Житїѧ̑ ст҃ы́хъ ѿ ст҃а́гѡ дими́трїа росто́вскагѡ/Ное́мврїй/к҃д

From Wikisource
Jump to navigation Jump to search
Житїѧ̑ ст҃ы́хъ, творе́нїе ст҃а́гѡ дими́трїа росто́вскагѡ (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃єby Dimitry of Rostov
Мцⷭ҇а ное́мврїа въ к҃д де́нь
This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.


Мцⷭ҇а ное́мврїа въ к҃д де́нь,
житїѐ и҆ страда́нїе ст҃ы́ѧ великомч҃нцы
є҆катері́ны, дѣ́вы премꙋ́дрыѧ.
[edit]

Во времена̀ нечести́вагѡ царѧ̀ маѯїмі́на бѣ̀ во гра́дѣ а҆леѯандрі́и дѣви́ца и҆́менемъ є҆катері́на, дще́рь кѡ́нсты пре́жнѧгѡ царѧ̀, ѕѣлѡ̀ красна̀, во́зрастомъ высока̀, ѻ҆смьна́десѧть лѣ́тъ и҆мꙋ́щаѧ, ѕѣлѡ́ же премꙋ́дра, наꙋчи́сѧ бо всѧ́комꙋ є҆́ллинскомꙋ писа́нїю, навы́че мꙋ́дрости всѣ́хъ дре́вныхъ книготво́рцєвъ: ѻ҆ми́ра, вїргі́лїа, а҆рїсто́телѧ, платѡ́на, и҆ про́чїихъ. не то́кмѡ же фїлосо́фѡвъ, но и҆ врачє́въ кни̑ги до́брѣ ѹ҆вѣ́да: а҆склі́пїа, и҆покра́та, галі́на, и҆ про́стѡ рещѝ, всемꙋ̀ ри́торскомꙋ и҆ сѷллогїсти́ческомꙋ мꙋдрова́нїю, и҆ всѧ́комꙋ рече́нїю и҆ ѧ҆зы́кꙋ и҆зꙋчи́сѧ, ꙗ҆́кѡ всѣ́мъ диви́тисѧ премꙋ́дрости є҆ѧ̀. и҆ мно́зи богатѣ́йшїи кнѧ́зи и҆ска́хꙋ поѧ́ти ю҆̀ въ невѣ́стꙋ ѿ ма́тере є҆ѧ̀, ꙗ҆́же бѧ́ше хрⷭ҇тїа́нынѧ вта́йнѣ, вели́кагѡ ра́ди гоне́нїѧ, є҆́же подви́же въ то̀ вре́мѧ на вѣ́рныѧ маѯїмі́нъ. сро́дники ѹ҆́бо и҆ ма́терь є҆ѧ̀ ча́стѡ є҆́й совѣ́товахꙋ, да посѧ́гнетъ за мꙋ́жа, да не ѿи́детъ ца́рство ѻ҆тца̀ є҆ѧ̀ ко и҆но́мꙋ чꙋжде́мꙋ комꙋ̀, и҆ ѿтщетѧ́тсѧ є҆гѡ̀ всеконе́чнѡ. Є҆катері́на же любѧ́ше дѣ́вство ѕѣлѡ̀ ꙗ҆́кѡ любомꙋ́драѧ, и҆ ѿню́дъ посѧ́гнꙋти не хотѧ́ше. ви́дѧщи же, ꙗ҆́кѡ мно́гѡ є҆́й ѡ҆ то́мъ стꙋжа́ютъ, речѐ и҆̀мъ: а҆́ще хо́щете, да посѧ́гнꙋ за мꙋ́жа, то̀ ѡ҆брѧ́щѣте мѝ такова́го ю҆́ношꙋ, да бꙋ́детъ подо́бенъ мнѣ̀ въ четы́рехъ дарова́нїѧхъ, и҆́миже а҆́зъ [ꙗ҆́коже са́ми и҆сповѣ́дꙋете] превосхождꙋ̀ всѧ̀ про́чыѧ ѻ҆трокѡви́цы, и҆ тогда̀ взѧ́ти є҆го̀ въ мꙋ́жа и҆зво́лю, поне́же недосто́йнѣйшагѡ менѐ и҆ хꙋ́ждшагѡ поѧ́ти не хощꙋ̀: и҆спытꙋ́йте ѹ҆̀бо повсю́дꙋ, а҆́ще бꙋ́детъ кто̀ подо́бенъ мнѣ̀ во бл҃горо́дїи, въ бога́тствѣ, въ красотѣ̀, въ премꙋ́дрости: а҆́ще же ѡ҆скꙋдѣ́етъ є҆мꙋ̀ є҆ди́но ѿ си́хъ дарова́нїе, нѣ́сть менѐ досто́инъ. Ѻ҆ни́ же ви́дѧще, ꙗ҆́кѡ не возмо́жно є҆́сть ѡ҆брѣсти́сѧ сицево́мꙋ ю҆́ноши, повѣ́даша, ꙗ҆́кѡ сы́нове ца́рстїи, и҆ и҆ні́и нѣ́цыи ѿ вели́кихъ кнѧзе́й, мо́гꙋтъ бы́ти бл҃горо́дни, и҆ богатѣ́йшїи ѿ неѧ̀: но въ красотѣ̀ и҆ въ премꙋ́дрости не ѹ҆подо́битсѧ є҆́й никто́же. Є҆катері́на же глаго́лаше: безкни́жнагѡ жениха̀ и҆мѣ́ти не и҆зволѧ́ю.

И҆мѣ́ѧше же ма́терь є҆ѧ̀ є҆ди́наго дх҃о́внаго ѻ҆ц҃а̀, чл҃вѣ́ка свѧ́та, и҆ бг҃оꙋго́дна, живꙋ́щаго въ мѣ́стѣ сокрове́нномъ внѣ̀ гра́да: взѧ̀ ѹ҆̀бо є҆катері́нꙋ, и҆ и҆́де съ не́ю къ томꙋ̀ бг҃оꙋго́дномꙋ мꙋ́жꙋ, ꙗ҆́кѡ да ѿ негѡ̀ совѣ́тъ бла́гъ прїи́метъ. Ѻ҆́нъ же ви́дѧ ѻ҆трокови́цꙋ бл҃голи́чнꙋ и҆ бл҃гочи́ннꙋ, и҆ слы́шавъ тоѧ̀ благоразꙋ́мнаѧ ѹ҆мѣ́реннаѧ словеса̀, положѝ во ѹ҆мѣ̀ свое́мъ, ѹ҆лови́ти ю҆̀ къ позна́нїю хрⷭ҇та̀ црѧ̀ нбⷭ҇нагѡ, и҆ гл҃а є҆́й: вѣ́мъ є҆ди́наго пречꙋ́днаго ѻ҆́трока, и҆́же тѧ̀ без̾ сравне́нїѧ превосхо́дитъ во всѣ́хъ дарова́нїѧхъ, ꙗ҆̀же рекла̀ є҆сѝ, красота̀ є҆гѡ̀ препобѣжда́етъ сїѧ́нїе со́лнечное. премꙋ́дрость є҆гѡ̀ ѹ҆правлѧ́етъ всѧ̀ чꙋ́вственнаѧ и҆ ѹ҆́мнаѧ созда́нїѧ. бога́тство сокро́вищъ є҆гѡ̀ раздѣлѧ́етсѧ во ве́сь мі́ръ, и҆ никогда́же ѹ҆малѧ́етсѧ, но па́че ѹ҆множа́етсѧ раздава́емое. бл҃горо́дїе є҆гѡ̀ є҆́сть неизрече́нное, неизглаго́ланное, и҆ недовѣ́домое. Сїѧ̑ слы́шащи ѻ҆трокови́ца є҆катері́на, мнѧ́ше, ꙗ҆́кѡ ѡ҆ нѣ́коемъ земно́мъ кнѧ́зѣ глаго́летъ, и҆ смꙋти́сѧ се́рдцемъ, и҆ лице́мъ и҆змѣни́сѧ, и҆ вопроша́ше: а҆́ще и҆́стинна сꙋ́ть всѧ̀ глаго́лємаѧ. ѻ҆́нъ же и҆звѣщева́ше, ꙗ҆́кѡ и҆́стинна сꙋ́ть, и҆ мно́жайшыѧ бл҃гѡда́ти млⷣнцъ то́й и҆́мать, и҆́хже и҆зрещѝ не возмо́жно. Вопроси́ же ѻ҆трокови́ца: чі́й є҆́сть сы́нъ, є҆го́же толи́кѡ похвалѧ́еши; ѻ҆́нъ же ѿвѣща̀: се́й не и҆́мать ѻ҆ц҃а̀ на землѝ, но роди́сѧ неизрече́ннѡ па́че є҆стества̀, ѿ є҆ди́ныѧ бл҃горо́днѣйшїѧ прест҃ы́ѧ и҆ пречⷭ҇тыѧ дв҃цы, ꙗ҆́же превели́кїѧ ра́ди своеѧ̀ чистоты̀ и҆ ст҃ы́ни такова́го роди́ти сн҃а сподо́бисѧ, и҆ пребы́сть безсме́ртна дꙋше́ю же и҆ тѣ́ломъ, и҆ вознесе́нна є҆́сть превы́ше нб҃съ, и҆ покланѧ́ютсѧ є҆́й всѝ ст҃і́и а҆́гг҃ли, ꙗ҆́кѡ цр҃цѣ всеѧ̀ тва́ри. Глаго́ла є҆мꙋ̀ є҆катері́на: є҆́сть ли возмо́жно ви́дѣти ю҆́ношꙋ того̀, ѡ҆ не́мже сицева̑ѧ чꙋ̑днаѧ повѣ́даеши; ста́рецъ же речѐ є҆́й: а҆́ще сотвори́ши, ꙗ҆́коже тебѣ̀ рекꙋ̀, то̀ сподо́бишисѧ ви́дѣти пресвѣ́тлое лицѐ є҆гѡ̀. Ѻ҆на́ же речѐ є҆мꙋ̀: ви́ждꙋ тѧ̀ чл҃вѣ́ка разꙋ́мна, и҆ ста́рца че́стна, и҆ вѣ́рꙋю, ꙗ҆́кѡ не лже́ши: гото́ва ѹ҆̀бо є҆́смь сотвори́ти всѧ̑, ꙗ҆̀же повели́ши, то́кмѡ да ви́ждꙋ хвали́маго тобо́ю. Тогда̀ ста́рецъ дадѐ є҆́й і҆кѡ́нꙋ прест҃ы́ѧ бцⷣы, и҆мꙋ́щыѧ бжⷭ҇твеннагѡ млⷣнца во ѻ҆б̾ѧ́тїѧхъ, и҆ глаго́ла є҆́й: сѐ є҆́сть и҆зображе́нїе дв҃ы и҆ мт҃ре тогѡ̀ млⷣнца, ѡ҆ не́мже тебѣ̀ сицева̑ѧ чꙋ̑днаѧ повѣ́дах. возмѝ ѹ҆̀бо є҆̀ въ до́мъ тво́й, и҆ заключи́вши две́ри черто́га твоегѡ̀, сотворѝ моли́твꙋ всено́щнꙋю со бл҃гоговѣ́нїемъ къ не́й, ꙗ҆́же и҆менꙋ́етсѧ мр҃і́а: и҆ ѹ҆молѝ ю҆̀, да и҆зво́литъ показа́ти тебѣ̀ сн҃а своего̀, и҆ ѹ҆пова́ю, ꙗ҆́кѡ а҆́ще ѹ҆мо́лиши съ вѣ́рою, то̀ послꙋ́шаетъ тебѐ, и҆ пода́стъ тебѣ̀ ви́дѣти, є҆го́же жела́етъ дꙋша̀ твоѧ̀. Тогда̀ ѻ҆трокови́ца взе́мши сщ҃е́ннꙋю і҆кѡ́нꙋ, ѿи́де въ пала́тꙋ свою̀, и҆ но́щїю заключи́сѧ є҆ди́на въ ло́жницѣ свое́й, и҆ молѧ́шесѧ, ꙗ҆́коже ста́рецъ наꙋчѝ ю҆̀. Молѧ́щисѧ же ѹ҆снꙋ̀ ѿ трꙋда̀, и҆ ви́дѣ въ видѣ́нїи свое́мъ а҆́гг҃лѡвъ цр҃цꙋ, ꙗ҆́коже бѣ̀ на і҆кѡ́нѣ и҆зображе́нна со ст҃ы́мъ млⷣнцем, и҆́же лꙋчы̑ и҆спꙋща́ше па́че сл҃нца: но ѡ҆браща́ше къ мт҃ри лицѐ своѐ, ꙗ҆́кѡ не можа́ше є҆го̀ спредѝ зрѣ́ти є҆катері́на. Жела́ющи же ви́дѣти є҆го̀ спредѝ, и҆́де на дрꙋгꙋ́ю странꙋ̀: хрⷭ҇то́съ же па́ки ѿ тꙋ́дꙋ лицѐ своѐ ѿвраща́ше. семꙋ̀ бы́вшꙋ трикра́ты, слы́ша всест҃ꙋ́ю дв҃ꙋ глаго́лющꙋю къ сн҃ꙋ своемꙋ̀ си́це: ви́ждь ча́до рабꙋ̀ твою̀ є҆катері́нꙋ, коли́кѡ є҆́сть красна̀ и҆ предобра̀. ѻ҆́нъ же ѿвѣща̀: помраче́нна є҆́сть ѕѣлѡ̀ и҆ без̾ѻбра́зна, и҆ не могꙋ̀ смотрѣ́ти на ню̀. Па́ки глаго́ла прест҃а́ѧ бцⷣа: нѣ́сть ли премꙋ́дра па́че всѣ́хъ виті́й; бога́та, и҆ бл҃горо́дна па́че ѻ҆трокови́цъ всѣ́хъ градѡ́въ; Хрⷭ҇то́съ же ѿвѣща̀: наипа́че глаго́лю тебѣ̀ мт҃и моѧ̀, ꙗ҆́кѡ є҆́сть дв҃ца та̀ безꙋ́мна, и҆ ни́ща, и҆ хꙋдоро́дна: и҆ дото́ль не воⷥзрю̀ на ню̀, до́ндеже ѡ҆брѣта́етсѧ въ сицево́мъ нече́стїи, и҆ не хощꙋ̀, да мѧ̀ въ лицѐ ви́дитъ. Пребл҃гослове́ннаѧ же мт҃рь речѐ є҆мꙋ̀: молю́ тѧ сладча́йшее ча́до моѐ, не пре́зри созда́нїѧ своегѡ̀, но накажѝ ю҆̀, и҆ скажѝ є҆́й, что̀ и҆́мать твори́ти, да наслади́тсѧ сла́вы твоеѧ̀, и҆ ви́дитъ пресвѣ́тлое твоѐ и҆ превожделѣ́нное лицѐ, є҆́же а҆́гг҃ли ви́дѣти жела́ютъ. Хрⷭ҇то́съ же ѿвѣща̀: да и҆́детъ къ ста́рцꙋ, и҆́же дадѐ є҆́й і҆кѡ́нꙋ, и҆ ꙗ҆́коже то́й речѐ є҆́й, та́кѡ да сотвори́тъ, и҆ тогда̀ ѹ҆́зритъ мѧ̀, и҆ бл҃года́ть ѹ҆ менѐ ѡ҆брѧ́щетъ. сїѧ̑ ви́дѣвши и҆ слы́шавши ѻ҆трокови́ца, возбꙋди́сѧ, и҆ чꙋдѧ́шесѧ ѡ҆ видѣ́нїи то́мъ. Бы́вшꙋ же ѹ҆́трꙋ, пойде съ не мно́гими рабы́нѧми свои́ми въ ке́ллїю ст҃а́гѡ ста́рца, и҆ припа́дающи со слеза́ми къ нога́мъ є҆гѡ̀, повѣ́да ви̑дѣннаѧ, и҆ молѧ́ше, да наста́витъ ю҆̀, что̀ и҆́мать твори́ти, дабы̀ наслади́ласѧ любвѐ жела́емагѡ. Прпⷣбный же повѣ́да є҆́й подро́бнꙋ всѧ̑ та́инства и҆́стинныѧ хрⷭ҇тїа́нскїѧ вѣ́ры, начина́ѧ ѿ мїротворе́нїѧ и҆ созда́нїѧ пра́ѻц҃а, да́же до коне́чнагѡ прише́ствїѧ влⷣки хрⷭ҇та̀, и҆ ѡ҆ неизрече́ннѣй сла́вѣ ра́йской, и҆ ѡ҆ всеболѣ́зненной безконе́чной мꙋ́цѣ. Ѻ҆на́ же, ꙗ҆́кѡ кни́жнаѧ и҆ премꙋ́драѧ, всѧ̑ ѹ҆разꙋмѣ̀ вско́рѣ, и҆ вѣ́рова ѿ всегѡ̀ се́рдца, и҆ прїѧ̀ ѿ негѡ̀ ст҃о́е кр҃ще́нїе. Повелѣ́ же є҆́й ста́рецъ помоли́тисѧ па́ки съ жела́нїемъ мно́гимъ къ прест҃ѣ́й бцⷣѣ, да ꙗ҆ви́тсѧ є҆́й, ꙗ҆́коже пре́жде.

