Ванине (2011)/8
[151]
| VIII |
Эри лиясто те эли тона ломанесь: ярсы, сими, важоди, вечки, три-касты эйкакшт, а косо-бути потсонзо кекшезь ашти ды порезь пори эйсэнзэ кодамояк зярс а марявиця орма. Ансяк шкань ютазь сон лиси лангс ды ёвтасынзе раужо валонзо: кадовсь теть, ломань-парочи, якамс менеленть алга, кецнемс панжиковонь самонтень, чилисемантень, эйкакшонь кургсто чольдердезь чудиця валтнэнень... тунь аламо, ансяк ков-кавто, кадык, пельие.
Кие содась, ютазь пингень 70-80-це иетнестэ куломань орма салавине пори планетанть лангсо покштояк покш, виевдеяк виев, СССР мазый лемень кандтний масторонть? Кадык аламо, ульнесть, мерема, седе васов неицяткак: сынь содасть ков, кона ёнов «эскелить» неть ниле букватне. Ды содамскак ульнесь аволь уш пек стака. Эрявсь вейке — седе сеедьстэ варштнемс удалов, умок-умок кадозь, ашназа челькссэ копачазь пингетнес. Тень вельде чарькодевель: мезеяк модамасторонть лангсо, менеленть ало ве таркасо шешкиця, а полавтовиця, а кулыця арась. А эряволь стувтнемс, мекевланг, кирдемаль мельсэ: каладсь, кода эзть кирде, Чингисханонь «Сырнень ордазо», каладсь седе икеле покштояк покш Римень империясь, яжавсь Византиянсесь, Турциянсесь, Англиянсесь, Австриянь-Венгриянсесь... Каня весе лововить! Мекс а каладомс, а янгавомс СССР-тень? Сон мезе, лия коцтсто стазь?! Ды сон каладсь... Каладсть кода Батыенсесь, Македонскоенсесь ды ламодояк ламо лиятне.
Ламодояк ламотне теде эзть арсеяк. Превс тенст эзь сакшно — СССР-сь сэреди куломань ормасо. Сась шка ды венстинзе пильгензэ. Ней мезе? Лайшема? Кода меремс... Лайшема сестэ Чингисханонь орданзо кисэяк? Чачома ды кулома. Лайшек-иля, сынст эйстэ кияк эзь тукшно. Ды а туи.
«Весемесь чуди, весемесь полавтови», — умоктояк умок тешкстазель философиянь превей книгатнесэ. Мекс а каладомс СССР-ть мельга (илямизь чумондо ды лово калавтыцякс) Россиянтень? [152] Каня сон мейсэяк явови Рименседенть? Кода иляст вансто сонзэ, иляст шна, иляст пирсе перьканзо кшнинь-толонь пирявкст — а кирдеви. Сыредсь, секскак сэреди эрьва ёндо ангориця орматнеде, эризе, лиси, эрямонзо. Сась калмамо шказо. Ансяк, Пазось ванозо, верь илязо валово Тов ильтемстэнзэ! А эряви стувтнемс, свал кирдема мельсэ маятникень коенть: зяро верь валозель те эли тона масторонть теемстэнзэ, зяро валови яжамстонзояк. Эрси, тешкстама, сонтемензэяк. СССР-сь вана каладсь, невтемакс, вертеме. А чехтне словактнень марто? Ды аволь ансяк сынь. «Каладомась» карми молеме аволь вейке-омбоце ие ды, теде башка, аволь ванды-вандыде мейле. Секскак содамс шкадо икеле штельксэнь пес, кода те весе карми молеме, стака.
Ледстнемакс кадовсь Союзось, истямокс теевсть сонзэ теицянзо-кирдицянзо, паро ды, седеяк, берянь тевест. Виевдеяк виев, превейдеяк превей, ванькстэяк ванькс, кода нерьгсть уде-мезэнек, коммунизмань партиясь теевсь историякс. Кие арсесь, истямо пес пачкоди? Сонзэ марто каладсь, паряк, седе виде карми, тапизь, эрьва ёндо мазылгавтнезь, моразь-шназь социализмантькак. Састь Россиясь ды аволь умонь «кунсолыця вишка сазоронзо» сенень, мезестэнть туекшнесть — социализманть таркас одс велявтсть сюпавчинь таштамонь койтне, сась пшти пей, мезде понгсь ярсыця, мейсэяк а пештявиця, оймень микшниця-рамсиця капитализмась. Те сонзэ истя лемдекшнызь, истямо питне макснесть тензэ коммунизмань чапицятне. Мезеяк а мерят, видестэ. Сон алкукскак истямо. Седеяк пек чарькодевсь сонзэ «оймезэ», сонзэ вачо пеке пачань обуцязо социализмадонть мейле.
Неть весе чадыведь шкань ведьчакш ёнов молиця чаравкстнэ-полавтовкстнэ, содави, эзть юта Кузвеленть вакскаяк. Колхозонть цюх сельгема, кончтамо юткос яжизь. Виренть чиресэ покш, кирьпецьстэ вачказь скалонь «фирмась», ков аволь ве ие яксесь потявтомо, ловсонь планонь топавтомо Куля, чамсь. Сельме икеле.Теке «ормась» ютась тувонь кардотнень лангаяк. Ков «орголесть» зярыя сядот сюракш ракшатне ды, седеяк, пурцузост марто ламо тувотне, секень вант, ваксост виресь ды сонзэ пиже черь килейтнеяк эзизь нее. Чатьмони менелеськак. Соласть. Иля вешне.
