Вашкала дыръя вылэм разбойникъёс

Вашкала дыръя вылэм разбойникъёс… Калык выжыкыл

Источник: Гаврилов Б. Г. Произведения народной словесности, обряды и поверья вотяков Казанской и Вятской губерний. — Казань, 1880. — С. 60—61• Текстэз туала орфографие берыктэмын

Вашкала дыръя вылэм разбойникъёс. Жильтыр-жальтыр лыктӥллям нюлэскы бадӟым сепысэн уксё ватыны бадӟым кыз улэ.

Шап кыз йылын пор луэм, со пыӵалэн кион витьыса пукем. Со пор, разбойникъёсыз адӟыса, шып улэм, мар ужалозы шуыса, тэк учкыса пукем.

Разбойникъёс гу гудӟыса уксё, зарни-азвесь гуэ понӥллям, собере огез огеныз мар кыл поном, мар сӥзёмы шуыса, кенешиллям. Огез шуэм: сю адями йыр вайыса, та уксёез мед басьтозы шуэм. Пор кыз йылысен верам: сю курег йыр шуэм. Разбойникъёс, со кылэз кылыса, курдаса, пыдесъяськыса улӥллям. Собере соос но сю курег йыр шуиллям, та курег йырез ку шедьтозы, соку мед басьтозы со уксёез, шуиллям.

Нош ик кенеш карыса, мар сӥзёно шуыса, палэзьпу шедьтыса кораллям, собере шори путкариллям но одӥг палзэ куштӥллям Каме, одӥгзэ отчы ик понӥллям. Камысь та палэзьпуэз утчаса шедьтозы ке, ваче карозы ке, соку мед басьтозы та уксёез, шуиллям. Собере одӥг пересь муртэ, ньыль пелят чогыса, понӥллям. Со адямиез куке ваче карозы, соку мед басьтозы та уксёез, шуиллям.

Собере разбойникъёс кошкиллям. Пор, кыз йылысь чальгем васькыса, уксёез утчам но шедьтымтэ, уксё уг сётӥськы, пе, басьтыны. Собере пор кошкем палэзьпузэ утчаны. Кам доры мыныса, лодка шедьтэм но, лодкае пуксьыса, мынэм палэзьпу утчаны. Сизьым иськем мыныса, шедьтэм но берен берытскем нюлэскы уксё доры.

Палэзьпузэ ваче карем, собере сю курег вайыса вандэм, чогыса понэм адямиез но ваче карем, собере гудӟыса уксё поттэм. Со пор со уксёез нуэм дӥняз, кышно басьтэм, нылпиез трос луэм, али но ӟеч узыр улэ.