Ётась тялось, тундась моли,
Ванды ули мази майсь,
Сембя нармотня састь меки,
Конат тушенцть лямбя крайс.
Шудихть ветня ляйхнень эзга,
Курок коськи паксянь кись,
Ладыкс лофнень модать лангста
Нардасыня тундань шись.
Пизи тундань сетьмя пиземсь
Карксокс вярьдя алу прай,
Лугать ланга келемсь пижесь
Шинь кучкаста кожфсь уфай.
Вирьга, садга шуфтня, панжыхть
Нароць сокама кундась,
Панчфста мешкятня медь кандыхть,
Сембонди макссь тев тундась.
Паксяв ванат, мяльця касы:
Колхозсь сокай тракторса,
Сембя сокаф модать валсы
Ароптф кединь сёроса.