Гӧрдармеечӧс дзебӧм-колльӧдӧм
| Гӧрдармеечӧс дзебӧм-колльӧдӧм (1925) |
| Гижан кад: 1925, Йӧзӧдан во: 1925. Ӧшмӧс: Югыд туй (1925-06-04) |
Май 21-ӧд лунӧ ми, гӧрдармеечьяс, Луга карын дзебим ассьыным ёртӧс Кутькин Иван Иванӧс. Сійӧ служитліс артиллерия дивизионын 2-ӧд батареяын. Лоӧ ачыс Пезмӧгысь, Кулӧмдін уездысь.
Кутькин ёрт кулі полкса лазаретын. Мыйӧн кывлісны сылысь кулӧмсӧ полкын, ставныс жугыльмылісны. Батареяыс, кӧні вӧлі служитӧ Кутькин ёрт, лӧсьӧдчыны кутіс дзебны ассьыс ёртсӧ. Эз тай ков семья ни, рӧдня ни. Гӧрдармеечьяс вӧліны рӧднясьыс-рӧдняяс.
Зэв бур вокӧс моз ми сійӧс колльӧдім-дзебим. Гортсӧ гӧгӧрыс тӧбим чветъясӧн да лентаясӧн. Куим пара вӧв нуисны гортсӧ лафет вылын (оруддьӧ новлӧдлан станок кӧлесаяс вылын). Колльӧдісны Кутькин ёртӧс став армеечыс батареяысь. Волісны тшӧтш полк вылын командуйтысьяс.
Гу бердын юралысьяс висьтавлісны Кутькин ёртлысь бура олӧмсӧ, служитӧмсӧ. Быд морт висьталӧм бӧрти оруддьӧяс паськӧдісны ылӧдз нор юӧр Кутькин ёрт кулӧм йылысь. Музыка медбӧръяысь нора ворсіс дзебигӧн-колльӧдігӧн ворсан марш.
Ми ставным шуам: кӧть и Кутькин ёрт эз кув ас гортас, ас рӧдвуж дінас, кулі ас муын, ас семья пытшкын. Ми ставнымӧн гу вылас шуим нуны бура Кутькин ёртлысь уджсӧ, ӧтмоза Кутькин ёрт моз кутны чорыда ассьыным гӧрдармееч ним.
Коми гӧрдармеечьяс.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 98 years or less since publication.
Public domainPublic domainfalsefalse