Дезертирлэн вӧтамез (Батуев)

From Wikisource
Jump to navigation Jump to search
Дезертирлэн вӧтамез
Автор: Павел Алексеевич Батуев
Поттэмын: Батуев П. Дезертирлэн вӧтамез. — Сарапул: Изд. Вот. Комиссариата, 1920. — 8 б. Источник: Марксистский П. А. Дезертирлэн вӧтамез // Удмурт литература: хрестоматия средней школалы / М. А. Лямин. — Ижевск: УДГИЗ, 1935. — 20-22-тӥ бамъёс.• Текст туала орфографилы лэсятэмын.
Дезертирлэн вӧтамез
Шудӥсь муртъёс:
  • Иван — Горд армиысь пегӟемын, 25 арес.
  • Марья — солэн кышноез, 25 арес.
  • Капитан — тӧдьы офицер.
  • Поручик — сыӵе ик.


Марья. (Кырӟаса, пинал веттаса, удмурт коркан пуке). Изь, пие, изь. Изид ке, бадӟым будод! Тани кема ик уз ул ни, атаед но вуоз ини. Война но быре ини. Батыр луыса вуоз, калык но ӟеч кылын буре ваёз, асьмелы но умой луоз. (Ӧсэ йыгало). Кин со уйин ветлэ на?

Иван. (Ӧс сьӧрын). Усьты, Марья!

Марья. Кин тон?.. Мар кулэ?

Иван. Я, усьты, уд тодмаськы-а, мар-а? Мон Иван ук, тынад кузпалыд. Усьты!

Марья. Ост-э!. Кытысь тон вуид, кызьы вуид? (Мыныса ӧссэ усьтэ. Иван пыре, бамыз кузь поп дӥсен бинялтэмын). Кызьы вуид?.. Кытысь вуид? (Ӧжыт вераськытэк улэ). Кытысь вуид, кызьы вуид?

Иван. Я, собере вераськом, юртты мыным кылиськыны, саесме кыскы али! (Марья, дӥсьсэ кыльыса, ӵоге оше). Табере сиён вай, туж сиеме потэ. Сютэм кион кадь луи ини мон.

Марья. Кызьы тон?! Оло ож дугдыса бертӥд-а? Весяклы бертӥд-а ини?

Иван. Я, берло… Сиён вай шуи уга ини мон тыныд! (Марья педло мынэ сиён дуре). Кыӵе ке но жади ук, бодыен тышкам кадь. Фу-у!

Марья. (Педлось пыре, кияз тусьты). Ма, отын оло чик уг сюдо-а тӥледыз?

Иван. Сюдо ке но сием потӥз на лэся. Мон кык нунал ӵоже чик сиськытэк бертӥ ук.

Марья. Малы, кызьы?

Иван. Гуртэ но дыртӥ, собере калыкын курыны но кепрес. (Визьтэм сямен кутске сиськыны). Табере кӧт тырытозь сисько ини.

Марья. Я, табере вера ини — кызьы бертӥд?

Иван. (Ым тыраз сиён пыртӥ турттэ вераны). Фронтысь бертӥ.

Марья. Кызьы лэзизы — весяклы-а, адӟиськыны гинэ-а?

Иван. Мон лэземзэс витё-а! Бертӥ но ужез быриз.

Марья. Ма, пегӟыса оло бертӥд тон?

Иван. Кычке но, пегӟи.

Марья. Озьы ке, тон беглой, тон пегась, тон вузад милемыз!

Иван. Озьы эн вераськы. Мынам но йыры жаль ӧвӧл-а? Мынам йыры кык ӧвӧл — одӥг гинэ. Мон огнам ӧй пегӟы, эшъёсыным.

Марья. Эк-ке кек!.. Малы, кызьы отысь пегӟид? Оло сиён-а ичи сёто?

Иван. Ӧвӧл, сиён но тырме…

Марья. Малы, бен, собере пегӟид? Оло начальникъёсты умой ӧвӧл, умоен уг вазисько шат?