Теке «ормась» стардынзе трактордо-машинадо ды лия улипародо пешксе парконть-гаражонть, тингелангонть, утомтнень. Плуг марто ламо трактортнэ кода-бути понгсть икелень азорост кедьс. Допрок стувтызь паксятнень. Икелень коряс покш, [153] сокамонь-видемань тевть уш а теить. Кинень, тердиндерясызь, пирине сокить, кинень зярыя кескавт сюро, пенгть эли мезеяк лия ускить...
Велесь, превей ломантнень кортамост коряс, чамомантень ялатеке саволь. Невтемакс — икелев молиця ламо мастортнэ. Автоматикась, од шкань виев, а яжавиця, нардев машинатне, технологиятне, компьютертнэ-мезтне, наукась кадовлизь, шкань ютазь, кедьсэ, сянгоркайсэ, коймесэ ды пелюмасо важодицятнень тевтеме. Ламот-ламот туевельть ошов-ков. Истя чамоволь велесь. Арась, истямо кись «верцетнень» мельс эзь тукшно, сонзэ таркас чумондызь, кода маштсть сялдызь колхозтнэнь-совхозтнэнь ды тейсть Ине янгамонь-яжамонь эпоха, тейсть седеяк покш, келей саламо-сюпалгадома.
Эхе-хе-хе-е... эрямо! Чамсть ферматне-гаражтне, энгамсь тингелангтне. Аволь аламо паксят ушодсть вельтявомо вирьсэ. Велесь чамсь. Вана кажось! Кода икеле чокшнеланга, седеяк сёксь ёнов, гармониянь викнема, морыцянь вайгель, куш пилень каназкадомазот кунсолок, а марят. Ютат телень маней, валдосо элякалиця чистэ велеванть, пандопрява-кува кирякстниця, коткудавокс кашкиця покш-вишкине эйкакшт а неят. Икеле... Кодамо якшамо ушосонть илязо уле, пандочаматне чоподас чольдердсть вайгельдест. Ней аволь эйкакш, покш ломаньгак велеванть ютамсто чуросто вастат. Прок кулость. Тев арась. Одтнэ, ды аволь уш пек, срадсть масторонть келес. Седе ламот ажияст аравтызь «сырнень таргамо» од Клондайк ёнов. Те истя Московдонть мерить. Тов ардыть. Тосо, кортыть, парсте пандыть, тосо седе «келей-кувака» целковоесь. Кой-кить пелеве ёнов ки келясть.
Яла аламо, те а саты, тона, те таштомсь, тона полавтома ... Пештяви-арась зярдояк ломанесь? Лотки-арась зярдояк целковоенть мельга келень лисезь пинекс чийнеме, икелензэ менчевеме-киштеме, кисэнзэ эсь прянть микшнеме? Зярдо серьгеди: «Саты, саты, пешкединь!» Мекс кодаяк а чарькодеви: эрямосонть эряви тунь аламо. Каня чинек-венек ланга ярсамодонть касыця пекесь а корты теде? Мекс ламодояк ламот эрить ды арсить аволь превсэ-оймесэ, а ...пекесэ? Мекс, мезе лангскак апак вано, весементь ванкшныть ярмаконь конёвонь пачк?
Тов, Московов, прянь-полдань синдезь чиить, ардыть, ливтить... Кадовсть Кузвелес какаря сыре ломанть, сэредицят-резыцят ды велеванть лытыцят — лындат, чинек-венек ченьксэнь вешницят. Нетнень мелест вейке: начтомс кирьгапаренть, [154] чизэнзэ весть куш мезеяк путомс пей алов. Сынст муемга лиясто «ильвелить»: киньгак ревине кардазсто эли лугасто-косто чочить, саразке кундыть... Тельня шабрань мацтскак чопавтнить. Ков молят? Сави... Ансяк вана ловось пилыть тсрти, танагай саевлизе! Эзганзо чалгавкстнэ сеске невтьсызь ков чаула ревинесь ношкстась, ков кекерькай саразнэсь ёнкс сайсь. Те виде. Ды ков молят, вачодонть ирныця пекесь ды коськеденть казямо кирьгапаресь ков а пантянзат?
