Житїѧ̑ ст҃ы́хъ ѿ ст҃а́гѡ дими́трїа росто́вскагѡ/Деке́мврїй/к҃є

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Деке́мврїа к҃д

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а деке́мврїа въ к҃є де́нь

Деке́мврїа к҃ѕ→

Мцⷭ҇а деке́мврїа въ к҃є де́нь,
сказа́нїе ѡ҆ ржⷭ҇твѣ̀ гдⷭ҇а бг҃а
и҆ сп҃са на́шегѡ і҆и҃са хрⷭ҇та̀,
ѿ бжⷭ҇твеннагѡ є҆ѵⷢ҇лїа и҆ ѿ ст҃ы́хъ ѻ҆ц҃ъ и҆ достовѣ́рныхъ повѣствова́телей со́бранное.

І҆и҃съ хрⷭ҇то́во ржⷭ҇тво̀ си́це бѣ̀: ѡ҆брꙋче́ннѣй бо бы́вши (пребл҃гослове́ннѣй) мт҃ри є҆гѡ̀ (пречⷭ҇тѣй дв҃ѣ) мр҃і́и і҆ѡ́сифови, мꙋ́жꙋ првⷣнꙋ, и҆ ѹ҆жѐ лѣ́тами ста́рꙋ, ѻ҆смидесѧтолѣ́тнꙋ бо: и҆ подъ ѻ҆́бразомъ сꙋпрꙋ́жества [по свидѣ́тельствꙋ ст҃а́гѡ григо́рїа нѵ́сскагѡ и҆ ст҃а́гѡ є҆пїфа́нїа кѵ́прскагѡ] да́ннѣй є҆мꙋ̀ въ хране́нїе дв҃ства є҆ѧ̀, и҆ въ попече́нїе ѡ҆ не́й: пре́жде да́же не сни́тисѧ и҆́ма, бѧ́ше бо і҆ѡ́сифъ мни́мый мꙋ́жъ мр҃і́инъ, са́мою же ве́щїю храни́тель ѡ҆сщ҃е́нныѧ бг҃ꙋ дв҃и́ческїѧ чистоты̀ є҆ѧ̀, и҆ ѻ҆чеви́дный свидѣ́тель непоро́чнагѡ тоѧ̀ житїѧ̀: и҆́бо та́кѡ и҆зволѧ́ше бг҃ъ своегѡ̀ ѿ пречⷭ҇тыѧ дв҃ы воплоще́нїѧ та́йнꙋ ѹ҆таи́ти пред̾ дїа́воломъ, дв҃ство мт҃ре своеѧ̀ пречⷭ҇ты́ѧ покры́въ сꙋпрꙋ́жествомъ, да не ѹ҆вѣ́сть вра́гъ, ꙗ҆́кѡ та̀ є҆́сть сїѧ̀ дв҃а, ѡ҆ не́йже предречѐ и҆са́їа: сѐ, дв҃а во чре́вѣ прїи́метъ: ѡ҆ чесо́мъ свидѣ́тельствꙋетъ ст҃ы́й а҆ѳана́сїй а҆рхїепⷭ҇кпъ а҆леѯандрі́йскїй гл҃ѧ: потре́бенъ бѧ́ше і҆ѡ́сифъ къ послꙋже́нїю та́инства, да дв҃а а҆́ки мꙋ́жа и҆мꙋ́щаѧ сла́витсѧ, и҆ ѹ҆таи́тсѧ са́маѧ ве́щь дїа́вола, да не ѹ҆вѣ́сть бы́ти хотѧ́щаѧ, ка́кѡ бг҃ъ съ чл҃вѣ́ки пребыва́ти и҆зво́литъ. Та́коже и҆ ст҃ы́й васі́лїй вели́кїй гл҃етъ: за є҆́же ѹ҆таи́тисѧ кнѧ́зѧ вѣ́ка сегѡ̀, і҆ѡ́сифово ѹ҆мы́шлено бы́сть ѻ҆брꙋче́нїе. и҆ ст҃ы́й і҆ѡа́ннъ дамаски́нъ: ѡ҆брꙋча́етсѧ і҆ѡ́сифъ мр҃і́и ꙗ҆́кѡ мꙋ́жъ, да не ѹ҆вѣ́давъ дїа́волъ безмꙋ́жное ѿ дв҃ы хрⷭ҇то́во ржⷭ҇тво̀ ѿбѣ́гнетъ, сі́есть: преста́нетъ наꙋща́ти и҆́рѡда, и҆ подвиза́ти і҆ꙋде́ѡвъ на за́висть. то́й бо є҆щѐ ѿто́лѣ, є҆гда̀ проречѐ и҆са́їа: сѐ, дв҃а во чре́вѣ прїи́метъ и҆ роди́тъ: назира́ше всѧ̀ дѣви̑цы, є҆гда̀ ка́ѧ ѿ ни́хъ зачне́тъ без̾ мꙋ́жа, и҆ породи́тъ дв҃о́ю сꙋ́щи. Ѹ҆стро́и ѹ҆́бѡ бж҃їе смотре́нїе ѡ҆брꙋче́ннѣй бы́ти дв҃ѣ мр҃і́и і҆ѡ́сифови, да и҆ дв҃ство пречⷭ҇тыѧ бцⷣы и҆ воплоще́нїе бг҃а сло́ва ѹ҆таи́тсѧ пред̾ тмы̀ кнѧ́земъ. Пре́жде ѹ҆́бѡ соверше́нїѧ позна́нїемъ плотски́мъ сꙋпрꙋ́жества, прчⷭ҇таѧ дв҃а мр҃і́а ѡ҆брѣ́тесѧ и҆мꙋ́щи во чре́вѣ ѿ дх҃а ст҃а, и҆ растѧ́ше чре́во є҆ѧ̀ ст҃о́е, вмѣща́ющее въ себѣ̀ невмѣсти́маго бг҃а. а҆ наипа́че, є҆гда̀ по пребы́тїи тре́хъ мцⷭ҇ей ѹ҆ є҆лїсаве́ты, возврати́сѧ въ до́мъ сво́й: тогда̀ ꙗ҆́вѣ показа́сѧ бы́ти непра́здна, де́нь ѿ днѐ растꙋ́щꙋ внꙋ́трь бжⷭ҇твенномꙋ плодꙋ̀, и҆ и҆сполне́нїемъ ѻ҆бы́чнагѡ вре́мене къ рожде́нїю приближа́ющꙋсѧ. є҆́же ѹ҆ви́дѣвъ і҆ѡ́сифъ бы́сть въ недоꙋмѣ́нїи и҆ печа́ли вели́цѣй: мнѧ́ше бо ю҆̀ бы́ти бракоѡкра́дованнꙋ. и҆ смꙋще́нъ сы́й ста́рецъ ѕѣлѡ̀, въ себѣ̀ глаго́лаше: ѿкꙋ́дꙋ є҆́й бы́сть сїѐ: а҆́зъ є҆ѧ̀ не позна́хъ, и҆ нижѐ по́мысломъ на ню̀ согрѣши́хъ, и҆ сѐ, непра́здна зри́тсѧ. ѹ҆вы̀ что̀ сотвори́сѧ, съ ки́мъ падѐ; кто̀ ю҆̀ прельстѝ; и҆ что̀ а҆́зъ и҆́мамъ твори́ти; не вѣ́мъ. ѡ҆бличꙋ̀ ли ю҆̀ ꙗ҆́кѡ законопрестꙋ́пнꙋ, и҆лѝ премолчꙋ̀ стꙋда̀ ра́ди є҆ѧ̀ и҆ моегѡ̀; а҆́ще ю҆̀ ѡ҆бличꙋ̀, то̀ вои́стинꙋ по зако́нꙋ мѡѷсе́овꙋ ка́менїемъ побїе́на бꙋ́детъ, и҆ ѡ҆брѧ́щꙋсѧ а҆́зъ ꙗ҆́кѡ мꙋчи́тель преда́вый ю҆̀ на сме́рть лю́тꙋю: а҆́ще же не ѡ҆блича́ѧ ю҆̀ премолчꙋ̀, то ча́сть и҆мѣ́ти бꙋ́дꙋ съ прелюбодѣ́и. что̀ ѹ҆́бѡ сотворю̀, недоꙋмѣ́ю; ѿпꙋщꙋ̀ ю҆̀ та́й, да и҆́детъ, а҆́може хо́щетъ, и҆лѝ а҆́зъ ѿидꙋ̀ ѿ неѧ̀ во странꙋ̀ дале́кꙋ, ꙗ҆́кѡ да не ви́дѧтъ ѻ҆чеса̀ моѧ̀ такова́гѡ стꙋда̀. си́це въ себѣ̀ мы́слѧщи пристꙋпѝ и҆ глаго́ла къ дв҃и́цѣ, ꙗ҆́коже ѡ҆ то́мъ ст҃ы́й сѡфро́нїй патрїа́рхъ і҆ерⷭ҇ли́мскїй воспомина́етъ: марі́е, что̀ дѣ́ло сїѐ, є҆́же въ тебѣ̀ зрю̀; недоꙋмѣ́ю и҆ ѹ҆дивлѧ́юсѧ, и҆ ѹ҆мо́мъ ѹ҆жаса́юсѧ: ѻ҆́тай ѹ҆́бѡ ѿ менє̀ бꙋ́ди вско́рѣ. марі́е, что̀ дѣ́ло сїѐ, є҆́же въ тебѣ̀ ви́жꙋ; за че́сть, срамотꙋ̀: за весе́лїе, ско́рбь: вмѣ́стѡ є҆́же хвали́тисѧ, ѹ҆кори́знꙋ мѝ принесла̀ є҆сѝ. ѿ і҆ерє́й и҆зъ цр҃кве гдⷭ҇ни ꙗ҆́кѡ непоро́чнꙋ тѧ̀ прїѧ́хъ, и҆ что̀ сѐ ви́димое; и҆ ст҃ы́й а҆ѳана́сїй а҆леѯандрі́йскїй ѡ҆ то́мже повѣствꙋ́етъ си́це: і҆ѡ́сифъ ви́дѣ тꙋ̀ во чре́вѣ и҆мꙋ́щꙋ, внꙋтрьꙋ́дꙋ же сокро́вища не вѣ́дый, смꙋти́вшисѧ, бесѣ́доваше къ дв҃ѣ, глаго́лѧ: что̀ тебѣ̀ сотвори́сѧ мр҃і́е; не ты̀ ли є҆сѝ честна́ѧ дв҃а въ сщ҃е́нныхъ притво́рѣхъ воспи́тана; не ты̀ ли є҆сѝ мр҃і́е, ю҆́же на лицѐ мꙋ́жнее зрѣ́ти нехотѣ́вшаѧ; не ты̀ ли є҆сѝ мр҃і́е, ю҆́же ѡ҆брꙋчи́тисѧ по произволе́нїю і҆ере́и ѹ҆вѣща́ти не можа́хꙋ; не ты̀ є҆сѝ мр҃і́е, дв҃ства ро́жꙋ неꙋвѧда́емꙋ сохрани́ти ѡ҆бѣтова́вшаѧ; гдѣ̀ твоегѡ̀ цѣломꙋ́дрїѧ черто́гъ; гдѣ̀ твоеѧ̀ чⷭ҇тоты̀ нескве́рный невѣ́стникъ; гдѣ̀ твоѐ стыдли́вое лицѐ; а҆́зъ стыжꙋ́сѧ, ты̀ же дерза́еши. ꙗ҆́кѡ ѹ҆таева́ю грѣ́хъ тво́й. Сїѧ̀ и҆ си́мъ подо́бнаѧ і҆ѡ́сифꙋ къ не́й глаго́лющꙋ, ѽ ко́ль стыдѧ́шесѧ непови́нна сꙋ́щи нескве́рнаѧ а҆́гница, непоро́чнаѧ голꙋби́ца, цѣломꙋ́дреннаѧ дв҃а, червленѣ́ющисѧ лице́мъ ѿ слы́шанїѧ таковы́хъ слове́съ і҆ѡ́сифовыхъ! не смѣ́ѧше же сказа́ти є҆мꙋ̀ а҆рха́гг҃льскагѡ є҆́й бл҃говѣ́щенїѧ и҆ є҆лїсаве́тина ѡ҆ не́й прорече́нїѧ, да не тщесла́вна и҆ велехва́льна бы́ти ꙗ҆ви́тсѧ. є҆́же и҆ вышепомѧнꙋ́тый ст҃ы́й а҆ѳана́сїй и҆звѣствꙋ́етъ ѿ лица̀ є҆ѧ̀ ко і҆ѡ́сифꙋ гл҃ющи си́це: а҆́ще а҆́зъ ѡ҆ мнѣ̀ возсвидѣ́тельствꙋю, ꙗ҆́кѡ тщесла́вна нѣ́каѧ ѡ҆брѧ́щꙋсѧ: ма́лѡ потерпѝ і҆ѡ́сифе, и҆ па́стырїе тѧ̀ ѹ҆вѣща́ютъ. И҆ не и҆́но что̀ ѿвѣщава́ше дв҃а мр҃і́а ко і҆ѡ́сифꙋ, то́чїю: жи́въ гдⷭ҇ь хранѧ́й мѧ̀ до ны́нѣ въ дв҃ствѣ цѣ́лꙋ, ꙗ҆́кѡ не позна́хъ грѣха̀, никто́же мнѣ̀ коснꙋ́сѧ, а҆ є҆́же во мнѣ̀, ѿ бж҃їѧ є҆́сть и҆зволе́нїѧ и҆ дѣ́йства. І҆ѡ́сифъ же, ꙗ҆́кѡ чл҃вѣ́къ чл҃вѣ́ческаѧ помышлѧ́ше, мнѧ́щи ѿ грѣха̀ бы́ти зача́тое. Ѻ҆ба́че ꙗ҆́кѡ првⷣнъ сы́й, не хотѧ̀ є҆ѧ̀ ѡ҆бличи́ти, восхотѣ̀ та́й ѡ҆ста́вити ю҆̀, сі́есть ѿитѝ ѿ неѧ̀ нѣ́камо дале́че. Сїѧ̑ же є҆мꙋ̀ помы́слившꙋ, сѐ, а҆́гг҃лъ гдⷭ҇ень во снѣ̀ ꙗ҆ви́сѧ є҆мꙋ̀, глаго́лѧ: і҆ѡ́сифе, сы́не дв҃довъ, не ѹ҆бо́йсѧ прїѧ́ти мр҃їа́мъ жены̀ твоеѧ̀. Жено́ю і҆ѡ́сифовою дв҃ꙋ а҆́гг҃лъ нарица́етъ, и҆стреблѧ́ѧ мнѣ́нїе і҆ѡ́сифово ѡ҆ прелюбодѣѧ́нїи, мнѧ́ше бо і҆ѡ́сифъ, ꙗ҆́кѡ ѿ прелюбодѣѧ́нїѧ мр҃і́а зача̀. твоѧ̀, речѐ, жена̀ ѡ҆брꙋче́наѧ, а҆ не и҆на́гѡ ко́егѡ мꙋ́жа. си́це ѳеофѷла́ктъ. нарица́етъ [а҆́гг҃лъ] жено́ю і҆ѡ́сифовою мр҃і́ю, ꙗ҆влѧ́ѧ, ꙗ҆́кѡ нѣ́сть, речѐ, со и҆ны́мъ ѡ҆скверни́ласѧ ѡ҆брꙋче́наѧ тебѣ̀: ксемꙋ̀ же и҆ тогѡ̀ ра́ди жено́ю і҆ѡ́сифовою нарица́етъ ю҆̀, ꙗ҆́кѡ да вкꙋ́пѣ съ дв҃ствомъ и҆ жени́тва зако́ннаѧ почте́на бꙋ́детъ. Дв҃ство ѹ҆́бѡ ꙗ҆́кѡ потре́бно ко ѡ҆сщ҃е́нїю и҆збра́но бы́сть, ѡ҆брꙋче́нїе же, є҆́же є҆́сть нача́ло бра́кꙋ, ꙗ҆́кѡ зако́нное ѹ҆чине́но бы́сть, да не беⷥзако́нїѧ возмни́тсѧ бы́ти ражда́емое: кꙋ́пнѡ же да и҆ свидѣ́тель при́сный чистоты̀ мр҃і́ины і҆ѡ́сифъ бꙋ́детъ, є҆́же бы не подлежа́ти є҆́й ѡ҆болга́нїемъ а҆́ки дв҃ство ѡ҆скверни́вшей, ѡ҆брꙋ́чника бо и҆мѣ́ѧше житїю̀ своемꙋ̀ свидѣ́телѧ и҆ храни́телѧ. доздѣ̀ васі́лїй ст҃ы́й. Гл҃етъ ѹ҆́бѡ а҆́гг҃лъ: не ѹ҆бо́йсѧ прїѧ́ти мр҃їа́мъ жены̀ твоеѧ̀, а҆́ки бы ре́клъ: прїимѝ женꙋ̀ твою̀ по ѡ҆брꙋче́нїю, дв҃ꙋ же по є҆ѧ̀ сотворе́нномꙋ бг҃ꙋ ѡ҆бѣ́тꙋ, и҆́бо та̀ пе́рваѧ въ ро́дѣ і҆и҃льстѣмъ дв҃а ѡ҆бѣтова̀ бг҃ꙋ дв҃ство своѐ до кончи́ны соблюстѝ нескве́рно. не ѹ҆бо́йсѧ, ро́ждшеебосѧ въ не́й ѿ дх҃а є҆́сть ст҃а. роди́тъ же сн҃а, и҆ нарече́ши и҆́мѧ є҆мꙋ̀: ты̀ нарече́ши и҆́мѧ ꙗ҆́кѡ ѻ҆ц҃ъ, а҆́ще и҆ нѣ́си ѻ҆́бщникъ тогѡ̀ рожде́нїѧ, поне́же бо ѻ҆бы́чнѡ ѻ҆ц҃є́мъ нарица́ти и҆мена̀ свои́мъ ча́дѡмъ, ꙗ҆́коже а҆враа́мъ наречѐ и҆́мѧ сн҃ꙋ своемꙋ̀ і҆саа́къ: ѹ҆́бо и҆ ты̀, а҆́ще и҆ не є҆сте́ственный, ѻ҆ба́че мни́мый томꙋ̀ ѻ҆ц҃ъ, ѻ҆ч҃ески послꙋ́жиши є҆мꙋ̀, и҆́мѧ нарица́ѧ. Си́це ст҃ы́й ѳеофѷла́ктъ ѿ лица̀ а҆́гг҃лова ко і҆ѡ́сифꙋ бесѣ́дꙋетъ: а҆́ще и҆ ниеди́но и҆́маши къ рожде́нїю прича́стїе, но се́й са́нъ [ѻ҆ч҃ескїй] хощꙋ̀ да́ти тебѣ̀, є҆́же и҆ и҆́мѧ нарещѝ ражда́емомꙋ, ты̀ бо нарече́ши и҆́мѧ млⷣнцꙋ, а҆́ще и҆ нѣ́сть [ѻ҆́нъ] рожде́нїе твоѐ, ѻ҆ба́че є҆́же є҆́сть ѻ҆ч҃еско, то̀ и҆ пока́жеши є҆мꙋ̀. Ко́е же и҆́мѧ; і҆и҃съ, є҆́же сказꙋ́етсѧ сп҃съ, то́й бо сп҃се́тъ лю́ди своѧ̑ ѿ грѣ̑хъ и҆́хъ. Воста́въ же і҆ѡ́сифъ ѿ сна̀, сотворѝ ꙗ҆́коже повелѣ̀ є҆мꙋ̀ а҆́гг҃лъ гдⷭ҇ень, и҆ прїѧ́тъ женꙋ̀ свою̀ ѡ҆брꙋче́нꙋю, дв҃ꙋ же непоро́чнꙋю ѡ҆бѣтова́нїемъ дв҃ства гдⷭ҇ꙋ ѡ҆сщ҃е́нꙋю, и҆ мт҃рь влⷣчню, ѿ дх҃а ст҃а сп҃са мі́рꙋ заче́ншꙋю. прїѧ́тъ ю҆̀, ꙗ҆́кѡ ѡ҆брꙋ́чницꙋ свою̀ лю́бѧщи, ꙗ҆́коже дв҃ꙋ гдⷭ҇ню ѕѣлѡ̀ почита́ющи, и҆ ꙗ҆́ко мт҃ри сп҃си́телевой со бл҃гоговѣ́нїемъ и҆ стра́хомъ слꙋжа́щи: и҆ не зна́ѧше є҆ѧ̀, до́ндеже родѝ, си́рѣчь [по ѳеофѷла́ктовꙋ и҆звествова́нїю] не прикоснꙋ́сѧ є҆́й николи́же. Ка́кѡ бо првⷣнъ сы́й и҆мѣ́ѧше прикоснꙋ́тисѧ то́й, ꙗ҆́же є҆мꙋ̀ не на бра́къ, но под̾ чи́номъ бра́ка на хране́нїе є҆ѧ̀ дв҃ства ѿ цр҃кве гдⷭ҇ни бѣ̀ дана̀; ка́кѡ и҆мѣ́ѧше прикоснꙋ́тисѧ дв҃цѣ гдⷭ҇ни вѣ́чное дв҃ство бг҃ꙋ ѡ҆бѣтова́вшей; ка́кѡ и҆мѣ́ѧше коснꙋ́тисѧ пренепоро́чнѣй мт҃ри гдⷭ҇а своегѡ̀ и҆ созда́телѧ; а҆ є҆́же гл҃етъ є҆ѵⷢ҇лїе: до́ндеже родѝ: сїѐ ѻ҆бы́чнѡ є҆́сть писа́нїю, сло́во сїѐ, до́ндеже, вмѣ́стѡ вре́мене непрестаю́щагѡ полага́ти. и҆́бо и҆ дв҃дъ гл҃етъ: речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀, до́ндеже положꙋ̀ врагѝ твоѧ̑ подно́жїе но́гъ твои́хъ. не ꙗ҆́кѡ то́чїю дото́лѣ гдⷭ҇ь сн҃ъ ѡ҆деснꙋ́ю гдⷭ҇а ѻ҆ц҃а̀ сѣдѣ́ти и҆мѣ́ѧше, до́ндеже положи́тъ врагѝ подно́жїе но́гъ є҆гѡ̀, а҆ по положе́нїи врагѡ́въ ѹ҆жѐ не и҆мѣ́ѧше сѣдѣ́ти: но и҆ положе́ннымъ сꙋ́щымъ врагѡ́мъ под̾ нозѣ̀ сѣдѣ́ти и҆́мать є҆щѐ пресла́внѣе ꙗ҆́кѡ побѣди́тель въ безконе́чныѧ вѣ́ки. Подо́бнѣ и҆ ѡ҆ ст҃о́мъ І҆ѡ́сифѣ пи́шетсѧ: не зна́ѧше є҆ѧ̀, до́ндеже родѝ: не ꙗ҆́кѡ пото́мъ и҆мѣ́ѧше ю҆̀ позна́ти, ꙗ҆́коже нѣ́цїи ѿ є҆реті̑къ вознепщева́ша, є҆́же є҆́сть чꙋ́ждо правосла́вныѧ цр҃кве: но по рожде́нїи такова́гѡ сн҃а, и҆́же бг҃ъ бѣ̀ воплоще́нный, и҆ по толи́кихъ чꙋдесѣ́хъ во вре́мѧ рождества̀ содѣ́ѧвшихсѧ, и҆́хже бѣ̀ і҆ѡ́сифъ самови́децъ, не то́чїю коснꙋ́тисѧ є҆́й не смѣ́ѧше, но и҆ попремно́гꙋ почита́ше ю҆̀ ꙗ҆́кѡ ра́бъ гпⷭ҇жꙋ̀ свою̀, слꙋжа́щи є҆́й ꙗ҆́кѡ мт҃ри бж҃їей со стра́хомъ и҆ тре́петомъ. ѡ҆ то́мъ словесѝ, до́ндеже, и҆ ст҃ы́й ѳеофѷла́ктъ бесѣ́дꙋетъ си́це: ѻ҆бы́чно є҆́сть писа́нїю та́ко гл҃ати, ꙗ҆кожѐ и҆ ѡ҆ пото́пѣ гл҃етъ: не возврати́сѧ, речѐ, вра́нъ въ ковче́гъ, до́ндеже и҆́зсше землѧ̀, ѻ҆́нъ бо ни по то́мъ возврати́сѧ. и҆ хрⷭ҇то́съ гл҃етъ: съ ва́ми є҆́смь до сконча́нїѧ вѣ́ка, є҆да̀ ѹ҆́бѡ по сконча́нїю вѣ́ка не бꙋ́детъ съ на́ми; па́че бо тогда̀ въ безконе́чныѧ вѣ́ки съ на́ми бꙋ́детъ. та́кѡ и҆ здѣ̀ гл҃етъ: до́ндеже родѝ, си́рѣчь, ни пре́жде рожде́нїѧ, ни по рожде́нїи позна̀ є҆ѧ̀, ꙗ҆́коже и҆ гдⷭ҇ь, и҆ вѣ́кꙋ сꙋ́щꙋ, и҆ по сконча́нїи вѣ́ка съ на́ми бꙋ́детъ па́че. ка́кѡ бо коснꙋ́тисѧ можа́ше пречⷭ҇тѣй по ѹ҆вѣ́дѣнїи неизрече́ннагѡ ржⷭ҇тва̀ ѻ҆́нагѡ. доздѣ̀ ѳеофѷла́ктъ.

