Велӧдчытӧм нывбаба енлы эскытӧм олӧм сям дорӧ
| Велӧдчытӧм нывбаба енлы эскытӧм олӧм сям дорӧ (1925) |
| Гижан кад: 1924, Йӧзӧдан во: 1924. Ӧшмӧс: Коми сикт (1925-06-27) |
Колян арын Сюзяыб сиктын, Висер вӧлӧсьтулын, ӧти гӧлиник нывбаба — Даньӧ Карить — кагасӧ «пыртіс» выль ногӧн. Медводдза нывбаба Сюзяыбын смелмӧдчис «пыртны» поптӧг. Даньӧ Каритьыд кӧсйӧ эськӧ вӧлі прамӧй октябрина вӧчны да, сиктас, весиг вӧлӧсьтулас сійӧ каднас некутшӧм на организация эз вӧв. Нывбаба сэтчӧ эз йӧрмы. Чукӧртіс гортас гоз-мӧд нывбабаясӧс, корис сэтчӧ жӧ ӧтик гӧлиник нывбабаӧс, коді ёнджыка сулалӧ Сӧвет власьт дор, да пиверсӧ ассьыс. Чукӧртчӧмӧн тӧлкуйтісны, кутшӧм вӧлі важ пыртчӧм да кутшӧм ӧні. Нимсӧ пуктісны «Василёк» — сю пиын тай дзоридз быдмӧ. «Гӧрдай» да «гӧрдань» ки орччӧдӧмӧн бать-мам водзын кӧсйысисны кагасӧ велӧдны бур туй вылӧ.
Та бӧрын пемыд пӧрысь бабаяс ёна шензисны. Быд ногӧн Каритьӧс ылӧдлісны да дивитісны, мед эськӧ сійӧ кагасӧ вичкоӧ пыртны нулас. Сӧмын Карить эз кывзы некодлысь, дивитӧмысь эз повзьы ни.
Ӧти баба — Габӧ Ӧльӧн (тьӧткаыс Каритьлӧн) — ылӧдӧма со кыдзи: меным пӧ тавой мамыд вӧтӧ уськӧдчыліс (Каритьлӧн мамыс важӧн нин кулӧма) да тшӧктіс висьтавны тэныд, мед пӧ кагатӧ пырысьтӧм‐пыр пыртан вичкоын. Он кӧ пырт, ёра пӧ да, бур овмӧс ньӧтчыд оз лолы.
Сэсся тьӧткаыд висьтавлӧма — повзьӧдны ас думсьыс Каритьӧс кӧсйӧма — ещӧ со мый: ӧтчыд пӧ ӧти баба куимысь помся кагаяссӧ шойӧн вайлывлӧма да пыртнысӧ найӧс абу вермылӧма (доймавлӧма сьӧкыд уджнас). Бабаыд мунас поп дінӧ. Поп сӧветуйтас куим вой помся вичкоын вӧлтар водзын пыр юрбитны. Бабаыд сідзи и вӧчас. Первой войнас баба дінӧ юрбитігас вичкоӧ пырасны пӧ кысянькӧ куим серафим. Сэсся кылас шы: «Тайӧ и эм тэнад шой кагаясыд». Мӧд вой юрбитігӧн бара жӧ локтасны сы дінӧ кык серафим да ӧти зэв мича андел; анделыс и шуас мамлы: «Сё пасибӧ, мамӧ, мездӧмыд вылӧ. Со ме анделӧ пӧри». Тадзи мамыд сэсся став кагасӧ анделӧ пӧртас.
Карить татшӧм мойдкыв вылӧ тьӧткалы воча кыв видзас: «Мыйла нӧ мамӧ-покончаӧй тэкӧд велӧдіс? Мыйла ачыс ме дінӧ оз волы? Мун да висьтав, сылӧн нылыс кагасӧ вичкоӧ оз кӧсйы нулыны. Мед колӧкӧ волас татчӧ, ме дінӧ сёрнитыштны».
Тайӧ бабаыс дзик велӧдчытӧм, некытчӧ ветлывтӧм. Кага пыртӧм бӧрын попӧс ни, дякӧс ни керка помас эз кут сибӧдны.
Со кутшӧм выльсяма олӧм лӧсьӧдысь нывбаба лои сиктын.
Л. Дедов.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 98 years or less since publication.
Public domainPublic domainfalsefalse