Кузвелень Алопесь, ловт, пелевеле. Чилисема ды седеяк пелеве ёндо пирязь сыре вирьсэ. Пичень. Сон вансты Эев океанонть якшамо кувсемадонзо, скириця, эрьва козонь эциця кежей вармадонзо. Веленть ушодыцянзо, зярыя пингеде икеле, аволь мазя превть ульнесть. Содасть козонь «озамс». А васоло, чикуншка ёно, — Инелеесь. Чии чинек-венек. Чии эй алгаяк. Яла та-ков капши. Ков? Кие пани? Кие эйсэнзэ учи? Мезе вешни? Кувалманзо лаймеванть-лёмганть — кизэнь шкава — мазычисэст сельмень кецневтиця, куракшсо пирязь эрькть. Кузвеледе аволь васоло — Домка весемеде покш эрькесь. Ведесь эйсэнзэ — сельведь. Ванькс-ванькс! Секс калткак понгонить. Ды аволь аламо. Сеедьстэ кундсицятне таргсить чалгант, туткот, муразейть, нучкот, понгонить аволь вишкине сэнейтькак. Инязоронь кал вана... Зярдо-бути Кузвелесэ ульнесь мик калонь кундсицянь артель. Кундсесть, салтсть, чентясть, микшнесть... Инелееськак, содазь, сестэ лияталь: ванькс, келей, домка, секс стерлядеськак понгониль. Нурькинестэ мерезь, седей, морак морот неть певтеме мазычитнеде! Сынст кунсолозь, а марясыть, стувтсыть эрямонь певтеме тарькстнэньгак.
... Кизэ. Леенть лаймева ацазь лугатнева — кочкак а кочкавить — цивтордыть, теке тештть, нормальть. Калень, эрьбань, индерень куракштнень алга-юткова якстере тештинекс цивтордыть кстыйть. Кочкак, зяро мелеть! Ушосонть летьке пси, потыть те мазычиденть эрьва чинь стакачитнеяк. Дошуз аватне ведрань-ведрань кандыть якстере ламбамо ярсамопельтнеде. Сёксня, кельметнень пракшномадо мейле, рубинэнь тюссост иредстядызь чевгень тояратне. А кирдевить, мендявить тарадост якстере потьмежа умарень пицькатнень сталмодост. Варштат лайменть кувалт ды арсезеват: «Мекс ламодояк ламот ютыть вакска, мезекскак а путыть те мазычинть? Пазось эрьванень макссь сельметь. Мекс эно неицясь сеедьстэ а неи, марицясь а мари?»
[155] А эрявить кодаткак Турциянь, Египетэнь, Эмиратонь... моря чиреть, а эрявить эрьва кода шназь Канаронь дюниядо пешксе усиятнеяк. Превскак а сакшны мик Ялтаськак. Вана косот, сельметь икелеть, неть «чиретне», неть канартнэ! Эряк, кецнек, лексек шумбрачинь казий коштсо, ловнок менеленть тештьсэ сялгонезь-сёрмадозь ёвтнеманзо. А стяко Кузвеленть кувалт таргавозь асфальтонь кись вети эйкакшонь оймсема лагертнев. А стяко лембе шкатнень самстост саезь таштамковс велесь, кадык чульть-чальть, ды моли ош ёнов. Секе тев, тей-тов ливтязь, ардыть валаня асфальтканть шожданькайть, автобуст, шкань-шкань ютнить покш машинаткак, кой-кить эскелить ялго, ардтнить «лисапедсэ»... Кодамо веле — ош! Сыть кизна покштяст-иньаваст туртов ошсто пельс эли цинсть рузыязь нуцькаст. Шалнозевить велень петне рузонь кортавкстнэде. Каня марсевсть сынь, лия келень валтнэ, колоньгемень-ниленьгемень иеде икеле? Кузвеле — эрзянь веле, ков тон шаштат? Мекс тон, Неиця, а неят? Совси превзэть, мезе учи Тонь ды тонь эйкакшот?
Пичепенть пензэ икельга сэрей пирявксокс ашти чопода-пиже пиче виресь. Маней чистэ чатьмони. Мерят, арси. Мезде? Теде ансяк сонсь соды. Кепети варма, ушоды аксунгалеме, ёжонь калавтыця, лужанядояк лужаня моронзо верьга вайгель морамо. Эно кода? Аволь свал нувсемс. Нувсезь кодамо эрямо?! Вензэ лангс, седе сеедьстэ, ойми, ушоды учомо ашолгадоманть. Пангс сакшныцятне чуросто лиснить тестэ чаво кептере марто. Вастневить, кадык аволь свал, ашо ды лейкс пангот, кочкак, зяро мелеть куя, тумо, пой ды суропангот. Суравкатнень тесэнь эрицятне пангокскак а ловить. Шукшт... А ванытькак лангозост.
Кинь мельс а туить истят ёнкстнэ-чиретне? Секс костонь-бути, кодат-бути ды кодамо-бути кельсэ кортыця ошонь ломанть рамсить пиреть-кудот ды кизэнь перть «ойсить» тезэнь эрямо. Котьмить пиресэст, кастыть эмежть ды эрьва кодат умарть. Кой-кить эйстэст «тонадсть», кадовкшныть теске, раужо варакатнекс, тельняяк. Ветить кодамо а кодамо хозяйства. Неть таркатнес «валгоницятнень» ютксо седе ламот, кортамонь коряс, рузт, вастневить татарт ды лия раськень ломантькак. Эрзянь келесь сыненст-кода пинентень ветеце пильгесь.... Вана истят апаро тевть молить Кузвелесэ иестэ иес. Неезь неяви: эрзянь, зярдо-бути виев, нардев, рацяня-эчке чувтонть коськемазо. Чикуншкань псиденть алонзо уш а кекшеват. Эсь шкастонзо текекс, Кузвеледе а васолонь тарка эрзянь Чуварлей покш велесь теевсь цартнень-императортнэнь [156] шкасто Вечерлеекс, шабрасонзо Кузлаткось — Козловкакс. Эрицяст ней, превть а мезть яжамс, — рузт. «Сёксень» эли «тундонь» — те сынст а талновты. Сынь а содытькак ды мелесткак арась содамс, кить ульнесть покштянь покштяст, кода, косто лиссь-саевсь велест лемезэ. Текес, секень вант, пачкоди Кузвелеськак. Сонзэяк яволявтсызь Козловкакс. Истя ёмить эрзянь велетне, истя аламонь-аламонь нардавить моданть чамасто мик леместкак. Текекс зярыя пингеде икеле нардазель Эрзянь Масторось ды ней мельганзо Тов ильтеви те масторонть раськезэяк.