Но и҆ ѿсю́дꙋ и҆звѣ́стнѡ показꙋ́етсѧ небра́чное и҆ по ржⷭ҇твѣ̀ дв҃ство пречⷭ҇тыѧ бцⷣы, ꙗ҆́кѡ є҆гда̀ і҆ѡ́сифꙋ ѡ҆ дв҃и́цѣ непра́здной сꙋмнѧ́щемꙋсѧ и҆ бракоѡкра́дованнꙋю бы́ти помышлѧ́ющемꙋ ꙗ҆ви́сѧ а҆́гг҃лъ, и҆ нарица́етъ тогда̀ мр҃і́ю жено́ю є҆гѡ̀: не ѹ҆бо́йсѧ, речѐ, прїѧ́ти мр҃їа́мъ жены̀ твоеѧ̀: мнѣ́нїе [ꙗ҆́коже вы́ше рече́сѧ] ѡ҆ прелюбодѣѧ́нїи и҆стреблѧ́ющи. Є҆гда̀ же то́йже а҆́гг҃лъ і҆ѡ́сифꙋ ѹ҆жѐ ѡ҆ чистотѣ̀ мр҃і́иной и҆ ѡ҆ ражда́емомъ ѿ дх҃а ст҃а́гѡ ѹ҆вѣ́рившꙋсѧ ꙗ҆ви́сѧ по хрⷭ҇то́вомъ ржⷭ҇твѣ̀ въ виѳлее́мѣ и҆ въ є҆гѵ́птѣ, не ктомꙋ̀ пречⷭ҇тꙋю дв҃ꙋ мр҃і́ю нарица́етъ є҆гѡ̀ жено́ю, но то́кмѡ мт҃рїю рожде́ннагѡ, си́це бо пи́шетсѧ: ѿше́дшымъ (волхвѡ́мъ), сѐ, а҆́гг҃лъ гдⷭ҇ень во снѣ̀ ꙗ҆ви́сѧ і҆ѡ́сифꙋ, глаго́лѧ: воста́въ поимѝ ѻ҆троча̀ и҆ мт҃рь є҆гѡ̀ [а҆ не женꙋ̀ твою̀], и҆ бѣжѝ во є҆гѵ́петъ. и҆ па́ки въ є҆гѵ́птѣ: воста́въ поимѝ ѻ҆троча̀ и҆ мт҃рь є҆гѡ̀ и҆ и҆дѝ въ зе́млю і҆и҃левꙋ: ꙗ҆́вѣ показꙋ́ѧ, ꙗ҆́кѡ не бра́къ і҆ѡ́сифа ѹ҆строѧ́ше, но на слꙋже́нїе ѻ҆троча́ти и҆ мт҃ри. не то́чїю ѹ҆́бѡ, до́ндеже ро́ди сн҃а своего̀ пе́рвенца, мр҃і́а не бы́сть позна́ною і҆ѡ́сифомъ жено́ю, но и҆ по рожде́нїи тогѡ̀ та́кожде пребы́сть дв҃а нетлѣ́нна, ꙗ҆́коже ѡ҆ то́мъ всѝ вели́кїи ѹ҆чи́тели цр҃ко́внїи согла́снѡ свидѣ́тельствꙋютъ.

Повѣствꙋ́етсѧ же и҆ сїѐ: ꙗ҆́кѡ непра́зднѣй сꙋ́щей дв҃ѣ мр҃і́и, нѣ́кїй ѿ кни̑жникъ и҆́менемъ а҆нни́нъ [ѹ҆жѐ по а҆́гг҃ловомъ і҆ѡ́сифови во снѣ̀ ꙗ҆вле́нїи] въ до́мъ и҆̀хъ прише́дъ и҆ дв҃и́цꙋ непра́зднꙋ ви́дѣвъ, течѐ ско́рѡ ко а҆рхїере́ю и҆ всемꙋ̀ собо́рꙋ, глаго́лѧ: є҆го́же првⷣна свидѣ́телствовасте бы́ти і҆ѡ́сифа древодѣ́лѧ, се́й беⷥзако́нїе сотворѝ: дв҃ꙋ, ю҆́же ѿ цр҃кве гдⷭ҇ни поѧ́тъ въ соблюде́нїе, та́йнѡ растлѝ и҆ ѡ҆сквернѝ, и҆ є҆́сть ны́нѣ непра́здна. ше́дше же по́сланнїи ѿ а҆рхїере́а слꙋги̑ въ до́мъ і҆ѡ́сифовъ, ѡ҆брѣто́ша непра́зднꙋ мр҃і́ю, ꙗ҆́коже то́й возвѣстѝ кни́жникъ. Пое́мше ѹ҆́бѡ ю҆̀ со і҆ѡ́сифомъ, ко а҆рхїере́ю и҆ собо́рꙋ ведо́ша. речѐ же а҆рхїере́й къ дв҃ѣ мр҃і́и: забы́ла є҆сѝ ты̀ гдⷭ҇а бг҃а воспита́ннаѧ во ст҃а̑ѧ ст҃ы́хъ, и҆ прїе́мшаѧ пи́щꙋ ѿ рꙋ́къ а҆́гг҃ловыхъ, и҆ а҆́гг҃льскаѧ пѣ̑нїѧ слы́шавшаѧ, что̀ сїѐ сотвори́ла є҆сѝ; ѻ҆на̀ же пла́чꙋщи гл҃аше: жи́въ гдⷭ҇ь бг҃ъ мо́й, ꙗ҆́кѡ чиста̀ є҆́смь, и҆ мꙋ́жа не зна́ю. Па́ки глаго́лѧ а҆рхїере́й ко і҆ѡ́сифꙋ: что̀ сїѐ сотвори́лъ є҆сѝ; и҆ речѐ і҆ѡ́сифъ: жи́въ гдⷭ҇ь бг҃ъ мо́й, ꙗ҆́кѡ чи́стъ є҆́смь ѿ неѧ̀. речѐ же є҆мꙋ̀ а҆рхїере́й: поне́же не подклони́лъ є҆сѝ главы̀ твоеѧ̀ под̾ крѣ́пкꙋю рꙋ́кꙋ бж҃їю, да́бы блгⷭ҇ве́но бы́ло твоѐ сѣ́мѧ, и҆ не ꙗ҆ви́въ сынѡ́мъ і҆и҃левымъ, та́йнѡ смѣси́лсѧ є҆сѝ со ѻ҆трокови́цею въ да́ръ гдⷭ҇еви да́нною: тогѡ̀ ра́ди и҆́матѣ пи́ти во́дꙋ ѡ҆бличе́нїѧ, ꙗ҆́кѡ да ꙗ҆ви́тъ гдⷭ҇ь грѣ́хъ ва́шъ пред̾ всѣ́ми. Бѣ̀ же сꙋ́дъ ѿ бг҃а чрез̾ мѡѷсе́а ѹ҆ста́вленый, ꙗ҆́коже въ кни́гахъ четве́ртыхъ мѡѷсе́евыхъ въ главѣ̀ пѧ́той пи́шетсѧ: А҆́ще ко́е лицѐ мꙋ́жеско и҆лѝ же́нско ѡ҆ прелюбодѣѧ́нїи поро́чено бꙋ́детъ, и҆ не и҆сповѣ́сть и҆́стины: подаѧ́шесѧ томꙋ̀ пи́ти вода̀ клѧ́твеннаѧ, со ѻ҆со́бными та́мѡ напи́саными дѣ́йствы и҆ чи́номъ въ хра́мѣ гдⷭ҇ни. и҆ быва́ше по питїѝ то́мъ сꙋдо́мъ бж҃їимъ нѣ́кое зна́менїе на прелюбодѣ́ѧвшемъ, ѡ҆блича́ющее, по немꙋ́же познава́шесѧ содѣ́ѧнное беⷥзако́нїе. То́ю ѹ҆́бѡ водо́ю съ подоба́ющимъ чи́номъ а҆рхїере́й напоѝ пе́рвѣе і҆ѡ́сифа, по то́мже мр҃і́ю, и҆ не бы́сть на не́й нико́егѡже ѡ҆бличе́нїѧ, и҆ чꙋди́шасѧ лю́дїе, ꙗ҆́кѡ грѣ́хъ и҆́хъ не ѡ҆брѣ́тесѧ. и҆ речѐ къ ни́мъ а҆рхїере́й: а҆́ще гдⷭ҇ь бг҃ъ не ꙗ҆вѝ грѣха̀ ва́шегѡ, и҆ди́те ѹ҆́бо съ ми́ромъ: и҆ ѿпꙋстѝ и҆̀хъ. І҆ѡ́сифъ же пое́мь дв҃ꙋ мр҃і́ю, и҆́де въ до́мъ сво́й ра́дꙋѧсѧ, и҆ сла́вѧ бг҃а і҆и҃лева.

