Вордскем музъеммы (Ашальчи Оки)

Вордскем музъеммы Автор: Ашальчи Оки

Поттэмын: 1919. Источник: Удморт кылбуръёс. Сборник вотских стихотворений на Глазовском наречии. — Вятка: Вятский губернский отдел народного образования, 1919. — С. 30.• Кылбурлэн текстэз туала орфографи нормая тупатэмын.

Вордскем музъеммы

Аслам музъеммы,
Вордскем интымы,
Туж мусо потӥськод,
Туж шулдыр адскиськод.

Паськыт лудъёсад
Кизем ю удалтэ;
Кизем ю кисьмакуз
Ву гыам кадь ветлэ.

Возь вылаз турынэз
Чиляса кадь улэ;
Чебересь сяськаез
Сюлэмез буйгатэ.

Нюлэсказ писпуэз
Кораса быдтонтэм;
Нюлэслэн шулдырез
Бертэмед потонтэм.

Со понна ик дуно
Вордскем музъеммы,
Со понна ик мусо
Вордскем интымы.

Калыке потыку
Гуртмылэсь мӧзмиськом,
Вордскем интымес
Туж буре ваиськом.

---