Совле́кшисѧ ѹ҆́бѡ ве́тхагѡ человѣ́ка є҆катері́на, и҆ ѡ҆бле́кшисѧ во ѻ҆де́ждꙋ ѡ҆бновле́нїѧ дх҃а, ѿи́де въ до́мъ сво́й, и҆ но́щь всю̀ молѧ́шесѧ а҆́лчна со слеза́ми, до́ндеже па́ки ѹ҆снꙋ̀: и҆ тогда̀ ви́дѣ нбⷭ҇нꙋю цр҃цꙋ съ бж҃ественнымъ млⷣнцемъ, и҆́же зрѧ́ше на є҆катері́нꙋ со мно́гимъ бл҃гоꙋтро́бїемъ и҆ ти́хостїю. Вопроша́ше же бг҃ома́терь сн҃а, гл҃ющи: ѹ҆го́дна ли є҆́сть тебѣ̀ сн҃е мо́й дѣви́ца сїѧ̀; ѻ҆́нъ же ѿвѣща̀: ѕѣлѡ̀ ѹ҆го́дна, ны́нѣ бо є҆́сть пресвѣ́тла и҆ сла́вна, ꙗ҆́же пре́жде бѣ̀ посра́млена и҆ безче́стна. ны́нѣ бога́та и҆ премꙋ́дра, ꙗ҆́же пре́жде бѣ̀ ни́ща и҆ неразꙋ́мна. ны́нѣ ю҆̀ возлюби́хъ, є҆ѧ́же пре́жде ненави́дѣхъ: и҆ толи́кѡ вожделѣ́хъ, ꙗ҆́кѡ хощꙋ̀ ѡ҆брꙋчи́ти ю҆̀ въ невѣ́стꙋ себѣ̀ нетлѣ́ннꙋ. Тогда̀ є҆катері́на падѐ на зе́млю, гл҃ющи: нѣ́смь досто́йна пресла́вный влⷣко видѣти црⷭ҇твїе твоѐ, но сподо́би мѧ̀ бы́ти съ рабы̀ твои́ми. Прест҃а́ѧ же бцⷣа прїѧ̀ деснꙋ́ю рꙋ́кꙋ ѻ҆трокови́цы, и҆ глаго́ла къ сн҃ꙋ: да́ждь є҆́й ча́до моѐ пе́рстень во ѡ҆брꙋче́нїе, и҆ ѹ҆невѣ́сти ю҆̀ себѣ̀, ꙗ҆́кѡ да сподо́биши ю҆̀ црⷭ҇твїѧ твоегѡ̀. Тогда̀ влⷣка хрⷭ҇то́съ дадѐ є҆́й є҆ди́нъ пе́рстень краснѣ́йшїй, гл҃ѧ сїѧ̑: сѐ дне́сь прїе́млю тѧ̀ въ невѣ́стꙋ себѣ̀ нетлѣ́ннꙋ и҆ вѣ́чнꙋ, сохранѝ ѹ҆̀бо согла́сїе сїе ѡ҆па́снѡ, да не прїи́меши ѿню́дъ и҆на́гѡ жениха̀ земна́гѡ. сїѧ̑ є҆гда̀ хрⷭ҇то́съ гдⷭ҇ь и҆зречѐ, сконча́сѧ видѣ́нїе, и҆ воздви́гшисѧ ѻ҆трокови́ца, ви́дѣ и҆звѣстнѡ въ десни́цѣ свое́й пе́рстень пречꙋ́денъ, и҆ прїѧ̀ въ се́рдцѣ толи́кое весе́лїе и҆ ра́дованїе, ꙗ҆́кѡ ѿ тогѡ̀ часа̀ плѣни́сѧ въ бж҃е́ственнꙋю любо́вь срⷣце є҆ѧ̀: и҆ толи́кѡ и҆змѣни́сѧ чꙋ́днымъ и҆змѣне́нїемъ, ꙗ҆́кѡ бо́лѣе ѡ҆ земны́хъ веща́хъ не мꙋ́дрствоваше, но то́кмѡ ѡ҆ превозлю́бленномъ женихѣ̀ свое́мъ де́нь и҆ но́щь непреста́ннѡ мы́слѧше, тогѡ̀ жела́ше, ѡ҆ то́мъ поꙋча́шесѧ, и҆ бо́дрствꙋющи и҆ спѧ́щи.