По се́мъ и҆зы́де повелѣ́нїе ѿ ке́сарѧ а҆́ѵгꙋста написа́ти всю̀ вселе́ннꙋю. И҆ и҆дѧ́хꙋ всѝ написа́тисѧ, ко́ждо во сво́й гра́дъ. Взы́де же и҆ і҆ѡ́сифъ ѿ галїле́и, и҆з̾ гра́да назаре́та, во і҆ꙋде́ю, во гра́дъ дв҃довъ, и҆̀же нарица́етсѧ виѳлее́мъ, занѐ бы́ти є҆мꙋ̀ ѿ до́мꙋ и҆ ѻ҆те́чества дв҃дова, написа́тисѧ съ мр҃і́ею ѡ҆брꙋче́ною є҆мꙋ̀ жено́ю, сꙋ́щею непра́здною. Виѳлее́мъ ма́лъ гра́дъ є҆́сть недале́че і҆ерⷭ҇ли́ма на странѣ̀ полꙋ́деннѣй, при пꙋтѝ ведꙋ́щемъ въ го́рнѧѧ къ хеврѡ́нꙋ сщ҃е́нническомꙋ гра́дꙋ, въ не́мже бѣ̀ до́мъ заха́рїинъ, и҆дѣ́же пречⷭ҇таѧ дв҃а по бл҃говѣ́щенїи а҆рха́гг҃ломъ посѣтѝ, и҆ цѣлова̀ є҆лїсаве́тъ мт҃рь прⷣте́чевꙋ. Междꙋ̀ і҆ерⷭ҇ли́момъ ѹ҆́бѡ и҆ хеврѡ́номъ виѳлее́мъ ѡ҆брѣта́етсѧ посре́дствꙋѧй, къ немꙋ́же ѿ назаре́та гра́да галїле́йскагѡ пꙋ́тнагѡ ше́ствїѧ є҆́сть трѝ днѝ и҆ ма́ло бо́лѣе. Нарица́етсѧ же виѳлее́мъ гра́дъ дв҃довъ, ꙗ҆́кѡ въ не́мъ роди́сѧ дв҃дъ, и҆ на ца́рство пома́засѧ, та́мѡ и҆ рахи́ль ѹ҆́мре, и҆ гро́бъ і҆ессе́а ѻ҆ц҃а̀ дв҃дова показꙋ́етсѧ. Бѣ̀ же виѳлее́мꙋ и҆менова́нїе пе́рвое є҆ѵфра́ѳа, но і҆а́ковъ пасꙋ́щи та́мѡ своѧ̑ скоты̀ до́момъ хлѣ́ба наречѐ є҆го̀, прови́дѧ дꙋ́хомъ и҆ предвозвѣствꙋ́ѧ, ꙗ҆́кѡ и҆мѣ́ѧше на то́мъ мѣ́стѣ роди́тисѧ хлѣ́бъ сше́дый съ нб҃сѐ хрⷭ҇то́съ гдⷭ҇ь. Бли́зъ же виѳлее́ма къ восто́кꙋ, проти́вꙋ дв҃дова стꙋденца̀, ѿ ко́егѡ ѻ҆́нъ и҆ногда̀ возжажда́всѧ, речѐ: кто̀ напои́тъ мѧ̀ водо́ю и҆з̾ ро́ва, и҆́же въ виѳлее́мѣ при вратѣ́хъ; ѡ҆брѣта́етсѧ пеще́ра въ горѣ̀ ка́меннѣй, на не́йже стои́тъ гра́дъ виѳлее́мскїй. Пеще́рѣ же то́й приближа́шесѧ ни́ва салѡмі́и та́може въ виѳлее́мѣ ѻ҆бита́вшїѧ, ꙗ҆́же бѣ̀ сро́дница ѻ҆бѣ́имъ, дв҃ѣ мр҃і́и и҆ і҆ѡ́сифꙋ. и҆ є҆гда̀ прибли́жисѧ і҆ѡ́сифъ ко гра́дꙋ, и҆спо́лнишасѧ дні́е роди́ти браконеискꙋ́снѣй невѣ́стѣ, и҆ и҆ска́ше до́мꙋ ко препокое́нїю, въ не́мже бы родѧ́щаѧ возмогла̀ ѹ҆до́бное и҆мѣ́ти мѣ́сто, во є҆́же и҆зда́ти въ мі́ръ пло́дъ чре́ва своего̀ бл҃гослове́нный. но не ѡ҆брѣ́те себѣ̀ вита́лницы мно́жества ра́ди наро́да написа́тисѧ прише́дшаго, и҆ не то́чїю ѻ҆́бщꙋю гости́ницꙋ, но и҆ ве́съ гра́дъ и҆спо́лнившагѡ. соврати́сѧ ѹ҆́бѡ въ пеще́рꙋ ѻ҆́нꙋю, занѐ не бѣ̀ и҆̀мъ мѣ́ста во ѻ҆би́тели, и҆ де́нь ѹ҆жѐ прекланѧ́шесѧ. пеще́ра же та̀ бѣ̀ ско́тское стоѧ́лище, и҆дѣ́же пречⷭ҇таѧ и҆ пребл҃гослове́ннаѧ дв҃а въ полꙋ́нощи те́плѣ къ бг҃ꙋ молѧ́щисѧ, и҆ всѧ̀ въ бз҃ѣ бг҃омышле́нїемъ бы́вши, и҆ тогѡ̀ жела́нїемъ и҆ любо́вїю горѧ́щи, гдⷭ҇а на́шегѡ і҆и҃са хрⷭ҇та̀ родѝ въ два́десѧть пѧ́тый деке́мврїа без̾ болѣ́зни. та́кѡ бо и҆ подоба́ше, да роди́тъ без̾ болѣ́зни, ꙗ҆́же зача̀ без̾ сла́сти: не позна́хъ, речѐ, сла́сти, бра́кꙋ є҆́смь неприча́стна. а҆ ꙗ҆́коже зача̀ чи́стѣ, си́це и҆ породѝ бе́з̾ и҆стлѣ́нїѧ, глаго́лющꙋ ст҃о́мꙋ григо́рїю нѵ́сскомꙋ: дв҃а зача̀, дв҃а поносѝ, дв҃а родѝ, дв҃а пребы́сть, ниеди́ноже ѿ бы́вшихъ на землѝ чꙋде́съ таково̀ ꙗ҆ви́сѧ. и҆ ст҃ы́й дамаски́нъ : ѽ чꙋдесѐ но́вагѡ всѣ́хъ дре́внихъ чꙋде́съ, кто̀ бо позна̀ мт҃рь без̾ мꙋ́жа ро́ждшꙋю! без̾ мꙋ́жа же, подо́бнѣ а҆да́мꙋ произве́дшемꙋ без̾ жены̀ є҆́ѵꙋ, ѡ҆ чесо́мъ златоꙋ́стъ ст҃ы́й си́це: ꙗ҆́коже бо а҆да́мъ кромѣ̀ жены̀ женꙋ̀ принесѐ, та́кѡ и҆ дне́сь дв҃а без̾ мꙋ́жа родѝ, за є҆́ѵꙋ ѿдава́ющи мꙋжє́мъ до́лгъ: цѣ́лъ бы́сть а҆да́мъ по и҆з̾ѧ́тїи ребра̀ тѣле́снагѡ, нетлѣ́нна пребы́сть и҆ дв҃а по происхожде́нїи млⷣнца. доздѣ̀ златоꙋ́стъ. И҆ сбы́стсѧ сѣно́вное прописа́нїе въ кꙋпинѣ̀ неѡпали́мѣй, и҆ въ мо́ри чермно́мъ: ꙗ҆́коже бо кꙋпина̀ не сгара́ше ѡ҆палѧ́ема, [воспѣва́етъ цр҃ковь,] та́кѡ дв҃а родила̀ є҆сѝ, и҆ дв҃а пребыла̀ є҆сѝ. и҆ па́ки: мо́ре по проше́ствїи і҆и҃левѣ пребы́сть непрохо́дно: непоро́чнаѧ по ржⷭ҇твѣ̀ є҆мманꙋ́илевѣ пребы́сть нетлѣ́нна. Та́кѡ без̾ поврежде́нїѧ дв҃ства своегѡ̀ прⷭ҇нодв҃а мр҃і́а родѝ бг҃а воплоще́ннаго. є҆щѐ же и҆ без̾ ѻ҆бы́чныѧ по́мощи и҆ слꙋ́жбы ба́бины, ꙗ҆́коже свидѣ́тельствꙋетъ ст҃ы́й а҆ѳана́сїй а҆леѯандрі́йскїй словеса̀ є҆ѵⷢ҇льскїѧ сїѧ̀: родѝ сн҃а своего̀ пе́рвенца, и҆ пови́тъ є҆го̀, и҆ положѝ є҆го̀ въ ꙗ҆́слехъ: разсꙋжда́ѧй, и҆ гл҃ѧй си́це: ви́ждь та́инственное рожде́нїе дв҃ы: сама̀ родѝ, сама̀ воспеленѝ. въ мїрски́хъ жена́хъ и҆́на раждае́тъ, и҆ и҆́на воспеленѧ́етъ. въ дв҃ѣ же не та́кѡ: сама̀ родѝ, сама̀ воспеленѝ, сама̀ безтрꙋ́дна мт҃и, и҆ неꙋчи́ма ба́ба, не попꙋстѝ комꙋ̀ нечи́стыма рꙋка́ма каса́тисѧ ржⷭ҇тва̀ пречⷭ҇тагѡ: сама̀ собо́ю сꙋ́щемꙋ ѿ неѧ̀ и҆ па́че є҆ѧ̀ послꙋжѝ, и҆ воспеленѝ є҆го̀, и҆ восклонѝ є҆го̀ во ꙗ҆́слехъ. Та́коже и҆ кѷпрїа́нъ ст҃ы́й: въ ржⷭ҇твѣ̀ [речѐ] и҆ по ржⷭ҇твѣ̀ дв҃а бж҃е́ственною си́лою пребы́сть, ꙗ҆́же без̾ болѣ́зни породѝ, нижѐ ко́егѡ тре́боваше ба́бинаго слꙋже́нїѧ, но сама̀ роди́тельница и҆ рожде́нїю слꙋжи́тельница, бл҃гоговѣ́йное возлю́бленномꙋ плодꙋ̀ своемꙋ̀ ꙗ҆влѧ́етъ пѣ́стꙋнство: ѡ҆сѧза́етъ, ѡ҆б̾е́млетъ, лобыза́етъ, подае́тъ сосе́цъ, всѐ дѣ́ло радо́сти и҆спо́лнено, ни є҆ди́на болѣ́знь, ни є҆ди́на є҆стествꙋ̀ не́мощь въ рожде́нїи. доздѣ̀ кѷпрїа́нъ ст҃ы́й. Сама̀ ѹ҆́бѡ нетлѣ́нномꙋ своемꙋ̀ ржⷭ҇твꙋ̀ дв҃и́ческима послꙋжѝ рꙋка́ма, не ждꙋ́щи салѡмі́и ста́рицы сро́дницы своеѧ̀, ю҆́же на послꙋже́нїе призва́ти и҆́де і҆ѡ́сифъ: но та̀ прїи́де соверши́вшꙋсѧ ѹ҆жѐ дѣ́лꙋ, ꙗ҆́же бо породѝ, та̀ и҆ послꙋжѝ, носѧ́щи, повива́ющи, и полага́ющи.

Повѣствꙋ́етъ же и҆ сщ҃енномч҃нкъ зинѡ́нъ є҆пⷭ҇кпъ и҆ сїѐ: ꙗ҆́кѡ прише́дши ба́ба не вѣ́рова дѣ́вственномꙋ и҆ нетлѣ́нномꙋ бы́ти рожде́нїю, и҆ тща́шесѧ ѹ҆вѣ́дати по ѻ҆бы́чаю слꙋже́нїѧ ба́бїѧ, а҆́ще и҆́стина є҆́сть ве́щь. но а҆́бїе ка́знь за дерзнꙋ́тое дѣ́ло прїѧ̀, рꙋка̀ бо и҆спыта́ти дерзнꙋ́вшаѧ болѣ́знїю ѻ҆́гненною внеза́пꙋ возжже́сѧ безмѣ́рнѡ, и҆ ѹ҆́сше, ю҆́же є҆гда̀ приложѝ къ бжⷭ҇твенномꙋ млⷣнцꙋ, а҆́бїе и҆сцѣлѣ̀, и҆ бы́сть здра́ва ꙗ҆́кѡ и҆ пе́рвѣе: вѣ́рова ѹ҆́бѡ и҆ ма́терь бы́ти дв҃ꙋ и҆ млⷣнца бг҃а.

По се́мъ непоро́чнаѧ роди́тельница и҆ неѡбы́чнаѧ ржⷭ҇твꙋ̀ своемꙋ̀ слꙋжи́тельница пови́вши сладча́йшее своѐ ча́до лнѧ́ными, бѣ́лыми, чи́стыми, то́нкими, на то̀ пре́жде време́ни ѹ҆гото́ваными и҆ съ собо́ю и҆з̾ назаре́та принесе́ными пелена́ми, и҆ положи́вши є҆гѡ̀ въ ꙗ҆́слехъ въ то́мже верте́пѣ бы́вшихъ, поклони́сѧ є҆мꙋ̀ ꙗ҆́кѡ бг҃ꙋ и҆ созда́телю своемꙋ̀. є҆́же воспомина́етъ бл҃же́нный і҆ѡ́сифъ канѡ́нѡвъ творе́цъ ко пречⷭ҇тѣй вѣща́ющи: воплоще́ннаго, ѻ҆трокови́це, и҆ ѡ҆бложе́ннаго человѣ́ческимъ подо́бїемъ, держа́щи рꙋка́ми, и҆ покланѧ́ющисѧ, и҆ лобыза́ющи мт҃рски, ча́до, глаго́лала є҆сѝ, сладча́йшее, ка́кѡ тѧ̀ си́це держꙋ̀, держа́щаго рꙋко́ю всю̀ тва́рь; Вѣ́рно ѹ҆́бѡ є҆́сть, ꙗ҆́кѡ рожде́нномꙋ ѿ неѧ̀ бг҃оѻтрокови́ца поклони́сѧ до землѝ, лежа́щемꙋ въ ꙗ҆́слѣхъ, и҆̀хже съ ѹ҆дивле́нїемъ ѡ҆крꙋжа́хꙋ неви́димо а҆́гг҃льстїи чи́ни и҆звѣствꙋ́ющей ѡ҆ то́мъ цр҃кви: ѡ҆крꙋжа́хꙋ ꙗ҆́кѡ прⷭ҇то́лъ херꙋві́мскїй, а҆́гг҃ли ꙗ҆́сли: верте́пъ бо нб҃о зрѧ́хꙋ, лежа́щꙋ въ не́мъ влⷣчце. Бѧ́ста же при ꙗ҆́слѣхъ и҆ во́лъ и҆ ѻ҆се́лъ привѧ̑зана, да сбꙋ́детсѧ писа́нїе: позна̀ во́лъ стѧжа́вшаго и҆̀, и҆ ѻ҆се́лъ ꙗ҆́сли господи́на своегѡ̀. во́лъ же то́й и҆ ѻ҆се́лъ приведє́на бѧ́ста і҆ѡ́сифомъ и҆з̾ назаре́та. ѻ҆се́лъ ведѧ́шесѧ непра́здныѧ ра́ди ѿрокови́цы, ꙗ҆́кѡ да несе́тъ ю҆̀ на себѣ̀ въ пꙋтѝ: вола̀ же приведѐ і҆ѡ́сифъ, є҆́же прода́ти є҆го̀, и҆ ѿда́ти до́лжнꙋю да́нь ца́рскꙋю, и҆ себѣ̀ ꙗ҆̀же на потре́бꙋ кꙋпи́ти. та̑ѧ ѹ҆́бѡ безсловє́снаѧ живѡ́тнаѧ стоѧ́щы при ꙗ҆́слѣхъ, па́рою свое́ю согрѣва́ста ѻ҆троча̀ зимѣ̀ належа́щей, и҆ та́кѡ слꙋжа́ста влⷣчцѣ и҆ творцꙋ̀ своемꙋ̀. Поклони́сѧ же і҆ѡ́сифъ ро́ждшемꙋсѧ и҆ ро́ждшей, тогда̀ бо позна̀, ꙗ҆́кѡ рожде́нное ѿ неѧ̀ ѿ дх҃а ст҃а є҆́сть. ꙗ҆кожѐ и҆ ст҃ы́й а҆ѳана́сїй гл҃етъ: вои́стинꙋ не зна́ѧше є҆ѧ̀ і҆ѡ́сифъ, до́ндеже родѝ сы́на своего̀ пе́рвенца: доне́лѣже дв҃а заче́ншесѧ чревоносѧ́ше, не зна́ѧше є҆ѧ̀ і҆ѡ́сифъ, не вѣ́даше, что̀ въ не́й, не вѣ́дѧше, что̀ ѹ҆строева́емое, є҆гда̀ же родѝ, тогда̀ позна̀. тогда̀ позна̀ і҆ѡ́сифъ дв҃ꙋ, ка́ѧ бѣ̀ си́ла дв҃ы, и҆ что̀ бы́ти сподо́бисѧ. тогда̀ позна̀, ви́дѣвъ дв҃ꙋ сосца́ма пита́ющꙋю, двⷭ҇тва же цвѣ́тъ нетлѣ́ненъ хранѧ́щꙋю. тогда̀ позна̀, є҆гда̀ дв҃а породѝ, но ꙗ҆́же сꙋ́ть роди́льницъ не разꙋмѣ̀. тогда̀ позна̀, ꙗ҆́кѡ сосе́цъ подадѐ не сѣ́ченъ ка́мень мы́сленномꙋ ка́мню. тогда̀ позна̀ і҆ѡ́сифъ, ꙗ҆́кѡ ѡ҆ не́й написа̀ и҆са́їа: сѐ, дв҃а во чре́вѣ прїи́метъ. доздѣ̀ а҆ѳана́сїева словеса̀, ꙗ҆̀же ѹ҆вѣрѧ́ютъ, ꙗ҆́кѡ въ то̀ вре́мѧ позна̀ і҆ѡ́сифъ та́инства си́лꙋ, и҆ позна́въ поклони́сѧ со стра́хомъ и҆ ра́достїю, бл҃годарѧ̀ воплоще́ннаго бг҃а сподо́бившаго тоѧ̀ та́йны самови́дцꙋ и҆ слꙋжи́телю є҆мꙋ̀ бы́ти. Време́ни же ржⷭ҇тва̀ хрⷭ҇то́ва бы́ти нлⷣнꙋю (по сꙋббѡ́тѣ) полꙋ́нощь ѿ мно́гихъ достовѣ́рныхъ пи́шетсѧ, и҆ къ собо́рꙋ то̀ прилага́етсѧ вселе́нскомꙋ шесто́мꙋ гл҃ющꙋ ѡ҆ пра́зднованїи недѣ́льнагѡ днѐ тогѡ̀ ра́ди, ꙗ҆́кѡ въ то́й де́нь бг҃ъ свѣ́тлость сотворѝ. въ то́й де́нь ма́нна съ нб҃сѐ ѡ҆дожде́на. въ то́й де́нь гдⷭ҇ь роди́тисѧ бл҃гоизво́лилъ. въ то́й кр҃ще́нїе на і҆ѻрда́нѣ ѿ і҆ѡа́нна прїѧ̀. въ то́й са́мъ премлⷭ҇тивый и҆скꙋпи́тель ро́да чл҃ческагѡ спⷭ҇нїѧ на́шегѡ ра́ди и҆з̾ ме́ртвыхъ воскрⷭ҇е. въ то́й дх҃а ст҃а́го на ѹ҆чн҃кѝ и҆злїѧ̀. Ꙗ҆́коже бо въ пѧто́къ, по свидѣ́тельствꙋ та́коже достовѣ́рномꙋ, зача́сѧ во ѹ҆тро́бѣ дв҃и́ческой а҆рха́гг҃ловымъ бл҃говѣ́щенїемъ, и҆ въ пѧто́къ пострада̀: си́це въ недѣ́лю роди́сѧ, и҆ въ недѣ́лю воскрⷭ҇е. и҆ прили́чно бѣ̀ въ де́нь недѣ́льный роди́тисѧ хрⷭ҇тꙋ̀, во́ньже бо де́нь, речѐ бг҃ъ, да бꙋ́детъ свѣ́тъ, и҆ бы́сть свѣ́тъ: въ то́й и҆ са́мъ свѣ́тъ сы́й неприкоснове́нный мі́рꙋ да возсїѧ́етъ. А҆ ꙗ҆́кѡ въ нощѝ и҆ въ кото́рый є҆ѧ̀ ча́съ роди́тисѧ хрⷭ҇то́съ и҆мѣ́ѧше, прⷪ҇ро́чески предрече́сѧ въ кни́гахъ премꙋ́дрости: ти́хомꙋ бо молча́нїю содержа́щꙋ всѧ̑, и҆ но́щи во свое́мъ тече́нїи преполовлѧ́ющейсѧ, всемогꙋ́щее сло́во твоѐ, (гдⷭ҇и,) съ нб҃съ ѿ прⷭ҇то́лѡвъ црⷭ҇кихъ же́стокъ ра́тникъ въ среди́нꙋ поги́бельныѧ землѝ сни́де. Сотвори́шасѧ же и҆ чꙋдеса̀ ве́лїѧ по вселе́ннѣй во вре́мѧ ржⷭ҇тва̀ хрⷭ҇то́ва. Въ са́мый бо той ча́съ, во́ньже чистото́ю запечатлѣ́ннаѧ дв҃и́ческаѧ врата̀ гдⷭ҇ь на́шъ про́йде, а҆́бїе и҆сто́чникъ воды̀ въ то́йже пеще́рѣ и҆стечѐ ѿ ка́мене. а҆ въ ри́мѣ и҆сто́чникъ є҆ле́а ѿ землѝ и҆зы́де, и҆ въ ті́веръ рекꙋ̀ потечѐ. хра́мъ і҆́дѡльскїй глаго́лемый вѣ́чный паде́сѧ, і҆́дѡли сокрꙋши́шасѧ, на нб҃сѝ трѝ сл҃нца та́може показа́шасѧ. въ і҆спа́нїи же то́йже но́щи ꙗ҆ви́сѧ ѻ҆́блакъ па́че сл҃нца свѣтлѣ́йшїй, а҆ въ землѝ і҆ꙋде́йстѣй вїногра́ды є҆нга́ддстїи прозѧбо́ша зимѣ̀ сꙋ́щей. И҆зрѧ́днѣе же по пи́санномꙋ въ є҆ѵⷢ҇лїи а҆́гг҃ли ѿ нб҃съ съ пѣснопѣ́нїемъ снидо́ша, и҆ человѣ́кѡмъ ѻ҆чеви́днѡ показа́шасѧ: и҆́бо прѧ́мо верте́па тогѡ̀, въ не́мже хрⷭ҇то́съ роди́сѧ, въ ты́сѧщꙋ саже́ней бѣ̀ сто́лпъ нарица́емый а҆́деръ, вселе́нїе па́стырское: та́мѡ въ то́й нощѝ слꙋчи́сѧ тре́мъ па́стырємъ бе́зъ сна̀ пребыва́ти стрегꙋ́щымъ своѐ ста́до, и҆ сѐ нача́льнѣйшїй ѿ си́лъ нб҃сныхъ а҆́гг҃лъ [є҆го́же гаврїи́ла бл҃говѣ́стника мни́тъ бы́ти кѷрпїа́нъ ст҃ы́й] ꙗ҆ви́сѧ и҆̀мъ въ свѣ́тлости вели́цѣй, блиста́ѧсѧ нб҃сною сла́вою, и҆ то́юже и҆ ѻ҆́ныхъ ѡ҆сїѧва́ѧ, є҆го́же ви́дѣвше ѹ҆страши́шасѧ ѕѣлѡ̀. но ꙗ҆вле́йсѧ а҆́гг҃лъ стра́хъ ѿложи́ти и҆ не боѧ́тисѧ повелѣ́въ, бл҃говѣстѝ и҆̀мъ ра́дость прише́дшꙋю всемꙋ̀ мі́рꙋ ржⷭ҇тво́мъ сп҃си́телевымъ. сказа̀ же и҆̀мъ зна́менїе нело́жнагѡ бл҃говѣ́стїѧ своегѡ̀, ѡ҆брѧ́щете, речѐ, млⷣнца пови́та, лежа́ща въ ꙗ҆́слѣхъ. Сїѐ а҆́гг҃лꙋ къ ни́мъ бесѣ́дꙋющꙋ внеза́пꙋ ѹ҆слы́шасѧ на воздꙋ́сѣ мно́жество во́євъ нбⷭ҇ныхъ, хва́лѧщихъ бг҃а, и҆ гл҃ющихъ: сла́ва въ вы́шнихъ бг҃ꙋ, и҆ на землѝ ми́ръ, во человѣ́цѣхъ бл҃говоле́нїе. По видѣ́нїи то́мъ а҆́гг҃льскомъ и҆ слы́шанїи пѣснопѣ́нїѧ во́євъ нб҃сныхъ па́стырїе совѣща́вшисѧ и҆до́ша спѣ́шнѡ до виѳлее́ма ви́дѣти, а҆́ще и҆́стина є҆́сть ска́заное и҆̀мъ ѿ а҆́гг҃ла. и҆ ѡ҆брѣто́ша прчⷭ҇тꙋю дв҃ꙋ мр҃і́ю бцⷣꙋ, и҆ ст҃а́го і҆ѡ́сифа ѡ҆брꙋ́чника є҆ѧ̀, и҆ ѻ҆троча̀ пови́тое положе́ное во ꙗ҆́слѣхъ. и҆ вѣ́ровавше несꙋмнѣ́ннѡ, ꙗ҆́кѡ то́й є҆́сть хрⷭ҇то́съ гдⷭ҇ь ча́емый мессі́а. прише́дый сп҃стѝ ро́дъ чл҃вѣ́ческїй, поклони́шасѧ є҆мꙋ̀, и҆ сказа́ша всѧ̀, ꙗ҆̀же ви́дѣша и҆ слы́шаша, что̀ рече́но и҆̀мъ бы́сть ѿ а҆́гг҃ла ѡ҆ се́мъ ѻ҆троча́ти. и҆ всѝ слы́шавшїи [і҆ѡ́сифъ, салѡмі́а, и҆ и҆́же в̾ то̀ вре́мѧ та́мѡ бѧ́хꙋ прише́дшїи] диви́шасѧ ѡ҆ глаго́ланныхъ ѿ па́стырей, а҆ наипа́че прчⷭ҇таѧ дв҃а мт҃и нетлѣ́ннѡ роди́вшаѧ соблюда́ше всѧ̀ гл҃ы сїѧ̀, слага́ющи въ срⷣцы свое́мъ. и҆ возврати́шасѧ па́стырїе, сла́вѧще, и҆ хва́лѧще бг҃а. Та́кѡ бы́сть ржⷭ҇тво і҆и҃са хрⷭ҇та̀ гдⷭ҇а на́шегѡ, є҆мꙋ́же и҆ ѿ на́съ грѣ́шныхъ бꙋ́ди че́сть и҆ сла́ва, поклоне́нїе и҆ бл҃годаре́нїе, со безнача́льнымъ є҆гѡ̀ ѻ҆ц҃е́мъ, и҆ соприсносꙋ́щнымъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