* * *
— Ваняй, Ванине, саты теть корномс, стяк! — стявты Куля, тевензэ теезь, «покольнензэ», кода пакшакс улемстэнзэ мериль цёранстэнь. — Зярс роса, ледемс седе шождыне, стяк. Улезентень улавшка анокстама. Телесь кувака, ламо тензэ эряви.
— Ма-маринь, авай, маринь. Стя-ан, — мерсь ды, ойкснезь-вайкснезь, кепедизе пондакш валдо черь прянзо тодовонть лангсто, штавтызе мельде-валдо лангстонзо вельксэнть. — «Стяк-стяк...», текень содат, а чарькодеви теть, кода прям пукштяи. ... Стян, молян, ансяк васня сядошка кандт.
— Теке превсэть. Сявдикс ланга эрявлить бангодемс неть «сядотнень» кис, — мерсь Куля кежиявтнезь, сонсь та-косто, алкукскак, таргась «ашо» ды нуртясь пельстопкашка. Ванине, окойники, явовсь коникстэнть, совась моргас, стенас понгавтозь шлямкаентень каясь кельме ведь, шлёберь-шлёберь ёрвалдызе умок уш апак нара чаманзо, нардась. Кельме ведесь, конань амолясь ды кайсесь кирьганзо ланга, явавтызь удомань мелензэ. Оршнесь-тейсь ды увол-авол эцесь стувор экшс. Авазо венстизе алтазенть. Сон саизе кедьстэнзэ ды каизе-гылкадизе комшакс панжозь кургозонзо.
— Ярсак, зярс пси ямось... — авазо бажась седе курок андомс тикшень анокстыцянть ды ильтемс, зярс ушосонть валскень экше ды летьке, ледеме. Мель путсь андомс цёранзо аволь ансяк тантей, виень максый ярсамкасо. Соды: тикшень ледемась — аволь карень кодамо, аволь сынст «артнемасткак». Чинь-чоп пелюмасонть ахолямсто вий ды вий эряви! Тикшень, седеяк розень ледемась, кортыть велень сыре атятне, весемеде виень саиця. Чизэнзэ панарот ветексть пурдасак ливезденть. Кутьмереть ашолгады салдонть. Секскак ярсамс эряви парсте.
Исяк печксть сараз, клукныцянть. Ней Ванине паро мельсэ, [157] псинть лангс апак вано, коршни келей ваканстонть ямдонть. Тантей! Чинедензэяк седееть витеви. Ашо кшинть Ванине кшикс а лови. Улезэ розень, раужо, эли «чёрный», кода покордамга мерить тензэ рузтнэ. «Мезе ашось? Тикше...» — яла сон мери. Пештизе Ванине пекензэ, лымбавтсь прядомга ловсо кечине ды чатьмонезь лиссь кардазов. Совась латалов, саизе паймес понгавтозь пелюманть, човсемканть. Савсь мурдамс кудов: каясь банкас, симемс, кельме ведь. Лиссь ушов ды сыргась содавикс янганть Инелей ёнов, кувалманзо сравтовозь мастумарень чинесэ качадыця лугатнень лангов.
Чипаесь прянь апак шна, каштмолезь кенерсь куземе лайменть эзга касыця ламарь чувттнэнь сэрьсэ. Мерят бажась варштамс, мезе полавтовсь вензэ перть моданть лангсо. Менелесь сравтовсь сэняжа, пачк невтиця келейдеяк келей парсеень коцтокс. Ванькс. А вановаткак. Ансяк чивалгома ёнкссонзо ашолдсь лехакс таргавозь келей сёлмо пельне. Валскень начкось, ламо тюссо кивчкаиця ведьбайгинетне педе-пес коськеме эзть кенере. Пиже, сэнь, ожо тештинекс цитнить чипаенть вечкевикс вановтонзо каршо. Чевгень, ламарень, калень ды эрьбань куракштне, васолдо ванозь, неявить валанясто судрязь тикшень покш штемекс. Ютковаст, виде, тия-тува вастневить алкуксоньгак.
