Инметӥ лобась из (Дядюков)

From Wikisource
Jump to navigation Jump to search
Инметӥ лобась из
Автор: Иван Тихонович Дядюков
Источник: Гудыри : газет. — 1924. — № 89. — 4-тӥ бам.

Вортча Васёнэн Атас Камаш артэ ана (му) вылын кӧс герызэс гыро вылэм. Гырыкузы вылытӥ, соослэн йыръёссы вадьсытӥ аэроплан ортчыны кемдэм. Васёнэн Камаш, талэсь куаразэ кылыса, паймоно луиллям. Паймемен гинэ тырмымтэ — мар-о та таӵе, ишан-а мар-а кылӥське ини — шуса, вал кӧт улазы пыриллям.

Камаш, вал кӧт улаз кыллённаз вылэ учкем, аэропланэз адӟем. Тае адӟыса вылаз ин из усе шуса, вал кӧт улысьтыз пот но, нюке кукыз иӵкалскымон — бырком ук ини, Васё, бырком… — шуса кесяськыса, бызьыны кутскем. Васё марзэ-созэ валатэк вал кӧт улысьтыз пот но, Камаш сьӧры ур… гинэ кесяськыса бызьыны кутскем.

Таослэсь озьы нюке бызьса васькемзэс, салдатэ ветлэм мурт Моко Байсар адӟем. Нюке доразы васькем.

— Васё! Камаш! Кытчы пыриды? Ма озьы турттӥськоды?

Васёен Камаш Байсарлэсь куаразэ тодмазы.

— Татын ми, татын… Бырком ук ини… вылэ ин из усе… чаль татчы, бырим ке но, огазе мед быромы.

— Эк, визьтэмъёс-визьтэмъёс! Кытысь тӥ адӟиды ин из усемез? Аэроплан ук со!

— Ероплан?!

— Аэроплан угось!

— Ми, шай коросэз ин из кожамы… Кыдёке-а бен кышкиз ини со? Возьматы, учконо вал.

— Тӥни… Отӥ… Марым… кызъёс сыло-а? Со кызъёс вадьсытӥ ортче ини.

— Шай корос, шай корос!.. ми сое ин из кожаса кукмы иӵкалскымон нюк улэ пегӟиськом; ачиз ик-а ма со ероплан? Мар-о бен со асьме палтӥ утчаса ветлэ?

— Яке пошта нуэ, яке калыкез ворттылытэ, яке кытчы ке ӝог муген мынэ дыр.

— Кытыназ гинэ со пошта нуллэ, калыкез ворттылытэ? Туж пичи ук!

— Асьмелы гинэ пичи адске, бадӟым со.

— Малы бен укыр пичи, ӵана бытча гинэ?

— Вылытӥ кошке, соин пичи адске.

— Озьы луоз со, озьы. Иське, со, пошта но нуллэ, калыкез но ворттылытэ: озьыен умой маке вылэм со. Нош нуналлы кыдёке-а меда мынэ?

— Кудӥз часлы тямыстон иськем мынэ.

— Уй-уй-уййй!… укыр ук трос мынэ вылэм! Кӧня манет сылэ меда?

— Ог 30 сюрс манет но сылысез вань.

— Дунтэм ик ӧвӧл. Ма, огазе кариськыса секыт ӧй лусал дыр басьтыны но… Оло одӥг — огпол вылаз пуксьыса ворттылонэз но адӟысал.

— Вераны гинэ дуно потэ. Нош асьмеос, асьме Удмурт Областямы улӥсь муртъёс, котыр одӥг манет пай поныса, эштос ке кылдытысалмы, кебертэк дассэ ӵош басьтыны быгатысалмы ук.

— Зэм но, котыр манет пай поныса, одӥг ероплан туж капчиен басьтысалмы. Соку вылэ ин из усе ук ини шуса нюке-гопе ӧм ни пегасалмы. Пыро, пыртэк уг кыльы пайе, гожъясь гинэ мед луоз, — Васё шуиз. Озьы ик Камаш но вераз.