Эрзянь ёвкст (М. Е. Евсевьев, 1928)/27
| ←Ёвкс 26 | Эрзянь ёвкст (1928) , edited by Евсевьев, Макар Евсевьевич Ёвкс 27 |
Ёвкс 28→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ВАРДЫНЕ.
Эрясть-айшсть атя ды баба. Ульнесь сынст ве тейтерьнест. Тейтерьнесь чистэ мери аванстэнь: „Авай, нолдамак васоло бабанень аштеме! Авай, нолдамак васоло бабанень аштеме!”
Авась мери: „Нолдавлетень, дочинем, ды васоло бабат вельть васоло эри, кись тенть а муеви!”
Сась тенст Вардыне и мери: „Монсь молян тейтереть ильтеме!”
Авась наряжизе тейтерензэ и кучизе Вардыне марто васоло бабанстэнь аштеме. Туйместэ авась сельксь тейтерьсть кавалов колмо сельк и мери: „Ванок, дочам, ки ланксо иля экшеле, — Вардыне сайсыньзе руцят-панарот!”
Тусть Вардыне марто тейтернесь. Ютасть, ютасть, сась ведь.
Вардыне мери тейтерьнестень: „Давай экшелитянок!”
Тейтерьнесь мери: „Экшелевлень, ды авам эзь мерть!”
— Ават ней васоло, — а нейдянзат!
Тейтерьнесь манявсь, кайсиньзе руцянзо-панаронзо и совась вец. Вардыне саинзе сынст ды орчинзе и ащи прок бояр-ава наряжазь, а сонсинзэ нулатьнень каинзе.
Тейтерьнесь лись вецтэнть и мери: „Вардыне, туи руцян-панарон!”
А Вардынесь мери: „Орчи монь нулатьнень, — тонеть молить!”
Тейтерьнесь озась ведь чирестень и серьгець: „Авай! Вардыне саиньзе руцян-панарон!”
Авась маризе ды серьгець: „Ужо, ужо, дочинем, чеке сюро кепедян, сыре Вардонь пря лазан!”
Вардыне каинзе тейтерьненьть одижанзо. Тейтерьнесь оршиньзе и тусть таго ютамо.
[ 89 ]Вардыне кевстни тейтерьнесэнть: „Кода истя ават васолдо мариньзеть?”
Тейтерьнесь мери: „Туйместэ авам сельксь кавалон колмо сельк и маримем!”
Ютасть, ютасть — таго сась ведь. Вардыне таго мери тейтерьнестень: „Давай экшелитянок!”
Тейтерьнесь мери: „Экшалевлень, ды тон руцян-панарон сайсыть!”
Вардынесь мери: „Ней а сайсынь, авадот пелян, — прям лайсазо!”
Тейтерьнесь таго манявсь, — кайсиньзе одижанзо ды совась вец. Вардыне-як совась мельганзо. Шлиньзе тейтерьсть кавал алдо селькнень и седе курок мекев лись. Орчинзе тейтерьнесть руцянзо-панаронзо и ашти прок бояр-ава. Лись вецтэнть тейтерьнеськак и мери: „Вардыне, туи руцян-панарон!”
— Орчи моньзетьнень, — молить тонеть!
Тейтерьнесь озась ведь чирестень и серьгець аванстэнь: „Авай, Вардыне саинзе руцян-панарон!”
Авась эссе маряк. Кармась тейтерьнесь аварьдеме. Аварьць-аварьць, теемс а мезе, — орчиньзе Вардонь нулатьнень и тусьть таго ютамо.
Пачкоцьть тейтерьнесть васоло бабаст туртов. Вардыне мери: „Васоло бабай, мон аштеме тенк сынь! А те нулав тейтерьнесь ильтемень сась”.
Васоло бабась радувась. Озавтызе Вардынень эзем пряс и максь тензэ порьнемс ловажа. А тейтерьненть озавтызе коник ланкс. Вардыне порьнизе ловажанть и ёртызе тейтерьненьть коняс.
Тейтерьнесь ашти коник ланксо — аварьди, васоло бабанстэнь ёвтамодо визьди.
Васоло бабась эсь пачканзо арси: „Ох, те аволь минек племань тейтерьсь, — кода ансяк сонзэ содамс?”
Сынст ульнесь видезь товзюрост. Тонацьть товзюростень сезьгат-варакат. Сынь кучизь Вардынень товзюрость ванцтомо, васоло бабась кекшсь [ 90 ]товзюронть поц. Сась Вардыне и озась уманть пес. Ливтить сезьгат-варакат. Сон мери тенст: „Садо! сезьгат-варакат, те аволь монь роднянь товзюрось, — прякснэнь-прякснэнь сэвинк, пулокскетьнень кадынк!”
Омбоце чистэ кучизь товзюронть ванстомо нулав тейтерьнесть. Тейтерьнесь сась и озась уманть пес, васоло бабась таго кекшсь товзюронть поц.
Ливтить сезьгат-варакат. Тейтерьнесь мери тенст: „Кшу, сезьгат, кшу варакат, — те васоло бабань товзюрось! Пулокскетьнень сэвинк, прякскетьнень кадынк!”
Маринзе не валтнэнь васоло бабась. Сась кудов, нельгинзе Вардонь ланксто руцятьнень-панартнэнь и орчавтыньзе тейтерьненть ланкс. Сонсинзэ Вардынень сюлмсизе лишмень пулос и дикой степс панизе. Тейтерьненьть кадызь эстест аштеме.