І҆кѡ́на ржⷭ҇тва̀ хрⷭ҇то́ва, творе́нїе прпⷣбнагѡ а҆ндре́а моско́вскагѡ.

Тропа́рь пра́здника, гла́съ д҃:

Ржⷭ҇тво̀ твоѐ, хрⷭ҇тѐ бж҃е на́шъ, ꙳ возсїѧ̀ мі́рови свѣ́тъ ра́зꙋма: ꙳ въ не́мъ бо ѕвѣзда́мъ слꙋжа́щїи, ꙳ ѕвѣздо́ю ѹ҆ча́хꙋсѧ, ꙳ тебѣ̀ кла́нѧтисѧ сл҃нцꙋ пра́вды, ꙳ и҆ тебѐ вѣ́дѣти съ высоты̀ восто́ка: ꙳꙳ гдⷭ҇и, сла́ва тебѣ̀.

Конда́къ, гла́съ г҃:

Дв҃а дне́сь пресꙋ́щественнаго ражда́етъ, ꙳ и҆ землѧ̀ верте́пъ непристꙋ́пномꙋ прино́ситъ. ꙳ а҆́гг҃ли съ па́стырьми славосло́вѧтъ, ꙳ волсви́ же со ѕвѣздо́ю пꙋтеше́ствꙋютъ: ꙳ на́съ бо ра́ди роди́сѧ ѻ҆троча̀ мла́до, ꙳꙳ превѣ́чный бг҃ъ.

Сло́во на ржⷭ҇тво̀ хрⷭ҇то́во.

Сп҃си́телева въ мі́ръ прише́ствїѧ нбⷭ҇ный бл҃говѣ́стникъ па́стырємъ виѳлее́мскимъ сказꙋ́етъ зна́менїе, млⷣнца пелена́ми пови́та и҆ въ ꙗ҆́слехъ положе́на, гл҃етъ бо: роди́сѧ ва́мъ дне́сь сп҃съ. И҆ сѐ ва́мъ зна́менїе, ѡ҆брѧ́щете млⷣнецъ пови́тъ, лежа́щъ въ ꙗ҆́слехъ. Помы́слилъ бы кто̀, ꙗ҆́кѡ не ве́лїе сїѐ зна́менїе ви́дѣти млⷣнца пови́та, и҆́бо ѻ҆бы́чно всѧ́комꙋ въ мі́ръ ражда́ющемꙋсѧ бы́ти млⷣнцꙋ, бы́ти пови́тꙋ: то̀ бѧ́ше бы ве́лїе зна́менїе, є҆гда̀ бы а҆́гг҃лъ во свидѣ́телство и҆ и҆звѣ́стное ѡ҆ ржⷭ҇твѣ̀ хрⷭ҇то́вомъ ѹ҆вѣре́нїе показа́лъ что̀ неѡбы́чное, ꙗ҆́коже волхвѡ́мъ ѕвѣздꙋ̀ на восто́цѣ, и҆лѝ сївѵ́лла а҆́ѵгꙋстꙋ показа̀ въ сл҃нцѣ дв҃и́цꙋ млⷣнца на рꙋка́хъ держа́щꙋю: ѻ҆ба́че а҆́ще кто̀ восхо́щетъ присмотрѣ́тисѧ разꙋ́мнымъ ѻ҆́комъ, соверша́ющымсѧ в̾ то́мъ млⷣнцѣ пови́томъ та́инствамъ, ѹ҆ви́дитъ, и҆ познае́тъ, ꙗ҆́кѡ ве́лїе є҆́сть сїѐ зна́менїе во и҆звѣ́стїе ржⷭ҇тва̀ сп҃си́телева ѿ а҆́гг҃ла па́стырємъ ска́заное, млⷣнецъ пови́тъ, лежа́щъ въ ꙗ҆́слехъ. то́й бо є҆́сть се́й млⷣнецъ, є҆гѡ́же ржⷭ҇тво̀ возсїѧ̀ мі́рови свѣ́тъ ра́зꙋма, ꙗ҆́снѣе па́че ѕвѣ́здъ и҆ сл҃нца, и҆ пелєны̀ є҆гѡ̀ ѻ҆блакѡ́въ ши́ршїи, и҆ ꙗ҆́сли нб҃съ простра́ннѣйшїи, в̾ ни́хже возлежѐ невмѣсти́мый хрⷭ҇то́съ бг҃ъ. Ѡ҆брати́мъ ѹ҆́бѡ ѹ҆́мнаѧ ѻ҆чеса̀ на́шѧ на млⷣнчество хрⷭ҇то́во, и҆́же бо вѣ́ки сотворѝ, и҆ ѿ вѣ̑къ ѹ҆гото́ва на́мъ спасе́нїе, се́й да ве́тхость є҆стества̀ на́шегѡ ѡ҆бнови́лъ, млⷣнецъ на землѝ ꙗ҆ви́сѧ: ѡ҆брѧ́щете, речѐ, млⷣнецъ.

Не бы́сть ли кто̀ такова́гѡ мнѣ́нїѧ, є҆́же бы хрⷭ҇тꙋ̀ прїитѝ въ мі́ръ не ꙗ҆́кѡ млⷣнцꙋ, но ꙗ҆́кѡ и҆споли́нꙋ, по прⷪ҇ро́чествꙋ дв҃да ѡ҆ прише́ствїи мессі́иномъ предглаго́лавшагѡ: и҆ то́й ꙗ҆́кѡ жени́хъ и҆сходѧ́й ѿ черто́га своегѡ̀, (сі́есть, ѿ ѹ҆тро́бы прчⷭ҇тыѧ дв҃ы) возра́дꙋетсѧ ꙗ҆́кѡ и҆споли́нъ тещѝ пꙋ́ть: и҆ тогѡ̀ ра́ди а҆́гг҃лъ гл҃етъ: ѡ҆брѧ́щете млⷣнца, а҆ не и҆споли́на: но є҆гда̀ разсмо́тримъ млⷣнчество хрⷭ҇то́во, и҆́нꙋю сегѡ̀ винꙋ̀ ѡ҆брѧ́щетъ. ꙗ҆́коже бо ржⷭ҇тво̀ є҆гѡ̀ не ѻ҆́бщее ржⷭ҇твꙋ̀ чл҃вѣ́ческомꙋ, стра́нное и҆ пачеесте́ственное: си́це и҆ млⷣнчество є҆гѡ̀ стра́нное, и҆ про́чїимъ млⷣнцємъ не ѻ҆́бщее. Всѝ млⷣнцы въ мі́ръ родѧ́щїисѧ сꙋ́тъ не́мощни и҆ несмы́слѧщїи, не и҆мѣ́ютъ въ себѣ̀ крѣ́пости, нижѐ что̀ ѹ҆мѣ́ютъ, доне́лѣже вре́менемъ нема́лымъ растꙋ́щымъ и҆̀мъ крѣ́пость и҆ ра́зꙋмъ въ ни́хъ начне́тъ ꙗ҆влѧ́тисѧ и҆ съ ни́ми возраста́ти: а҆ се́й новорожде́нный млⷣнецъ гдⷭ҇ь на́шъ і҆и҃съ хрⷭ҇то́съ и҆ съ крѣ́постїю и҆ съ ра́зꙋмомъ ражда́етсѧ. и҆ тогѡ̀ ра́ди а҆́гг҃лъ, ꙗ҆́кѡ є҆ди́но въ мі́рѣ никогда́же ви́дѣнное чꙋ́до, сказꙋ́етъ такова́го млⷣнца, и҆́же ражда́етсѧ и҆ съ си́лою непобѣди́мою и҆ съ премⷣростїю недомы́слимою. Є҆ли́кѡ до непобѣди́мой є҆гѡ̀ крѣ́пости и҆ си́лы, ѡ҆ то́й в̾ ны́нѣшнїй пра́здникъ не ѹ҆молча̀ цр҃ковь съ прⷪ҇ркомъ и҆са́їею пою́щи: бг҃ъ крѣ́пкїй, властели́нъ, кн҃зь ми́ра. И҆ нѣ́гдѣ приповѣствꙋ́етсѧ: ѿ ногте́й познае́тсѧ ле́въ: ле́въ ѿ колѣ́на і҆ꙋ́дова хрⷭ҇то́съ, ѿ млады́хъ ногте́й познава́етсѧ бы́ти гдⷭ҇ь крѣ́покъ и҆ си́ленъ, гдⷭ҇ь си́ленъ въ бра́ни. смо́тримъ, ко́ль ве́лїѧ новорожде́ннагѡ млⷣнца крѣ́пость и҆ си́ла: є҆два̀ нача̀ ѡ҆ ржⷭ҇твѣ̀ є҆гѡ̀ проходи́ти вѣ́сть, а҆ ѹ҆жѐ и҆́рѡдъ смѧте́сѧ и҆ ве́сь і҆ерⷭ҇ли́мъ съ ни́мъ. Є҆щѐ не гл҃етъ ѻ҆троча̀, а҆ ѹ҆жѐ ѹ҆страши́лъ наре́кшихъ и҆мена̀ своѧ̀ на землѝ. Є҆щѐ въ пелена́хъ, а҆ ѹ҆жѐ воѡрꙋже́нныхъ ѹ҆жасѝ мꙋчи́телей. Є҆щѐ въ ꙗ҆́слехъ, а҆ ѹ҆жѐ сотрѧсѐ на ца́рстѣмъ сѣдѧ́щаго прⷭ҇то́лѣ.