Аштемковонь куншка чить. Самай-самай ледема шка. Седе тов тикшенть лезэвчизэ, танстезэ, кизэнь чинезэ истямо уш а ули. Карми олгиямо. Ней вана... уськаз, лугань Пинеме, овтонь понкст, луга тикше! Курынень курыне вастневить якстере ды ашназа-якстере чавкань прятне. Понгонить карксамодо сэрей ашо ды ожо цивця касынькайтне. Кода скалось эрьва потявтомсто а карми максомо ведра истямо тикшеде! Ды аволь ансяк кизна. Ледть, костяк, ускт. Тельня а кармат нуднеме — кадован-арась вачодо.
Колхозонь-совхозонь шкатнестэ эзь мереве олго сэльгинеяк кандомс эсь скалот-андыцят-трицят туртов. Ули мелеть вачодо а куломс, кирдть скал. Кода? Те уш тонсь арсек. Эсеть мелявксось. Эрьва кудораськесэнть вете-сисем кургт. Кой-кинь эйстэст кеменьшка. Эрси седеяк ламо. Эрьвась веши. Варчик, пештить тутмаст зняротнень! Секскак эрьвась, эрьва прявтось мель путсь кирдемс скал. Кирдемс стакачитнень лангс апак вано, эсь прянь апак вансто, кода маштат. Маштовсть теленень тикшекс пирень, модамарень-эмежень кочкомсто чееренькарьксэсь, чудожовось, ципирькаесь, марчось... Вейсхозонь сюронь, седеяк, суронь кочкомсто начко тикшентькак аватне кандтнесть, зяро кандови, [158] сявдиксэст лангсо кудов. Комбайнантень лушминетнева розесь эли товсюрось алга а саевиль. Неть, седе сэрей жнива таркатне, ледневсть пелюмасо. Латкотисс-луткотнескак пачколесть аватне. Тестэяк мукшность андомапель. Нусть тарвазкесэ, ноцорясть кедьсэ. Ды таго сявдикс лангсо, чирькекс мендявозь, кандома канстонть пире удалга-кува. Войнань шкасто, ды мейлеяк, телень дюм веть, кивтеме, кандылов шкасто — челькстнэ вельтявост, — якасть салазкесэ шабра совхозонь паксясто олгонь-сювань саламо. Пежеть, коень колсема? Нулгодькс тев? Содазь. Ансяк седеяк пежетьс вайсесть сеть, кить пансесть ломантнень истямо эрямос.
Нетне оймсеме эзть ойсе. Састь лия шкат, Нарьгамотне чсвтелгадсть: вейсхозось кармась макснемс важодицятненень, пандома питнень таркас, «процент». Гектар, сайсынек, ледят-урядат, эйстэнзэ кеменце, лиясто мик ветеце пельксэзэ — тонь. Тень туртов виднесть ве иень тикше-вика марто човор пинемс. Кемень эли комсь процентт. Лемдекшнызьгак неть пелькстнэнь истя — «процент». Велень эрицянть, колхозникенть, эрямозо туекшнесь венежасто, аламнеде веревпандт, седе шождалгадокшнось. Кандгнематнень, сявдиксэнь трокс кайсевиця пикстнэнь, кавто чаросо тарабайкатнень ильтизь латалов, музейс. Сынст полавтызь тракторт-машинат.
Ютасть, кадовсть ледстнемакс неть полавтовкстнэяк. Сась лия лув. Ней, вейсэнь хозяйстватнень янгамодост-тапамодост мейле, ледть, костяк, уск, капак, андт... ойметь пиемс. Весе сядо «проценттнэ» тонь. Ков а варштат — тикше. Уцорсо касы! Анок кудозот вальмава эцемс. Ды, мерема, кой-кува кенерсь уш совамояк. Ламо пиретне, кардазтнэ теевсть азортомокс, секскак тикшесь полонинзе уматнень ды мик китнень-янтнэнь... Ледть прамозот! Ансяк вана ледицятне... сизьгемень-кавксоньгемень иесэ курсякс мендявозь «одирьват». Велень келес маряви, кода ловажаст чикордыть, кода кувсить, кижныть ды козыть. Атятнеде истяткак эзть кадово.
Ульнесть эйкакшт, сыреть-одт, ават-цёрат. Эрьва кудораськест пувозось, трясь ракшат. Стадань панемстэ скалтнэ ды реветне эль кельгильть куринкань кудотнень юткс. Неи? Ней, кить котьмить, карязт яжить — кирдить скал, кемень сурсояк лововить. Секс, ков а варштат, карксамга тикше, Кирмалавт, пиципалакст, нартемкспулот,уськаз... Секень вант, чаво, нусманясто ваныця, кукольнязь аштиця кудотне ёмить потмозост.
Ледть Ванине!
[159] Цёрась ютась, пелюмасонть ахолязь, икелькс, мельганзо омбоце. Начксь, теке экшелямсто лиссь. Ливезесь ланганзо чудезь чуди. Каизе панаронзо ды путызе тикшень правтовксонть лангс. Копорьганзо ютась вечкевикс экшень зэхельне. Таргизе зепстэнзэ човсемкевенть, комась ды човсизе пелюманзо. Поладызе тевензэ. Ютась зярыя икелькст ды озась оймсеме. Таргась понкс зепстэнзэ «уштомапельть»: папиросань керьме, пицькат. Таргась керьместэнть вейке, чевелизе аламнеде кавто сур ютксо, путызе турванзо юткс ды кирвазстизе. Мельспаросо ноцковтсь весть, омбоцеде, нолдась судоварява кувтань-кувта качамонь зярыя чоблат. Кепедизе вановтонзо сявордовкстнэнь лангс. «Кода парсте теевсть! Теке бритвасо нарынь», — шнызе эсь прянзо. Варштась перьканзо. Кувать ваннось вельксканзо цопазь чарыця вадовонть мельга. Кирькс, омбоце... Вана кинь паро эрямозо! Ков мелезэ, тов ливти, киньгак а эряви кевкстнемс.