Иван. Начальникъёс но туж умоесь. Йыр жаль но… Тонэныд гинэ адӟиськыны бертӥ, тон жальпотэмен. Собере отын ыбылӥсько, со быдтэ. Ӧй ке ыбылӥськысалзы, отын улыны туж умой.

Марья. Э-э!.. Ма тон кыӵе маке вылэмед! Астэ гинэ ватӥсь маке. Милемыз утись шуы на тонэ?!.. Тон мыным кузпал ӧвӧл. Озьы ке тон беглой, милемыз вузад.

Иван. Эн вераськы мон азьын сыӵе кылыныд! Таӵедэ ке тодысал, ӧй бертысал, тонэ ӧй жалясал.

Марья. Монэ ке жалясал, тон ӧй бертысал. Тани тон пегӟемын, мукетыз пегӟоз. Ачид ик вераськод, трос кузя пегӟим шуыса. Соин ик война но кемалы кыстӥське, кусыпты но шероме. Соин ик ужды но азьлань уг мыны. Тон ке ӧй пегӟысал, мукетыз но ӧй пегӟысал. Война но кемалась бырысал ини, та дырозь ӧй луысал. Учкы али, кыӵе верасько пегӟись муртъёс сярысь. Соос милемыз вузазы, воштӥзы шуо, соосыз ваньзэс ыбылоно шуо… Тон пегаса ветлӥськод. Тӧдьыос вуизы ке, мар карозы асьмеды татчы? Эк, изменник, шкурник!

Иван. Дугды! Кытысь кыл но шедьтэ?! Азям озьы эн вераськы! Мыныса тылэз пичиятоно. Ульчаетӥ ветлӥсьёс медаз адӟе. Адӟизы ке, кутозы. (Пичиятэ тылзэ). Я, валиськы ай мыным, изем потэ, изёно. Арня ӵоже изьытэк но ветлӥсько ини. (Вушйылэ. Марья валиське, Иван изьыны выдэ. Ӧжыт улыса, соргетыны ик кутске).

Марья. Тани кыӵе милям утялтӥсьмы. Мон кожасько, герой луыса вуоз. Героймы ог пала герой луэм, пеганы! Тушмонлэсь возьмась шу сое!

(Пыро кык кудӟем офицеръёс, киязы быдэн бутылка).

Капитан. Я, кунокуа но шедиз лэся. Кин, бен, татын улэ?

Поручик. Шедиз, шедиз, господин капитан. Мынам сямен та кунокуа асьмелы ӧвӧл, та начар.

Капитан. Эй, яралоз та но! Тани татын деньщик но вань. Учкы али, чебер кышномурт но вань. (Иван доры кариське). Эй, султы, кызьы тынад нимыд? Султы! (Шашкаен шукке). Султы, шуисько уга. (Иван султэ но, мазэ валатэк, кирос карыса, аминь-аминь шуыса сялаське). Тон сяласькиськод нош на ми шоры? Султы шонер! (Бамаз чапке). Уд адӟиськы-а ма кин? (Иван дыр куалекъяса сылэ). Ме, усьты тае, вай милемлы стакан. (Иван усьтэ но стакан сётэ. Соосыз юо, серекъяло). Поручик! мон тынысьтыд таӵе чалмыт улэмдэ уг яратӥськы. Мӧзмыт татын, шулдырез ик ӧвӧл.

Поручик. Иван! Я мын али гуртэ, вай татчы чебер нылъёсыз но салдаткаосыз!

Капитан. Тани татын но вань чебер маке. Кос сое лыктыны, мед кырӟалоз.

Поручик. Эй, кызьы тынад нимыд? Лык татӥе, шулдырты ӧжыт, капитанэз шумпотыты кырӟаса.

Марья. Мон дорады уг мыны, аслам кузпалы вань, тӥтэк но.

Поручик. Иван!.. Уть кыӵе со вераське. Ӧз ке кылзӥськы, ыб сое, ме! (Сётэ револьвер).

