Дзодзӧгъяс (Лыткин Георгий Степанович)

by Лыткин Георгий Степанович

Оліс пӧрысь морт гӧтырыскӧд; налӧн вӧлі ныв дзоля пикӧд. Пӧрысьяс мӧдӧдчӧны карӧ, нылыслы тшӧктӧны: «Ми мунам, нылӧй, карӧ; ваям тэныд шобді нянь, ньӧбам чышъян; тэ нӧ вежӧра ло, воктӧ видз, ывла вылӧ эн пет». Пӧрысьяс мунісны; ныв пуксьӧдіс воксӧ эж вылӧ, ӧшинь улӧ, ачыс нӧ котӧртіс ывла вылӧ, сэтӧн ворсӧдчис. Воисны дзодзӧгъяс, дзоля пиӧс лэптісны, бордъяс вылас лэбзьӧдісны.

Ныв котӧртіг воис, видзӧдӧ — вокыс абу! Чӧвтчысис сэтчӧ-татчӧ — абу! Ныв чуксаліс-чуксаліс воксӧ, оз чукӧстчы. Котӧртіс паськыд эрд вылӧ: ылын чӧвтчысис дзодзӧг чукӧр, пемыд вӧр сайын вошис. «Дерт, дзодзӧгъяс нуисны вокӧс!» — нывлы юр садь вылас усис, сэсся пондіс дзодзӧгъясӧс вӧтӧдны.

Ныв котӧртіс-котӧртіс, аддзӧ — пач сулалӧ. «Пачӧй, пачӧй! Висьтав, кытчӧ дзодзӧгъяс лэбзьыштісны?» — «Сёй менсьым рудзӧг нянь, висьтала». — Ныл нӧ шуӧ: «Менам ай ордын шобді нянь оз нин сёйсьы!» — сэсся котӧртіс ылӧ.

Ныв котӧртӧ ылӧ, аддзӧ — яблоня сулалӧ. «Яблоня, яблоня! Кытчӧ дзодзӧгъяс лэбзьыштісны?» — «Менсьым вӧрса яблӧг сёйышт, сэк висьтала». — «Менам ай ордын йӧрсаяс оз нин сёйсьыны!» — ныв шуис, ылӧ котӧртіс.

Котӧртӧ ныв, аддзӧ: «Киссьӧ йӧла шор — шом кӧра ляз дора! «Висьтав, кытчӧ дзодзӧгъяс лэбзьыштісны?» — «Менсьым ляз йӧлӧн сёйышт, сэк висьтала!» — «Менам ай ордын кень оз нин сёйсьы!» Сэк ныв котӧртіс ылӧ.

Дыр эськӧ нывлы лоис котравны, сӧмын сылы паныд сюрис чушкысь. Ныв кӧсйӧ вӧлі чужйыштны сійӧс, сӧмын поліс бытшкысьны, юалӧ: «Чушкысьӧй, чушкысьӧй, кытчӧ дзодзӧгъяс лэбзьыштісны?» Чушкысь нывлы туй петкӧдліс. Ныв котӧртіс тув вывті, аддзӧ — сулалӧ керка чипан кокъяс вылын, сулалӧ-бергалӧ; керкаын пукалӧ лы кока, сёй ныр-вома ёма энь; сэтӧн вокыс пукалӧ джек вылын, ӧшинь дорын, ворсӧ зарни яблӧгъясӧн. Ныв ньӧжйӧникӧн сибӧдчис ӧшинь дорӧ, воксӧ шамыртіс, гортас пышйис; ёма энь нӧ чукӧстіс дзодзӧгъясӧс, налы тшӧктіс вӧтӧдны нылӧс.

Ныв котӧртӧ, дзодзӧгъяс нӧ сійӧс вӧтӧдӧны. Кытчӧ дзебсьыны? Ныв котӧртіс, воис ляз кыркӧтша йӧла шор дорӧ. «Шорӧй, мусаӧй, дзеб менӧ». — «Менсьым ляз йӧвкӧд сёйыштан-ӧ?» Ныв паньыштіс юмовсӧ йӧлыскӧд; сэк шор дзебис нылӧс джуджыд кыркӧтш улас, дзодзӧгъяс нӧ вывті лэбзьыштісны.

Кыркӧтш увсянь ныв петӧ, ылӧджык котӧртӧ, дзодзӧгъяс нӧ сійӧс аддзисны, бара вӧтӧдны пондісны. Мый нывлы керны? Воис сійӧ яблоня дорӧ: «Яблоня, мусаӧй, дзеб менӧ!» «Менсьым вӧрса яблӧг сёян кӧ, дзеба». Нывлы абу мый керны, вӧрса яблӧг сёйыштіс. Яблоня увъяснас нылӧс саймӧдіс: дзодзӧгъяс вывті лэбзьыштісны.

Яблоня увсянь ныв петіс, пондіс котӧртны гортас. Котӧртӧ, дзодзӧгъяс нӧ бара аддзисны сійӧс, вӧтӧдчисны бара сы бӧрсянь! Сійӧс суӧдӧны, бордъяснас ӧвтӧны юр вылын. Медбӧръя вын пырсьыс ныв котӧртіс пач дорӧдз: «Пачӧй, эньӧй, дзеб менӧ!» — «Менсьым рудзӧг нянь сёйыштан кӧ, дзеба». Ныв ӧдйӧджык сёйыштіс рудзӧг нянь, сэсся пырис пач пытшкӧ: дзодзӧгъяс вывті лэбзьыштісны.

Пач пытшкысь ныв петіс, быд лов пырсьыс лэччис мунны гортӧ. Дзодзӧгъяс сійӧс бара аддзисны, сы бӧрсянь бара вӧтӧдчисны. Со, со лэбзьӧдчӧны, чужӧм банас бордъясӧн вартӧны: видзӧд, мый киысь воксӧ мырддясны, сӧмын керкаыс абу нин ылын. Ныв пырис керкаӧ, ӧдзӧс бырскӧба игналіс, ӧшинь пӧдлаліс. Керка вывті дзодзӧгъяс лэбалісны-кытшлалісны, готсалісны, сэсся абуӧн лэбзьыштісны ёма энь ордӧ.

Пӧрысь ай гӧтырыскӧд гортӧ воисны, аддзӧны — дзоля пи гортын, дзоньвидза; нылыслы шобді нянь, чышъян сетісны.