Апак учо ледсь мелезэнзэ Нату. Стясь икелензэ армиясто самодонзо мейле клубов васенце молемазо, аволь «мазый» вастомазо васень вечкеманзо марто. Самай сень марто, кона эзизе учокшно армиясто мурдамонзо, кенерькшнесь лисеме лиянень. Мельсэнзэ, вельть мельсэнзэ сёксень се чопода чокшнесь, недявомазо, каявомазо Натунь поланзо лангс, сеть покордазь ёжотне.
«Умок те ульнесь. Ну зяро? Маряви, колоньгемень малава иеть. Ютасть — эзть марявояк. Одолинь. Комсь тень ульнесть. Ней ведьгемень малава чарыть. А кемевияк! Кемть-иля... Па-паряк, аволь лисеяк мирденень, учовлимимгак, эрявлинь ней, кода весе, улевельть ним, эйкакшон, мелявксон... Ней... Крандаз тикше. Ков вармась, тов мон. Течи тесан, валске — сонсь пазоськак азды. Эхе-хе-хе, эрямо...
Натунь мирдезэ, Миша, умок уш кулось. Допрок одсто. Авась, ловт, кадовсь одирьвакс, ськамонзо стявтсь пильге лангс кавто одёр цёрат. Превейть, марсевсь. Важодить та-косо паро, «вере» таркасо. Пшкалинь Натунень. Мейле мезе? Мезеяк арась. «Оргодть, — мельсэнь валонзо, — эйстэнь, иредьстэ бадик! Аволитинь нееяк!» Эзинь покордавкшно. Мезде? Кодат ордалемат, мезень кис? Эль пильге лангсо тарнынь-кирдевинь сестэ икелензэ. Умок те ульнесь. Кеменьшка иеть, секень вант, ютасть. Паряк, седеяк ламо. Ней вана ведьгементне каршон капшить. Эрьва кува савкшнось эскелямс, ламо-мезе неемс, марямс, варчамс. Варчнинь авань танстькак. Содаса сонзэ. Ды те зярдо [160] ульнесь? Умок. Пек умок. Ней? Ней кияк тень а эряви. Весе. Пе. Мик визделгадан, тандадомань ёжояк пачкан юты, зярдо кияк аватнеде пеедькшнезь-раксезь нежеди эли поводи эйзэнь. Истят «вечкемат» лиснесть, виде, аламнеде эсь превсэ шкастон. Истямокс вана эрсян чуросто. Косто сыненст содамс — мон умок уш мезекскак а маштован. Лемезэ ансяк цёран. Лангс ванозь. Охо-хо, чиремкшнезь, ёкол-ёкол якиця аватнедеяк кадовсть аламо. Оно тарны зярс Кажа Маря... Монь шкань, вейсэ школав якинек. Кудовгак, зяроксть некшния, а пачколи, кирмалав потсо удси... Кодат тень пельде эждемат... Весе ошка-кува срадсть...»
Зяро иля аште, ледиця, пелюма недесь учи. Кшувавтынзе оймсицясь ледстнеманзо, прядызе таргамонзо. Папиросанзо тонадозь модердизе кота кочкарясонзо, неждясь вить кедензэ лангс ды ливчанясто стясь пиже-летьке сявордозь тикшенть лангсто.
Саты. Шказо а учи. Зярс эзь кенере чипаесь кевереме тёкшс, зярс ванькс, а тандавтни пиземесэ менельксэсь, тевенть прядома. Кепедизе пелюманзо. Сайсь од икелькс. Жи-ик, жи-ик, вешкезь ушодсь ёвтнеме эсь тевдензэ Ванинень «кичкере пеелезэ». Ёвтни, сонсь сяворды, алга кери зярс летьке тикшенть. Выськ, выськ... ахоли Ванине. Прянь сэредемазояк а истя маряви, теке ютась иредьксэнь кадовксоськак, лецькаень «похмелэсь». Прок исяк эзь «лополеяк». А стяко кортыть: сехте вадря ормаменьксэсь, куш кодамо ормадо, берянь ёжодо, псилгалевтиця, верень эрязасто пансевтиця тевесь. Сон, васняяк, сон пильге лангс сэредицятнень стявтницяст! Сон путни пистенть калмолангов шаштницятнень икельга. Рунгонь яжазь, кода ледемстэ, сыретнеяк ёртнить зярыя иеть сявдиксэст лангсто.
