Верӧспулӧн тшӧтшъясаяслы

by Лыткин Георгий Степанович

Верӧспулӧн тшӧтшъясаяслы  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Тшӧтшъяса тай, кылӧ, воӧма
Сюрс морт пытшкысь медомӧльыс мӧдӧдӧма.
Тшӧтшъяса тай, кылӧ, воӧма
Тыла ректан паськӧма;
Тшӧтшъяса тай, кылӧ, воӧма
Рыныш тупйӧд юра;
Тшӧтшъяса тай, кылӧ, воӧма
Нинкӧм вольӧс тоша;
Тшӧтшъяса тай, кылӧ, воӧма
Карнан тшупӧд ныра;
Тшӧтшъяса тай, кылӧ, воӧма
Сюмӧд гӧрддзӧм кока.
Тшӧтшъясаяс тай, кылӧ, воӧмаӧсь
Сюрс морт пытшкысь
Медбур войтырысь бӧрйӧмаӧсь.
Роч ӧксыӧн кӧ тай ме шуи —
Роч ӧксы кодьӧсь вӧлінныд,
Коми ӧксыӧн кӧ тай ме шуи —
Коми ӧксы кодьӧсь вӧлінныд,
Рочысь тай тіянӧс бӧрйӧма
Юклӧдлігтырйи;
Комиысь тай тіянӧс бӧрйӧма
Поткӧдлігтырйи.
Уна тай меӧй тіянкӧд
Ветлывлі-мунлывлі;
Уна тай меӧй тіянкӧд
Сьывлывлі-ворслывлі:
Омӧль тай меӧй вӧлі —
Омӧльысь эн повлывлӧй;
Гӧль тай меӧй вӧвлі —
Гӧльлунысь эн яндывлӧй.
Бур пыдди пуктысьясӧй,
Шань пыдди лыддьысьясӧй!
Быдӧн дінысь тай меӧй куті
Кӧдзавны-янсавны
Кӧдзалӧма кӧрт этшӧн,
Янсалӧма ыж этшӧн,
Ас йыла нэмӧй кежлӧ,
Морт нэмӧй кежлӧ.