Колхозонь эряф/1940/01-2/Долгань чуда
| ←Венч | Колхозонь эряф (1940), № 1—2 Январь—Февраль edited by Чумаков И. Ф. Долгань чуда |
Оцязоронь цёрась—богатырь→ |
| Колхозонь эряф. Эрь ковонь литературно-художественнай и общественно-политическяй журнал. Мордовскяй писателень союзть органоц. — № 1—2 Январь—Февраль 1940. — с. 104—106 |
| ФОЛЬКЛОР |
| Долгань чуда |
Кулось купецть рьвац. Куломстонза сон мярьгсь купецти: „Кинди платьяне ладяйхть, сянь сявк рьвакс“.
Куломдонза меле купецсь кармась рьвянь вешендема, но исть ладе аванц платьянза киндинге.
Ся пинкти кассь ни сонцень стирец. Весть стирсь щазень тярянц платьянзон и тейнза синь ладясть. Аляц кармась сонь рьвакс корхнемонза.
И стирьсь мярьгсь:
— Рамак ина тейне цебярь щапт.
Стирсь мезе мярьги, сянь аляц и рамай, и наряжазе стирть пяк цебярь щамса.
— Ну, нинге рамак долгань щам.
Аляц сянге рамазе.
Весть стирсь корхтай:
— Служафтт попть кядьста ранняй обедня и поздняй обедня, а сяльде и венцятама.
Купецсь тусь обеднянь служафтома. А стирец ся пингть ворьгодсь. Веть ласьки, а шить кяши. Ласьксь сон мзярс и кяшсь шуфтонянь алу.
Угадявсь оцязоронь цёрась денщиконц мархта и няезе стирть, но ашезь шарьхкоде, мезе тоса. Кучезе денщикть ваномонза, мезе тоса. Денщиксь тусь ванома, кодама чуда шуфтонять ала.
— Мон долгань чудан, — корхтай стирсь.
Сась денщиксь оцязоронь цёрати и корхтай:
— Стане-стане, мярьгсь мон долгань чудан.
— Архт кантк тяза.
Кандозе, сявозь куду и путозь башка комнатас.
Фкя времать оцязоронь цёрати савсь молемс сиделкас. Кармась кухняса штама сапоньца, а чудась кармась кизефнемонза: „Цёра, а цёра, коза тон ёрат молемс?“
— Ах, тон, долгань чуда, месть тон дразнят эсон?
И кармась стирть эса сапоньца пикссема. Тяда меле сон щась-карясь и тусь кштима.
А долгань чудась каязень долгань нарядонзон и щась шелковайхть, тердсь слуга и тусь сонга тоза.
Оцязоронь цёрась сембе стирьхнень ванозень, но тя стирть кодяма фкявок аш. Оцязоронь цёрась кизефнесы стирть:
— Кодама губернянь?
[ 105 ]Стирсь и отвечай:
— Стама губернянь, коса сапоньца тюрихть.
Кармась валдашкоткшнема ушесь. Синь прощандасть и тусть. Цёрась каретав озась и тусь ардозь, стирське мельганза тусь.
Сась омбоце илядсь. Кармась оцязоронь цёрась наряжама. Самай щай цюлканзон, а долгань чудась мольсь ваксозонза кирендезь и корхтай:
— Цёра, а цёра, коза молят?
Цёрась фатязё цюлканц и кармась цюлкаса пикссемонза.
— Ах, долгань чуда, фалу шорьсят тейне.
И стирсь долгань одежанц мархта аердсь сяка вастонцты.
Оцязоронь цёрась наряжась-тись и тусь.
А долгань чудась каязень долгань нарядонзон и наряжась шелковайса. Тердезе слугать и сонга тусь. Сувась ся куду, оцязоронь цёрась учи ни эсонза. Фатязе сонь и кармасть корхнема. Оцязоронь цёрась тага кизефнесы:
— Мес мон ашень шарьхкодь, кодама губернянь тон?
Стирсь отвечась каршезонза:
— Стама губернянь, коса цюлкаса тюрендихть.
Цёрась тага изь шарьхкодь.
Варьхмодсь. Оцязоронь цёрась сась куду, стирське мольсь мельганза. Каязень шелковай платьянзон и щазень долганнетнень.
Сась колмоце илядсь. Шоподсь. Оцязоронь цёрась сувась кухняв. Цюлканзон щазень и кармась кямонзон щама. А ся пингоня долгань чудась шаштсь малазонза и кизефнесы:
— Цёра, а цёра, коза молят?
— Ах, долгань чуда, эрь шиня шорьсят тейне!
И кармась кямоса пикссемонза. Тоса цёрась тусь беседкав. А долгань чудась наряжась шёлковай платьяса, и нарошна ашезь моль ламос. Оцязоронь цёрась тоскавай. Долгань чудась вдрук эвондась, и сон фатязе кядьта, и синь кармасть кштима и корхнема.
Кармась варьхмодема. Цёрась кизефнесы стирть:
— Мес поваднайста аф азондсак, костоннят тон?
Стирсь сидеста кармась отвечама:
— Стама-стама губернянь, коса кямоса тюрендихть.
Оцязоронь цёрась тага ашезь шарьхкодь.
Стирьсь и мярьги:
— А тяни прощай, оду минь аф няйхтяма.
Синь полафтсть именной сурксса. Цёрась кизефнесы:
— А тяни кода няйхтяма?
— Мон колма илядьта меле пялот саян.
Долгань чудась сась, кайсезень шелковай платьянзон и щазе долгань щамонц.
Вов ётни ни кафта шит, цёрась коль учи эсонза. Сась колмоце шиське, а стирсь аф эвондакшни...
Оцязоронь цёрась тоскавась, што урмаськодсь и мярьгсь [ 106 ]поварти пидемс цебярь ямня. Поварсь пидесь цебярь ямня, каясь шаваняс тейнза и тусь вайнкса. А долгань чудась ся пингть каязе цёрать именной сурксонц ямти. Кармась цёрась ямда ярхцама, ваны — именной сурксоц. Тердезе поварть.
— Киель кудса.
Поварсь атказась, кивок, корхтай, ашель кудса. Эста цёрась шарьхкодсь, што ся мази стирсь — долгань чудась. Сон и думандай: „Сон вдь первай илять корхтась стама губернястан, коса тюрендихть сапоньца. Омбоцеда корхтась стама губернянь, коса тюрендихть цюлкаса. А колмоцеда мярьгсь стама губернянь, коса тюрендихть кямоса“.
Тердезе долгань чудать.
— Азонтк, долгань чуда, тя тон тяфта работат?
Тя пеедезевсь каршезонза и тусь эсь комнатазонза. Тоса сон наряжась шелковай нарядса, нльне комнатаське валдомсь.
Цёрась сявозе урьвакс периннай чудать, и тисть синь свадьба.
| Сёрматф Адаш велеса, Инсарскяй р-ца. Сявф Мордо- виянь научно-исследовательскяй институтть материа- лонзон эзда. |