Въ то̀ вре́мѧ прїи́де во а҆леѯандрі́ю ца́рь пребеⷥзако́нный, и҆мѣ́ѧй не по ра́зꙋмꙋ ре́вность мно́гꙋю и҆ безмѣ́рнꙋю по нечꙋ́вственныхъ свои́хъ бо́зѣхъ, са́мъ сы́й нечꙋ́вственнѣйшїй и҆ безслове́снѣйшїй: хотѧ́ же сотвори́ти и҆̀мъ пра́здникъ ве́лїй, посла̀ ко всѣ́мъ ѻ҆кре́стнымъ градѡ́мъ и҆ страна́мъ, повелѣва́ющи, да соберꙋ́тсѧ къ немꙋ̀ лю́дїе съ же́ртвами, є҆́же почти́ти бо́ги собо́рнѡ. Собра́сѧ ѹ҆̀бо мно́жество наро́да безчи́сленное, ведо́щи кі́йждо по си́лѣ на же́ртвꙋ, ѻ҆́въ волы̀, ѻ҆́въ же ѻ҆́вцы, ни́щїи же несо́ще пти̑цы, и҆ и҆на́ѧ подѡ́бнаѧ. Є҆гда́ же прїи́де де́нь ме́рзскагѡ тогѡ̀ торжества̀, пожрѐ безꙋ́мный ца́рь ю҆нцє́въ сто̀ и҆ три́десѧть, про́чїи же велмо́жи и҆ кнѧ́зи ме́нше пожро́ша, и҆ кі́йждо человѣ́къ по си́лѣ приноша́ше же́ртвꙋ. и҆ и҆спо́лнисѧ ве́сь гра́дъ молвы̀ ѿ гласѡ́въ закала́емыхъ живо́тныхъ, и҆ смра́да ѿ ды́ма же́ртвъ, ꙗ҆́кѡ бѣ̀ повсю́дꙋ ве́лїе стѣсне́нїе и҆ смѧте́нїе, и҆ ве́сь воздꙋ́хъ ѡ҆сквернѧ́шесѧ. Си̑мъ та́кѡ соверша́емымъ, ви́дѧщи бл҃говѣ́рнаѧ и҆ предо́браѧ є҆катері́на толи́кое прелще́нїе и҆ па́гꙋбꙋ дꙋ́шъ человѣ́ческихъ, ѹ҆ѧзви́сѧ лю́тѣ срⷣцемъ, соболѣ́знꙋющи поги́бели и҆́хъ: и҆ ѿ ре́вности бж҃е́ственныѧ подви́гшисѧ, поѧ́тъ съ собо́ю немно́гїѧ рабы̑, и҆́де во хра́мъ, и҆дѣ́же же́ртвꙋ соверша́хꙋ безꙋ́мнїи. Є҆гда́ же ста̀ въ две́рехъ хра́ма, привлечѐ зрѣ́нїе всѣ́хъ къ прекра́снѣй добро́тѣ свое́й, ꙗ҆́же бѣ̀ свидѣ́телствомъ внꙋ́треннїѧ красоты̀ є҆ѧ̀. возвѣсти́ же царю̀, ꙗ҆́кѡ и҆́мать рещѝ є҆мꙋ̀ ѕѣлѡ̀ потре́бное сло́во: ѻ҆́нъ же повелѣ̀ є҆́й вни́ти пред̾ себѐ. Прише́дши ѹ҆́бѡ є҆катері́на пред̾ царѧ̀, пе́рвѣе поклони́сѧ є҆мꙋ̀, подоба́ющꙋю че́сть воздаѧ̀. та́же речѐ: позна́й ѽ царю̀ пре́лесть, є҆́юже ѿ бѣсѡ́въ прелсти́стесѧ, и҆ слꙋ́жите ꙗ҆́кѡ богѡ́мъ і҆́дѡлѡмъ тлѣ́ннымъ и҆ нечꙋ́вственнымъ: вои́стиннꙋ стꙋ́дъ є҆́сть ве́лїй си́це бы́ти слѣ́пꙋ и҆ безꙋ́мнꙋ, покланѧ́ющисѧ таковы́мъ ме́рзостемъ. понѐ премꙋ́дромꙋ твоемꙋ̀ дїѡдо́рꙋ и҆мѝ вѣ́рꙋ, и҆́же глаго́летъ: ꙗ҆́кѡ бо́зи ва́ши бѧ́хꙋ человѣ́цы и҆ногда̀, и҆ сконча́ша житїѐ ѻ҆каѧ́ннѡ, но нѣ́кїихъ ра́ди дѣѧ́нїй сла́вныхъ, ꙗ҆̀же сотвори́ша, созда́ша и҆̀мъ лю́дїе столпы̀ и҆ і҆́дѡлы. послѣ́днїи же ро́ди не вѣ́дꙋще мы́сли прароди́телей свои́хъ, и҆̀же то́кмѡ воспомина́нїѧ ра́ди поста́виша и҆̀мъ кꙋми́ры, но мнѧ́ще, ꙗ҆́кѡ є҆́сть ве́щь бл҃гоче́стна и҆ бл҃гоприли́чна, нача́ша покланѧ́тисѧ и҆̀мъ ꙗ҆́кѡ богѡ́мъ, и҆́хже и҆ хїроне́йскїй плюта́рхъ гнꙋша́етсѧ и҆ презира́етъ и҆̀хъ. тѣ̑мъ ѹ҆чи́телємъ ва́шымъ вѣ́рꙋй ѽ царю̀, и҆ не бꙋ́ди вино́венъ поги́бели толи́кихъ дꙋ́шъ, и҆́хже ра́ди и҆́маши наслѣ́довати вѣ́чнꙋю мꙋ́кꙋ. Позна́й же є҆ди́наго и҆́стиннаго бг҃а прⷭ҇носꙋ́щнаго, пребезнача́лнаго, и҆ безсме́ртнаго, и҆́же на послѣ́докъ лѣ́тъ бы́сть человѣ́къ на́шегѡ ра́ди спасе́нїѧ: си́мъ ца́рїе ца́рствꙋютъ, и҆ страны̑ ѹ҆правлѧ́ютсѧ, и҆ ве́сь мі́ръ состои́тъ. є҆гѡ̀ сло́вимъ є҆ди́нымъ всѧ̑ созда́шасѧ и҆ пребыва́ютъ. Се́й всеси́лный бг҃ъ и҆ пребл҃гі́й не тре́бꙋетъ сицевы́хъ же́ртвъ, нижѐ весели́тсѧ ѡ҆ закла́нїи непови́нныхъ живо́тныхъ, но то́кмѡ повелѣва́етъ, да сохрани́мъ за́пѡвѣди є҆гѡ̀ неподви́жнѡ. Сїѧ̑ слы́шавъ ца́рь, воз̾ѧри́сѧ ѕѣлѡ̀, и҆ пребы́сть безгла́сенъ на мно́гъ ча́съ. та́же не могі́й проти́витисѧ словесє́мъ є҆ѧ̀, ѿвѣща̀: ѡ҆ста́ви на́съ ны́нѣ соверши́ти же́ртвꙋ, и҆ по се́мъ послꙋ́шаемъ слове́съ твои́хъ. Соверши́въ ѹ҆̀бо ме́рзское своѐ торжество̀ нечести́вый ца́рь, повелѣ̀ привестѝ ст҃ꙋ́ю въ ца́рскїѧ своѧ̀ пала́ты, и҆ глаго́ла є҆́й: рцы̀ на́мъ дѣви́це, кто̀ є҆сѝ ты̀; и҆ ка́ѧ сꙋ́ть словеса̀, ꙗ҆̀же глаго́лала є҆сѝ на́мъ; ѻ҆на́ же ѿвѣща̀: а҆́зъ є҆́смь дще́рь царѧ̀ пре́жде тебѐ бы́вшагѡ, нарица́юсѧ є҆катері́на, наꙋчена́ же є҆́смь всемꙋ̀ хꙋдо́жествꙋ, пи́сменємъ ри́торскимъ, фїлосѡ́фскимъ, землемѣ́рїю, и҆ про́чымъ премꙋ́дростѧмъ: но сїѧ̑ всѧ̀ ꙗ҆́кѡ сꙋ́єтнаѧ и҆ неполє́знаѧ презрѣ́хъ, и҆ и҆зво́лихъ ѹ҆невѣ́ститисѧ влⷣцѣ хрⷭ҇тꙋ̀, и҆́же глаго́летъ чрез̾ прⷪ҇ро́ка своего̀ сїѧ̑: погꙋблю̀ премꙋ́дрость премꙋ́дрыхъ, и҆ ра́зꙋмъ разꙋ́мныхъ сокры́ю (Иса. к҃ѳ : д҃і). Ца́рь же чꙋдѧ́сѧ ра́зꙋмꙋ є҆ѧ̀, и҆ ви́дѧ толи́кꙋ добро́тꙋ и҆ красотꙋ̀, мнѧ́ше, ꙗ҆́кѡ не ѿ сме́ртныхъ роди́телей бѣ̀ рожде́нна, но нѣ́каѧ боги́нѧ ѿ богѡ́въ, и҆̀хже то́й почита́етъ: и҆ є҆два̀ вѣ́рꙋ ꙗ҆́ти хотѣ̀, ꙗ҆́кѡ ѿ земноро́дныхъ є҆́сть таковы́ѧ неизрече́нныѧ красоты̀ дѣви́ца, є҆ѧ́же добро́тою ѹ҆ѧзви́вшисѧ, глаго́лаше словеса̀ любодѣ́йнаѧ. Ст҃а́ѧ же позна́вши мы́сль є҆гѡ̀ беⷥзако́ннꙋю, речѐ є҆мꙋ̀: бѣ́си, и҆̀хже ꙗ҆́кѡ богѡ́въ почита́ете, ті́и прелща́ютъ ва́съ, и҆ въ по́хоти несмы́слєнныѧ влекꙋ́тъ ва́съ: а҆́зъ же вѣ́мъ себѐ бы́ти зе́млю и҆ бре́нїе, созда́ же мѧ̀ бг҃ъ по ѻ҆́бразꙋ своемꙋ̀ и҆ по подо́бїю, и҆ сицево́ю почте́ мѧ красото́ю, да ѿ сегѡ̀ наипа́че почꙋдѧ́тсѧ лю́дїе премꙋ́дрости созда́вшагѡ, ꙗ҆́кѡ въ толи́кое хꙋдо́е и҆ бре́нное лицѐ возмо́же да́ти бл҃горазꙋ́мїе и҆ красотꙋ̀ таковꙋ́ю. Ѡ҆зло́бисѧ же ца́рь тѣ́ми є҆ѧ̀ словесы̀, и҆ речѐ: не глаго́ли ѕлѣ̀ ѡ҆ бо́зѣхъ и҆мѣ́ющихъ безсме́ртнꙋю сла́вꙋ. Ст҃а́ѧ же проти́вꙋ ѿвѣща̀: а҆́ще восхо́щеши ѿтрѧстѝ ма́лѡ мглꙋ̀ и҆ помраче́нїе пре́лести, ѹ҆разꙋмѣ́еши богѡ́въ твои́хъ хꙋ́дость, и҆ позна́еши и҆́стиннаго бг҃а, є҆гѡ́же то́кмѡ и҆́мѧ глаго́лемое, и҆лѝ крⷭ҇тъ на воздꙋ́сѣ и҆зобразꙋ́емый, прогонѧ́етъ бо́ги твоѧ̀, и҆ погꙋблѧ́етъ и҆̀хъ: и҆ а҆́ще вели́ши, ꙗ҆влю̀ тебѣ̀ и҆́стинꙋ ꙗ҆́снѡ. Ца́рь же ви́дѣвъ свобо́дное є҆ѧ̀ глаго́ланїе, не восхотѣ̀ бесѣ́довати къ не́й, боѧ́щисѧ є҆ѧ̀, да не побѣди́тъ є҆го̀ словесы̀ свои́ми премꙋ́дрыми и҆ посрами́тъ є҆го̀. но речѐ сїѧ̑: не лѣ́по є҆́сть царю̀ бесѣ́довати съ жена́ми: соберꙋ́ же а҆́зъ премꙋ́дрыѧ фїлосо́фы, ꙗ҆́кѡ да бесѣ́дꙋютъ съ тобо́ю, тогда̀ ѹ҆разꙋмѣ́ши гада́нїй твои́хъ не́мощь, и҆ въ на́ши догма́ты вѣ́ровати и҆́маши. сїѧ̑ ре́къ, повелѣ̀ храни́ти ѻ҆па́снѡ ст҃ꙋ́ю дѣ́вꙋ. а҆́бїе же посла̀ по всѣ́мъ градѡ́мъ вла́сти своеѧ̀ писа́нїе сицево́е: Ца́рь маѯїмі́нъ, премꙋ́дрымъ фїлосо́фѡмъ и҆ виті́амъ, въ мое́й ѻ҆́бласти сꙋ́щымъ, ра́доватисѧ: Всѝ, и҆̀же премꙋ́дрѣйшемꙋ бо́гꙋ є҆рмі́ю /меркꙋ́рїю/ слꙋ́жите, и҆ призыва́ете вино́вныѧ ра́зꙋмꙋ мꙋ̑зы: прїиди́те ко мнѣ̀, да загради́те ѹ҆ста̀ нѣ́кїѧ премꙋ́дрыѧ жены̀, ꙗ҆́же ꙗ҆ви́сѧ во днѝ сїѧ̀, и҆ рꙋга́етсѧ вели́кимъ богѡ́мъ, и҆менꙋ́ющи дѣѧ̑нїѧ и҆́хъ ба̑сни и҆ блѧдослѡ́вїѧ: и҆ та́кѡ и҆́мате показа́ти ѻ҆те́ческꙋю ва́шꙋ премꙋ́дрость, да просла́витсѧ в̾ чл҃вѣ́цѣхъ, и҆ ѿ менѐ прїи́мете да́ры и҆ воздаѧ̑нїѧ трꙋда̀ ра́ди ва́шегѡ. Собра́шасѧ ѹ҆̀бо и҆збра́ннѣйшїи и҆ мꙋ́дрѣйшїи виті́и число́мъ пѧтдесѧ́тъ, ѡ҆строꙋ́мны въ ра́зꙋмѣ, и҆ многомо́щны во глаго́ланїи: къ ни́мже речѐ ца́рь си́це: ѹ҆гото́витесѧ прилѣ́жнѡ и҆ нелѣ́ностнѡ къ мꙋ́жественномꙋ по́двигꙋ проти́вꙋ є҆ди́ныѧ дѣви́цы, ꙗ҆́кѡ да возмо́жете препрѣ́ти ю҆̀ словесы̀ ѡ҆ бо́зѣхъ: и҆ не неради́те, ꙗ҆́кѡ съ жено́ю и҆́мате бесѣ́довати, но а҆́ки бы проти́вꙋ подвиза́телѧ мꙋ́жественнѣйшагѡ, и҆ премꙋ́дрѣйшагѡ виті́а ста́ти и҆мѣ́ли, та́кѡ положи́те всѐ тща́нїе ва́ше, и҆ покажи́те мꙋ́дрость ва́шꙋ: занѐ ꙗ҆́коже а҆́зъ ѻ҆па́снѡ разꙋмѣ́хъ ю҆̀, превосхо́дитъ въ мꙋ́дрости самаго̀ чꙋ́днаго платѡ́на: ѹ҆̀бо молю̀ ва́съ, ꙗ҆́коже бы и҆мѣ́ли самаго̀ ѻ҆́наго проти́вѡ подвиза́ющасѧ, толи́кое прилѣжа́нїе покажи́те. и҆ а҆́ще побѣди́те ю҆̀, то̀ да́мъ ва́мъ вели́кїѧ да́ры: а҆́ще же побѣжде́ни бꙋ́дете, и҆спо́лнитесѧ неизрече́ннагѡ стꙋда̀, и҆ вмѣ́стѡ дарѡ́въ го́рькꙋю сме́рть воспрїи́мете. Сїѧ̑ царю̀ и҆зре́кшꙋ, ѿвѣща̀ є҆ди́нъ виті́а сла́внѣйшїй и҆ премꙋ́дрѣйшїй, глаго́лѧ: не бо́йсѧ царю̀, а҆́ще и҆ ѻ҆строꙋ́мна є҆́сть та̀ жена̀, ѻ҆ба́че ꙗ҆́кѡ жена̀ не мо́жетъ бы́ти въ премꙋ́дрости соверше́нна, и҆ въ ри́торствѣ и҆скꙋ́сна: повелѝ то́кмѡ є҆́й пред̾ на́ми ста́ти, и҆ ѹ҆ви́диши, ꙗ҆́кѡ а҆́ще то́чїю ѹ҆́зритъ таковы́ѧ и҆ толи́кїѧ фїлосо́фы и҆ ри́торы, а҆́бїе постыди́тсѧ. Ца́рь же слы́ша хва́лѧщасѧ фїлосо́фа, и҆спо́лнисѧ ве́сь ра́дости и҆ весе́лїѧ, надѣ́ѧсѧ, ꙗ҆́кѡ де́рзостный и҆ скве́рный ѧ҆зы́къ побѣди́тъ и҆спо́лненнꙋю кро́тости и҆ бжⷭ҇твенныѧ премꙋ́дрости дѣви́цꙋ. повелѣ̀ ѹ҆̀бо а҆́бїе привестѝ ст҃ꙋ́ю пред̾ себѐ: бѣ́ же со́брано мно́гое мно́жество наро́да на позо́рище, хотѧ́щихъ ви́дѣти и҆ слы́шати прѣ́нїе то̀. Но пре́жде да́же дости́гнꙋша по́сланнїи къ ст҃ѣ́й, прїи́де съ нб҃сѐ мїхаи́лъ а҆рха́гг҃лъ, и҆ глаго́ла є҆́й: не бо́йсѧ ѻ҆трокови́це гдⷭ҇нѧ, се́ бо гдⷭ҇ь тво́й да́стъ тебѣ̀ премꙋ́дрость къ премꙋ́дрости твое́й, да побѣди́ши въ прѣ́нїи пѧтдесѧ́тъ виті́й: и҆ не то́кмѡ ті́и, но и҆ и҆ні́и мно́зи вѣ́ровати и҆́мꙋтъ тобо́ю, и҆ всѝ мꙋ́ченическїй вѣне́цъ прїи́мꙋтъ: сїѧ̑ ре́къ а҆́гг҃лъ, ѿи́де. Вше́дше же по́сланнїи, взѧ́ша ю҆̀, и҆ приведо́ша пред̾ царѧ̀ и҆ пред̾ фїлосо́фѡвъ въ позо́ръ всѣ́мъ: и҆ а҆́бїе до́блественный ѻ҆́ный фїлосо́фъ, и҆́же хва́лѧщесѧ, речѐ съ го́рдостїю къ ст҃ѣ́й є҆катері́нѣ: ты́ ли є҆сѝ, ꙗ҆́же безстꙋ́днѡ и҆ безꙋ́мнѡ ѹ҆карѧ́еши бо́ги на́шѧ; Ст҃а́ѧ же съ кро́тостїю є҆мꙋ̀ ѿвѣща̀: а҆́зъ є҆́смь, ѻ҆ба́че не безстꙋ́днѡ ни безꙋ́мнѡ, ꙗ҆́коже ре́клъ є҆сѝ, но ѹ҆мѣ́реннѡ и҆ любои́стиннѡ глаго́лю то̀, ꙗ҆́кѡ бо́зи ва́ши ничто́же сꙋ́ть. Рече́ же виті́а: поне́же вели́цыи стїхотво́рцы и҆менꙋ́ютъ и҆̀хъ высо́кими бога́ми, ка́кѡ ѹ҆́бѡ ты̀ дви́жеши ѧ҆зы́къ тво́й съ толи́кою де́рзостїю на ни́хъ, ѿ ни́хже прїѧ́ла є҆сѝ премꙋ́дрость, и҆ приѡбщи́ласѧ є҆сѝ сла́дости дарѡ́въ и҆́хъ; Ѻ҆на́ же ѿвѣща̀: а҆́зъ не ѿ ва́шихъ богѡ́въ, но ѿ моегѡ̀ є҆ди́нагѡ и҆́стиннагѡ бг҃а премꙋ́дрость и҆́мамъ тꙋ́не, и҆́же са́мъ є҆́сть премꙋ́дрость и҆ живо́тъ: и҆ а҆́ще кто̀ є҆гѡ̀ бои́тсѧ и҆ храни́тъ є҆гѡ̀ бжⷭ҇твєннаѧ повелѣ́нїѧ, то́й є҆́сть вои́стиннꙋ фїлосо́фъ. дѣла́ же богѡ́въ ва́шихъ и҆ повѣ̑данїѧ сꙋ́ть достѡ́йна смѣ́ха и҆ ѹ҆кори́зны, и҆ и҆спѡ́лнена пре́лести: ѻ҆ба́че рцы́ ми, кто̀ ѿ вели́кихъ стїхотво́рцєвъ твои́хъ, и҆ ка́кѡ бога́ми и҆̀хъ и҆менова̀; Виті́а же речѐ: пе́рвый мꙋдрѣ́йшїй ѻ҆ми́ръ молѧ́сѧ къ ді́ю глаго́летъ: зеве́съ сла́внѣйшїй, превели́кїй бо́же, и҆ и҆ні́и безсме́ртнїи бо́зи. та́кожде и҆ пресла́вный ѻ҆рфе́й, бл҃годарѧ̀ а҆поллѡ́на глаго́летъ сїѧ̑: ѽ сы́не лато́новъ, и҆здале́ча стрѣлѧ́ѧй, си́лный фе́бе на всѧ̀ призира́ѧй, и҆ ца́рствꙋѧй над̾ сме́ртными и҆ безсме́ртными, сл҃нце златы́ми взе́млемое кри́лы. си́це пе́рвѣйшїи и҆ сла́внѣйшїи стїхотво́рцы почита́хꙋ богѡ́въ, и҆ безсме́ртными и҆̀хъ ꙗ҆́вѣ нарица́хꙋ: не прелща́йсѧ ѹ҆̀бо ты̀, ниже́ поланѧ́йсѧ распѧ́томꙋ ꙗ҆́кѡ бг҃ꙋ, є҆го́же никто́же ѿ дре́внихъ мꙋдрецѡ́въ и҆менова̀ бг҃омъ, нижѐ кто̀ вѣ́дѧше є҆го̀ бы́ти бг҃а. Ѿвѣща̀ ст҃а́ѧ є҆катері́на: то́йжде ѻ҆ми́ръ ва́шъ на и҆но́мъ мѣ́стѣ ѡ҆ велича́йшемъ твое́мъ бо́зѣ ді́и глаго́летъ, ꙗ҆́кѡ є҆́сть ло́жный, преле́стникъ, и҆ лꙋка́вый: и҆ ꙗ҆́кѡ хотѧ́хꙋ свѧза́ти є҆го̀ и҆ні́и бо́зи: и҆́ра, посїдо́нъ, и҆ а҆ѳи́на, а҆́ще не бы̀ бѣжа́лъ и҆ скры́лсѧ. подо́бнѡ и҆ и҆́на мнѡ́гаѧ на презрѣ́нїе богѡ́въ ва́шихъ кни́ги ва́ши ꙗ҆влѧ́ютъ. А҆ поне́же ре́клъ є҆сѝ, ꙗ҆́кѡ распѧ́таго ни є҆ди́нъ дре́внїй ѹ҆чи́тель и҆сповѣ́дꙋетъ бы́ти бг҃а: то̀ а҆́ще и҆ не подоба́ше бы мно́гѡ и҆спы́товати ѡ҆ не́мъ, ꙗ҆́кѡ є҆́сть бг҃ъ и҆́стиненъ, нб҃сѐ, и҆ землѝ, и҆ мо́рѧ, сл҃нца, лꙋны̀, и҆ всегѡ̀ человѣ́ческагѡ ро́да содѣ́тель, непостижи́мый, неизслѣ́димый, и҆ неизрече́нный: ѻ҆ба́че и҆́стиннѣйшагѡ ра́ди ѹ҆вѣре́нїѧ, ѿ ва́шихъ же кни́гъ свидѣ́телства покажꙋ̀: слы́ши что̀ ѡ҆ не́мъ премꙋ́дрѣйшаѧ сѷві́лла ва́ша глаго́летъ, свидѣ́телствꙋющи ѡ҆ є҆гѡ̀ бжⷭ҇твенномъ воплоще́нїи, и҆ сп҃си́телномъ распѧ́тїи: По́здѣ нѣ́кїй на многоча́стнꙋю сїю̀ прїи́детъ зе́млю, и҆ кромѣ̀ грѣха̀ бꙋ́детъ пло́ть, безтрꙋ́дными же бжⷭ҇тва̀ предѣ́лы, неисцѣ́лныхъ страсте́й разрѣши́тъ тлѣ́нїе, и҆ семꙋ̀ за́висть бꙋ́детъ ѿ невѣ́рныхъ люде́й, и҆ на высотѣ̀ повѣ́шенъ бꙋ́детъ, а҆́ки бы сме́рти досто́йный. Слы́ши же и҆ нело́жнаго твоего̀ а҆полли́на, ка́кѡ и҆ нево́лею свое́ю и҆сповѣ́да хрⷭ҇та̀ бг҃а и҆́стинна, принꙋжде́нъ ѿ є҆гѡ̀ си́лы: є҆ди́нъ мѧ̀, речѐ, понꙋжда́етъ нбⷭ҇ный, и҆́же є҆́сть свѣ́тъ трисвѣ́тлый, пострада́вый же бг҃ъ є҆́сть, а҆ не бжⷭ҇тво̀ пострада̀ са́мое: и҆́бо ѻ҆боѐ є҆́сть, и҆ сме́ртенъ пло́тїю, и҆ и҆стѣ́нїѧ чꙋ́ждь, то́йже бг҃ъ є҆́сть, мꙋ́жъ всѧ̀ терпѧ́й ѿ сме́ртныхъ, крⷭ҇тъ, доса́дꙋ, погребе́нїе. Сїѧ̑ речѐ а҆полли́нъ ѡ҆ и҆́стинномъ бз҃ѣ, и҆́же є҆́сть собезнача́лный ро́ждшемꙋ є҆гѡ̀ и҆ сопрⷭ҇носꙋ́щный, нача́ло и҆ ко́рень, и҆ и҆сто́чникъ созда́нныхъ бла̑гъ всѣ́хъ: созда̀ мі́ръ ѿ небытїѧ̀ во є҆́же бы́ти, и҆ содержи́тъ є҆го̀: є҆диносꙋ́щенъ же сы́й ѻ҆ц҃ꙋ̀, бы́сть человѣ́къ на́съ ра́ди, и҆ хожда́ше по землѝ, наказꙋ́ѧ, ѹ҆ча̀ и҆ бл҃годѣ́телствꙋѧ человѣ́кѡмъ: та́же сме́рть прїѧ̀ за на́съ неблагода́рныхъ, да разрѣши́тъ пе́рвое ѡ҆сꙋжде́нїе, и҆ прїи́мемъ дре́внее наслажде́нїе и҆ бл҃же́нство, и҆ та́кѡ ѿве́рзе на́мъ па́ки врата̀ ра́йскаѧ, ꙗ҆̀же ѕлѣ̀ заключи́хомъ: и҆ воскре́съ тридне́венъ, взы́де на нб҃са̀, ѿню́дꙋже и҆ сни́де, и҆ посла̀ дх҃а ст҃а́го ѹ҆ч҃нкѡ́мъ свои́мъ: ѻ҆ни́ же ше́дше въ ве́сь мі́ръ, проповѣ́даша є҆гѡ̀ бжⷭ҇тво̀, въ не́же подоба́етъ и҆ тебѣ̀ вѣ́ровати фїлосо́фе, да позна́еши и҆́стиннаго бг҃а, и҆ бꙋ́деши ра́бъ тогѡ̀, и҆́же є҆́сть ми́лостивъ и҆ благоꙋтро́бенъ, и҆ согрѣши̑вшыѧ призыва́етъ, глаго́лѧ: прїиди́те ко мнѣ̀ всѝ трꙋжда́ющїисѧ и҆ ѡ҆бремене́ннїи, и҆ а҆́зъ ѹ҆поко́ю вы̀ (Мт. а҃і : к҃и). Да́ждь ѹ҆́бѡ вѣ́рꙋ понѐ свои́мъ ѹ҆чи́телємъ и҆ богѡ́мъ, платѡ́нꙋ, глаго́лю, ѻ҆рфе́ю же, и҆ а҆полли́нꙋ, и҆̀же чи́стѡ и҆ ꙗ҆́снѡ, а҆́ще и҆ не хотѧ́ще, хрⷭ҇та̀ бг҃а и҆сповѣ́даша. Сїѧ̑ и҆ и҆́наѧ мнѡ́жайшаѧ глаго́лющи премꙋ́драѧ є҆катері́на, ѹ҆дивѝ фїлосо́фа, и҆ бы́сть безгла́сенъ, не могꙋ́щи ѿню́дъ глаго́лати вопрекѝ ничто́же. Ца́рь же ви́дѣвъ є҆го̀ та́кѡ побѣжде́нна и҆ чꙋдѧ́щасѧ, повелѣ прѡ́чїимъ бесѣ́довати со ст҃о́ю дѣ́вою. ѻ҆ни́ же ѿрица́хꙋсѧ глаго́люще: не мо́жемъ ста́ти проти́вꙋ и҆́стины: а҆́ще бо нача́лникъ на́шъ ѹ҆молчѐ побѣжде́нъ, то̀ мы̀ что̀ рещѝ и҆́мамы; Тогда̀ ца́рь воз̾ѧри́всѧ, повелѣ̀ разжещѝ ѻ҆́гнь ве́лїй посредѣ̀ гра́да, во є҆́же сожещѝ всѣ́хъ фїлосо́фѡвъ и҆ виті́й. ті́и же слы́шавше таковы́й сꙋ́дъ и҆ и҆зрече́нїе на сѧ̀ царе́во, припадо́ша къ нога́мъ ст҃ы́ѧ, просѧ́ще ю҆̀, да помо́литсѧ ѡ҆ ни́хъ къ є҆ди́номꙋ и҆́стинномꙋ бг҃ꙋ, ꙗ҆́кѡ да прости́тъ и҆̀мъ всѧ̑, є҆ли̑ка въ невѣ́дѣнїи согрѣши́ша: и҆ да сподо́битъ и҆̀хъ ст҃а́гѡ кр҃ще́нїѧ и҆ да́ра прест҃а́гѡ дх҃а. Ст҃а́ѧ же и҆спо́лнившисѧ сла́дости и҆ ра́дованїѧ, речѐ и҆̀мъ: вои́стиннꙋ бл҃же́ни вы̀ и҆ бл҃гополꙋ́чни є҆стѐ, ꙗ҆́кѡ тмꙋ̀ ѡ҆ста́вивше, свѣ́тъ и҆́стины позна́сте, и҆ тлѣ́ннаго на землѝ царѧ̀ презрѣ́вше, пристꙋпи́сте къ нетѣ́нномꙋ нбⷭ҇номꙋ: несꙋмнѣ́ннѡ ѹ҆̀бо на ми́лость є҆гѡ̀ надѣ́йтесѧ, и҆ вѣ́рꙋйте, ꙗ҆́кѡ ѻ҆́гнь, и҆́мже ва́съ ѹ҆страша́ютъ нечести́вїи, бꙋ́детъ ва́мъ кр҃ще́нїе, и҆ лѣ́ствица къ нб҃сѝ возводѧ́щаѧ. въ то́мъ ѻ҆гнѝ ѡ҆чи́стившесѧ ѿ всѧ́кїѧ скве́рны пло́ти и҆ дꙋ́ха, ѡ҆брѧ́щетесѧ ꙗ҆́кѡ ѕвѣ́зды свѣ́тлыѧ чи́стыѧ пред̾ цр҃е́мъ сла́вы, и҆ бꙋ́дете є҆мꙋ̀ возлю́бленнїи дрꙋ́зи. Сїѧ̑ гл҃ющи ст҃а́ѧ, ѡ҆бвеселѝ и҆̀хъ сицевы́ми наде́ждами, и҆ назна́менова коего́ждо на челѣ̀ печа́тїю хрⷭ҇то́вою крⷭ҇то́мъ ст҃ы́мъ, и҆ и҆до́ша съ ра́достїю на мꙋче́нїе. во́ини же вверго́ша и҆̀хъ во ѻ҆́гнь, въ седмьнадесѧ́тый де́нь ное́мврїа мцⷭ҇а. Въ ве́черъ же и҆до́ша нѣ́цыи бл҃гочести́вїи и҆ хрⷭ҇толюби́вїи лю́дїе собра́ти мо́щы и҆́хъ, и҆ ѡ҆брѣто́ша всѣ́хъ цѣ́лыхъ, и҆ нижѐ вла́съ и҆́хъ ѿ ѻ҆гнѧ̀ сгорѣ̀: тѣ́мъ чꙋ́домъ мно́зи къ позна́нїю и҆́стины ѡ҆брати́шасѧ, и҆ мо́щы ты́ѧ че́стнѡ на мѣ́стѣ прили́чномъ погребо́ша.