Чикуншка малава Ванине сась лайместэ-лёмсто — вайгельпешкань ютко — ярсамо-оймсеме. Васня авазо каясь саразъям. Коршизе. Мейле путсь икелензэ пешксе лапшава топонь прякинеть. Лангаст каясь велькс. Састыне човоринзе чувтонь пенчсэ. Тан-тей-йть! Лапшавась чамсь мильк меремс. «Машты, видеяк, авам, — ютась ярсыцянть прява, — пидеме-панеме! Свал мезеяк ды од аноксты. Марят ламбамо, ризаня эли кодамояк лия расть. Ярсат, секень вант, келеть нильсак. Косо тенень тонавтнесь, кие тонавтыцязоль? Инецьавам?»
Витизе Ванине седеензэ пси ламбамо чай стопкасо ды паро ёжосо стясь стуворонть экшстэ: озась кудо кенкшень тарчксонть лангс ды пурнась-сэрнясь таргамо.
— Ко-косто... — аламнеде абунгадозь варштась аванзо лангс ды мерсь Ванине. Кирвазстизе папиросанзо.
— Кулось. Зяро майсесь пиштякась! Сакшнось тенек шабразо, Сёвонень Палай, — поладынзе валонзо Куля, — тердинзить калмонь чувомо. Пек энялдсь. Куш, келя, иля кулояк, калмамс а кинень. Велестэнть цёраломань а муят. Ну, мезе виде — виде.
— Со-содазь, молян, — лиссть Ванинень кургсто валтнэ човор качамо марто.
— Ну, молят... Молема. Ансяк, пелян, таго тарт-турт, тарт-турт пачкодят калмазырьстэ. Вана мезде тотнан... — нусманясто, пелезь мерсь авазо ды, теке ведь копордась, чатьмонезевсь.
— Ма-марсинь, а весть теде ма-марсинь! — эзть вечкеве аванзо валтнэ, машнетезь мерсь Ванине, стясь ды вырк лиссь, лавсадизе мельганзо кенкшенть — тусь лаймесэ ушодозь тевензэ прядомо. Аволь ламо кадовсь.
Менельксэсь эзь полавтово. Истяня, кода валске марто, ракси-налкси чольдерькай сырнень налсонзо чипаесь. Псиденть кекшнесть тикшень тастатнеяк, а маряви човине, цийниця вайгелесткак. Ансяк сэнь сёлмине нимилявтне мезекскак а путыть те псинть. Лип-лип, лип-лип-лип... ливтнить балягатнень велькска. «Паряк, чи-кавто кирдьсы, — ювк ютась Ванинень прява мелесь лугалангов ветиця янганть эскелямсто, — велявтнеса-костяса ледезенть. Ускомскак ули а берянь. Ванды калмамонь тевть, а вандыде мейле кайсема штемева. Чопоньпелев муема трактор. Пиземе илязо туе, пиземе... Вана мезде пелема. Алонзо понгониця тикшесь уш а истямо. Те, ловт, а тикше, лезэсь эйсэнзэ псакань пулалкс. Почкоди-арась — а кармавтсак... Те сонзэ тевесь. Менелень. Чудема варянзо, почкодиндеряйть, атулодсыть». Истя арсезь, Ванине эзизе редяяк, кода пачкодсь пеледензэ ламо ахолязь «уманзо» видьс ды кундась тевезэнзэ.
* * *
...Валскень ярсамодо мейле Ванине чатьмонезь валгсь кардазс, сайсь кшнинь койме, каизе лавтовонзо трокс, ды Алопень кувалт киванть сыргась исень меревксэнть топавтомо, тоначинь кудонь путомо. Кузвелень калмазыресь чувто потсо. Васолдо неяви виръпулокс. Аволь умок пиризь цицинасо. Натой стявтсть [162] кшнинь келей ортат. Совак, нолдатанзат апак кевкстне. Сон пекстнемат а соды. Крёсттнэ, кой-конат наксадсть, празь аштить калмонь марнэтнэнь ланга, лиятне чиремсть, прок венстизь кедест ды учить витицяст. Тия-тува вастневить вете ужине марто советтнэнь шкань пирамидат. Ули, маряка, истямо кой: крёстт а витнить, седеяк, — наксадозь, таштонть таркас, келя, од а озавтнить. Виде те? Кода меремс... Мекс-бути седе сюпавтне бажить путомс калмо лангс мраморонь, гранитэнь эли мезестэяк лиясто тешкс, сатозо кувать, содаст ломантне кулозденть аволь ве пингень перть. Те, арсеви, седе виде. Истямояк мель кирдеви: эрьва буесь калмси малавиксэнзэ малацек-малацек, ве таркас. Теяк виде. Секскак лиясто калмонь чувомсто чувицятне эртневить лия, умонь шкань калмос, понгонить ловажат-пакарть. А стака, ютындерят, редямс — «удыцятнень» ютксо ламодояк ламо шкадост икеле Тов туиця допрок од ломанть. Те кармавты ламодо арсеме.
...Кшнинь кенкшенть икеле учость, таргасть Чичав Палю, Рыжой Рудик ды Сёвонень Палай, Шабай Нюркань, кулыцянть, шабразо.
— Адядо тарканть невтьса, — мерсь сырькайнесь, ансяк кенерсь эйзэст пачкодеме Ванине, ды калмотнень юткова сонензэ содавикс, тикшесэ копачазь яннэванть тусь икелев. Цёратне коймест-мезест марто сыргасть мельганзо. Зярс мольсть, росань цивторкай ведьбайгинетне начтызь Пильгест кумажава. Чувттнэде, теке вирьсэ, летьке коштоськак. Те маряви чама киськесэ.
