Иш менән ҡуш. Гүзәл Ситдиҡова

From Wikisource
Jump to navigation Jump to search


ИШ МЕНӘН ҠУШ



Бар нәмәне парлы биргән
Хаҡ тәғәлә донъяға,
Аҡ һәм ҡара, көн менән төн,
Таш... - өҫтөнән һыу аға.

Тыуым булғас - үлем дә бар,
Бар әсеһе, татлыһы,
Бер һанындай ябайы бар,
Бар серле мең ҡатлыһы.

Изгелек менән яуызлыҡ,
Ҡайғы менән бар шатлыҡ,
Ялған ҡоторһа бер яҡта -
Уны еңер бар хаҡлыҡ .

Пак һәм нәжес, уң менән һул,
Байы менән ярлыһы,
Гөл-сәскәле йәйебеҙ бар,
Ҡышыбыҙ бар ҡарлыһы.

Ишле-ҡушлы сифаттарҙың
Була кеше һайыны.
... Быуат-быуат тыуа тора
Һәр һәбилгә - Хаины.

* Һәбил менән Хаин - Әҙәм менән Һаууаның улдары. Хаины Һәбилде нығыраҡ яраталар тип көнләшеп, уны үлтерә.


2014


CC SomeRightsReserved.png
Cc-by white.svgCc-sa white.svg
This work is licensed under the Creative Commons Attribution-ShareAlike 3.0 Unported license.