Дыууæ халоны (Хетæгкаты)

by Хетæгкаты Къоста

Дыууæ халоны  (1911)  by Хетæгкаты Къоста

Фыст датæ: 1899, Рауагъ аз: 1911. Равзæрæн: Хетæгкаты Къоста. Ирон фæндыр : зæрдæйы сагъæстæ, зарджытæ, кадджытæ æмæ æмбисæндтæ. – Дзæуджыхъæу : Ир, 2012.

ДЫУУÆ ХАЛОНЫ

Халон халонмæ тæхы,
Халон халонæн зæгъы:
Халон! Цæй–ма, ныр цы хæрæм?
Сихорæн амал цы скæнæм?

Дзуры йæм фæстæмæ халон:
Сихор нын цæттæ у абон, –
Терчы былыл нын, хъæугæрон,
Ауыгъдæй лæууы мæхъæлон...

---