Италмас сяськаосы (Ашальчи Оки)

From Wikisource
Jump to navigation Jump to search
Италмас сяськаосы
Автор: Ашальчи Оки
Поттэмын: Гудыри : газет. — 1921. — № 47. — 2-тӥ бам. Источник: [1]


Италмас сяськаосы


Италмас сяськаосы,
Чебересь сяськаосы,
Мыным эн тӥ ӧпкеле,
Монэ эн тӥ каргалэ.

Жалятэк ик тӥледыз
Бичаса мон ветлӥсько,
Янгышен пыдъёсыным
Лёгаса но кельтӥсько.

Бичаса мон сяськаме
Тугоко ваньзэ кертто,
Со керттэм тугокоме
Вынылэн йыраз поно.

Куиньметӥ арня ӵоже
Яратон выны висе,
Куиньметӥ арня ӵоже
Дугдылтэк ялан бӧрдэ.

Горд намер кадь бамъёсыз
Кӧсэктӥз ини солэн,
Лыз сяська кадь синъёсыз
Гырк усиз ук нунылэн.

Италмас сяська зынын
Вынылэн через быроз,
Кӧсэктэм висись бамаз
Выльысь нош ӵыжыт пыроз.

Соку нош, азьло кадь ик,
Возь вылэ шудны мыном,
Италмас сяська пӧлын
Сяська кадь ик адӟиськом.