Ичӧт катехизис

by Попов Андрей Ефимович

Ичӧт катехизис  (1863)  by Попов Андрей Ефимович

Гижан кад: 1863, Йӧзӧдан во: 1863. Ӧшмӧс: Краткий православный катехизис на русском и зырянском языках. Санкт-Петербург, 1863.

Юалӧм: Мый понда тэ шусян кристианинӧн?

Висьталӧм: Сы понда, мый веруйта миян Господьлы Исус Кристослы и кута Сылысь Святӧй Закон.

Юалӧм: Мыйӧ велӧдӧ кристианскӧй вера?

Висьталӧм: Велӧдӧ быдсяма веськыдӧ и быдсяма буркерӧмӧ, мый йылысь кузя висьталӧма пророкъяс и апостолъяс книгаясын, а дженьыдика быдсӧн сійӧ гижӧма миян православнӧй вера висьталӧмын, коді и лыддьысьӧ со кыдзи:

1. Веруйта, мый эм ӧтик Ен Бать, быдсяматор кутысь, небеса и му, быдсӧн тыдалан и тыдавтӧмтор Керысь.

2. И ӧтик Господь Исус Кристос, ӧтка-ӧдинечка Ен Пи, коді чужис Батьсянь быдсяма пӧраысь войдӧр. Югыд югыдсянь, истиннӧй Ен истиннӧй Енсянь, коді рӧдитӧма, а не керӧма, ӧти существоа Батьыскӧд и Сыӧн быдсяматор лоӧма.

3. Ми мортъяс вӧсна и миянӧс спаситӧм вӧсна лэччис небесаяс вылысь и босьтіс морт яй Свят Дух и Мария Нывсянь, и мортӧн лои.

4. Миян вӧсна рӧспинайтӧма Понтийса Пилат дырйи, мучитчис и вӧлі гуалӧма.

5. И ловзис коймӧд лунӧ гижӧдъяс серти.

6. И кайис небесаяс вылӧ и пукалӧ Бать веськыдладорас.

7. (Коді) и бара воас славаӧн судитны ловъяясӧс и кулӧмаясӧс и Сы сарстволы оз ло пом.

8. (Сідзжӧ веруйта, мый эм) и Свят Дух, Господь Лов сетысь , коді Батьсянь петӧ, и коді Батькӧд и Пикӧд ӧтмоз юрбитсьӧ и славитсьӧ, и коді сёрнитіс Пророкъяс пыр.

9. Сідзжӧ веруйта, мый эм ӧтик Святӧй соборнӧй и Апостольскӧй вичко.

10. Висьтала ӧтчыд пыртчӧм грекъяс эновтчӧм вӧсна.

11. Виччыся кулӧмъясысь ловзьӧм,

12. И мӧдар югыдын (помтӧм) олӧм. Аминь.

Юалӧм: Мый йылысь медвойдӧр казьтӧдӧ тэныд тайӧ вера висьталӧм.

Висьталӧм: Ен йылысь, мый сійӧ менӧ и став енъюгыд видзӧ и веськӧдлӧ, и сы понда колӧ любитны Сійӧс сьӧлӧмысь, лыддьыны лицемеритлытӧг и веритны, мый сэки ме думайта и кера бурӧс, кор думайта и кера, мый тшӧктӧ Сылӧн Святӧй Законыс.

Юалӧм: Кыдз тэ думайтан и арталан Ен йылысь?

Висьталӧм: Ме думайта, и артала, и верита, мый Ен эм ӧтик куим чужӧмын: Бать, Пи и Свят Дух, и Сы кындзи мӧд абу; мый Сійӧ век вӧлі, и абу Сылӧн ни медводдза пом, ни медбӧръя; мый Сійӧ эм дух вир-яйтӧм и кувтӧм, а сэкжӧ и веськыда судитысь, бурсьӧлӧма, быдлаын и быдсяма местаын эм, быдсӧн аддзӧ, быдсӧн кылӧ, быдсӧн тӧдӧ и ӧнія думаяснымӧс ,и мый водзӧ керны кӧсъям.

Юалӧм: Тырмас-ӧ Ен йылысь сідз тӧдны и артавны, а керны, кыдз гажыд?

