Илеш. Гүзәл Ситдиҡова

From Wikisource
Jump to navigation Jump to search

Илеш


Быуаттар йүгерә тора,
ХХ1 тиһеңсе!
Тик һаман да яумай торһа
Күккә ҡарай игенсе.
Әсә һөтөләй танһыҡлап,
Ямғыр көтә игенлек,
Асыуына тейгәндәрме -
Күк күрһәтмәй игелек…

Аҡһаҡалдар телгә ала
Боронғолар йолаһын:
Аяҡ баҫһын ине, тиҙәр,
Юллыҡлы бер ҡунағы.
Килде лә төштө шул көндө
Ике арба яҙыусы.
Юллыҡһыҙҙар тип уларға
Булмаҫ яла яғыусы –
Көнөндә үк ижадсылар
Нисә ауыл ураны,
Иртәгә үк яуа тиеп
Ләйсәнен дә юраны.
Юрағандары юш килде,
Таң уятты йыр менән -
Барабанлы, шаулы-гөрлө
Һәм моңло ямғыр менән!
Күкрәк киреп һулыш алды
Баҫыуҙары Илештең,
Ҡотло ҡунаҡ үҙе менән
Алып килә өлөштө.
Ә йәндәрҙе имле дымдай
Һуғарҙы шағир һүҙе,
Бер көлдөрҙө, бер илатты
Бәғеркәйҙәрҙе өҙөп.
Тереклек башланған һыуҙан –
Шулай ти Изге Ҡөрьән,
Телмәр биреп тик кешегә
Хаҡ тәғәлә йән өргән.
Ләйсәндәй саф хисебеҙҙе
Бүләк иттек Илешкә.
… Ғашиҡ булмау мөмкин түгел
Илешкә бер килештән.

Шиғыр 2010 йылдың майында
 Илеш районына барғанда яҙылғайны.
 Был йылы бик ҡоролоҡ булды,
 беҙ, бер төркөм яҙыусылар,
барып төшкән төнө күкрәп
яуып ебәрҙе.


2012


CC SomeRightsReserved.png
Cc-by white.svgCc-sa white.svg
This work is licensed under the Creative Commons Attribution-ShareAlike 3.0 Unported license.