Ца́рь же и҆мѣ́ѧше всѐ своѐ попече́нїе ѡ҆ ст҃о́й є҆катері́нѣ, ко́имъ бы ѻ҆́бразомъ ѡ҆брати́ти ю҆̀ къ своемꙋ̀ нече́стїю. не ѹ҆спѣ́въ же ничто́же фїлосо́фскими сѷллогі́смы, нача̀ ласка́ньми и҆ лꙋка́вствы прельща́ти ю҆̀, глаго́лѧ: послꙋ́шай мѧ̀ до́браѧ дщѝ, ꙗ҆́кѡ чадолюби́вый тво́й ѻ҆те́цъ совѣ́тꙋю тѝ: поклони́сѧ вели́кимъ богѡ́мъ, наипа́че мꙋсикі́йскомꙋ є҆рмі́ю, и҆́же ѹ҆краси́ тѧ толи́кими фїлосо́фскими дарова́нми. а҆́зъ же раздѣлю̀ съ тобо́ю ца́рство моѐ, бо́зи мѝ свидѣ́тели, и҆ да́мъ тѝ по́лъ вла́сти моеѧ̀, и҆ бꙋ́деши со мно́ю жи́ти веселѧ́щисѧ непреста́ннѡ. Ст҃а́ѧ же ꙗ҆́кѡ премꙋ́дра сꙋ́щи, ѹ҆разꙋмѣ̀ намѣ́ренїе є҆гѡ̀ и҆ лꙋка́вство, и҆ ле́сть, и҆ глаго́ла є҆мꙋ̀: ѿложѝ ѽ царю̀ лꙋка́вство, и҆ не ѹ҆подоблѧ́йсѧ ли́сꙋ, а҆́зъ бо є҆ди́ною рѣ́хъ тѝ, ꙗ҆́кѡ хрⷭ҇тїа́нынѧ є҆́смь, и҆ и҆зво́лихъ ѹ҆невѣ́ститисѧ хрⷭ҇тꙋ̀, и҆ є҆го̀ є҆ди́наго и҆мѣ́ю жениха̀, и҆ совѣ́тника, и҆ красотꙋ̀ дѣ́вства моегѡ̀: ѻ҆де́жды же мч҃нчества лꙋ́чше жела́ю па́че всѧ́кїѧ црⷭ҇кїѧ багрѧни́цы. Ца́рь же па́ки речѐ: принꙋжда́еши мѧ̀, а҆́ще и҆ не хощꙋ̀, да ѡ҆безче́щꙋ досто́инство твоѐ, и҆ кра́сное твоѐ тѣ́ло мно́гими ѡ҆бложꙋ̀ ра́нами. Ст҃а́ѧ же ѿвѣща̀: творѝ є҆́же хо́щеши, и҆́бо вре́меннымъ безче́стїемъ хода́тайтвовати мнѣ̀ бꙋ́деши сла́вꙋ вѣ́чнꙋю, и҆ мно́гое мно́жество люде́й вѣ́ровати бꙋ́детъ мно́ю во хрⷭ҇та̀ моего̀: и҆ ѿ твоеѧ̀ пала́ты мно́зи по́йдꙋтъ со мно́ю къ сщ҃е́ннымъ черто́гѡмъ нбⷭ҇нымъ. сїѧ̑ проречѐ ст҃а́ѧ, бг҃ъ же съ высоты̀ призирѧ́ѧй, въ соверше́нїе привожда́ше прⷪ҇ро́чество є҆ѧ̀. Тогда̀ ца́рь разгнѣ́вавсѧ ѕѣлѡ̀, повелѣ̀ съ неѧ̀ совлещѝ порфѵ́рꙋ, и҆ ѡ҆бнажи́вше би́ти ю҆̀ жи́лами воло́выми неми́лостивнѡ. и҆ би́ша слꙋгѝ мч҃нцꙋ два̀ часа̀ крѣ́пкѡ, по плеща́мъ и҆ по чре́вꙋ толи́кѡ, до́ндеже всѐ дѣ́вственное є҆ѧ̀ тѣ́ло раздроби́сѧ ра́нами, и҆ бы́сть ѿ ꙗ҆́звъ безобра́зно, є҆́же пре́жде бѣ̀ красно̀ и҆ предобро̀, и҆ кро́вь а҆́ки рѣка̀ теча́ше, и҆ землѧ̀ є҆́ю ѡ҆багри́сѧ. Ст҃а́ѧ же стоѧ́ше съ толи́кимъ мꙋ́жествомъ и҆ до́блествомъ, ꙗ҆́кѡ ви́дѧщымъ чꙋди́тисѧ ѕѣлѡ̀. По́здѣ же повелѣ̀ ди́вїй ѻ҆́ный ѕвѣ́рь всади́ти ю҆̀ въ темни́цꙋ, и҆ не да́ти є҆́й пи́щи ни питїѧ̀, до́ндеже ѹ҆мы́слитъ ко́ими мꙋ́ками погꙋтби́тъ ю҆̀.

