є҃
Сло́во ст҃а́гѡ і҆ѡа́нна златоꙋ́стагѡ,
ка́кѡ не лѣни́тисѧ кни̑ги честѝ. М но́зи непочита́нїемъ бжⷭ҇твенныхъ писа́нїй съ пра́вагѡ пꙋтѝ соврати́шасѧ, и҆ заблꙋди́вше погибо́ша. И҆ні́и же и҆ кни̑ги почита́юще, но соверше́нна не и҆мѧ́хꙋ ра́зꙋма, съ пра́вагѡ пꙋтѝ соврати́шасѧ, бг҃ꙋ попꙋсти́вшꙋ, вели́чїѧ и҆́хъ ра́ди, занѐ ра́зꙋмъ прїи́мше, а҆ пра́вды не творѧ́тъ самохо́тїемъ.
Мꙋ́жъ бо кни́женъ, а҆ пїѧ́нчивъ не мо́жетъ напра́витисѧ на и҆́стинꙋ спасе́нїѧ. А҆́ще кто̀ не ѹ҆мѣ́ѧ кни́гъ мꙋ́дрꙋетъ, таковы́й подо́бенъ ѡ҆пло́тꙋ без̾ подпо́ръ стоѧ́щꙋ: а҆́ще бꙋ́детъ вѣ́тръ, то паде́тсѧ.
Та́кѡ и҆ мꙋдрꙋ́ѧй, а҆ не кни́жникъ, а҆́ще на́нь грѣхо́вный пахне́тъ вѣ́тръ, паде́тъ, не и҆мы́й подпо́ра слове́съ кни́жныхъ, и҆ мꙋ́дростей кни́ги.
А҆́ще то сѧ̀ ѻ҆боѐ мни́тъ въ человѣ́цѣ, то ꙗ҆́кѡ ꙭ҆́чи ѻ҆́бѣ въ тѣлесѝ соверше́ннѡ и҆мꙋ́ще глѧдѧ́тъ.
Пти́цамъ бо тогѡ̀ ра́ди крилѣ̑ данѣ̑, да сѣ́тей человѣ́ческихъ и҆збѣжа́тъ, а҆ человѣ́кѡмъ кни̑ги, ꙗ҆́же всю̀ непрїѧ́зненнꙋ ле́сть ѡ҆бнажа́ютъ. Мно́зи бо сꙋ́ть кѡ́зни лꙋка́вагѡ дїа́вола, и҆́миже ѹ҆ловлѧ́етъ человѣ́ки: ѻ҆́вого бо гнѣ́вомъ надыма́етъ, а҆ и҆но́го за́вистїю ѹ҆стрѣлѧ́етъ, и҆но́го же на татьбꙋ̀ и҆ ѡ҆би́дѣти ѹ҆ча́тъ, а҆ и҆ны́хъ на позо́ры и҆ на и҆́гры, и҆ на плѧса́нїе поты́чꙋтъ, а҆ и҆но́го на пїѧ́нство и҆ на блꙋ́дъ ласка́ютъ, а҆ и҆ны̑ѧ на го́рдость ѻ҆стрѧ́тъ и҆ скꙋ́пости ѹ҆ча́тъ, а҆ и҆но́го на кощꙋны̀ и҆ на плеска́нїе и҆ на пѣ̑сни, и҆ на гꙋ́сли поꙋча́ютъ, а҆ и҆ны́хъ лѣ́ностїю ѡ҆крада́ютъ, да къ цр҃кви бы́ша не приходи́ли.
Мно́ги бо соблажнѧ́ютъ, хотѧ̀ на́съ ѿ бг҃а ѿлꙋчи́ти и҆ црⷭ҇тва нбⷭ҇нагѡ чꙋ́жа сотвори́ти. Бг҃ъ человѣ́кѡмъ ѿкры̀ ст҃ы́ми кни́гами всѧ̑ соблажє́нїѧ є҆гѡ̀. И҆ на дїа́вола дарова̀ чтⷭ҇ны́й крⷭ҇тъ, а҆ на сѣ̑ти є҆гѡ̀, ст҃ы̑ѧ кни̑ги, и҆̀хже послꙋ́шающе и҆ сотворѧ́юще речє́ннаѧ полꙋчи́мъ жи́знь вѣ́чнꙋю и҆ со ст҃ы́ми весе́лїе ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ.
This is a translation and has a separate copyright status from the original text. The license for the translation applies to this edition only.
Original:
This work was published before January 1, 1929, and is in the public domain
Translation:
This work was published before January 1, 1929, and is in the public domain
This is a translation and has a separate copyright status from the original text. The license for the translation applies to this edition only.