Висьталӧм: Оз. Кыдз ме артала Ен йылысь, сідз сы ногӧн жӧ и овны колӧ. И вот кыдз: кодыр ме тӧда, мый Ен веськыд, сы понда омӧль керӧмысь кута видзчысьны, мед эськӧ ог усь Сійӧ веськыд суд улӧ. А кор Ен бурсьӧлӧма, ме кута висьтасьны аслам омӧль керӧмъясысь, надеяӧн, мый Сійӧ менсьым висьтасьӧм кывзас. А кыдз Сійӧ быдлаын эм, и быдсӧн тӧдӧ, сы понда ме кута видзчысьны не керӧмысь куш омӧльӧс, но и думайтӧмысь, а понда Сылы служитны йылавек лов кузя и бур думӧн.

Юалӧм: Мыйӧ велӧдӧ кристианскӧй вера миян Господь Исус Кристос йылысь?

Висьталӧм: Велӧдӧ, мый Сійӧ Аслас бурсьӧлӧм кузяыс, ми грека войтыр дінӧ лэччис небесаысь, и миянлысь босьтмысьт Ас вылас вир-яй, сетіс тӧдны миянлы Ассьыс вӧлясӧ, и пемдӧм дум миянлысь югдӧдіс веськыд Енмӧс тӧдмӧдӧмӧн, а медбӧрын, миянлысь грекъяс весалӧм вӧсна куліс крест вылын, но коймӧд лунӧ ловзис, и ловзьӧм яйнас лэптысис небесаӧ.

Юалӧм: Тайӧ велӧдӧмыс кристианскӧй вера йылысь отсалӧ-ӧ тэныд бурджыка овны?

Висьталӧм: Дерт, тшӧктӧ меным любитны Енмӧс. Ен кӧ ӧд сы мында менӧ возлюбитіс, мый ме вӧсна вӧляӧн быдсӧн терпитіс вир-яйнас и куліс, ме эськӧ лои дзик вунӧдысь Сылысь бурлунсӧ, эг кӧ эськӧ кӧсйи сьӧлӧмысь сійӧс любитны, и любитӧмсӧ Сійӧс пуктыны вылӧджык быдсяма торйысь.

Юалӧм: Мый сэтшӧм эм таинство?

Висьталӧм: Таинство эм сэтшӧм вежӧдӧм керӧм, кытӧні аддзана тор пыр гусьӧн мортъяс вылӧ лэччӧ бурсетӧм или спаситан вын Енлӧн.

Юалӧм: Кымын сэтшӧм вичкоса таинствоыс?

Висьталӧм: Сизим: пыртчӧм, мироӧн мавтӧм (пыртчигӧн), даръясьӧм, висьтасьӧм, попӧ пуктӧм, гӧтрасьӧм да мавтчӧм (висигӧн).

Юалӧм: Мый сэтшӧм пыртчӧм?

Висьталӧм: Пыртчӧм эм таинство, кӧні куимысь сюйлігӧн мортӧс ваӧ, шуалігӧн тайӧ кывъяс «Пыртчысьӧ морт Енлӧн (тані ним шусьӧ) Бать, и Пи, И Свят Дух нимӧ», мыськысьӧ грекъясысь веруйтысьлӧн лов Кристос вирӧн.

Юалӧм: Мый тэ босьтан святӧй пыртчӧм пыр?

Висьталӧм: Мынӧны грекъяс менам, и ӧтлаася веруйтысьяс чукӧрӧ кристианаяс дінӧ; а сэк жӧ Ен водзын и Сійӧ вичко водзын кӧсйыся сэтшӧм сӧстӧма и гректӧг овны, кутшӧм сӧстӧма и гректӧм петі ва пытшсьыс.

Юалӧм: Мый сэтшӧм эм мироӧн мавтӧм?

Висьталӧм: Эм таинство, кӧні (ки-кок) и мукӧд яй торъяс мавтігӧн вежӧдӧм мироӧн, лэччӧ пыртчӧм морт вылӧ аддзытӧм миро, мый лоӧ, бурсетӧмъяс Свят Духлӧн.

Юалӧм: Мый сэтшӧм даръясьӧм?

Висьталӧм: Даръясьӧм эм таинство, кӧні веруйтысь прӧскур пыдди самӧй яйсӧ Кристослысь, а вина пыдди самӧй вирсӧ Кристослысь даръясьӧ, грекъяс кольӧм вӧсна и помтӧм олӧм вӧсна.

Юалӧм: Мый вӧсна тэ даръясян?

