Йыраҥым писын куралеш.
Шеҥгечын, ошын-ошын койын,
Возеш волгалтын вожсаска.
Пашаште кеч-мыняре нойо:
Погыстарет - чонлан ласка.
Кеч кавыскен пареҥге шудо,
Куан садак шыҥа шӱмеш.
Пасушто йылмым так ит рӱдӧ,
Пӱжалтын тырше кас лиймеш.
Пареҥге. Мо шонет, пареҥге
Ала сӱретлан вел йӧра?
Уке, шӱм дене мо ырен гын,
Тек калык чапым пойдара.