А҆́ѵгꙋста же сꙋпрꙋ́жница царе́ва и҆мѣ́ѧше жела́нїе мно́гое ви́дѣти лицѐ є҆катері́ны ст҃ы́ѧ, и҆́бо возлюбѝ ю҆̀ ѕѣлѡ̀, слы́шавши добродѣ̑тели є҆ѧ̀, и҆ премꙋ́дрость, и҆ мꙋ́жество, наипа́че же є҆ди́нагѡ ра́ди видѣ́нїѧ во снѣ̀ ви́дѣннагѡ, ꙗ҆́коже ни́же ꙗ҆ви́тсѧ: ѿню́дꙋже ѹ҆ѧзви́сѧ се́рдцемъ въ любо́вь є҆ѧ̀ толи́кѡ, ꙗ҆́кѡ и҆ ѹ҆снꙋти не можа́ше. И҆зше́дшꙋ же царю̀ ѿ гра́да нѣ́кїѧ ра́ди вины̀, и҆ ѹ҆ме́длившꙋ та́мѡ нѣколикѡ дне́й, ѡ҆брѣ́те цари́ца бл҃гоꙋго́дное вре́мѧ, во є҆́же полꙋчи́ти желаемое. Бѧ́ше же є҆ди́нъ вели́кїй кнѧ́зь, дрꙋ́гъ вѣ́рный царе́въ, са́номъ воево́да, и҆́менемъ порфѵ́рїй, чл҃вѣ́къ бл҃горазꙋ́мный: семꙋ̀ и҆сповѣ́да а҆́ѵгꙋста намѣ́ренїе своѐ та́йнѡ, сїѧ̑ глаго́лющи: во є҆ди́нꙋ ѿ преше́дшихъ ноще́й ви́дѣхъ въ видѣ́нїи мое́мъ є҆катері́нꙋ, ꙗ҆́же сѣдѧ́ше посредѣ̀ мно́гихъ ю҆́ношъ и҆ дѣ́въ кра́сныхъ, ѡ҆блече́нныхъ во ѻ҆де́жды бѣ́лыѧ: и҆ толи́кое сїѧ́нїе и҆схожда́ше ѿ лица̀ є҆ѧ̀, ꙗ҆́кѡ не мого́хъ воззрѣ́ти на ню̀. ѻ҆на́ же посади́ мѧ близ̾ себѐ, и҆ возложѝ на главꙋ̀ мою̀ златы́й вѣне́цъ, гл҃ющи: Влⷣка хрⷭ҇то́съ посыла́етъ тебѣ̀ се́й вѣне́цъ. ѿню́дꙋже и҆мѣ́ю толи́кое жела́нїе ви́дѣти ю҆̀, ꙗ҆́кѡ не ѡ҆брѣта́ю поко́ѧ срⷣцꙋ моемꙋ̀: молю̀ ѹ҆̀бо тѧ̀, сотворѝ ко́имлибо ѻ҆́бразомъ ви́дѣти мѝ ю҆̀ та́йнѡ. Порфѵ́рїй же ѿвѣща̀: а҆́зъ и҆спо́лню жела́нїе твоѐ цари́це. Наста́вшей же но́щи взѧ̀ воево́да двѣ́сти во́инѡвъ, и҆ и҆до́ша въ темни́цꙋ съ цари́цею, и҆ да́вше стражє́мъ пѣ́нѧзи, внидо́ша ко ст҃ѣ́й: ю҆́же є҆гда̀ ѹ҆зрѣ̀ цари́ца, ѹ҆диви́сѧ свѣ́тлости лица̀ є҆ѧ̀, є҆́же цвѣтѧ́ше бжⷭ҇твенною бл҃года́тїю. и҆ па́дши ско́рѡ къ нога́мъ є҆ѧ̀, со слеза́ми нача̀ гл҃ати: ны́нѣ є҆́смь бл҃гополꙋ́чнаѧ и҆ бл҃же́ннаѧ цари́ца, ꙗ҆́кѡ сподо́бихсѧ ви́дѣти тѧ̀, є҆ѧ́же безмѣ́рнѡ жела́хъ зрѣ́ти, и҆ жажда́хъ ꙗ҆́коже є҆ле́нь, слы́шати медото́чный ѧ҆зы́къ тво́й: и҆ ны́нѣ, ꙗ҆́кѡ сподо́бихсѧ жела́емое полꙋчи́ти, не скорблю̀, ѹ҆жѐ а҆́ще и҆ живота̀ и҆ ца́рствїѧ лише́на бꙋ́дꙋ, веселю́сѧ се́рдцемъ и҆ дꙋше́ю, прїе́млющи толи́кое сла́дкое ѡ҆заре́нїе ѿ кра́снагѡ твоегѡ̀ видѣ́нїѧ. бл҃же́нна ты̀ и҆ досто́йна похвалы̀, ꙗ҆́кѡ сицево́мꙋ влⷣцѣ прилѣпи́ласѧ є҆сѝ, ѿ негѡ́же прїе́млеши толи́каѧ дарова̑нїѧ. Ст҃а́ѧ же ѿвѣща̀ є҆́й, гл҃ющи: бл҃же́нна є҆сѝ и҆ ты̀ ѽ цари́це, поне́же ви́ждꙋ вѣне́цъ главы̀ твоеѧ̀ а҆́гг҃лскими рꙋка́ми въ высотꙋ̀ взе́млемый, є҆го́же и҆́маши по тре́хъ дне́хъ прїѧ́ти за ма́лꙋю мꙋ́кꙋ, ю҆́же претерпи́ши, да и҆́деши ко и҆́стинномꙋ црю̀ ца́рствовати вѣ́чнѡ. Ѻ҆на́ же речѐ є҆́й: бою́сѧ мꙋче́нїй, а҆ наипа́че сꙋпрꙋ́жника: ꙗ҆́кѡ же́стокъ є҆́сть ѕѣлѡ̀ и҆ безчеловѣ́ченъ. Гл҃а є҆́й ст҃а́ѧ: дерза́й, и҆мѣ́ти бо бꙋ́деши в̾ срⷣцѣ твое́мъ хрⷭ҇та̀ помога́ющаго тебѣ̀, да не прибли́житсѧ дꙋшѝ твое́й ниеди́на мꙋ́ка, то́кмѡ ма́лѡ поболи́тъ тѣ́ло твоѐ здѣ̀ привре́меннѡ, и҆ та́мѡ ѹ҆поко́итсѧ вѣ́чнѡ. Сїѧ̑ ст҃ѣ́й и҆зре́кшей, вопросѝ ю҆̀ порфѵ́рїй, глаго́ла: что̀ да́рꙋетъ хрⷭ҇то́съ тѣ̑мъ, и҆̀же въ него̀ вѣ́рꙋютъ; поне́же хощꙋ̀ и҆ а҆́зъ въ него̀ вѣ́ровати, и҆ во́инъ тогѡ̀ бы́ти. Речѐ є҆мꙋ̀ мч҃нца: не чита́лъ ли є҆сѝ, и҆лѝ не слы́шалъ є҆сѝ писа́нїѧ хрⷭ҇тїа́нскагѡ; Ѿвѣща̀ порфѵ́рїй: ѿ младе́нства во бра́нехъ ѹ҆пражнѧ́хсѧ, а҆ ѡ҆ и҆ны́хъ ве́щехъ попече́нїѧ не и҆мѣ́хъ. Гл҃а є҆мꙋ̀ ст҃а́ѧ: не мо́жетъ ѧ҆зы́къ и҆сповѣ́сти та̀ бл҃га̑ѧ, ꙗ҆̀же преблагі́й бг҃ъ и҆ чл҃вѣколю́бецъ ѹ҆гото́ва лю́бѧщымъ є҆го̀, и҆ хранѧ́щымъ є҆гѡ̀ повелѣ̑нїѧ. Тогда̀ порфѵ́рїй ра́дости безмѣ́рныѧ и҆спо́лнисѧ, и҆ вѣ́рова во хрⷭ҇та̀ съ двꙋмѧ̀ ст҃а́ми вѡ́инъ и҆ съ цари́цею, и҆ цѣлова́вше всѝ со бл҃гоговѣ́нїемъ мч҃нцꙋ, ѿидо́ша. Млⷭ҇тивый же чл҃вѣколю́бецъ хрⷭ҇то́съ не ѡ҆ста́ви ст҃ꙋ́ю свою̀ невѣ́стꙋ небрего́мꙋ толи́кѡ дне́й, но ꙗ҆́кѡ чадолюби́вый ѻ҆ц҃ъ промышлѧ́ше ѡ҆ не́й, и҆ посыла́ше є҆́й пи́щꙋ є҆ди́ною голꙋби́цею на всѧ́къ де́нь. Та́же и҆ са́мъ до́брый подвигополо́жникъ прїи́де посѣти́ти ю҆̀ со сла́вою мно́гою, и҆ со всѣ́ми нбⷭ҇ными чи́нми, и҆ мно́жае ѹ҆крѣпѝ мꙋ́жество є҆ѧ̀, и҆ и҆спо́лни ю҆̀ дерзнове́нїѧ, гл҃ѧ: не бо́йсѧ возлю́бленнаѧ моѧ̀ невѣ́сто, ꙗ҆́кѡ а҆́зъ є҆́смь съ тобо́ю, и҆ ни є҆ди́но мꙋче́нїе прибли́житсѧ тебѣ̀, терпѣ́нїемъ же твои́мъ мнѡ́гїѧ ко мнѣ̀ ѡ҆брати́ши, и҆ мно́гихъ вѣнцє́въ сподо́бишисѧ: таковы́ми ю҆̀ словесы̀ гдⷭ҇ь ѹ҆тѣ́шивъ, ѿи́де.