Висьталӧм: Мед босьтігӧн Святӧй дари, босьтны выль вын и бурсетӧм, овны Святӧя и кристианин ногӧн; а сэкжӧ став кристиана вокъяс гажӧдны, мый ме накӧд тшӧтш сибала вӧлтар дінӧ и эскӧда найӧс, мый ме вичко дінысь абу янсӧдӧма, и накӧд йылавек любовӧн и ӧти думӧн кӧсъя овны.

Юалӧм: Мый колӧ, мед эськӧ дари вочны?

Висьталӧм: Ловзьӧдӧм шобді нянь, сӧстӧм и тшыктӧм (вичко) вина, сорлалӧмӧн сӧстӧм вакӧд.

Юалӧм: Кор колӧ даръясьлыны.

Висьталӧм: Медводдза кристианаяс даръясьлісны быд вежонын (тайӧ лов вердан сёянторнас), и миянлы на вылӧ жӧ колӧ видзӧдны. И кӧть ӧтчыд во кежӧ, а дерт быд мортлы колӧ даръясьны лов висьӧмъяс бурдӧдӧм вӧсна и эскӧдӧм вӧсна, мый сійӧ эм православнӧй кристианин и веськыд пи вичколӧн.

Юалӧм: Кодлы оз позь дари сетны?

Висьталӧм: Явӧ грек керысь и висьтасьтӧм мортлы, и сы дыра мый дыра оз тшӧктыны Святӧй отечьяслӧн гижӧдъяс.

Юалӧм: Кыдз колӧ лӧсьӧдчыны даръясьны?

Висьталӧм: Кевмӧмӧн, висьтасьӧмӧн и бур вылӧ овмӧс вежӧмӧн.

Юалӧм: Мый сэтшӧм висьтасьӧм?

Висьталӧм: Висьтасьӧм эм таинство, кӧні веруйтысьлы веськыда висьтавмысьт ассьыс грекъяс и прамӧя кӧсйысьӧм мысьт водзӧ кежлӧ бурджыка овны, лэдзсьӧны Енсянь грекъяс Кристослы служитысь пыр (висьтӧдысь поп пыр).

Юалӧм: Мый эм ӧпитенньӧ?

Висьталӧм: Ӧпитенньӧ эм, коді грека мортлы казьтӧдӧ грекъяссӧ и омӧля олӧмъяссӧ и нуӧдӧ сійӧс бур овмӧс вылӧ, а сэтшӧм торъяс эмӧсь: видзалӧм, кевмӧм, милӧстина сетӧм, вичкоӧ ветлӧм и мукӧд торъяс, кутшӧмӧс пуктас бур тӧлка духовник, кыдз лов бурдӧдысь.

Юалӧм: Мый эм попӧ пуктӧм?

Висьталӧм: Попӧ пуктӧм эм таинство, кӧні Аркирей ки пуктӧмӧн Свят Дух пуктӧ бӧрйӧм мортӧс вӧчны таинствояс и видзны Кристослысь йӧз.

Юалӧм: Коді туйӧмӧн босьтӧ поп чин?

Висьталӧм: Бур овмӧса морт, Ен дор зэв сулалысь, и ёна тӧдысь Ен гижӧд вылысь.

Юалӧм: Мый аслас чин кузяыс поплы колӧ керны?

Висьталӧм: Таинствояс вӧчӧм кындзи и вичко требаяс справитӧм кындзи Апостол тшӧктӧм серти со мый нёль тор: велӧдны йӧзӧс Ен законӧ кылӧн да ас овмӧсӧн, янӧдны ылалысьясӧс, вӧйпӧдны омӧля олысьясӧс, мыждыны найӧс, кодъяс оз висьтасьлыны.

Юалӧм: Мый эм гӧтрасьӧм?

Висьталӧм: Гӧтрасьӧм эм таинство, кӧні престол водзын служитысь кык ӧтлаасьысь мортъясӧс, найӧ воча сёрни бӧрын, и абу кӧ найӧ костын некутшӧм сорласьӧм, чунькытшалӧ и сетӧ налы Енсянь бурсиӧм.

Юалӧм: Мый эм мавтчӧм?

Висьталӧм: Мавтчӧм эм таинство, кӧні престол водзын служитысь мавтігӧн висьысьӧс корӧ сылы Енсянь висьӧмсьыс кокньӧдӧм и эновтӧм грекъяссьыс.

