Житїѧ̑ ст҃ы́хъ ѿ ст҃а́гѡ дими́трїа росто́вскагѡ/Ма́їй/и҃

From Wikisource
Jump to navigation Jump to search
Житїѧ̑ ст҃ы́хъ, творе́нїе ст҃а́гѡ дими́трїа росто́вскагѡ (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃єby Dimitry of Rostov
Мцⷭ҇а ма́їа во и҃ де́нь
This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.


Мцⷭ҇а ма́їа во и҃ де́нь,
воспомина́нїе пра́ха ѿ гро́ба
ст҃а́гѡ і҆ѡа́нна бг҃осло́ва.
[edit]

Сегѡ̀ ст҃а́гѡ а҆пⷭ҇ла и҆ є҆ѵⷢ҇лі́ста, напе́рсника, дѣ́вственника и҆ возлю́бленнагѡ ѹ҆ченика̀ хрⷭ҇то́ва і҆ѡа́нна бг҃осло́ва честно́е преставле́нїе пра́зднꙋетсѧ септе́мврїа мцⷭ҇а въ два́десѧть шесты́й де́нь, въ ѻ҆́нже и҆ житїѐ є҆гѡ̀ ст҃о́е простра́ннѡ напи́санное положи́сѧ. Въ се́й же де́нь почита́етсѧ воспомина́нїе то́чїю цѣле́бнагѡ пра́ха ѿ гро́ба є҆гѡ̀ чꙋде́снѡ и҆сходи́вшагѡ. Є҆гда́ бо ст҃ы́й бг҃осло́въ преживѐ сто̀ лѣ́тъ и҆ вѧ́щше, трꙋди́всѧ во бл҃говѣ́стїи хрⷭ҇то́вомъ, и҆зы́де съ седмїю̀ ѹ҆ченика́ми свои́ми внѣ̀ є҆фе́са гра́да, и҆ повелѣ̀ и҆скопа́ти себѣ̀ гро́бъ крⷭ҇тоѡбра́зный, и҆ въ не́мъ, ꙗ҆́коже въ житїѝ є҆гѡ̀ пи́шетсѧ, погребе́сѧ жи́въ: слы́шавше ѡ҆ то́мъ бра́тїѧ, и҆̀же во гра́дѣ, прїидо́ша, и҆ ѿкопа́ша гро́бъ є҆гѡ̀, и҆ не ѡ҆брѣто́ша тѣ́ла а҆пⷭ҇толова, и҆ мно́гѡ ѡ҆ не́мъ пла́кавше, возврати́шасѧ. по то́мъ ча́стѡ прихожда́хꙋ ко гро́бꙋ томꙋ̀, и҆ соверша́хꙋ та́мѡ своѧ̀ къ бг҃ꙋ молє́нїѧ, призыва́юще въ по́мощь и҆ хода́тайство і҆ѡа́нна ст҃а́го. та́же нача̀ на всѧ́кїй го́дъ сегѡ̀ мцⷭ҇а и҆ днѧ̀ и҆сходи́ти и҆з̾ гро́ба є҆гѡ̀ пра́хъ нѣ́кїй то́нокъ чꙋдотво́ренъ, є҆го́же взе́млюще вѣ́рнїи, цѣлѧ́хꙋ тѣ́мъ всѧ́кїѧ недꙋ́ги и҆ стра́сти въ лю́дехъ быва́ющыѧ. и҆ тогѡ̀ ра́ди ѹ҆ста́висѧ въ се́й де́нь, ꙗ҆́коже и҆ въ септе́мврїи, цр҃ко́вными пѣснословле́нїи похвалѧ́ти и҆ ѹ҆бл҃жа́ти вели́каго сего̀ ѹ҆го́дника бж҃їѧ, па́че и҆ны́хъ бг҃ꙋ любе́знѣйшаго. Ꙗ҆́кѡ да тогѡ̀ моли́твами, полꙋ́чимъ и҆ мы̀ болѣ́знемъ на́шымъ дш҃е́внымъ и҆ тѣлє́снымъ и҆сцѣле́нїе, и҆ сподо́бимсѧ ѹ҆го́дни и҆ любе́зни бы́ти хрⷭ҇тꙋ̀ бг҃ꙋ на́шемꙋ.

Въ то́йже де́нь,
житїѐ прпⷣбнагѡ ѻ҆ц҃а̀ на́шегѡ
а҆рсе́нїа вели́кагѡ.
[edit]

[…] […] […]


PD-icon.svg This work was published before January 1, 1926, and is in the public domain worldwide because the author died at least 100 years ago.