Во ѹ҆́трїе же сѣ́дши на сꙋди́щи ца́рь, повелѣ̀ привестѝ мч҃нцꙋ, ꙗ҆́же вни́де въ ца́рскаѧ съ дх҃о́вными благода́тми и҆ сла́дкою ѻ҆́ною свѣ́тлостїю, ꙗ҆́кѡ и҆ предстоѧ́щымъ ѡ҆зари́тисѧ сїѧ́нїемъ красоты̀ є҆ѧ̀. Ѹ҆диви́сѧ же и҆ ца́рь ѕѣлѡ̀, и҆ мнѧ́ше, ꙗ҆́кѡ нѣ́кто даѧ́ше є҆́й пи́щꙋ въ темни́цѣ, и҆ сегѡ̀ ра́ди не ѡ҆слабѣ̀ тѣ́ломъ, ни и҆змѣнѝ красоты̀ лица̀ своегѡ̀ чрез̾ толи́кѡ дне́й. хотѧ́ше же казни́ти страже́й, но ст҃а́ѧ є҆катері́на, да не бꙋ́дꙋтъ и҆ні́и мꙋ́чени непови́ннѡ є҆ѧ̀ ра́ди, и҆сповѣ́да и҆́стинꙋ, гл҃ющи: вѣ́ждь царю̀, ꙗ҆́кѡ мнѣ̀ пи́щꙋ не подадѐ рꙋка̀ человѣ́ческаѧ ѿню́дъ, но влⷣка мо́й хрⷭ҇то́съ, и҆́же пече́тсѧ ѡ҆ рабѣ́хъ свои́хъ, то́й пита́ше мѧ̀. Ца́рь ѹ҆̀бо диви́сѧ сицево́й добро́тѣ, и҆ восхотѣ̀ па́ки и҆скꙋси́ти ю҆̀ ласка́нїемъ и҆ ле́стїю, глаго́лѧ сїѧ̑: тебѣ̀ подоба́етъ ца́рствовати дщѝ, сл҃нечнозра́чнаѧ ѻ҆трокови́це, ꙗ҆́же и҆ са́мꙋю а҆ртемі́дꙋ /дїа́нꙋ/ превосхо́диши благолѣ́пїемъ: прїидѝ ѹ҆̀бо, пожрѝ богѡ́мъ, да ца́рствꙋеши съ на́ми, и҆ поживе́ши живо́тъ прера́достный: молю́ тѧ, не восхощѝ погꙋби́ти толи́кїѧ добро́ты твоеѧ̀ и҆ красоты̀ мꙋче́нми. Гл҃а ст҃а́ѧ: а҆́зъ є҆́смь землѧ̀ и҆ бре́нїе, всѧ́ же красота̀ ꙗ҆́кѡ цвѣ́тъ ѹ҆вѧда́етъ, и҆ ꙗ҆́кѡ со́нїе и҆счеза́етъ ѿ ма́лыѧ не́мощи, и҆лѝ ѿ ста́рости, по сме́рти же весма̀ гнїе́тъ: не пецы́сѧ ѹ҆̀бо ѡ҆ добро́тѣ и҆ красотѣ̀ мое́й. Сїѧ̀ є҆гда̀ бесѣ́доваше ст҃а́ѧ съ царе́мъ, є҆па́рхъ нѣ́кїй и҆́менемъ хꙋрса́денъ, же́стокъ нра́вомъ, и҆ мꙋчи́тель неми́лостивый, то́й хотѧ̀ показа́ти къ ца́рю любо́вь и҆ доброхо́тїе, речѐ: а҆́зъ царю̀ и҆зобрѣто́хъ мꙋче́нїе є҆ди́но, и҆́мже дѣви́цꙋ тꙋ̀ побѣди́ши. повелѝ сотвори́ти четы́ре древѧ́ныѧ коле́са во є҆ди́номъ гвоздѣ̀, и҆ въ ни́хъ пригвозди́ти ѻ҆́крестъ ко́пїѧ и҆ и҆́наѧ желѣ́за ѻ҆стрѣ́йшаѧ: два̀ ѹ҆́бѡ ко́ла да ѡ҆браща́ютсѧ ѡ҆деснꙋ́ю, а҆ два̀ ѡ҆шꙋ́юю, посредѣ́ же и҆́хъ да бꙋ́детъ дѣви́ца свѧ́зана, и҆ та́кѡ ѡ҆браща́ющаѧсѧ колеса̀ раздробѧ́тъ пло́ть є҆ѧ̀. но пе́рвѣе да ѡ҆браща́емы бꙋ́дꙋтъ коле́са пра́здны пред̾ ѻ҆чесы̀ дѣви́цы, ꙗ҆́кѡ да ви́дѧщи ѻ҆́ныѧ ѹ҆бои́тсѧ жесто́кагѡ мꙋче́нїѧ, и҆ прекло́нитсѧ къ во́ли твое́й: а҆́ще же нѝ, то̀ да прїи́метъ та́кѡ го́рькꙋю сме́рть. ѹ҆го́денъ же бы́сть царю̀ совѣ́тъ є҆па́рховъ, и҆ повелѣ̀ сотвори́ти такова́ѧ коле́са. приве́дше же ст҃ꙋ́ю на лю́тое то̀ мꙋче́нїе, ѡ҆браща́хꙋ коле́са нꙋ́ждею мно́гою пред̾ ѻ҆чесы̀ є҆ѧ̀, да ѹ҆страша́тъ ю҆̀: и҆ глаго́ла є҆́й мꙋчи́тель: ви́диши ли какова̀ ѹ҆гото́вана тѝ є҆́сть мꙋ́ка, въ не́йже горча́йшꙋю сме́рть прїѧ́ти и҆́маши, а҆́ще не покло́нишисѧ богѡ́мъ; Ѻ҆на́ же ѿвѣща̀: реко́хъ тѝ мно́гажды намѣ́ренїе моѐ, про́чее не погꙋблѧ́й вре́мене, но творѝ є҆́же хо́щеши: ѻ҆́нъ же ви́дѧ, ꙗ҆́кѡ не мо́жетъ ѹ҆страши́ти ю҆̀, и҆ ѿ хрⷭ҇та̀ ѿврати́ти, повелѣ̀ на коле́са привѧза́ти ю҆̀, и҆ ѡ҆браща́ти крѣ́пкѡ, ꙗ҆́кѡ да ѻ҆стрѣ́йшими желѣ́зы раздробле́на бꙋ́детъ на ѹ҆́ды, и҆ лютѣ́йшею ѹ҆́мретъ сме́ртїю. начина́ющꙋсѧ же таково́мꙋ мꙋче́нїю, внеза́пꙋ а҆́гг҃лъ гдⷭ҇нь соше́дъ съ нбⷭ҇сѐ, разрѣшѝ ст҃ꙋ́ю ѿ ѹ҆́зъ цѣ́лꙋ и҆ неврежде́ннꙋ. коле́са же сокрꙋшѝ на ча́сти ꙗ҆̀же ѿ нꙋ́жднагѡ сокрꙋше́нїѧ летѧ́щи, мнѡ́гїѧ невѣ́рныѧ порази́вше, ѹ҆мертви́ша. Предстоѧ́щїй же наро́дъ ви́дѣвши пресла́вное то̀ чꙋ́до, взыва́ше: Ве́лїй бг҃ъ хрⷭ҇тїа́нскїй. а҆ ца́рь ѿ ꙗ҆́рости помрачи́всѧ, и҆ неи́стовствова, и҆ мы́слѧше па́ки и҆зѡбрѣстѝ на мч҃нцꙋ новѣ́йшꙋю мꙋ́кꙋ.