Юалӧм: Кыдз сэсся колӧ овны кристианин ним новлӧдлӧм кузя?

Висьталӧм: Кыдз тшӧктӧ и тшӧктас меным мам менам вичко, сы понда дугдывтӧг Енлысь понда корны, мед эськӧ меным вичко дінысь некор не янсӧдчыны и пышъявны вензьӧмъясысь торъя вераясысь и быдсяма нелӧсялӧмысь (вичкокӧд).

Юалӧм: Быдтор кӧ сідз тыртан, кыдз колӧ кристианинлы, мый сы понда надейтчан?

Висьталӧм: Надейтча бурсьӧлӧма Енсянь босьтны быдсяма бурсиӧм и тані, и мӧдар югыдын. Веруйта ӧд ме, мый веськыд Господь менам локтас судитны кулӧмаясӧс и ловъяясӧс, и мый Сійӧ суд бӧрын, кыдз бура олысьяслӧн гажӧдчӧмлы, сідз жӧ и омӧля олысьяслӧн мучитчӧмлы пом оз ло.

Юалӧм: Позяс-ӧ спаситчыны ӧти верӧн бур уджъястӧг?

Висьталӧм: Оз. Ӧти вера ӧд бур уджъястӧг оз спасайт.

Юалӧм: Кӧні тэныд гижӧма, кыдз колӧ бура овны?

Висьталӧм: Ен законын, коді гижсьӧ тайӧ дас заповедьын:

Медводдза: Ме эм Господь Ен тэнад, мед оз лоны тэныд мукӧд енъяс Ме кындзи.

Мӧд: Эн вӧч аслыд идол либӧ кутшӧмкӧ сы ногса тор, мый небесаын вылын, и мый му вылын улын, мый ваясын и му улын; мед он юрбит налы и он служит.

Коймӧд: Эн казьтыв нимсӧ Господьлысь, тэнад Енлысь, весьшӧрӧ.

Нёльӧд: Эн вунӧд вежӧдны праздник лун, квайт лун уджав и сійӧ лунъясӧ эштӧд быд уджтӧ ассьыд, а сизимӧд лун шойччӧм тэнад Господь Ен понда.

Витӧд: Ыджыдӧ пукты батьтӧ и мамтӧ ассьыд, мед бур тэныд лоас, и мед кузь нэма лоан му вылын.

Квайтӧд: Эн ви.

Сизимӧд: Эн пӧдруга видз.

Кӧкъямысӧд: Эн гусясь.

Ӧкмысӧд: Эн висьтав мӧд вылӧ лӧжӧс.

Дасӧд: Мед оз пет вежыд мӧд морт гӧтыр вылӧ, мед оз пет вежыд сійӧ керкаыс вылӧ, ни му-видзыс вылӧ, ни ай уджалысьыс вылӧ, ни энь уджалысьыс вылӧ, ни ӧшкыс вылӧ, ни осёлыс вылӧ, ни мукӧд скӧтыс вылӧ, и нинӧмтор вылӧ, мый мӧдлӧн, мед оз пет вежыд.

Юалӧм: Мыйӧ велӧдӧ медводдза заповедь?

Висьталӧм: Велӧдӧ сьӧлӧмӧн тӧдны и кылӧн висьтавны сӧмын ӧтик Енмӧс, Сійӧс ӧтиӧс мед зэв любитны и ыджыдӧ пуктыны, а сы понда колӧ быдсяма ногӧн пышъявны Ентӧм олӧмысь, уна енма олӧмысь, тшыкӧдчӧмысь, нинӧм абуӧ эскӧмысь, лёкнога и торъя вераясысь, сідзжӧ вылӧ пуксьӧмысь надейтчӧмӧн ас вежӧр вылӧ, ас либӧ йӧз вын вылӧ или озырлун вылӧ, вунӧдӧмӧн, мый Ен быдсӧн понда тӧждысьӧ.

Юалӧм: Кыдз колӧ лыддьыны Святӧй угодникъясӧс Енлысь?

Висьталӧм: Не сідз, кыдз Асьсӧ Енсӧ, но кыдз мусаясӧс Енлы, и юрбитысьясӧс Сылы ми спаситчӧм вӧсна; а сэкжӧ и найӧ моз овны.

Юалӧм: Мый оз тшӧкты Ен мӧд заповедьын?

