Гырын пото мон ӵукна ик
Мусо ана люкетме,
Гырыса быдтэм берам ик
Кизё чылкыт кидысме.
Собереяз сынам кадь ик
Чебер гинэ усъяло.
Соку мынам йырйылъёсам
Турагай шулдыр чырдоз
Соку мынам усы берам
Шаплы шырчик четчалоз.
Кинлэн медам соку сюлмыз
Мынам кадь ик шумпотоз?..
Ӝужам узьым валэс юэз
Шуныт шунды шунтылоз,
Турынэз но, сяськаез но
Кадырласа будэтоз.
Ӟеч зоръёс но, ӟеч тӧлъёс но
Солы сюлмысь юрттӥськоз…
Турын вуоз, ю кисьмалоз,
Аран, турнан мон пото.
Шумпотыса мон турнало,
Зӧк кабанъёс пуктыло.
Зарни порма ю йыръёсыз
Культоосы люкало.
Культоосы люкало но,
Ас иншырам нулдыло.
Отын мынам шудэ-буре
Кабан луса адӟиськоз,
Кабан луса адӟиськоз но
Нылы-пие шумпотоз.