Цари́ца же слы́шавши ѡ҆ чꙋдесѝ то́мъ, и҆зы́де ѿ черто́га своегѡ̀, и҆ ѡ҆бличѝ царѧ̀, гл҃ющи: вои́стиннꙋ ю҆ро́дъ и҆ несмы́сленъ є҆сѝ, дерза́ѧ бра́тисѧ съ живы́мъ бг҃омъ, и҆ мꙋ́чити рабꙋ̀ є҆гѡ̀ непра́веднѡ. Сїѧ̑ неча́ѧннѡ слы́шавъ ца́рь, возсвирѣ́пѣ ѿ неи́стовства, и҆ бы́сть па́че всѣ́хъ ѕвѣре́й безчеловѣ́чнѣйшїй. ѡ҆ста́вивши же є҆катері́нꙋ ст҃ꙋ́ю, ѡ҆братѝ ꙗ҆́рость на сꙋпрꙋ́жницꙋ свою̀, забы́въ є҆сте́ственнꙋю къ не́й любо́вь: и҆ повелѣ̀ принестѝ ковче́гъ вели́къ, и҆ напо́лнити є҆го̀ ѻ҆́ловомъ, да бꙋ́детъ неподви́жимь. въ покро́въ же ковче́жный гво́здїе вби́въ, сосцы̀ жены̀ своеѧ̀ междꙋ̀ ковче́гомъ и҆ покро́вомъ, вложѝ, и҆ тѣ́мъ пригнѣтѐ ѻ҆́ныѧ ѕѣлѡ̀, ꙗ҆́кѡ бы́ти болѣ́зни неизрече́ннѣй. гѣтѧ́ше же та́кѡ є҆ѧ̀ сосцы̀ до то́лѣ, доне́лѣже нꙋ́жднѡ ѿторго́шасѧ, а҆ бл҃же́ннаѧ а҆́ѵгꙋста неизрече́ннꙋю тꙋ̀ болѣ́знь терпѧ́щи, ра́довашесѧ, ꙗ҆́кѡ за и҆́стиннаго бг҃а стражда́ше, къ немꙋ́же молѧ́шесѧ, да по́слетъ є҆́й съ высоты̀ по́мощь. Ѿто́рженнымъ же бы́вшымъ є҆ѧ̀ сосца́мъ, теча́ше кро́вь а҆́ки рѣка̀, и҆ всѝ предстоѧ́щїи и҆спо́лнишасѧ жа́лости, и҆ соболѣ́зновахꙋ си́це стра́ждꙋщей горча́йшꙋю и҆ нестерпи́мꙋю мꙋ́кꙋ. Кровоѧ́децъ же ѻ҆́ный немилосе́рдый не поми́лова сꙋпрꙋ́ги своеѧ̀, но повелѣ̀ главꙋ̀ є҆ѧ̀ ѿсѣщѝ мече́мъ. ѻ҆на́ же сицево́е и҆зрече́нїе ра́достнѡ прїе́мши, гл҃а ко ст҃ѣ́й є҆катері́нѣ: Рабо̀ и҆́стиннагѡ бг҃а, сотворѝ моли́твꙋ ѡ҆ мнѣ̀. ѻ҆на́ же речѐ є҆́й: и҆дѝ съ ми́ромъ, да црⷭ҇твꙋеши со хрⷭ҇то́мъ вѣ́чнѡ. и҆ ѹ҆сѣ́чена бы́сть бл҃же́ннаѧ цари́ца внѣ̀ гра́да въ два́десѧтъ тре́тїе число̀ ное́мврїа. Стратила́тъ /воево́да/ же порфѵ́рїй но́щїю взе́мши є҆ѧ̀ тѣ́ло, погребѐ че́стнѡ. Во ѹ҆́трїе же съ во́ины свои́ми во хрⷭ҇та̀ вѣ́ровавшими предста̀ царю̀, гл҃ющи: и҆ мы̀ хрⷭ҇тїа́не є҆смы̀, во́ини вели́кагѡ бг҃а. сегѡ̀ слы́шати не терпѧ̀ ца́рь, воздохнꙋ̀ и҆з глꙋбины̀ се́рдца, глаго́лѧ: ѹ҆вы̀ погибо́хъ, ꙗ҆́кѡ ѿтщети́хсѧ чꙋ́днагѡ порфѵ́рїа. та́же ѡ҆бра́щсѧ къ прѡ́чїимъ во́инѡмъ глаго́лаше: и҆ вы̀ во́ини моѝ любе́знѣйшїи прелсти́стесѧ, и҆ ѿ богѡ́въ ѻ҆те́ческихъ ѿстꙋпи́сте: что̀ согрѣши́ша ва́мъ бо́зи, ꙗ҆́кѡ ѡ҆ста́висте и҆̀хъ; ѻ҆ни́ же не ѿвѣща́ша є҆мꙋ̀ словесѐ, то́кмѡ порфѵ́рїй речѐ: чесѡ̀ ра́ди ѡ҆ставлѧ́еши главꙋ̀, и҆ вопроша́еши но́ги; со мно́ю бесѣ́дꙋй. Ѻ҆́нъ же речѐ: ѕла́ѧ главо̀, ты̀ є҆сѝ вино́венъ поги́бели и҆́хъ. не могі́й же бо́лѣе глаго́лати ѿ ꙗ҆́рости, повелѣ̀ ѹ҆сѣщѝ всѣ́мъ главы̑, и҆ та́кѡ сконча́шасѧ. и҆ и҆спо́лнисѧ ст҃ы́ѧ є҆катері́ны прорече́нїе, є҆́же речѐ царю̀, ꙗ҆́кѡ мно́зи ѿ пала́ты є҆гѡ̀ вѣ́ровати и҆́мꙋтъ во хрⷭ҇та̀ бг҃а.