Висьталӧм: Оз тшӧкты юрбитны идолъяслы либӧ кутшӧмкӧ мукӧд киӧн керӧмторъяслы Енлы моз; сідзжӧ оз тшӧкты нинӧм абуӧ эскыны, лицемеритны, взяткаяс босьны и вывті чӧскыдӧс любитны.

Юалӧм: Кыдз колӧ лыддьыны вежӧдӧм ӧбразъяс?

Висьталӧм: Колӧ лыддьыны найӧс, а не Енмӧ пуктыны; сы понда мый ӧбразъяс сӧмын гижӧдъяс, и казьтӧдӧны найӧ миянлы Енлысь и Сы угодникъяслысь уджъяссӧ, медым ми видзӧдігӧн на вылӧ олім святӧя, найӧ моз жӧ.

Юалӧм: Мый оз тшӧкты Ен коймӧд заповедьын?

Висьталӧм: Оз тшӧкты нимсӧ Ассьыс казьтывны кытчӧ сюрӧ, но сӧмын молитваясын, колан ёрсьӧмъясын и присягаясын, да и сэк зэв ёна полігтырйи и видзчысьӧмӧн, и сы вӧсна зэв ыджыд грек, мый-нибудь сёрнитны Ен воча, веськыд вера и Святӧй вичко воча, ёрсьӧм вунӧдны, ковтӧг сёкристосасьны, корны Енлысь шогмытӧмтор либӧ вунӧдны ассьыд бур кӧсйысьӧмъяс.

Юалӧм: Мый тшӧктӧ керны Ен нёльӧд заповедьын?

Висьталӧм: Тшӧктӧ быд вӧскресенньӧӧ и праздник лунъясӧ кольны быдсяма удж и волывны вичкоӧ, сьӧлӧмысь кывзыны и лыддьыны вичкоса велӧдӧмъяс, а гортын велӧдны ныв-пиӧс и гортса олысьясӧс Ен законӧ и кыдзи быд лун, а зэвджык нин тайӧ Святӧй лунъясӧ, видзчысьны омӧль уджъясысь и керанторъясысь, а медзэв – вывті вина юӧмысь да кодалӧмысь.

Юалӧм: Мый тшӧктӧ Ен витӧд заповедьын?

Висьталӧм: Тшӧктӧ бать-мамӧс, а найӧ ним улын медводзын Государӧс, поп-дякӧс, суддяясӧс, велӧдысьясӧс, буркерысьясӧс и пӧрысьясӧс лыддьыны и найӧс кывзыны, да и быд мортӧс любитны асьнымӧс моз.

Юалӧм: Кыдзи колӧ овны бать-мамлы и ныв-пилы ас коласаныс?

Бать-мамлы колӧ ныв-пиӧс быдтыны Енмысь полӧмӧн и велӧдны законӧ; ичӧтысянь туйдны найӧс труд пуктыны, олӧм гӧгӧртны, йӧзкӧд лӧсьыда тӧдчыны, видзны лёк тӧдчӧмъясысь, а медзэв – аслыныс бать-мамлы колӧ видзчысьны ныв-пи дырйи омӧльӧс сёрнитӧмысь и керӧмысь, и велӧдны найӧс колӧ бурӧнджык, а не лёкӧн. Ныв-пилы жӧ бать-мамӧс колӧ любитны, ыджыдӧ пуктыны и найӧс кывзыны; а кор гӧльмасны и пӧрысьмасны, вердны-удны найӧс и видзны, и сійӧн мынтыны налы веськыд уджйӧз.

Юалӧм: Кыдзи колӧ овны гозъя коласын?

Висьталӧм: Верӧслы ассьыс гӧтырсӧ колӧ любитны, не лёкӧн сыкӧд овны и олӧм лӧсьӧдігӧн, и ныв-пи быдтігӧн пуктыны сійӧс медвеськыд отсасьысь пыдди. А гӧтыръяслы колӧ любитны и ыджыдӧ пуктыны ассьыныс верӧсъяснысӧ, и овны найӧ ногӧн; а кыкнанныслы гозъя коласын дерт колӧ видзчысьны венеч уськӧдӧмысь.

Юалӧм: Кыдзи колӧ овны быдсяма мортлы быдсяма морткӧд?

