Заман үтер... Гүзәл Ситдиҡова

From Wikisource
Jump to navigation Jump to search

Заман үтер...


Олоғайған һайын яҙ ҡыҫҡараҡ,
Керпек кенә ҡаҡҡан ара кеүек,
Былбылдарын тыңлап өлгөрмәйһең,
Йылы яҡҡа китеп бара кеүек.

Йылғаһы ла хәҙер ташмай оҙаҡ,
Тиҙ-тиҙ генә ҡайта йырҙаһына,
Колхоз ҡырҙарында гөрләп эшләү
Тороп ҡалды хәҙер йырҙа ғына.

Йәшлектәге яҙҙар ятып ҡалды
Мәле генә түгел, иле менән
Тыуған тупраҡ ҡына үҙемдеке -
Баҡса сәсәм яҙҙар килеү менән

Түтәлдәрем хәҙер ҡыҫҡараҡ та,
Оҙағыраҡ әммә ҡаҙыуҙары
Ашыҡһам да тиҙерәк сәсәйем тип
Китеп өлгөргәнсе яҙ һыуҙары.

Орлоҡ һибәм - ҡыҫыр ҡалмаһын ер,
Тоҡомдарға беҙҙең ҡалһын орлоҡ .
Заман үтер - тыуған тупраҡ ҡалыр,
Тупрағыңдан яҙһаң - килер хурлыҡ...
Тыуған тупрағыма сәсәм орлоҡ...


2014


CC SomeRightsReserved.png
Cc-by white.svgCc-sa white.svg
This work is licensed under the Creative Commons Attribution-ShareAlike 3.0 Unported license.