Воскресения день
Пѣснь а̃[edit]
Воскресе́нїѧ де́нь, просвѣти́мсѧ лю́дїе: Па́сха, Госпо́днѧ Па́сха! Ѿ сме́рти бо къ жи́зни, и ѿ землѝ къ Небесѝ, Хрїсто́съ Бо́гъ насъ преведѐ, побѣ́днꙋю пою́щїѧ.
Пѣснь г̃[edit]
Прїиди́те, пи́во пїе̑мъ но́вое, не ѿ ка́мене непло́дна чꙋдодѣ́емое, но нетлѣ́нїѧ исто́чникъ, изъ гро́ба ѡдожди́вша Хрїста̀, въ Не́мже оутвержда́емсѧ.
Пѣснь д̃[edit]
На боже́ственней стра́жи, богоглаго́ливый Аввакꙋ́мъ да ста́нетъ съ на́ми, и пока́жетъ свѣтоно́сна а́ггела, ꙗ́снѡ глаго́люща: дне́сь спасе́нїе мíрꙋ, ꙗ́кѡ воскре́се Хрїсто́съ, ꙗ́кѡ всеси́ленъ.
Пѣснь е̃[edit]
ОУ́тренюемъ оу́треннюю глꙋбокꙋ̀, и вмѣ́сто мѵ́ра пѣ́снь принесе̑мъ Влады́цѣ, и Хрїста̀ оу́зримъ, Пра́вды Со́лнце, всѣ̑мъ жи́знь возсїѧ́юща.
Пѣснь ѕ̃[edit]
Снизше́лъ єсѝ въ преиспо̑днѧѧ землѝ и сокрꙋши́лъ єсѝ вереѝ вѣ́чныѧ, содержа́щїѧ свѧ́занныѧ, Хрїстѐ, и тридне́венъ, ꙗ́кѡ ѿ ки́та Іѡ́на, воскре́слъ єсѝ ѿ гро́ба.
Пѣснь з̃[edit]
О́троки ѿ пе́щи изба́вивый, бы́въ человѣ́къ, стра́ждетъ ꙗ́кѡ сме́ртенъ, и стра́стїю сме́ртное въ нетлѣ́нїѧ ѡблачи́тъ благолѣ́пїе, Єди́нъ благослове́нъ отце̑въ Бо́гъ, и препросла́вленъ.
Пѣснь и̃[edit]
Се́й нарече́нный и свѧты́й де́нь, єди́нъ сꙋббо́тъ ца́рь и госпо́дь, пра́здниковъ пра́здникъ, и торжество̀ є́сть торже́ствъ: въ о́ньже благослови́мъ Хрїста̀ во вѣ́ки.
Пѣснь ѳ̃[edit]
А́ггелъ вопїѧ́ше Благода́тнѣй: чи́стаѧ Дѣ́во, ра́дꙋйсѧ, и па́ки рекꙋ̀, ра́дꙋйсѧ: Тво́й Сы́нъ воскре́се тридне́венъ ѿ гро́ба, и ме́ртвыѧ воздви́гнꙋвый, лю́дїе, весели́тесѧ.
Свѣти́сѧ, свѣти́сѧ, но́вый Іерꙋсали́ме: сла́ва бо Госпо́днѧ на тебѣ̀ возсїѧ̀, ликꙋ́й ны́нѣ, и весели́сѧ, Сїо́не! Ты же, Чи́стаѧ, красꙋ́йсѧ, Богоро́дице, ѡ воста́нїи Рождества̀ Твоего̀.
Transliteration[edit]
Песнь 1[edit]
Воскресения день, просветимся людие: Пасха, Господня Пасха! От смерти бо к жизни, и от земли к Небеси, Христос Бог нас преведе, победную поющия.
Песнь 3[edit]
Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся.
Песнь 4[edit]
На божественней стражи, богоглаголивый Аввакум да станет с нами, и покажет светоносна ангела, ясно глаголюща: днесь спасение миру, яко воскресе Христос, яко всесилен.
Песнь 5[edit]
Утренюем утреннюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.
Песнь 6[edit]
Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от гроба.
Песнь 7[edit]
Отроки от пещи избавивый, быв человек, страждет яко смертен, и страстию смертное в нетления облачит благолепие, Един благословен отцев Бог, и препрославлен.
Песнь 8[edit]
Сей нареченный и святый день, един суббот царь и господь, праздников праздник, и торжество есть торжеств: в оньже благословим Христа во веки.
Песнь 9[edit]
Светися, светися, новый Иерусалиме: слава бо Господня на тебе возсия, ликуй ныне, и веселися, Сионе! Ты же, Чистая, красуйся, Богородице, о востании Рождества Твоего.