Повѣствꙋ́етъ нѣ́кто ѿ и҆скꙋ́снѣйшихъ враче́въ, ꙗ҆́кѡ сво́йственно є҆́сть тѣ̑мъ, и҆́же и҆́мꙋтъ бы́ти въ мі́рѣ вели́цы, и҆мени́ты, и҆ сла́вни, и҆лѝ нѣ́кїими царѧ́ми, и҆лѝ хра́брыми во́инами, тѣ̑мъ (речѐ) сво́йственно ѿ млады́хъ ногте́й и҆мꙋ́щихъ бы́ти свои́хъ си́лъ и҆ дѣѧ́нїй зна́мєнїѧ ꙗ҆влѧ́ти. и҆ гл҃етъ: не ѹ҆̀ рожде́нъ бы́сть пері́клесъ ѻ҆лѵ́мпїй, а҆ ѹ҆жѐ гре́кѡвъ ѹ҆страшѝ со́нными привидѣ́нїи: а҆леѯа́ндръ є҆щѐ не роди́сѧ, а҆ ѿ всѣ́хъ ѹ҆жѐ а҆ммѡ́нїевъ сы́нъ и҆ ца́рства кнѧ́зь нарица́шесѧ. и҆ и҆́ндѣ повѣствꙋ́етсѧ, ꙗ҆́кѡ ми́дꙋ царю̀ фрѷгі́йскомꙋ ма́лꙋ сꙋ́щꙋ ѻ҆́трокꙋ, мра́вїѧ зє́рна пшени́чна спѧ́щꙋ томꙋ̀ въ ѹ҆ста̀ носѧ́ще влага́хꙋ, прозна́менꙋюще и҆мꙋ́щаѧ бы́ти є҆мꙋ̀ безчи́слєннаѧ бога̑тства. Сѐ и҆ на́шъ цр҃ь и҆ влⷣка, родѧ́щїйсѧ ны́нѣ млⷣⷣнцъ, въ дѣ́тствѣ свое́мъ, и҆мꙋ́щихъ бы́ти свои́хъ си́лъ и҆ дѣѧ́нїй и҆звѣ̑стнаѧ зна́мєнїѧ ꙗ҆влѧ́етъ. ѻ҆́ныхъ грѧдꙋ́щихъ бога́тствъ лю́бѧщымъ є҆го̀ ѹ҆гото́ванныхъ показꙋ́етъ зна́менїе, є҆гда̀ зла́то, лїва́нъ, и҆ смѵ́рнꙋ, ѿ стра́нъ далеча́йшихъ приноси́мо къ себѣ̀ бы́ти ѹ҆строѧ́етъ. ѻ҆́ныѧ и҆мꙋ́щїѧ бы́ти є҆гѡ̀ над̾ сме́ртїю и҆ дїа́воломъ побѣ̑ды, и҆ над̾ всецѣ́лымъ а҆́домъ торжества̀, ны́нѣ ꙗ҆влѧ́етъ знаме́нїе, є҆гда̀ и҆́рѡдомъ и҆ всѣ́мъ і҆ерⷭ҇ли́момъ потрѧса́етъ, и҆ смꙋща́етъ. ѻ҆́ныѧ над̾ ви́димымъ и҆ неви́димымъ мі́ромъ и҆мꙋ́щїѧ по чл҃вѣ́чествꙋ бы́ти вла́сти, ѡ҆ не́йже во своѐ вре́мѧ рече́тъ: Даде́сѧ мѝ всѧ́ка вла́стъ на нб҃сѝ и҆ на землѝ: и҆звѣ́стное зна́менїе ꙗ҆влѧ́етъ, є҆гда̀ ржⷭ҇твꙋ̀ своемꙋ̀ а҆́гг҃лѡвъ и҆ па́стырей слꙋжи́телей, восто́чныхъ же царе́й покло́нникѡвъ твори́тъ, по прⷪ҇ро́чествꙋ дв҃довꙋ: И҆ покло́нѧтсѧ є҆мꙋ̀ всѝ ца́рїе зе́мстїи: сѐ бо и҆спо́лнисѧ ѹ҆жѐ тогѡ̀ прорече́нїе, є҆гда̀ ꙗ҆́кѡ цр҃ь црⷭ҇твꙋющихъ ѿ трїе́хъ царе́й земны́хъ поклоне́нїемъ и҆ дара́ми почте́нъ є҆́сть. Кра́снѣ І҆ппѡні́йскїѧ цр҃кве первоседа́тель вѣща́етъ: Сїѧ̀ сꙋ́ть зна́мєнїѧ ржⷭ҇тва̀ твоегѡ̀ гдⷭ҇и і҆и҃се, пре́жде да́же во́лны морскі́ѧ подсте́лютсѧ тѝ под̾ но́зѣ по мо́рю ходѧ́щꙋ, пре́жде да́же ѹ҆мо́лкнꙋтъ вѣ́тры твои́мъ повелѣ́нїемъ, пре́жде да́же ме́ртвїи сло́вомъ твои́мъ воста́нꙋтъ, пре́жде да́же со́лнце, тебѣ̀ ѹ҆мира́ющꙋ, поме́ркнетъ, землѧ̀ тебѣ̀ ѿ гро́ба востаю́щꙋ потрѧсе́тсѧ, не́бо тебѣ̀ восходѧ́щꙋ ѿве́рзетсѧ: пре́жде да́же сїѧ̀ и҆ и҆́наѧ чꙋдє́снаѧ млады́ѧ пло́ти твоеѧ̀ лѣ́ты сотвори́ши, є҆щѐ рꙋка́ма мт҃рнима но́сишисѧ, а҆ ѹ҆жѐ гдⷭ҇ь всегѡ̀ мі́ра познава́ешисѧ. Сѐ новорожде́ннагѡ млⷣнца гдⷭ҇а на́шегѡ і҆и҃са хрⷭ҇та̀ крѣ́пость и҆ си́ла, ꙗ҆́кѡ въ свое́мъ є҆щѐ дѣ́тствѣ крѣ́пкимъ бы́ти влⷣкою и҆звѣ́стнѡ ꙗ҆влѧ́етсѧ бг҃ъ крѣ́покъ влⷣка. Вои́стинꙋ си́ла бж҃їѧ въ не́мощи соверша́етсѧ, въ ма́лыхъ бо и҆ немощны́хъ чле́нахъ млⷣнческихъ ви́димъ ве́лїю і҆и҃съ хрⷭ҇то́вꙋ си́лꙋ, ю҆́же и҆з̾ѧвѝ цр҃ковь, є҆гда̀ родѧ́щагосѧ гдⷭ҇а а҆́гнцꙋ ѹ҆подоблѧ́етъ, и҆ а҆́гнцемъ нарица́етъ, въ неседа́лномъ моле́нїи ѡ҆ поклоне́нїи па́стырей чтꙋ́щи: Ви́дѧтъ сего̀ ꙗ҆́кѡ а҆́гнца непоро́чна во чре́вѣ мр҃і́инѣ ѹ҆па́сшасѧ. ю҆́же пою́ще рѣ́ша: Ра́дꙋйсѧ, а҆́гнца и҆ па́стырѧ мт҃и: здѐ и҆ ѹ҆подо́бленъ а҆́гнцꙋ, и҆ нарече́нъ а҆́гнцемъ родѧ́щїйсѧ ѿ дв҃и́цы хрⷭ҇то́съ. но ка́ѧ въ а҆́гнцѣ крѣ́пость; ка́ѧ си́ла; си́ла вои́стинꙋ неѡдолѣ́ннаѧ, ю҆́же ѹ҆ви́димъ ѿсю́дꙋ: ѹ҆зрѣ̀ и҆ногда̀ і҆ѡа́ннъ бг҃осло́въ во ѿкрове́нїи свое́мъ разли̑чныѧ ѕвѣ́ри, ѕмі́и ѿ мѣ́стъ разли́чныхъ, ѿ мо́рѧ, бе́здны, и҆ пꙋсты́ни и҆сходѧ́щыѧ, со мно́гими стра́шными глава́ми, и҆ ѹ҆сты̀ ѿве́рстыми смертоно́снагѡ ꙗ҆́да и҆спо́лненными, и҆́хже и҆ са́мое видѣ́нїе ѕѣлѡ̀ ѹ҆жа́сно. ті́и всѝ востаю́тъ проти́вꙋ є҆ди́нагѡ а҆́гнца, ꙗ҆кожѐ гл҃етъ писа́нїе: Сі́и со а҆́гнцемъ бра́нь сотворѧ́тъ. смотрѧ̀ на тꙋ̀ бра́нь ѕмі́євъ и҆ ѕвѣре́й ѻ҆́ныхъ со а҆́гнцемъ. ча́ѧлъ бы кто̀, ꙗ҆́кѡ кото́рый є҆ди́нъ ѿ хꙋдѣ́йшихъ ѕвѣре́й а҆́бїе а҆́гнца похи́тивъ растерза́етъ, а҆ бо́лшимъ ѕвѣ́рємъ не бꙋ́детъ съ ки́мъ та́мо и҆ бра́тисѧ: но ви́ждь а҆́гнцевꙋ си́лꙋ, то́ль крѣ́пкѡ ста̀ проти́вꙋ и҆̀мъ, ꙗ҆́кѡ все́й тѣ́хъ ѕвѣри́ной си́лѣ внеза́пꙋ па́сти и҆ въ пе́рстъ всели́тисѧ тво́ритъ, ꙗ҆́коже пи́шетсѧ: А҆́гнецъ побѣди́тъ ѧ҆̀, ꙗ҆́кѡ гдⷭ҇ь гдⷭ҇ємъ є҆́сть, и҆ цр҃ь цр҃є́мъ є҆́сть. ѽ вои́стинꙋ ве́лїѧ то̀ а҆́гнцева си́ла. Чре́з̾ а҆́гнца того̀ зна́менꙋетсѧ си҃ъ бж҃їй. чрез̾ ѕмїе́въ же и҆ ѕвѣре́й бѣ́си и҆ и҆́хъ слꙋги̑. здѣ̀ ве́щь разсꙋжде́нїѧ досто́йна: почто̀ а҆́гг҃лъ показꙋ́ѧй тꙋ̀ сн҃а бж҃їѧ съ є҆гѡ̀ врагѝ бра́нь, не наречѐ є҆го̀ и҆́стымъ тогѡ̀ и҆́менемъ съ нб҃сѐ во времꙗ бл҃говѣ́щенїѧ къ пречⷭ҇тѣй дв҃ѣ принесе́ннымъ и҆ при ѡ҆брѣ́занїи да́ннымъ; почто̀ не речѐ : сі́и со і҆и҃сомъ хрⷭ҇то́мъ, но со а҆́гнцемъ бра́нь сотворѧ́тъ; Вои́стинꙋ тогѡ̀ ра́ди, ꙗ҆́кѡ ѻ҆́нъ въ ржⷭ҇твѣ̀ свое́мъ не жды́й нарече́нїѧ и҆́мене себѣ̀, и҆злага́етъ врагѡ́въ свои́хъ: є҆щѐ а҆́ки а҆́гнецъ на сѣ́нѣ почива́етъ, а҆ ѹ҆жѐ мы́сленныхъ ѕмі́евъ ѕвѣре́й лама́етъ а҆́ки тро́стїе, крꙋши́тъ а҆́ки сосꙋ́ды скꙋде́лныѧ. до́брѣ пи́шетсѧ во прⷪ҇ро́чествѣ: Нарцы̀ и҆́мѧ є҆мꙋ̀, ско́рѡ плѣнѝ, на́глѡ расхи́ти: занѐ пре́жде не́же разꙋмѣ́ти ѻ҆троча́ти, назва́ти ѻ҆ц҃а̀ и҆лѝ мт҃рь: прїи́метъ си́лꙋ дама́сковꙋ и҆ коры́сти самарі́йскїѧ. Не жде́тъ се́й новорожде́нный а҆́гнецъ доне́лѣже бꙋ́детъ ле́въ, и҆ рече́тсѧ ѡ҆ не́мъ: Сѐ побѣди́лъ є҆́сть ле́въ ѿ колѣ́на і҆ꙋ́дова. не те́рпитъ се́й млⷣнецъ, доне́лѣже возрасте́тъ въ крѣ́пость а҆́ки и҆споли́нъ. не жде́тъ сїѐ ѻ҆троча̀ доне́лѣже ю҆́ныѧ є҆гѡ̀ чле́ны прїи́мꙋтъ си́лꙋ а҆́ки самѱѡ́нъ. но пре́жде не́же начина́етъ сса́ти сосцы̀ мт҃ре своеѧ̀, врагѡ́въ свои́хъ побѣжда́етъ. Пре́жде не́же ѹ҆вѣ́сть и҆́мѧ своѐ и҆лѝ пречⷭ҇тыѧ мт҃ре своеѧ̀ ѹ҆сты̀ нарица́ти, и҆мена̀ недосто́йныхъ ѿ кни́гъ живо́тныхъ и҆стреблѧ́етъ. пре́жде да́же въ мꙋ́жескꙋю начне́тъ возраста́ти си́лꙋ, си́лныхъ съ престѡ́лъ низлага́етъ: А҆́гнецъ побѣди́тъ ѧ҆̀, ꙗ҆́кѡ гдⷭ҇ь гдⷭ҇ємъ є҆́сть, и҆ цр҃ь цр҃є́мъ. Сѐ а҆́гнца на́шегѡ крѣ́пость, сѐ бжⷭ҇твеннагѡ млⷣнца непобѣди́маѧ си́ла, съ не́юже ражда́етсѧ.

Ражда́етсѧ же вкꙋ́пѣ и҆ съ ра́зꙋмомъ: и҆мы́й бо въ млⷣнчествѣ свое́мъ крѣ́пость и҆ си́лꙋ, и҆́мать вкꙋ́пѣ и҆ ра́зꙋмъ: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ разꙋ́ма є҆гѡ̀ нѣ́сть числа̀. А҆́ще кото́ромꙋ млⷣнцꙋ, ꙗ҆́кѡ семꙋ̀ ѡ҆бж҃е́нномꙋ, прили́чествꙋютъ словеса̀ напи̑саннаѧ: Па́че ста́рєцъ разꙋмѣ́хъ. Младе́нцы ѻ҆́бщїи ро́ждшесѧ ничесѡ́же разꙋмѣ́ютъ да́же до вре́мене во́зраста своегѡ̀, и҆ возраста́ющымъ и҆̀мъ ѹ҆че́нїе потре́бно, да́бы что̀ моглѝ разꙋмѣ́ти. Се́й же млⷣнецъ бжⷭ҇твенный, ꙗ҆́коже бѣ̀ пре́жде ржⷭ҇тва̀ своегѡ̀ са́маѧ премⷣрость, си́це и҆ въ ржⷭ҇твѣ̀ свое́мъ є҆́сть глꙋбина̀ премⷣрости и҆ ра́зꙋма бж҃їѧ. Млⷣнчествомъ подлѣ́тенъ, премⷣростїю же предвѣ́ченъ. Млⷣнецъ, и҆ ве́тхїй де́ньми. Ѻ҆́трокъ вкꙋ́пѣ и҆ ѻ҆ц҃ъ на́мъ ражда́етсѧ, гл҃ющꙋ ны́нѣ въ ржⷭ҇тво̀ є҆гѡ̀ и҆са́їи прⷪ҇ро́кꙋ: Ѻ҆ц҃ъ бꙋ́дꙋщагѡ вѣ́ка. то̀ и҆менова́нїе ѻ҆ц҃ъ, не ѻ҆троча́тємъ, но мꙋ́жємъ є҆́сть прили́чно, и҆ никто́же младе́нца ссꙋ́ща сосцы̀ ѻ҆тце́мъ наречѐ когда̀. ѻ҆ба́че прⷪ҇ро́къ родѧ́щагосѧ хрⷭ҇та̀ ѻ҆ц҃е́мъ не ѡ҆бинꙋ́ѧсѧ нарица́етъ: почто̀; да пока́жетъ, ꙗ҆́кѡ во ѡ҆бж҃е́нномъ то́мъ млⷣⷣнцѣ то́йже є҆́сть ра́зꙋмъ, та́ѧже премⷣрость, ꙗ҆́коже и҆ въ ѻ҆тцѣ̀ ветходне́вномъ. ꙗ҆́коже бо кото́рый премⷣрѣйшїй ѻ҆те́цъ съ свои́ми ча́ды, та́кѡ се́й нбⷭ҇сный ѿ пречⷭ҇тыѧ бцⷣы ро́ждшїйсѧ млⷣнецъ съ на́ми дѣ́етъ. и҆ ѡ҆ се́мъ зна́менїи ѹ҆вѣрѧ́емсѧ, ꙗ҆́кѡ роди́сѧ на́мъ дне́сь сп҃съ, поне́же въ млⷣнчествѣ свое́мъ ѻ҆ц҃е́мъ на́мъ бы́ти ꙗ҆влѧ́етсѧ. Ка́кѡ же на́мъ быва́етъ ѻ҆ц҃ъ; вне́млемъ: Ражда́ющисѧ са́мъ, а҆́бїе и҆ на́съ ѿ сме́рти на живо́тъ ѿражда́етъ не и҆на́кѡ, но ꙗ҆́коже є҆ѵⷢ҇лскїй ѻ҆те́цъ блꙋ́днаго сы́на ме́ртва бы́вша и҆ ѡ҆жи́вша. То́й ѻ҆те́цъ, да бы̀ ѿроди́лъ на живо́тъ ме́ртваго своего̀ сы́на, нападѐ на вы́ю є҆гѡ̀, и҆ ѡ҆блобыза̀ є҆го. ѻ҆те́ческое ѻ҆́ное лобза́нїе зна́менїемъ бѣ̀ сы́нꙋ проще́нїѧ грѣхѡ́въ вино́вныхъ бы́вшихъ дш҃е́вныѧ є҆гѡ̀ сме́рти, грѣхо́мъ бо сме́рть вхо́дитъ. грѣхо́мъ же, ꙗ҆́кѡ вїнѣ̀ сме́ртнѣй, чрез̾ проще́нїе ѿ̾ѧ́тымъ бы́вшымъ, а҆́бїе ѡ҆живѐ ме́ртвый. ꙗ҆́коже бо по преше́ствїи но́щи быва́етъ де́нь, си́це по ѿ̾ѧ́тїи мра́чныѧ грѣхо́вныѧ сме́рти возсїѧва́етъ блгⷣть бж҃їѧ, ꙗ҆́же є҆́сть дꙋшѝ живо́тъ. но та́кѡ є҆́сть вои́стинꙋ, ꙗ҆́кѡ хрⷭ҇то́съ сп҃съ на́шъ въ ржⷭ҇твѣ̀ свое́мъ лобза̀ на́съ, ѹ҆́бѡ ѹ҆ме́ршихъ на́съ грѣха́ми ѿроди́лъ є҆́сть на живо́тъ блгⷣти своеѧ̀, и҆ тѣ́мъ ꙗ҆влѧ́етсѧ на́мъ ѻ҆ц҃ъ премⷣръ въ свое́мъ млⷣнчествѣ. А҆ ꙗ҆́кѡ хрⷭ҇то́съ сп҃съ на́шъ въ ржⷭ҇твѣ̀ свое́мъ лобза̀ на́съ, смо́тримъ ѿ писа́нїѧ бжⷭ҇твеннагѡ въ пѣ́снѣхъ пѣ́сней нѣ́кое бг҃олюби́вое лицѐ, сицевы́мъ къ бг҃ꙋ взе́млетсѧ жела́нїемъ: да ло́бжетъ мѧ̀ ѿ лобза́нїй ѹ҆́стъ свои́хъ. Хо́щемъ ли ѹ҆вѣ́дати, кто̀ є҆́сть жела́ѧй бж҃їѧ лобза́нїѧ; слы́шимъ а҆мвро́сїа ст҃а́го гл҃ющаго: ꙗ҆́кѡ є҆стество̀ на́ше, пло́ть на́ша, та́ѧ то̀ жела́етъ къ таково́й прїитѝ чрез̾ воплоще́нїе сн҃а бж҃їѧ съ бг҃омъ любвѝ и҆ прїѧ́знствꙋ, да́бы могла̀ съ ни́мъ а҆́ки дрꙋ́гъ съ дрꙋго́мъ лице́мъ къ лицꙋ̀ зрѣ́тисѧ, и҆ ѹ҆сты̀ въ ѹ҆ста̀ лобза́тисѧ лобза́нїемъ ст҃ы́мъ. Си́це ѹ҆ч҃тль ѻ҆́нъ гл҃етъ: разꙋмѣ́имъ пло́ть ѻ҆́нꙋ, ꙗ҆́же во а҆да́мѣ ѕмїи́нымъ ѡ҆мо́чена бѣ̀ ꙗ҆́домъ, и҆ гнїѧ́ше смра́домъ престꙋпле́нїѧ, та̀ ѿ мно́гихъ прⷪ҇ро́чествъ ѹ҆вѣ́давши, ꙗ҆́кѡ прїи́детъ бг҃ъ, и҆ ле́сть ѕмїи́нꙋ ѿтрѧ́съ, дх҃а ст҃а́гѡ и҆злїе́тъ бл҃года́ть, мо́литсѧ гл҃ющи: да ло́бжетъ мѧ̀ ѿ лобза́нїй ѹ҆́стъ свои́хъ. и҆ златоꙋ́стъ ст҃ы́й въ лицѣ̀ цр҃кве ѿ ꙗ҆зы̑къ соста́вленныѧ гл҃етъ: А҆́зъ ꙗ҆́же ѿ ꙗ҆зы̑къ цр҃ковь, не та́кѡ хощꙋ̀, да чрез̾ мѡѷсе́а, и҆ и҆са́їю, и҆ і҆еремі́ю, и҆ и҆́ныхъ прⷪ҇ро́кѡвъ ко мнѣ̀ гл҃етъ. ꙗ҆́коже хощꙋ̀, да са́мъ собесѣ́дꙋетъ мѝ: са́мъ ѹ҆́бѡ да прїи́детъ, и҆ возглаго́лю съ ни́мъ ѹ҆сты̀ къ ѹ҆стѡмъ: са́мъ да прїи́детъ, и҆ да ло́бжетъ мѧ̀ лобза́нїемъ ѹ҆́стъ свои́хъ. Слы́шꙋ і҆еремі́ю ѡ҆ не́мъ гл҃юща: глꙋбоко̀ се́рдце, (чл҃вѣ́кꙋ) па́че всѣ́хъ, и҆ чл҃вѣ́къ є҆́сть, и҆ кто̀ позна́етъ є҆го̀; сама́го ѹ҆́бѡ жела́ю, да прїи́детъ, и҆ ло́бжетъ мѧ̀ лобза́нїемъ ѹ҆́стъ свои́хъ. слы́шꙋ а҆мѡ́са ѡ҆ не́мъ вѣща́юща: сѐ мꙋ́жъ стоѧ́й на ѡ҆гра́дѣ а҆дама́нтовѣ, и҆ въ рꙋцѣ̀ є҆гѡ̀ а҆дама́нтъ. но а҆́зъ самогѡ̀ тогѡ̀ и҆щꙋ, да прїи́детъ и҆ ло́бжетъ мѧ̀ лобза́нїемъ ѹ҆́стъ свои́хъ. до здѣ̀ златоꙋ́стъ. ѿ си́хъ слове́съ ѹ҆чи́телей ст҃ы́хъ ꙗ҆́вѣ показꙋ́етсѧ, ꙗ҆́кѡ бж҃їе съ є҆стество́мъ на́шимъ лобза́нїе, є҆́сть воплоще́нїе сн҃а бж҃їѧ. ꙗ҆́коже бо въ лобза́нїи ѹ҆ста̀ ко ѹ҆стѡ́мъ прилага́ютсѧ, си́це въ воплоще́нїи сп҃сителевомъ є҆стество̀ бж҃їе къ є҆стествꙋ̀ чл҃вѣ́ческомꙋ приложи́сѧ и҆ соедини́сѧ. Та́кѡ ѹ҆бѡ хрⷭ҇то́съ сп҃съ на́шъ въ ржⷭ҇твѣ̀ свое́мъ ꙗ҆́кѡ ѻ҆ц҃ъ лобза̀ на́съ, ѡ҆ чесо́мъ предречѐ дв҃дъ: Пра́вда и҆ ми́ръ ѡ҆блобыза́стасѧ. и҆дѣ́же є҆ѵѳѵ́мїй толкова́тель чрез̾ пра́вдꙋ разꙋмѣ́етъ є҆стество̀ бж҃їе, є҆ди́нъ бо бг҃ъ сꙋдїѧ̀ є҆сть првⷣнъ. чрез̾ ми́ръ же є҆стество̀ во хрⷭ҇тѣ̀ чл҃вѣ́ческое ра́ди преи́скреннїѧ и҆ приро́дныѧ є҆мꙋ кро́тости. та̑ ѹ҆́бѡ ѻ҆́ба є҆стества̀ взаи́мъ ѡ҆блобыза́тисѧ гл҃етасѧ, тогѡ̀ ра́ди, ꙗ҆́кѡ ве́лїе съ собо́ю во хрⷭ҇тѣ̀ и҆мѣ́ета соедине́нїе, согла́сїе, и҆ соизволе́нїе.

