Зонлы

by Лыткин Георгий Степанович

Зонлы  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Кӧнкӧ тай кылӧ бара воӧма
Коми ӧксыӧй, муса вокӧй!
Ме дор гашкӧ тэ воин
Ӧти бур кыв горӧдчыны?
Ылі тай тэ, майбырӧй,
Ме гӧгӧр бергалан-кытшлалан:
Водза омӧльӧй кӧ менам эз сибдыв,
Ӧнія омӧль оз нин сибды.
Омӧль тай меӧй вӧлі —
Омӧльысь эн повлывлы;
Гӧль тай меӧй вӧлі —
Гӧльлунысь эн яндывлы.
Уна тай меӧй тэкӧд
Ветлывлі-мунлывлі;
Уна тай меӧй тэкӧд
Сьывлывлі- ворслывлі;
Уна тай меӧй тэкӧд
Арся видз дырйи войсӧ пуклывлі;
Уна тай меӧй тэкӧд
Йӧв лунъяс дырйи иславлі
Бур сё шайта вӧвнад,
Кызь вит шайта додьнад;
Уна тай меӧй тэкӧд
Ыджыд лун дырйи чеччавлі:
Чеччалан пӧв тай вӧлі ваян,
Лайкӧдчан сюръясӧ сувтӧдан.
Югыд шондіӧй, муса вокӧй!
Тэкӧд сьылӧмӧй, ворсӧмӧй,
Ветлӧмӧй, мунӧмӧй,
Тӧдан тэ, менам, коньӧрлӧн,
Кольны-бырны кутіс
Ас йыла нэмӧй кежлӧ,
Ас морт нэмӧй кежлӧ;
Тӧдан тэ, менам, коньӧрлӧн,
Тӧвся туйӧй тӧвны кутіс.
Быдӧн дінысь тай меӧй куті
Кӧдзавны-янсавны
Кӧдзалӧма кӧрт этшӧн,
Янсалӧма ыж этшӧн,
Ас йыла нэмӧй кежӧ,
Ас морт нэмӧй кежлӧ.