Визув кад
1.
Миян олӧм — асъя кадысь мича.
Миян олӧм —
Шонді вына чвет.
Асъя мелі шонділы моз видза
Талунлы,
Том кадлы
Пӧсь привет!
Ассьым томлун вежӧрын ме кыла,
Томлун вынӧн горакыла тан.
Мед жӧ кывбур тайӧ
Артмас мыла,
Югыд кодзув,
Томлун,
Шондібан!
2.
Ассьым шудлун вӧлись гӧгӧрвои,
Ӧні тӧда —
Кытчӧ кӧть ог мун,
Югӧр койӧ меным
Асъя войӧ
Менам шудлун —
Менам Сӧвет му.
Менам шудлунӧй эм менам томлун,
Кыпыд сьӧлӧм,
Киподтуя удж.
Миян востерлунӧн
Кузяла кӧть вомлӧс
Повтӧг
Войвыв саридз вывті вудж.
Чужан му тэ менам —
Синмӧн судзтӧм,
Тэнад вынлӧн артавлытӧм пом.
Пӧрысьмам ми... Мудзам...
Тэ пыр мудзтӧм...
Пыр тэ лунысь-лунӧ
Лоан том.
Кыдз не радейтӧмӧн миян овны,
Олӧмыс кӧ гажалунӧн тыр?
Сетам ассьыным ми
Тэныд томлун —
Том мед вӧлін,
Нэмыд кежлӧ пыр.
Менам шудлун —
Сійӧ гажа талун,
Кыпыд уджӧн лолалысь том йӧз.
Кылӧ
Водзӧ тувччан воськов налӧн
Быд удж шыын,
Гажын,
Олігчӧж.
Менам шудлун —
Сійӧ шуда аски.
Миян кузь туй
Джынвыйын оз ор.
Югыд кадын аддзысьлам на, гашкӧ,
Паныдасьлам,
Ичӧтдырся ёрт!
Розъявны
Став вӧльнӧй мувыв пасьта
Кутас енэж улын гажа сад...
Паныдасьлам!
Пышйӧм вояс казьтам...
Кыпыд томлун коллян
Визув кад!
3.
Визув кад!
Тэ вунны дыр он вермы.
Тӧда,
Коркӧ казьтылантор сюрас.
Сійӧн аслым пыр ме шуа:
Тэрмась!
Овны нэмтӧ
Тыр олӧмӧн бура.
Шуа аслым:
Олӧмысь ог дӧзмы.
Сійӧ выльысь-выль
Да помтӧм паськыд.
Мед нӧ став олӧмыс —
Йӧзлӧн,
Сійӧ неуна и менам тшӧтш.
Сы вӧсна и меным
Татшӧм долыд.
Морӧс пиысь
Сьыланкыв оз куслы.
Сы вӧсна ме
Лов тыр гажӧн ола,
Видза сьӧлӧм пиын
Помтӧм муслун.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 87 years or less since publication (if applicable).
Public domainPublic domainfalsefalse