Висьталӧм: Быд мортлы быдсӧнкӧд колӧ овны меліа, мичаа, нора сьӧлӧмӧн, тшыг мортӧс вердны, пасьтӧмӧс пасьтӧдны; висьысь дінӧ волывлыны, грекӧ вӧйысьӧс ӧлӧдны грекӧ вӧйӧмсьыс, нинӧм кужтӧмӧс велӧдны законӧ, быдсӧнӧс бур вылӧ туйдны и кевмыны бурсьӧлӧма Енлы быдсяма морт спаситчӧм понда.

Юалӧм: Мый оз тшӧкты Ен квайтӧд заповедьын?

Висьталӧм: Оз тшӧкты нинӧкодлы керны некутшӧм ӧбида ни ас пыр, ни думӧн, ни керӧмӧн; но кыдз сӧмын позьӧ, тшӧктӧ меным быдсӧнӧс видзны быдсяма омӧльысь. И сы понда зэв грек Ен водзын кыдз-нибудь мортӧс вины либӧ мӧдӧс сы вылӧ лэптыны и отсавны, либӧ виӧмӧдз и омӧль керӧмӧдз лэдзны. Кӧть шуам: тӧдны лёк дум мортлысь и не явитны, либӧ аддзыны косясьӧм (тышкасьӧм) и не дугӧдны, сотчанін, и не кусӧдны, либӧ нинӧмӧн не отсавны гӧльлы и висьысьлы. Тайӧ заповедьӧн жӧ зэв ӧлӧдӧ (Ен) асьнымӧс виӧмысь, но тшӧктӧ видзны ассьыным дзоньвидзалун (здоровйӧ) кыдз зэв дона Ен козин.

Юалӧм: Мый оз тшӧкты тэныд Ен сизимӧд заповедьын.

Висьталӧм: Оз тшӧкты пӧдруга видзны, венеч уськӧдны и быдсяма ногӧн пежасьны, а сідз жӧ и сійӧс оз тшӧкты, мый мортӧс сэтчӧдз воштӧ, кӧть шуам: вывті вина юӧм, весь олӧм, понъясьӧм, йӧктӧмъяс, восанінъяс, пеж сьыланкывъяс и лёк книгаяс.

Юалӧм: Мый оз тшӧкты тэныд Ен кӧкъямысӧд заповедьын?

Висьталӧм: Оз тшӧкты меным Ен нинӧкодлысь ни явӧ, ни гусьӧн нинӧм мырддьыны, сідзжӧ аддзӧмтор ас ордын гусьӧн кутны, либӧ пышъялысь мортӧс дзеблавны, йӧзлысь му-видз ас скӧтӧн лякны либӧ вердны, йӧз муӧн ладейтны, вузасигӧн, ньӧбасигӧн и вежласигӧн кодӧс-либӧ пӧръявлыны, (оз тшӧкты) уджалысьяслысь дон кутны, а медзэв – гӧль йӧзлысь удждалӧмысь содтӧд (прӧчент) босьтны, Государлысь, вичколысь и некодлысь деньга гусявны либӧ личкыны. А сы понда оз ков дышӧдчыны, а колӧ уджавны. Уджалӧмӧн ӧд не асьтӧ куш и гортсаястӧ позяс бура видзны, но и гӧльяслы сетны.

Юалӧм: Мый оз тшӧкты тэныд Ен ӧкмысӧд заповедьын?

Висьталӧм: Оз тшӧкты меным Ен весьшӧрӧ мӧд вылӧ мый-нибудь висьтавны, весьшӧрӧ удтысьны и янӧдны, серавны морт вылын, дивитны, йӧзлысь кывъяс омӧль вылӧ бергӧдлыны. Ӧтик кылӧн шуны: тшӧктӧ меным видзчысьны быдсяма чукля сёрниысь и пӧръясьӧмысь.

Юалӧм: Мый оз тшӧкты дасӧд заповедь?

Висьталӧм: Оз тшӧкты не керны куш омӧльӧс, но и думайтны омӧль йылысь и сьӧлӧмын сійӧс кутны. Омӧль думъясысь ӧд зэв кокньыда вермасны артмыны и омӧль уджъяс.

Юалӧм: Мед эськӧ тыртны Енлысь заповедьяссӧ, мый колӧ мортлы?

Висьталӧм: Отсалӧм Енсянь, коді быд бур моз ыстысьӧ (Сысянь) сьӧлӧмысь кевмӧм кузя. А кевмӧм эм сьӧлӧмӧн и думӧн лэптысьӧм Ен дінӧ, корӧмӧн Сылысь быдсяма бур ас ловлы.

Пом.