Гӧстькӧд
| Гӧстькӧд (1951) by |
| Йӧзӧдан во: 1951. Ӧшмӧс: И. А. Куратов. Бӧрйӧм гижӧдъяс. Сыктывкар: Коми Госиздат, 1951. |
Лок жӧ, лок, бур гӧсьт!
Видлы менсьым керка-карта.
Со тэд сур доз, вина парта,
Чериняньӧй пӧсь…
Лок жӧ, лок, бур гӧсьт!
Пуксьылам кык вок.
Медводз ачым видла-юа,
Пувваӧн ог юктӧд, шуа…
Мыччылі туй, лок…
Пуксьылам кык вок!
Нуръясь, ю, бур морт!
Яран моз ми огӧ юӧ;
Коми пыр нин юрсӧ нуӧ,
Тӧдӧ удж и горт…
Нуръясь, ю, бур морт!
Лючки сёрнитам;
Сэсся бара юам. Сідз-ӧ?
Кыдз нин Катьӧтӧ ен видзӧ?
Шедысьджык нин, рам?..
Лючки сёрнитам!
Кӧсйи коравны,
Да тэ панйин вайны сійӧс,
Ӧні ныв вылад нин пиӧс
Колӧ гӧтравны.
Кӧсъя коравны!
Кисьты чукйӧн, вок!
Миян томлун кольӧм ылӧ;
Гӧтыръяс нин этша, кылӧ,
Пиньтӧммӧмны… ок!
Кисьты чукйӧн, вок!
Мыйкӧ шогасьлім!
Том дырйиныс менам Анӧ,
Тэнад Катьӧ… Шондібанӧй!
Мыйкӧ гоньявлім,
Мыйкӧ шогасьлім!
Муніс миян нэм!
Мед ас пайсӧ мукӧд олас!
Олас мед да лёкысь полас!
Вокӧ, сійӧ-й эм!
Муніс миян нэм!
Енмыс мед оз вун!
Гӧртӧгыс мед оз коль мусӧ,
Юысьлысь мед оз босьт русӧ,
Шышӧн мед оз мун…
Енмыс мед оз вун!
Квайт лун удж, бур гӧсьт!
Сизимӧдас этша юам,
«Быд йӧз лоасны мед, — шуам, —
Бурӧсь, авъяӧсь!»
Юыштам, бур гӧсьт!
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
The author died in 1875, so this work is also in the public domain in other countries and areas where the copyright term is the author's life plus 148 years or less (if applicable), or the copyright term is 72 years or less since publication for posthumous works (if applicable).
Public domainPublic domainfalsefalse