Изгелеккә юрайыҡ. Фирүзә Абдуллина.

Изгелеккә юрайыҡ. (шиғыр) автор Фирүзә Абдуллина

Ижад итеү ваҡыты: 12.04.2014. Нәшер ителгән: 01.12.2014. Сығанаҡ: “Бәйләнештә” сайтындағы “Ғәжәп донъя” төркөмөнән. “

Изгелеккә юрайыҡ.

Бер-беребеҙҙән йылмайып,
Иҫәнлектәр һорайыҡ.
Йылмайыуҙы, йылы һүҙҙе
Изгелеккә юрайыҡ.

Кеше күңеле бик йомшаҡ,-
Иғтибарға урайыҡ.
Һәр бер һүҙҙе, һәр теләкте
Изгелеккә юрайыҡ.

Күңел ҡалдырырлыҡ һүҙҙе
Шаяртыуға борайыҡ,
Өгөттәрҙе, кәңәштәрҙе
Изгелеккә юрайыҡ.

Күпме кеше яныбыҙҙа-
Ярҙам итеп торайыҡ.
Иткән, алған ярҙамдарҙы
Изгелеккә юрайыҡ.

Һаҡлайыҡ бер-беребеҙҙе,
Күңелдәрҙе ҡырмайыҡ,
Матур эштәр эшләйек тә,
Изгелеккә юрайыҡ!

12.04.2014

---