Та́же мꙋчи́тель приве́дши є҆катері́нꙋ на сꙋди́ще, речѐ є҆́й: мно́гꙋю ско́рбь и҆ тщетꙋ̀ сотвори́ла є҆сѝ мнѣ̀: ты̀ прелсти́ла є҆сѝ женꙋ̀ мою̀, и҆ мꙋ́жественнаго моего̀ стратила́та погꙋби́ла є҆сѝ, и҆́же бѧ́ше всѧ̀ си́ла во́инства моегѡ̀: и҆ и҆на́ѧ мнѡ́гаѧ ѕла́ѧ слꙋчи́шасѧ мнѣ̀ тобо́ю, и҆ подоба́ше тѧ̀ ѹ҆мертви́ти неми́лостивнѡ, но проща́ю тѧ̀, ꙗ҆́кѡ жалѣ́ю погꙋби́ти тѧ̀ ѻ҆трокови́цꙋ толи́кѡ краснꙋ̀ и҆ премꙋ́дрꙋ: сотворѝ ѹ҆̀бо во́лю мою̀ любе́знѣйшаѧ моѧ̀, пожрѝ богѡ́мъ, да сотворю́ тѧ себѣ̀ цари́цꙋ, и҆ никогда́же ѡ҆скорблю́ тѧ, нижѐ сотворю̀ ко́е дѣ́ло без̾ твоегѡ̀ совѣ́та, и҆ поживе́ши со мно́ю въ толи́комъ весе́лїи и҆ блаже́нствѣ, въ каково́мъ и҆на́ѧ ни є҆ди́на когда̀ поживѐ цари́ца. Сїѧ̑ и҆ мнѡ́жайшаѧ гл҃аше лꙋка́вый, прельща́ѧ и҆збра́ннꙋю невѣ́стꙋ хрⷭ҇то́вꙋ: но не возмо́же ле́стными свои́ми словесы̀ разлꙋчи́ти ю҆̀ ѿ хрⷭ҇та̀, съ ни́мже ѻ҆на̀ и҆́стинныѧ любвѐ сою́зомъ крѣ́пкѡ свѧза́сѧ. Та́же ви́дѧ, ꙗ҆́кѡ ни ласка́нїемъ, ни ѡ҆бѣща́нїѧми, нижѐ преще́нїемъ и҆ мꙋ́ками можа́ше ѹ҆мѧгчи́ти твердѣ́йшꙋю па́че а҆дама́нта, дадѐ на ню̀ и҆зрече́нїе, да ѿсѣ́чена бꙋ́детъ є҆́й глава̀ внѣ̀ гра́да. Пое́мше ѹ҆̀бо ю҆̀ во́ини, ведо́ша на мѣ́сто ѹ҆сѣче́нїѧ. послѣ́доваше же є҆́й наро́дъ мно́гъ мꙋже́й и҆ же́нъ пла́чꙋщихъ ѡ҆ не́й, ꙗ҆́кѡ и҆мѣ́ѧше поги́бнꙋти, ꙗ҆́коже ѻ҆нѝ мнѧ́хꙋ, сицева́ѧ предо́браѧ и҆ премꙋ́драѧ ѻ҆трокови́ца. и҆зрѧ́днѣйшыѧ же ѿ же́нъ и҆ бл҃горо́днѣйшыѧ глаго́лахꙋ къ не́й, рыда́юще: ѽ краснѣ́йшаѧ ѻ҆трокови́це и҆ пресвѣ́тлаѧ, чесѡ̀ ра́ди толи́кѡ жестокосе́рда є҆сѝ, и҆ предпочита́еши сме́рть па́че сладча́йшагѡ живота̀; чесѡ̀ ра́ди погꙋблѧ́еши безвре́меннѡ и҆ всꙋ́е цвѣ́тъ ю҆́ности твоеѧ̀; не лꙋ́ше лѝ послꙋ́шати царѧ̀ и҆ наслажда́тисѧ толи́кихъ бла́гъ въ жи́зни се́й, не́же ли ѹ҆мре́ти ѻ҆каѧ́ннѡ; ѻ҆на́ же ѿвѣща̀: ѡ҆ста́вите неполе́зный пла́чь, и҆ ра́дꙋйтесѧ па́че, ꙗ҆́кѡ а҆́зъ ны́нѣ зрю̀ возлю́бленнаго жениха̀ і҆и҃са хрⷭ҇та̀ творца̀ и҆ сп҃са моего̀, и҆́же є҆́сть мч҃нкѡвъ красота̀, и҆ вѣне́цъ, и҆ сла́ва, и҆ призыва́етъ мѧ̀ къ неизрече́ннымъ добро́там ра́йскимъ, да црⷭ҇твꙋю съ ни́мъ, и҆ возвеселю́сѧ во вѣ́къ безконе́чный: не ѡ҆ мнѣ̀ ѹ҆̀бо, но себѐ пла́чите, ꙗ҆́кѡ за невѣ́рїе ва́ше по́йдете во ѻ҆́гнь безконе́чный мꙋ́читисѧ во вѣ́ки. Дости́гши же на мѣ́сто сконча́нїѧ, сотворѝ моли́твꙋ сїю̀:

Гдⷭ҇и і҆и҃се хрⷭ҇тѐ бж҃е мо́й, бл҃годарю́ тѧ, ꙗ҆́кѡ поста́вилъ є҆сѝ на ка́мени терпѣ́нїѧ но́зѣ мои, и҆ и҆спра́вилъ є҆сѝ стѡпы̀ моѧ̀. прострѝ ны́нѣ пречⷭ҇тыѧ дла́ни твоѧ̀, ꙗ҆̀же на крⷭ҇тѣ̀ ѹ҆ѧзви́лъ є҆сѝ, и҆ прїимѝ дꙋ́шꙋ мою̀, ю҆́же въ же́ртвꙋ принесо́хъ тебѣ̀ любвѐ ра́ди твоеѧ̀. помѧнѝ гдⷭ҇и, ꙗ҆́кѡ пло́ть и҆ кро́вь є҆́смь, и҆ не попꙋстѝ да ѿ лю́тыхъ и҆спыта́телей на стра́шномъ твое́мъ сꙋдѣ̀ ꙗ҆влѧ́тсѧ согрѣшє́нїѧ моѧ̀ въ невѣ́дѣнїи содѣ́ѧннаѧ: но ѡ҆мы́й ѧ҆̀ кро́вїю, ю҆́же и҆злива́ю за тѧ̀, и҆ ѹ҆стро́й да тѣ́ло сїѐ, є҆́же тебѐ ра́ди мꙋ́ками ѹ҆ра́нено мече́мъ посѣка́етсѧ, неви́димо бꙋ́детъ врагѡ́мъ твои́мъ гонѧ́щымъ мѧ̀. При́зри съ высоты̀ твоеѧ̀ гдⷭ҇и и҆ на предстоѧ́щыѧ лю́ди сїѧ̀, и҆ наста́ви и҆̀хъ на свѣ́тъ твоегѡ̀ позна́нїѧ, и҆ тѣ́мъ, є҆ли́цы призовꙋ́тъ мно́ю всест҃о́е и҆́мѧ твоѐ, да́ждь, ꙗ҆̀же къ ползѣ прошє́нїѧ, да ѿ всѣ́хъ воспѣва́ютсѧ вели́чїѧ твоѧ̀ во вѣ́ки. Та́кѡ помоли́вшисѧ, речѐ мꙋчи́телю: сконча́й повелѣ́нное. ѻ҆́нъ же просте́ръ ме́чь, ѿсѣчѐ честнꙋ́ю є҆ѧ̀ главꙋ̀, и҆ и҆сте́че ѿ ꙗ҆́звы млеко̀ вмѣ́стѡ кро́ве. Честны́ѧ же є҆ѧ̀ мо́щы въ то́йже ча́съ [ꙗ҆́коже ви́дѣно бы́сть ѿ вѣ́рныхъ досто́йныхъ] а҆́гг҃ли ст҃і́и взѧ́ша, и҆ пренесо́ша ѧ҆̀ че́стнѡ на го́рꙋ сїна́йскꙋю, въ сла́вꙋ хрⷭ҇тꙋ̀ бг҃ꙋ, и҆́же со ѻ҆ц҃е́мъ и҆ ст҃ы́мъ дх҃омъ, во є҆ди́номъ бжⷭ҇твѣ̀ црⷭ҇твꙋетъ во вѣ́ки, а҆ми́нь.

File:Ikona-Sviatia-Ekaterini-BB2U.jpg
І҆кѡ́на ст҃ы́ѧ великомч҃нцы є҆катері́ны.
Тропа́рь, гла́съ д҃:

Добродѣ́тельми ꙗ҆́кѡ лꙋча́ми со́лнечными, просвѣти́ла є҆сѝ невѣ̑рныѧ мꙋдрецы̀, и҆ ꙗ҆́коже пресвѣ́тлаѧ лꙋна̀ ходѧ́щымъ въ нощѝ, невѣ́рїѧ тмꙋ̀ ѿгна́ла є҆сѝ: бл҃же́ннаѧ великомꙋ́ченице є҆катері́но, жела́нїемъ востекла̀ є҆сѝ къ женихꙋ̀ хрⷭ҇тꙋ̀, є҆мꙋ́же со а҆́гг҃лы предстоѧ́щи за ны̀ моли́сѧ.

Конда́къ, гла́съ в҃:

Ли́къ честны́й бжⷭ҇твеннѣ мꙋчениколю́бцы воздви́гните ны́нѣ, почита́юще всемꙋ́дрꙋю є҆катері́нꙋ: сїѧ́ бо въ три́знищи хрⷭ҇та̀ проповѣ́да, и҆ ѕмі́ѧ попра̀, ри́торѡвъ ра́зꙋмы ѹ҆кроти́вши.

[…] […] […]


PD-icon.svg This work was published before January 1, 1926, and is in the public domain worldwide because the author died at least 100 years ago.