Герман вооружённой кужымъёслэн кыл вератэк сётскемзы сярысь акт
| Герман вооружённой кужымъёслэн кыл вератэк сётскемзы сярысь акт |
Герман вооружённой кужымъёслэн кыл вератэк сётскемзы сярысь акт гожтон
1. Ми, улӥын гожтӥськемъёс, Герман Вылӥ Командованилэн нимыныз действовать карыса, соглаш луиськомы музъем вылысь, зарезь вылысь но омырысь вань вооружённой кужымъёсмылэн, нош озьы ик та дыръя немец командованилэн кивалтэмез улсын луись вань кужымъёсмылэн кыл вератэк сётсконзылы Горд Армилэн Вылӥ Главнокомандованиезлы но со дыре ик Союзникъёслэн экспедиционной кужымъёссылэн Вылӥ Командованизылы.
2. Герман Вылӥ Командование сухопутной, зарезь но омыр кужымъёслэн вань немец командующойёслы но герман командованилэн кивалтэмез улсын луись вань кужымъёслы чик ӝегатскытэк приказъёс сётоз шор европа дырын 23:01 часын 8-тӥ мае 1945-тӥ арын ожмаськемысь дугдыны, со дыре улон интыязы ик кыльыны, быдэсак разоружиться кариськыны но вань оружизэс но ожгар ваньбурзэс сётыны интыысь союзной командующойёслы яке Союзной Вылӥ Командованилэн представительёсыныз висъям офицеръёслы, чик сӧрылытэк кельтылыны пароходъёсты, судноосты но самолётъёсты, соослэсь двигательёссэс, корпусъёссэс но оборудованизэс, нош озьы ик машинаосты, вооружениез, аппаратураез но ож нуон вань военно-технической средствоосты.
3. Герман Вылӥ Командование чик ӝегатскытэк висъялоз нимысьтыз командиръёсты но ужрадъёс кутоз Горд Армилэн Вылӥ Главнокомандованиеныз но Союзной экспедиционной кужымъёслэн Вылӥ Командованиенызы азьпалан поттӥськись вань приказъёсты быдэстон вылысь.
4. Та акт уз люкеты сое огазеяськем нациосын яке соослэн нимынызы Германилэн но герман вооружённой кужымъёслэн сётсконзы сярысь гожтэм мукет генеральной документэн воштон понна.
5. Немец Вылӥ Командование яке солэн кивалтэмез улсын луись кыӵе ке вооружённой кужымъёс сётскон сярысь та актэз ӧз ке быдэсъялэ, Горд Армилэн Вылӥ Командованиез, нош озьы ик Союзной экспедиционной кужымъёслэн Вылӥ Командованизы сыӵе чурыт ужрадъёс яке мукет действиос кутозы, кудъёссэ соос кулэен лыдъялозы.
6. Та акт гожтэмын ӟуч, англи но немец кылъёсын. Ӟуч но англи текстъёс гинэ зэмос луо.
Гожтэмын 8-тӥ мае 1945-тӥ арын Берлин карын.
Герман Вылӥ Командованилэн нимыныз:
Кейтель, Фриденбург, Штумпф
Гожтон дыръя вал:
| Горд Армилэн Вылӥ Главнокомандующойезлэн косэмезъя Советской Союзлэн Маршалэз |
Союзникъёслэн экспедиционной кужымъёссылэн Вылӥ Командующойзылэн косэмезъя Авиацияя Главной Маршал |
| Г. ЖУКОВ | ТЕДДЕР |
Актэз гожтон дыръя адӟисьёс интыын озьы ик вал:
| США-лэн стратегической омыр кужымъёсыныз командующой генерал |
Француз армилэн Главнокомандующоез генерал |
| СПААТС | ДЕЛАТР де ТАССИНЬИ |