И҆звѣ́стнѡ же є҆́сть и҆ сїѐ, ꙗ҆́кѡ тѣ́мъ лобза́нїемъ хрⷭ҇то́съ сп҃съ на́шъ въ ржⷭ҇твѣ̀ свое́мъ ѿроди́лъ на́съ и҆з̾ сме́рти грѣхо́вныѧ на живо́тъ бл҃года́ти бжⷭ҇твенныѧ. въ кни́гахъ ца́рскихъ чте́тсѧ: жена̀ сѡмані́тѧнынѧ, є҆гда̀ просѝ є҆лїссе́а прⷪ҇ро́ка въ горѣ̀ карми́лстѣй пребыва́ющаго, дабы̀ ше́дши въ до́мъ є҆ѧ̀, воскреси́лъ ѹ҆ме́ршаго є҆ѧ̀ сы́на: прⷪ҇ро́къ не и҆ды́й а҆́бїе са́мъ, посла̀ пре́жде гїезі́ю слꙋгꙋ̀ своего̀ съ жезло́мъ свои́мъ, дабы̀ положи́лъ є҆го̀ на лицѐ ѻ҆́трочища, но не бѣ̀ гла́са ни послꙋша́нїѧ. прише́дъ же са́мъ прⷪ҇ро́къ къ ѹ҆ме́ршемꙋ, положѝ ѹ҆ста̀ своѧ̀ на ѹ҆стѣ́хъ є҆гѡ̀, и҆ дꙋ́нꙋ на него̀, и҆ ѿве́рзе ѻ҆́трочищъ ѻ҆́чи своѝ. смотрѝ, ка́кѡ ме́ртвомꙋ ѻ҆́трочищꙋ даде́сѧ живо́тъ; приложе́нїемъ ѹ҆́стъ прⷪ҇ро́чихъ къ ѹ҆стѡ́мъ є҆гѡ̀, ꙗ҆́коже быва́етъ въ лобза́нїи. и҆ вои́стинꙋ лобза́нїе та́мѡ бѣ̀, и҆дѣ́же ѹ҆ста̀ прⷪ҇ро́чєскаѧ къ ѹ҆стѡ́мъ ѻ҆́трочєскимъ прилага́хꙋсѧ: и҆ лобза́нїемъ тѣ́мъ воскре́се ме́ртвый. Проѡбразова́нїе то̀ хрⷭ҇то́ва бѣ̀ воплоще́нїѧ: сме́рть вше́дши грѣхо́мъ въ мі́ръ похи́ти пе́рваго ѻ҆́трока а҆да́ма є҆два̀ жи́ти наче́ншаго. жена̀, є҆стество̀ чл҃вѣ́ческое стꙋжа́етъ бг҃ꙋ: гдⷭ҇и преклонѝ нб҃са̀, и҆ сни́ди: просвѣтѝ лицѐ твоѐ, и҆ спасе́мсѧ. Гдⷭ҇ь бг҃ъ не а҆́бїе са́мъ и҆ды́й, но а҆́ки є҆лїссе́и слꙋгꙋ̀ своего̀, посла̀ рабы̀ своѧ̀ прⷪ҇ро́ки съ жезло́мъ зако́на, да́бы возлага́ти то̀ на ѻ҆́трока пле́мѧ а҆да́мле. но не воста̀ ѻ҆́трокъ, лю́дїе бѧ́хꙋ седѧ́ще во тмѣ̀ и҆ сѣ́ни сме́ртнѣй. Е҆гда́ же са́мъ гдⷭ҇ь прише́дъ въ воплоще́нїи свое́мъ, ꙗ҆́коже рече́сѧ, ᲂу҆стнѣ̀ бжⷭ҇тва̀ своегѡ̀ къ ᲂу҆ста́мъ чл҃вѣ́чества приложѝ, и҆ лобза̀ на́съ лобза́нїемъ ᲂу҆́стъ свои́хъ: а҆́бїе воста̀ ѻ҆́трокъ, воскре́се ме́ртвый, а҆да́мъ воⷥзва́сѧ, є҆́ѵа свободи́сѧ, сме́рть ᲂу҆мертви́сѧ, и҆ мы̀ ѡ҆жи́хомъ: из̾ сме́рти на живо́тъ ѿроди́хомсѧ въ ржⷭ҇твѣ̀ хрⷭ҇то́вомъ. Подо́бно є҆́сть сїѐ по́вѣсти дре́вней: дрꙋ́гъ нѣ́кїй до́бръ ви́дѧ люби́маго своего̀ дрꙋ́га ᲂу҆ѧ́звлена ѿ врага̀ мече́мъ ꙗ҆доно́снымъ, пече́тсѧ прилѣ́жнѡ, ка́кѡ бы є҆го̀ и҆сцѣли́ти ѿ сме́ртныѧ ра́ны: и҆ сѐ глаго́лютъ є҆мꙋ̀ вра́чеве, ꙗ҆́кѡ та̀ ꙗ҆́зва є҆́сть неисцѣ́льна, ме́чь бо ꙗ҆́домъ напое́ный не то́чїю ᲂу҆ѧзвѝ пло́тъ, ра́нꙋ ве́лїю сотворѝ: но и҆ тѣ́мже ꙗ҆́домъ повредѝ тѣ́ло, и҆ всѧ́чески сме́рть настои́тъ дрꙋ́гꙋ твоемꙋ̀, ра́звѣ а҆́ще бы кто̀ є҆го̀ свои́мъ и҆скꙋпи́лъ здра́вїемъ, си́це: да́бы приложи́лъ ᲂу҆ста̀ своѧ̀ къ ꙗ҆́звѣ є҆гѡ̀, и҆ и҆сса́лъ бы ѿ ра́ны ѻ҆́ный ꙗ҆́дъ: дрꙋ́гъ бы ᲂу҆́бѡ тво́й ᲂу҆до́бь прїѧ́лъ цѣльбꙋ̀, но и҆сса́вый ꙗ҆́дъ ѿ ра́ны ᲂу҆ме́рлъ бы всѧ́чески. То̀ слы́шавъ и҆́стинный дрꙋголю́бецъ, а҆́ще є҆мꙋ̀ и҆ сво́й и҆́стый живо́тъ бѣ̀ него́рекъ, ѻ҆ба́че любѧ̀ дрꙋ́га па́че себѐ сама́го, и҆ єгѡ̀ здра́вїе па́че своегѡ̀ живота̀ предпочита́ѧ, тѣ́мъ рече́ннымъ ѻ҆́бразомъ приложе́нїемъ ᲂу҆́стъ свои́хъ къ ра́нѣ и҆сса̀ ꙗ҆́дъ, ᲂу҆врачева̀ дрꙋ́га, и҆ свое́ю сме́ртїю прїѧ́телское и҆скꙋпѝ здра́вїе. подо́бнѣ и҆ гдⷭ҇ь бг҃ъ на́шъ сотвори́лъ съ на́ми ᲂу҆ѧ́звлеными ѿ а҆́дскагѡ ра́тника ꙗ҆доно́снымъ грѣха̀ мечемъ. никто́же можа́ше на́съ и҆сцѣли́ти ѿ ꙗ҆́звы и҆ и҆зба́вити ѿ сме́рти, сме́ртнагѡ пе́рвѣе ѿ на́съ не ѿе́мши вреда̀. не бѣ̀ си́це соверше́ннагѡ врача̀, до́ндеже са́мъ ѻ҆́нъ превы́шнїй сѣдѧ́й на херꙋви́мѣхъ, дꙋша́мъ и҆ тѣ́лѡмъ соверше́нный вра́чь и҆ твор́ецъ, ᲂу҆ста̀ своѧ̀, сі́есть сн҃а своего̀, ꙗ҆́коже бо дх҃ъ ст҃ы́й въ писа́нїи нарица́етсѧ ѻ҆ч҃ескимъ пе́рстомъ, ѡ҆ пе́рстѣ [речѐ] бж҃їи и҆згоню̀ бѣ́сы: си́це бг҃ъ сн҃ъ и҆менꙋ́етсѧ ѻ҆́ч҃їими ᲂу҆стна́ми, по пи́санномꙋ: дх҃омъ ᲂу҆́стъ є҆гѡ̀ всѧ̀ си́ла и҆́хъ: та́ѧ гл҃ю ᲂу҆ста̀ своѧ̀ гдⷭ҇ь бг҃ъ сн҃а своего̀ возлю́бленнаго ѿ любвѝ къ ро́дꙋ чл҃вѣ́ческомꙋ приложи́лъ къ ꙗ҆́звѣ є҆стества̀ на́шегѡ: та́кѡ возлюбѝ бг҃ъ мі́ръ, ꙗ҆́кѡ и҆ сн҃а своего̀ да́лъ є҆́сть.

[…]

Въ то́йже де́нь
сказа́нїе ѡ҆ поклоне́нїи волхвѡ́въ.