Иван. (Револьвер кутыса, палэнэ учке). Марья! Кылзӥськы, номыре уз луы со понна…

Поручик. Я, куинь шутозям ӧд ке ыб, астэ ыбо. Одӥг… (Револьверен мерта Иванлэн йыраз).

Иван. Марья, кылзӥськы… э-э… (Револьверзэ ӝутэ но суйыз уг вормы, берен уллань усе).

Поручик. Кык!… (Иван сылэ куаретытэк). Куинь! Я, ыб! (Иван, палэнэ учкыса, ыбе. Марья ӟус вылэ погра).

Иван. Эк, мар ужай! (Револьверзэ уськытыса, йырзэ мыкыртыса, бамзэ киыныз шобыртэ).

Капитан. (Нырулыса пукись маке ыбем куараен сазьяське но йырзэ ӝутыса серекъя). Ха-ха-ха-ха! Та большевик выжыосты ваньзэс ыбылыса быдтоно. Собере умой луоз.

Поручик. Озьы со озьы, господин капитан. Соосты ӧд ке ыбылы, соос султозы но нош восстанья лэсьтозы. Асьмелы эрик уз луы ни тазьы сиыса-юыса ветлыны, чебер коркан небыт валес вылын изьыны. Ваньзэс быдтоно. Иван, кин со зыбкаяд? Ыб сое!

Иван. Ой, мон мар ужай!… Кышноме ыби, пиме но косо на ыбыны. Уг!.. Уг ыб ни, мед ыбозы асме но. (Усе ӟус дуре пыдес йылаз, куараен бӧрдыны кутске).

Поручик. (Зыбкаысь пиналэз ыбе). Тани кызьы кулэ соосты.

Капитан. (Серекъя, пиньёсыз куртчемын). Озьы кулэ! Я табере мыном гурт кузя. Соосты ыбылыса быдтоно. (Бутылкаоссэс кутыса ӟыгырскыса кошко).

Марья. (Иванлэсь бӧрдэм куаразэ кылыса дораз мынэ но сайкатэ). Иван… мар луиз? Иван, султы, сазьяськы!

Иван. (Султэ). Ма таӵе-э?!.. Ма луиз монэным. Вӧтаськем-а, мар-а? А-а!.. мон вӧтай… Мон кожасько вал, кышноме быдтӥ… Вӧтаськем озьы… Та вӧтэ синме усьтӥз. (Сцена сьӧрын кырӟало «Интернационал»). Марья! Мар-о со? Мар-о, «Интернационал» кырӟало? (Учке укноетӥ).

Марья. Со комсомолецъёс. Фронтэ мыно, ас мылкыдынызы.

Иван. Юлтошъёс! Эн кельтэ монэ! Мон но тӥ сьӧры мынӥсько. Мон та дырозь кожасько вал, малы мон фронтын йырме быдтом шуыса. Али мон вӧтай. Та вӧтэ мынэсьтым синме усьтӥз. Табере мон тодӥ — малы фронтэ мыноно. Табере уг ни кышкаськы, йыры ке но быриз… Я, Марья, ӟеч лу, пидэ ӟеч утялты, бадӟым будэты. (Марьяез чупаса, кошке кырӟаса). Вир кисьтонэз быдтом. Та луоз ожлэн пумыз. Интернационалэн вичак калык султоз.

Flag of the United States.svg Public domain
This work is in the public domain in the United States because it was first published outside the United States prior to January 1, 1927. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1951 or earlier (more than 70 years ago).[1]

This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1927 works copyrighted at home.

PD-US-1923-abroad Public domain in the United States but not in its source countries //wikisource.org/wiki/%D0%94%D0%B5%D0%B7%D0%B5%D1%80%D1%82%D0%B8%D1%80%D0%BB%D1%8D%D0%BD_%D0%B2%D3%A7%D1%82%D0%B0%D0%BC%D0%B5%D0%B7_(%D0%91%D0%B0%D1%82%D1%83%D0%B5%D0%B2)