І҆и҃сꙋ же ро́ждшꙋсѧ въ виѳлее́мѣ і҆ꙋде́йстѣмъ во дни̑ и҆́рѡда царѧ̀, сѐ, волсвѝ ѿ востѡ́къ прїидо́ша. не ѿ є҆ди́ныѧ ко́еѧ восто́чныѧ страны̀, но ѿ разли́чныхъ, ꙗ҆́коже ꙗ҆влѧ́етсѧ ѿ ѻ҆ц҃ъ ст҃ы́хъ разли́чнѣ ѡ҆ ни́хъ повѣствꙋ́ющихъ. И҆ны́и бо гл҃ютъ и҆̀хъ бы́ти ѿ персі́ды, си́це ст҃ы́й златоꙋ́стъ, кѷрі́ллъ а҆леѯандрі́йскїй, ѳеофѷла́ктъ, и҆ про́чїи, тогѡ̀ ра́ди, ꙗ҆́кѡ въ то̀ вре́мѧ наипа́че та́мѡ сла́вно бѣ̀ ѹ҆че́нїе ѕвѣздоче́тское. и҆ не можа́ше кто̀ ѹ҆ ни́хъ царе́мъ бы́ти, а҆́ще не пе́рвѣе ѕвѣздоче́тства и҆зꙋче́нъ бꙋ́детъ. Дрꙋзі́и же мнѧ́тъ и҆̀хъ бы́ти ѿ а҆раві́и, си́це ст҃ы́й мч҃нкъ і҆ꙋсті́нъ, кѷпрїа́нъ, є҆пїфа́нїй: того̀ ра́ди, ꙗ҆́кѡ та̀ страна̀ попремно́гꙋ и҆зоби́ловаше злато́мъ, лїва́номъ и҆ смѵ́рною. а҆ и҆ны́и ѿ є҆ѳїо́пїи ѻ҆́ныхъ бы́ти непщꙋ́ютъ, поне́же ѿтꙋ́дꙋ прїи́де и҆ногда̀ ца́рица са́вска, сі́есть є҆ѳїо́пска, во і҆ерⷭ҇ли́мъ, слы́шати премꙋ́дрость соломѡ́новꙋ, є҆́же бѣ̀ по і҆ерѡнѵ́мовꙋ разꙋмѣ́нїю, проѡбразова́нїемъ настоѧ́щїѧ ве́щи, прише́ствїѧ гл҃го́лю волхвѡ́въ, къ мы́сленномꙋ соломѡ́нꙋ хрⷭ҇тꙋ̀, и҆́жє є҆́сть бж҃їѧ премрⷣсть. но и҆ дв҃дъ гл҃етъ: є҆ѳїо́пїа предвари́тъ рꙋ́кꙋ свою̀ къ бг҃ꙋ. ѻ҆ба́че всѧ̀ ты́ѧ страны̀ сꙋ́ть востѡ́чныѧ, и҆ сопредѣ́льныѧ себѣ̀, зла́томъ, лїва́номъ и҆ а҆рѡма́тами и҆зоби́лꙋющыѧ, волхова́нїѧмъ же и҆ ѕвѣздоче́тствꙋ прилѣжа́щыѧ, въ ни́хже премꙋ́дрѣйшымъ не та́йно бѧ́ше валаа́мово ѡ҆ и҆мѣ́вшей возсїѧ́ти ѕвѣздѣ̀ прⷪ҇ро́чество, є҆́же ѿ ро́да въ ро́ды, и҆ повѣствова́нїемъ и҆ писа́нїемъ въ кни́гахъ и҆́хъ предава́шесѧ. Мни́тсѧ же бы́ти си́це: ꙗ҆́кѡ є҆ди́нъ ѿ ни́хъ бѣ̀ ѿ персі́ды, дрꙋгі́й ѿ а҆раві́и, а҆ тре́тїй ѿ є҆ѳїо́пїи. и҆́бо сегѡ̀, ꙗ҆́кѡ ѿ разли́чныхъ стра́нъ бѧ́хꙋ, є҆́сть и҆́стинно подо́бїе въ прⷪ҇ро́чествѣ дв҃довомъ, и҆дѣ́же гл҃етъ: Ца́рїе ѳарсі́йстїи и҆ ѻ҆́строви да́ры принесꙋ́тъ, ца́рїе а҆ра́встїи и҆ сава̀ да́ры приведꙋ́тъ. Сїѐ же, ꙗ҆́коже толко́вницы бжⷭ҇твеннагѡ писа́нїѧ гада́тельствꙋютъ, предречѐ дв҃дъ ѡ҆ волсвѣ́хъ и҆мѣ́вшихъ прїитѝ ко хрⷭ҇тꙋ̀ съ да́ры. и҆ є҆гда̀ гл҃етъ: ца́рїе ѳарсі́йстїи, сі́есть замо́рстїи, ѳарсі́съ бо, мо́ре зна́менꙋетъ, разꙋмѣ́й бы́ти персі́дꙋ, ꙗ҆́кѡ за мо́ремъ сꙋ́щꙋю. ца́рїе а҆ра́встїи, здѣ̀ ꙗ҆́вѣ сказꙋ́етъ а҆раві́ю. є҆ѳїо́пїю же ꙗ҆влѧ́етъ, є҆гда̀ гл҃етъ: и҆ сава̀ да́ры приведꙋ́тъ. и҆́бо сава̀ є҆́сть гра́дъ та́кѡ нарица́ющїйсѧ, гра́дъ же то́й сто́льный є҆́сть всеѧ̀ є҆ѳїо́пїи. ѹ҆́бо ѿ персі́ды, а҆раві́и и҆ є҆ѳїо́пїи бѧ́хꙋ ті́и трѝ волсвѝ. Глаго́лютсѧ же бы́ти волсвѝ, не ꙗ҆́кѡ въ бѣсо́вскихъ ѡ҆баѧ́нїѧхъ и҆ ѕловрѣ́дныхъ чародѣѧ́нїѧхъ ѹ҆пражнѧ́ющїисѧ: но поне́же ѻ҆бы́чай бѣ̀ а҆ра́влѧнѡмъ, сѷрі́анѡмъ, пе́рсѡмъ, є҆ѳїо́пѡмъ, и҆ и҆́нымъ востѡ́чнымъ страна́мъ фїлосо́фы своѧ̀ и҆ ѕвѣздоче́тцы та́кѡ нарица́ти волхва́ми, не ѿ ѻ҆́ныхъ ѹ҆́бѡ ѡ҆баѧ́нникѡвъ и҆ чародѣ́євъ сїѝ волсвѝ, [а҆́ще и҆ є҆дина́кѡ и҆̀мъ прозва́нїе] но ѿ мꙋдрѣ́йшихъ ѕвѣздоче́тцевъ и҆ фїлосо́фѡвъ бѧ́хꙋ. Нарица́ютсѧ же и҆ ца́рїе, не ꙗ҆́кѡ ца́рїе вели́цыи и҆ є҆диновла́стители мнѡ́гимъ страна́мъ, но ꙗ҆́кѡ и҆мꙋ́щїи ѿ ни́хъ кі́йждо сво́й гра́дъ, и҆лѝ кнѧже́нїе ѡ҆предѣле́нное. ѻ҆бы́че бо писа́нїе ст҃о́е є҆ди́нагѡ коегѡ́ждо гра́да власти́телей царѧ́ми и҆менова́ти, ꙗ҆́коже ꙗ҆́вѣ є҆́сть въ кни́зѣ бытїѧ̀ въ главѣ̀ четве́ртойнадесѧть. ѿ кото́рыхъ же градѡ́въ бѧ́хꙋ ті́и ца́рїе. нѣ́сть достовѣ́рнагѡ и҆звѣ́стїѧ, то́кмо сїѐ и҆звѣ́стно, ꙗ҆́кѡ ѿ стра́нъ восто́чныхъ. число́мъ трѝ по числꙋ̀ тре́хъ дарѡ́въ принесе́ныхъ, зла́та, лїва́на и҆ смѵ́рны, ті́и кі́йждо ѿ своеѧ̀ страны̀ подви́гшесѧ, є҆ди́ною води́ми ѕвѣздо́ю, снидо́шасѧ по бж҃їю смотре́нїю на пꙋтѝ во є҆ди́но, и҆ дрꙋ́гъ дрꙋ́га намѣ́ренїе ѹ҆вѣ́давше грѧдѧ́хꙋ вкꙋ́пѣ ѕвѣздѣ̀ послѣ́дствꙋюще, ѡ҆ не́йже сла́внѣйшїй ѕвѣздоче́тецъ валаа́мъ и҆ногда̀ предречѐ гл҃го́лющи: возсїѧ́етъ ѕвѣзда̀ ѿ і҆а́кѡва, и҆ воста́нетъ человѣ́къ ѿ і҆и҃лѧ. Ка́ѧ же то̀ ѕвѣзда̀ бѣ̀; златоꙋ́стъ и҆ ѳеофѷла́ктъ повѣствꙋ́ютъ, ꙗ҆́кѡ не бѣ̀ ѿ числа̀ ѕвѣ́здъ нбⷭ҇ныхъ на́ми ви́димыхъ, но бжⷭ҇твеннаѧ нѣ́каѧ и҆ а҆́гг҃льскаѧ си́ла вмѣ́стѡ ѕвѣзды̀ ꙗ҆влѧ́ющаѧсѧ. всѝ бо ѕвѣ́зды ѿ нача́ла мїротворе́нїѧ бытїѐ своѐ и҆мѣ́ютъ, а҆ та̀ кончи́нѣ вѣкѡ́въ вопло́щшꙋсѧ сло́вꙋ ꙗ҆ви́сѧ. всѝ ѕвѣ́зды на нб҃сѣ́хъ сꙋ́ть поста́влени, а҆ та̀ на воздꙋ́сѣ зрѧ́шесѧ. всѝ ѕвѣ́зды ѻ҆бы́чнѣ ѿ восто́ка на за́падъ текꙋ́тъ, а҆ та̀ є҆ди́на неѻбы́чнѡ ѿ восто́ка на ю҆́гъ ко і҆ерⷭ҇ли́мꙋ теча́ше. всѝ ѕвѣ́зды въ нощѝ то́чїю сїѧ́ютъ, а҆ та̀ и҆ во днѝ сл҃нцꙋ подо́бнѣ сїѧ́ше превосходѧ́щи несравне́ннѡ нбⷭ҇ныѧ ѕвѣ́зды и҆ сїѧ́нїемъ и҆ вели́чествомъ. всѝ ѕвѣ́зды съ про́чими свѣти́лы, сл҃нцемъ и҆ лꙋно́ю и҆ со всѣ́мъ крꙋ́гомъ нбⷭ҇нымъ непреста́нное своѐ и҆́мꙋтъ движе́нїе и҆ тече́нїе: а҆ та̀ є҆ди́на ѻ҆вогда̀ и҆дѧ́ше, ѻ҆вогда̀ же стоѧ́ше, гл҃го́лющꙋ ѳеофѷла́ктꙋ: ходѧ́щымъ волхвѡ́мъ хожда́ше и҆ ѕвѣзда̀, почива́ющымъ же и҆̀мъ и҆ ѻ҆на̀ стоѧ́ше. Ѡ҆ време́ни же ꙗ҆вле́нїѧ ѕвѣзды̀ тоѧ̀ разли́чнїи разли́чнѣ гада́тельствꙋютъ: нѣ́цыи глаго́лютъ, ꙗ҆́кѡ въ са́мꙋю но́щь и҆ въ са́мый ча́съ сп҃си́телева ѿ дв҃ы рожде́нїѧ ꙗ҆ви́сѧ: но не мни́тсѧ бы́ти та́кѡ: и҆́бо а҆́ще бы въ то̀ вре́мѧ ꙗ҆ви́ласѧ ѕвѣзда̀. то ка́кѡ бы и҆здале́ча волсвѝ возмоглѝ не во мнѡ́гїѧ днѝ і҆ерⷭ҇ли́ма пости́гнꙋти, пре́жде да́же не ѿи́де і҆ѡ́сифъ со ѻ҆троча́темъ и҆ мт҃рїю є҆гѡ̀ въ є҆гѵ́петъ, и҆́же по и҆сполне́нїи четы́редесѧти дне́й и҆ зако́нномъ въ цр҃кви ѡ҆чище́нїи, а҆́бїе не ме́длѧ въ домꙋ̀ свое́мъ, и҆́же въ назаре́тѣ, то́чїю потрє́бнаѧ на пꙋ́ть взе́мъ къ є҆гѵ́птꙋ со тща́нїемъ ѡ҆брати́сѧ. а҆́ще же и҆ глаго́лютъ нѣ́цыи, ꙗ҆́кѡ волсвѝ ѻ҆́ни ско́рыхъ ко́ней ѹ҆потреби́ша, и҆ скорѣ́йшее тече́нїе творѧ́ще въ тринадесѧ́тый ѿ ржⷭ҇тва̀ хрⷭ҇то́ва де́нь виѳлее́мъ постиго́ша, ѻ҆ба́че не вѣроѧ́тно сїѐ: царє́мъ бо сꙋ́щымъ а҆ не скорохо́дцємъ, съ да́ры же и҆ мно́гими ца́рскомꙋ са́нꙋ и҆ че́сти прили́чествꙋющими слꙋга́ми грѧдꙋ́щымъ со скота́ми же и҆ вещмѝ къ пꙋтѝ потре́бными, ка́кѡ мо́щно бѣ̀ ѿ персі́ды и҆ а҆раві́и и҆ є҆ѳїо́пїи въ трина́десѧть дне́й дойтѝ до виѳлее́мскагѡ гра́да; къ семꙋ́же и҆ ѹ҆де́ржани бы́ша нѣ́кїй де́нь во і҆ерⷭ҇ли́ме ѿ и҆́рѡда, до́ндеже первосщ҃е́нникѡмъ и҆ кни́жникѡмъ сѡ́бранымъ и҆ вопроше́нымъ, гдѣ̀ хрⷭ҇то́съ ражда́етсѧ; бы́вшымъ, ѹ҆вѣ́дасѧ, ꙗ҆́кѡ въ виѳлее́мѣ і҆ꙋде́йстѣмъ. дрꙋзі́и же, ѿ ни́хже и҆ ст҃ы́й є҆пїфа́нїй. глаго́лютъ: ꙗ҆́кѡ ꙗ҆ви́сѧ ѕвѣзда̀ въ ча́съ ржⷭ҇тва̀ хрⷭ҇то́ва, но волсвѝ по двꙋ̀ лѣ́тѣхъ на поклоне́нїе прїидо́ша, и҆ ѹ҆жѐ дволѣ́тно ѻ҆троча̀ хрⷭ҇та̀ ѡ҆брѣто́ша. сїѐ же мнѣ́нїе ѿсю́дꙋ привни́де, ꙗ҆́кѡ и҆́рѡдъ повелѣ̀ и҆збива́ти младе́нцы ѿ двꙋ̀ лѣ́тъ и҆ нижа́йше, по вре́мени, є҆́же и҆звѣ́стнѡ и҆спыта̀ ѿ волхвѡ́въ. но сицево́е мнѣ́нїе ст҃ы́й ѳеофѷла́ктъ глаго́летъ бы́ти ꙗ҆́вѣ непрїѧ́тно. є҆́сть бо всеѧ̀ цр҃кви вѣ́рное разꙋмѣ́нїе, ꙗ҆́кѡ волсвѝ ѻ҆́ни хрⷭ҇тꙋ̀ въ виѳлее́мѣ и҆ въ верте́пѣ є҆щѐ сꙋ́щемꙋ поклони́шасѧ: а҆ по двꙋ̀ лѣ́тѣхъ хрⷭ҇то́съ гдⷭ҇ь не то́чїю не бы́сть въ виѳлее́мѣ, но нижѐ въ палесті́нѣ, но въ є҆гѵ́птѣ. и҆́бо ꙗ҆́коже рече́сѧ по свидѣ́тельствꙋ лꙋкѝ ст҃а́гѡ по четыредесѧтодне́вном въ цр҃кви ѡ҆чище́нїи, и҆дѣ́же сѷмеѡ́нъ ста́рецъ срѣ́те гдⷭ҇а, и҆ ꙗ҆́кѡ сконча́шасѧ всѧ̀ по зако́нꙋ гдⷭ҇ню, возврати́шасѧ і҆ѡ́сифъ ст҃ы́й и҆ прчⷭ҇таѧ дв҃а мр҃і́а со млⷣнцемъ а҆́бїе въ галїле́ю а҆ не во і҆ꙋде́ю, во гра́дъ сво́й назаре́тъ, а҆ не въ виѳлее́мъ. и҆ ѿтꙋ́дꙋ по повелѣ́нїю а҆́гг҃ловꙋ въ є҆гѵ́птꙋ ѹ҆гото́вашасѧ: ка́кѡ ѹ҆́бѡ можа́хꙋ волсвѝ по двꙋ̀ лѣ́тѣхъ ѡ҆брѣстѝ хрⷭ҇та̀ въ виѳлее́мѣ; нїки́форъ же дре́внїй і҆сто́рикъ гре́ческїй сказꙋ́етъ, ꙗ҆́кѡ за два̀ лѣ́та пре́жде ржⷭ҇тва̀ хрⷭ҇то́ва ѕвѣзда̀ на восто́цѣ показа́сѧ, и҆ два̀ лѣ́та волсвѝ къ і҆ерⷭ҇ли́мꙋ пꙋтеше́ствовахꙋ, да́же въ са́мый ча́съ ржⷭ҇тва̀ постиго́ша. мни́тсѧ и҆ се́й і҆сто́рикъ томꙋ́же согласова́ти, є҆́же пи́шетсѧ въ є҆ѵⷢ҇лїи ѡ҆ и҆збїе́нїи младе́нцєвъ ѿ двою̀ лѣ̑тꙋ и҆ нижа́йше, но ни та́кѡ є҆́сть достовѣ́рно. и҆́бо ка́ѧ бы нꙋжда̀ належа́ла ѻ҆́нымъ волхвѡ́мъ дволѣ́тнѧгѡ ѿ стра́нъ восто́чныхъ пꙋтеше́ствїѧ, из̾ ни́хже въ два̀ и҆лѝ трѝ мѣ́сѧца возмо́жно дойтѝ до і҆ерⷭ҇ли́ма: а҆́ще же и҆ ко́снѡ ꙗ҆́кѡ царѝ и҆ со мно́жествомъ бреме́ни грѧдѧ́хꙋ, ѻ҆ба́че не мни́тсѧ бо́лѣе шестѝ и҆лѝ седмѝ мѣ́сѧцей и҆̀мъ въ пꙋтѝ ѹ҆ме́длити: и҆́бо востѡ́чныѧ страны̑, ꙗ҆кожѐ персі́да, а҆раві́а, є҆ѳіо́пїѧ, ѿ і҆ерⷭ҇ли́ма не сꙋ́ть толи́кагѡ разстоѧ́нїѧ, да́бы междꙋ̀ и҆́ми бы́лъ пꙋ́ть дволѣ́тный. кото́рое же бы̀ ѡ҆ вре́мени ꙗ҆вле́нїѧ ѕвѣзды̀ бы́ло разꙋмѣ́нїе достовѣ́рнѣйшее; мню̀, ꙗ҆́кѡ ст҃а́гѡ і҆ѡа́нна златоꙋ́ста и҆ ѳеофѷла́кта, ті́и ѹ҆чи́тели глаго́лютъ си́це: ѕвѣзда̀ пре́жде рожде́нїѧ хрⷭ҇то́ва ꙗ҆ви́сѧ волхвѡ́мъ. поне́же мно́гое вре́мѧ проводи́ти и҆мѧ́хꙋ пꙋтеше́ствꙋюще, тогѡ̀ ра́ди пре́жде мно́гагѡ вре́мене ꙗ҆ви́сѧ и҆̀мъ ѕвѣзда̀, да во вре́мѧ рожде́нїѧ пости́гше поклонѧ́тисѧ є҆мꙋ̀ є҆щѐ сꙋ́щꙋ въ пелена́хъ. доздѣ̀ тѣ́хъ ст҃ы́хъ ѹ҆чи́телей разꙋмѣ́нїе. Смо́тримъ же, ꙗ҆́кѡ не воспомина́ютъ, ни ѹ҆ставлѧ́ютъ ѕвѣздѣ̀ ѻ҆́ной дволѣ́тнѧгѡ вре́мене, но то́чїю глаго́лютъ, пре́жде мно́гагѡ вре́мене, а҆́ки бы ре́кше, пре́жде нѣ́коликѡ мѣ́сѧцей. ѿсю́дꙋ же златоꙋ́стова и҆ ѳеофѷла́ктова сегѡ̀. ꙗ҆́кѡ пре́жде вре́мене ржⷭ҇тва̀ хрⷭ҇то́ва ѕвѣзда̀ ꙗ҆ви́сѧ, повѣствова́нїѧ держа́щесѧ, бл҃гоче́стно разꙋмѣ́ти є҆́сть, ꙗ҆́кѡ въ са́мый то́й де́нь и҆ ча́съ, во́ньже бл҃говѣ́щенїемъ а҆рха́гг҃ловымъ, дх҃а же ст҃а́гѡ наше́ствїемъ, сло́во пло́ть бы́сть, заче́ншисѧ въ пренепоро́чнѣй ѹ҆тро́бѣ дв҃и́честѣй, за де́вѧть мѣ́сѧцєвъ пред̾ ржⷭ҇тво́мъ ѕвѣзда̀ на восто́цѣ ꙗ҆ви́сѧ. си́це разꙋмѣ́юще, и҆ воспомѧнове́нныхъ ѹ҆чи́телей свидѣ́тельства не ѡ҆ста́немсѧ, и҆ недостовѣ́рное волхвѡ́въ въ пꙋтѝ чрез̾ два̀ лѣ̑та закоснѣ́нїе ѿме́тнемъ. а҆ ѡ҆ дволѣ́тїи и҆збїе́нныхъ младе́нцєвъ по́слеже въ де́нь па́мѧти и҆́хъ рече́тсѧ. за де́вѧть ѹ҆́бѡ мѣ́сѧцєвъ, ꙗ҆́коже глаго́лемъ, пред̾ хрⷭ҇то́вымъ ржⷭ҇тво́мъ во вре́мѧ бл҃говѣ́щенїѧ волсвѝ на восто́цѣ ѕвѣздꙋ̀ ѹ҆зрѣ́вше, пе́рвѣе разсꙋжда́хꙋ ѹ҆дивлѧ́ющисѧ и҆ проразꙋмѣва́юще, ка́ѧ то̀ є҆́сть ѕвѣзда̀, не нѣ́каѧ ли ѿ метеѡ́ръ блиста́ющихъ на воздꙋ́сѣ, и҆ ѿ провозвѣща́ющихъ нѣ̑каѧ ѕлоключє́нїѧ, ꙗ҆́коже быва́ютъ комє́ты. ꙗ҆́коже и҆ вои́стинꙋ та̀ ѕвѣзда̀ провозвѣща́ше въ тѣ́хъ страна́хъ ѕлоключе́нїе врагꙋ̀ дꙋшегꙋ́бцꙋ, паде́нїе і҆́дѡлѡвъ, и҆згна́нїе бѣсѡ́въ, свѣ́та же вѣ́ры ст҃ы́ѧ просвѣще́нїе: та́же позна́вше и҆́ное тоѧ̀ ѕвѣзды̀ не по слꙋ́чаю быва́ющее, но по ѻ҆со́бнѣй бжⷭ҇твеннѣй си́ле є҆стество̀ и҆ подо́бїе, воспомѧнꙋ́ша дре́внее ѻ҆́ное валаа́мово прⷪ҇ро́чество, є҆щѐ же и҆ ѿ сївѵ́ллы і҆нді́йскїѧ є҆рѷфре́и ѡ҆ то́йже ѕвѣздѣ̀ прⷪ҇ро́чествовавшей ѹ҆вѣща́вшесѧ: а҆ наипа́че ꙗ҆́коже ст҃ы́й ле́въ па́па ри́мскїй разꙋмѣ́етъ, сами́мъ бг҃омъ та́йнѡ наꙋче́ни позна́ша, ꙗ҆́кѡ прїи́де вре́мѧ рожде́нїѧ гдⷭ҇а и҆ цр҃ѧ̀ всеѧ̀ вселе́нныѧ и҆мꙋ́щагѡ роди́тисѧ во і҆и҃ли, ꙗ҆́коже валаа́мъ проречѐ: воста́нетъ человѣ́къ ѿ і҆и҃лѧ. и҆ то̀ є҆гѡ̀ є҆́сть ѕвѣзда̀ и҆зда́вна предвозвѣще́ннаѧ. вѣ́ровавше ѹ҆́бѡ несꙋмнѣ́ннѡ бы́ти та́кѡ, и҆ дово́льнѡ на пꙋ́ть приꙋгото́вльшесѧ, дви́гнꙋшасѧ ѿ стра́нъ свои́хъ, и҆ на пꙋтѝ, ꙗ҆́коже вы́ше рече́сѧ, во є҆ди́но соше́дшесѧ, грѧдѧ́хꙋ є҆диномы́сленнѡ. а҆ тѣ́мъ вре́менемъ девѧтомѣ́сѧчное ѿ ꙗ҆вле́нїѧ ѕвѣзды̀ и҆сполнѧ́шесѧ вре́мѧ, и҆ приближа́шесѧ ча́съ ржⷭ҇тва̀ хрⷭ҇то́ва. прибли́жишасѧ же и҆ ѻ҆нѝ къ предѣ́лѡмъ палесті́нскимъ, та́же и҆ сама́гѡ ца́рственнагѡ во і҆ꙋде́и гра́да і҆ерⷭ҇ли́ма въ са́мый де́нь ржⷭ҇тва̀ хрⷭ҇то́ва достиго́ша. Приходѧ́щымъ же и҆̀мъ ко і҆ерⷭ҇ли́мꙋ, а҆́бїе ѕвѣзда̀ водѧ́щаѧ и҆̀хъ ѿ ѻ҆че́съ скры́сѧ: и҆́бо а҆́ще бы та́ѧжде ѕвѣзда̀ и҆ во і҆ерⷭ҇ли́мѣ возсїѧ́ла, всѧ́чески бы наро́дъ ѹ҆зрѣ́вши ю҆̀ поше́лъ за не́ю съ волхвы̀ ко хрⷭ҇тꙋ̀, и҆ ѹ҆вѣ́далъ бы и҆́рѡдъ съ зави́стными а҆рхїсѷнагѡ́ги і҆ꙋде́йскими рожде́ннаго хрⷭ҇та̀, и҆ по за́висти пре́жде вре́мене бы̀ є҆го̀ ѹ҆би́ли. но смотре́нїе бж҃їе лꙋ́чше на́мъ спⷭ҇нїе ѹ҆строѧ́ющее повелѣ̀ скры́тисѧ ѕвѣздѣ̀, ѻ҆́во да не ѹ҆вѣ́стсѧ верте́пъ и҆́щꙋщими дꙋ́шꙋ ѻ҆троча́те, ѻ҆́во ꙗ҆́кѡ недосто́йна бѧ́хꙋ ѻ҆чеса̀ тогѡ̀ ѕлонра́внагѡ жидо́вскагѡ ро́да ви́дѣти пречꙋ́днꙋю ѕвѣздꙋ̀ ѻ҆́нꙋю, ѻ҆́во же и҆скꙋша́юще вѣ́рꙋ и҆́хъ, ѹ҆вѣ́рꙋютъ ли словесе́мъ ѻ҆́ныхъ волхвѡ́въ прише́ствїе мессі́ино бл҃говѣствꙋ́ющихъ, и҆ восхотѧ́тъ ли позна́ти хрⷭ҇та̀ сп҃са мі́рꙋ; а҆́ще же нѝ, то̀ да бꙋ́детъ и҆̀мъ на бо́льшее ѡ҆сꙋжде́нїе. Си́це ѳеофѷла́ктъ гада́тельствꙋетъ: чесѡ̀ ра́ди волсвѝ прїидо́ша; на ѡ҆сꙋжде́нїе і҆ꙋде́ѡмъ. а҆́ще бо волсвѝ і҆дѡложе́рцы сꙋ́ще вѣ́роваша, како́въ ѿвѣ́тъ і҆ꙋде́и и҆́мꙋтъ рещѝ; ѻ҆нѝ бо то́ль дале́кѡ ѿстоѧ́ще прїидо́ша поклони́тисѧ, і҆ꙋде́и же и҆ ѹ҆ себѐ и҆мꙋ́ще хрⷭ҇та̀ гонѧ́хꙋ є҆го̀.

Вше́дше же волсвѝ въ ца́рскїй гра́дъ і҆ерⷭ҇ли́мъ, ѡ҆ новорожде́нномъ цр҃ѣ̀ вопроша́хꙋ: гдѣ̀, глаго́люще, є҆́сть рожде́йсѧ цр҃ь і҆ꙋде́йскїй; ви́дѣхомъ бо ѕвѣздꙋ̀ є҆гѡ̀ на восто́цѣ и҆ прїидо́хомъ поклони́тисѧ є҆мꙋ̀. и҆ а҆́бїе сїѧ̀ но́ваѧ вѣ́сть ѹ҆дивѝ наро́дъ, смꙋтѝ же и҆́рѡда царѧ̀ и҆ всѣ́хъ нача́льникѡвъ і҆ерⷭ҇ли́мскихъ, и҆ собра́въ всѧ̑ первосвѧще́нники и҆ кни́жники людскі̑ѧ, вопроша́ше ѿ ни́хъ: гдѣ̀ хрⷭ҇то́съ ражда́етсѧ; ѹ҆боѧ́сѧ бо, да не ѿи́метсѧ ѿ негѡ̀ ца́рство, и҆ мы́слѧше, ка́кѡ бы новорожде́ннаго цр҃ѧ̀ ѹ҆би́ти; и҆ ѹ҆вѣ́давъ, ꙗ҆́кѡ въ виѳлее́мѣ і҆ꙋде́йстѣмъ хрⷭ҇то́съ ражда́етсѧ, призва̀ волхвы̀ ты́ѧ, и҆ ѡ҆ вре́мени ꙗ҆́вльшїѧсѧ ѕвѣзды̀ и҆спыта̀. Та́же притвори́въ ле́сть, и҆мы́й мы́сль непра́веднꙋ и҆ намѣ́ренїе ѕло̀, речѐ лꙋка́вѡ: ше́дше и҆спыта́йте и҆звѣ́стнѡ ѡ҆ ѻ҆троча́ти: є҆гда́ же ѡ҆брѧ́щете, возвѣсти́те мѝ, ꙗ҆́кѡ да и҆ а҆́зъ ше́дъ поклоню́сѧ є҆мꙋ̀. Ѿше́дшымъ же волхвѡ́мъ и҆з̾ і҆ерⷭ҇ли́ма, а҆́бїе ѕвѣзда̀ водѧ́щаѧ и҆̀хъ ꙗ҆ви́сѧ, и҆ по́йде пред̾ ни́ми, ра́дꙋющымсѧ и҆̀мъ ѕѣлѡ́ ѡ҆ ꙗ҆вле́нїи є҆ѧ̀ па́ки. и҆ предидѧ́ше и҆̀мъ, до́ндеже доведѐ ѧ҆̀ въ виѳлее́мъ къ верте́пꙋ, и҆ ста̀ верхꙋ̀, и҆дѣ́же бѣ̀ ѻ҆троча̀. над̾ ѻ҆́нымъ жили́щемъ, и҆дѣ́же ѻ҆троча̀ бѣ̀, ѕвѣзда̀ ста̀, сі́есть: ни́зꙋ соше́дши, и҆ къ землѝ прибли́жившисѧ. и҆на́кѡ бо невозмо́жно бы позна́ти, над̾ кото́рымъ стои́тъ мѣ́стомъ, а҆́ще небы̀ снизшла̀ нижа́е. си́це и҆ ѳеофѷла́ктъ ѿ ст҃а́гѡ златоꙋ́ста навы́къ бесѣ́дꙋетъ: сїѐ стра́нно зна́менїе бѧ́ше: сни́де бо ѕвѣзда̀ съ высоты̀, и҆ при землѝ бы́вши, показа̀ и҆̀мъ мѣ́сто: а҆́ще на высотѣ̀ стоѧ́ла бы, то̀ ка́кѡ позна́ти и҆мѧ́хꙋ ѻ҆со́бное мѣ́сто, и҆дѣ́же бѣ̀ хрⷭ҇то́съ. поне́же ка́ѧждо ѕвѣзда̀ мнѡ́гаѧ мѣ̑ста ѡ҆бде́ржитъ: ꙗ҆́коже и҆ ты̀ мно́жицею верхꙋ̀ хра́мины твоеѧ̀ лꙋнꙋ̀ зри́ши, та́кожде и҆ а҆́зъ мню̀, ꙗ҆́кѡ сїѧ̀ верхꙋ̀ моеѧ̀ хра́мины є҆́сть, и҆ всѝ бо та́коже мнѧ́тъ, ꙗ҆́кѡ над̾ ни́ми то́кмо лꙋна̀ стои́тъ, и҆лѝ и҆́на ѕвѣзда̀. ꙗ҆́коже и҆ та̀ ѕвѣзда̀ не бы̀ ꙗ҆́вѣ показа́ла хрⷭ҇та̀, а҆́ще бы снижшла̀, и҆ верхꙋ̀ главы̀ ѻ҆троча́те ста́ла. до здѣ̀ ѳеофѷла́ктъ. И҆ ѿ сегѡ̀ чꙋдесѐ зна́емо є҆́сть, ꙗ҆́кѡ та̀ ѕвѣзда̀ не ѿ сꙋ́щихъ на тве́рди нбⷭ҇нѣй бѣ̀, но ѻ҆со́бнаѧ бж҃їѧ си́ла. Ѡ҆брѣто́ша ѹ҆́бѡ волсвѝ и҆ско́маго, вше́дше въ хра́минꙋ, ꙗ҆́коже гл҃етъ є҆ѵⷢ҇лїе. ѿкꙋ́дꙋ нѣ́цыи мнѧ́тъ, ꙗ҆́кѡ не въ верте́пѣ, но въ нѣ́коемъ домꙋ̀ въ гра́дѣ волсвѝ хрⷭ҇та̀ ѡ҆брѣто́ша, поне́же не верте́пъ, но хра́минꙋ є҆ѵⷢ҇лїе воспомина́етъ: разше́дшꙋсѧ ѹ҆́бѡ, речѐ, мно́жествꙋ наро́да, и҆́же написа́тисѧ прише́лъ, пра́здна бы́сть и҆ ѻ҆́бщаѧ гости́ница. и҆ про́чыѧ гражда̑нскїѧ домы̀, и҆ и҆зведе́на бы́сть мт҃рь со ѻ҆троча́темъ и҆з̾ верте́па въ хра́минꙋ нѣ́кꙋю. Но ст҃ы́й мч҃нкъ і҆ꙋсті́нъ, златоꙋ́стъ, григо́рїй нѵ́сскїй, и҆ і҆ерѡнѵ́мъ сказꙋ́ютъ: ꙗ҆́кѡ въ верте́пѣ, и҆дѣ́же роди́сѧ, бѣ̀ да́же до вре́мене ѻ҆чище́нїѧ по четы́редесѧте дне́хъ быва́ющагѡ: та́мѡ и҆ ѿ волхвѡ́въ ѡ҆брѣ́тенъ бы́сть, сѐ же тогѡ̀ ра́ди, да ца́рїе зе́мстїи ѹ҆вѣ́дѧтъ новорожде́ннагѡ цр҃ѧ̀ црⷭ҇тво въ нищетѣ̀, въ смире́нїи, и҆ въ презрѣ́нїи мїрскі́ѧ сла́вы, а҆ не въ бога́тствахъ, киче́нїи же и҆ пала́тахъ. къ семꙋ́же да и҆ вѣ́ра и҆́хъ множа́йшаѧ ꙗ҆ви́тсѧ, є҆гда̀ того̀, є҆го́же ра́ди си́це до́лгїй пꙋ́тный трꙋ́дъ под̾ѧ́ша, и҆ є҆го́же въ ца́рскихъ пала́тахъ ѡ҆брѣстѝ надѣ́ѧшасѧ, толи́кꙋю нищетꙋ̀ ѹ҆зрѣ́вше не раска́ютсѧ, и҆ не воспрезо́рствꙋютъ. въ верте́пѣ ѹ҆́бѡ ѡ҆брѣ́тше гдⷭ҇а волсвѝ, поклони́шасѧ є҆мꙋ̀ па́дше, сі́есть, не просты́мъ поклоне́нїемъ, но бг҃ꙋ до́лжнымъ, не ꙗ҆́кѡ чл҃вѣ́кꙋ то́кмѡ, но и҆ ꙗ҆́кѡ бг҃ꙋ поклони́шасѧ. И҆́бо ꙗ҆́коже ст҃ы́й і҆рине́й и҆ ле́въ па́па глаго́лютъ: волсвѝ ті́и, просвѣща́ющей и҆̀хъ та́йнѡ гдⷭ҇ней блгⷣти, ви́дѣвше ѻ҆троча̀, бг҃а є҆го̀ бы́ти позна́ша и҆ вѣ́роваша, и҆ тогѡ̀ ра́ди не то́чїю ꙗ҆́кѡ цр҃ю̀, но и҆ ꙗ҆́кѡ бг҃ꙋ є҆мꙋ̀ поклони́шасѧ поклоне́нїемъ бг҃ꙋ прили́чествꙋющимъ, чесѡ̀ ра́ди пи́шетсѧ: па́дше, и҆ ѿве́рзше сокрѡ́вища своѧ̀, принесо́ша є҆мꙋ̀ да́ры, и҆сполнѧ́юще повелѣ́ное: да не ꙗ҆ви́шасѧ (пред̾ гдⷭ҇емъ) то́щь. котѡ́рыѧ же дары̀; зла́то, и҆ лїва́нъ, и҆ смѵ́рнꙋ. Зла́то ꙗ҆́кѡ цр҃ю̀, лїва́нъ ꙗ҆́кѡ бг҃ꙋ, смѵ́рнꙋ ꙗ҆́кѡ чл҃кꙋ сме́ртнꙋ, смѵ́рною бо жи́дове пома́зовахꙋ тѣ́ло ѹ҆ме́ршагѡ, жела́юще, да цѣ́ло бꙋ́детъ. Та́кѡ трѝ ца́рїе тре́ми є҆ди́наго ѿ трⷪ҇цы почто́ша дара́ми, и҆ тѣ́ми два́ въ не́мъ є҆стєства̀ из̾ѧви́ша, си́це ѡ҆ то́мъ глаго́летъ ле́въ ст҃ы́й: лїва́нъ бг҃ꙋ, смѵ́рнꙋ чл҃кꙋ, зла́то прино́сѧтъ цр҃ю̀, разꙋ́мнѣ бж҃їе и҆ чл҃вѣ́ческое є҆стество̀ въ є҆ди́нствѣ почита́юще, є҆́же срⷣцы вѣ́рꙋютъ, дара́ми и҆сповѣ́дꙋютъ.

И҆ вѣ́сть прїе́мше во снѣ̀ ѿ а҆́гг҃ла ꙗ҆́вльшагѡсѧ и҆̀мъ, не возврати́тисѧ ко и҆́рѡдꙋ ѕла̑ѧ мы́слѧщемꙋ и҆ ѹ҆би́ти новорожде́ннаго цр҃ѧ̀ поꙋча́ющемꙋсѧ, и҆́нымъ пꙋте́мъ ѿидо́ша кі́йждо и҆́хъ во странꙋ̀ свою̀. и҆ та́мѡ ѹ҆чи́тели и҆ проповѣ́дницы хрⷭ҇то́вы бы́ша по достовѣ́рномꙋ повѣствова́нїю нїки́форовꙋ. Проповѣ́дающе бо прише́ствїе въ мі́ръ хрⷭ҇та̀ си҃а бж҃їѧ ѹ҆ча́хꙋ люде́й вѣ́ровати въ него̀, ꙗ҆́коже и҆ са́ми вѣ́роваша. и҆ несꙋмнѣ́нно є҆́сть, ꙗ҆́кѡ въ ли́цѣ ст҃ы́хъ по ѹ҆ме́ртвїи причте́ни бы́ти сподо́бишасѧ. и҆мена̀ же и҆́хъ сꙋ́ть сїѧ̑: пе́рвый мелхїѡ́ръ, ста́ръ и҆ сѣ́дъ, власы̀ главні́и и҆ брадꙋ̀ и҆мы́й до́лгꙋ, то́й принесѐ зла́то цр҃ю̀ и҆ влⷣцѣ. вторы́й га́спарь, мла́дъ и҆ без̾ брады̀, лице́мъ червле́нъ, то́й принесѐ лїва́нъ бг҃ꙋ вочл҃вѣ́чшꙋсѧ. тре́тїй валтаса́ръ, смꙋ́глъ лице́мъ весьма̀, брада́тъ, се́й смѵ́рнꙋ принесѐ си҃ꙋ чл҃вѣ́ческомꙋ сме́ртномꙋ: тѣлеса̀ и҆́хъ по мно́гихъ лѣ́тѣхъ пренесе́на бы́ша пе́рвѣе въ кѡнстантїнопо́ль, та́же въ медїола́нъ, по то́мъ въ коло́нїю, въ че́сть хрⷭ҇тꙋ̀ бг҃ꙋ воплоще́нномꙋ, є҆мꙋ́же съ ро́ждшею є҆го́ ѿ на́съ бꙋ́ди сла́ва, во вѣ́ки. А҆ми́нь.

Конда́къ пра́здника, гла́съ ѕ҃:

И҆же пре́жде денни́цы ѿ ѻ҆ц҃а̀ безъ мт҃ре роди́выйсѧ, ꙳ на землѝ безъ ѻ҆тца̀ воплоти́сѧ дне́сь и҆зъ тебє̀. ꙳ тѣ́мже ѕвѣзда̀ бл҃говѣствꙋ́етъ волхвѡ́мъ, ꙳ а҆́гг҃ли же съ па́стырьми пою́тъ ꙳ несказа́нное ржⷭ҇тво̀ твоѐ, бл҃года́тнаѧ.