— Вана тезэнь, аванзо ваксс, — невтсь сурсонзо дошуз, ламо а кортыця Палай пельспразь крёсткенть лангс ды уш туиксэль.
— Те кода истя, Палай патяй, — мизолдозь кардызе сырькайнеть Рыжой Рудик зярдояк а рангиця, сэтьме вайгельсэнзэ, — тонсь содат, чувомо коймесь а карми, вельть модась коське, начтома...
— Теке мельсэнк, а ломань понат! — ацирьгадсь марязденть Палай, куш содась, «начковтомо» неень шкане чирь вановт а теят, чеерь пулосонзо а юхади. — Ужо эно, аштек, кулозь верьгиз сусковлинзить. На, кирдть!
Таркань невтицясь, машнетезь, шир-шир панжизе юдманзо ды венстясь лавкань ашо пря вина бутылка. Содась, секень вант, кармить вешеме, секскак эрьвантень венстсь пряка печть ды колмост туртов покш куяр. Эзь стувто саемс мартонзо цяркаяк. Шкадо икеле весе арсизе.
— Ды тень эйстэ келенекак а чевтемить! — автизе кургонзо, [163] сюкпрянь таркас ёвтась истят валт Чичавонсесь модас коймензэ сялгомсто.
— Тон, цыган тюс, а содат пештевема! Саты. Прядсынк — кандан, — алтась авась ды ювк-ювк тусь, теке метьказ, эль келязь, крёсттнэнь-марнэтнень юткова тей-тов менчевиця яннэванть.
— Ну ме-мезе, цёрат, у-ушодтано? — кода-бути сынсь, апак арсе, прасть Ванинень кургсто, кувтолк мерсть ашо пеензэ, валтнэ.
— Ушодтано? Чувомо эли кандозенть чамдомо? — низельдезь, нарьгазь-згилязь кевкстсь Палю ды лепштизе суликанть, теке някинензэ, мештезэнзэ.
— А мезть кевкстнемс! Автяйненьгак содави, мейстэ ушолевить покш тевтне. Эно озатано, — автизе пейтеме кургонзо Рудик, сялгизе коймензэ ды васенцекс озась луганарсо вельтязь маласо калмо марнэнть лангс. Ваксозонзо мусь тарка Ванинеяк. Палю кадовсь стядо. «Пирэнь» ветицякс. Васенцекс начтызе кирьгапарензэ сонсь. Сусксь пряка печттенть ды мельспародонть вадяшизе пекензэ. — Паро-о-о...
Нуртясь Рудикнень.
— Седеяк паро-о-о... — сеянь вайгельсэ, моразь таргизе тона валонть. Чамсь бутылкась сельгень прамс.
— Ну, ней тевесь лия! — верьга вайгельть, прок мода потсо «удыцятнеяк» марявлизь ды полавтовлизь бокаст, витевсь мелезэ, паро ёжосо серьгедсь Палю. — Монень исяк байтяк понгонесь. Аволь кода ней. Арсинь, течи валске прям лазови. Эрь вана, эзь лазово, оймавтовсь.
— Моньгак, — пряка палонть каволямсто, турвасонзо цямкаезь, поладызе матразь вайгельсэ кортамо лувонть умок апак нара, апак судря якстерть-тюжа черь Важдай Рудик.
Ванине чатьмонсь. Сон исяк чоп тевсэль — тикше ледсь-анокстась. «Коськстэ» чизэ ютась. Мезе ансяк авазо кандтнесь валске марто ледеме туемадонзо икеле. Ульнесь мелезэ чопоньпелев чопавтемс ве таркас, ды чаво зептне эзизь нолда. Сынтемест, мезеньгак апак тее, кие теть нурти! Рынок, келя...
— Мезе, у-уставатано? — ледстизе чатьмоницясь. Валтнэнь ёвтамсто нежедсь кавто кедьсэ кумажанзо лангс ды ливчанясто, прок од цёра, лутызе удалксонзо тикшинесэ вельтязь марнэнть лангсто.
— Ужо, иля пстыля, кенертяно, — кардызе Палю. — Чей, аволь теле. Чувсынек. Ташто калмоськак оно невтезь тарканть вакссо. Маряви, «инжекс» варштатано. Шожда карми.
Рудикень васоньпеельсэ наразь пря ды судалкс черензэ, сакалонзо, Якстерть мерить. Мекс эзизь лемде велень згилицятне Чеменькаекс эли Чентяекс? Парт валтнэ, эрзянь. Сынст таркас — ачарькодевикс... Рудик. Косто саевсь, кие плестядизе, мезде сон корты, кияк а соды. Истя тензэ педясь те «чопода» валось, ламот Юртай алкуксонь лемензэяк а содасызь. Рудик ды Рудик. Нурькине, шождасто ёвтавиця, пшти. Секень вант, тень кувалма айгизеяк алкуксонь лемензэ.
Урендясь-служась Рудик флотсо. Аволь косояк — флотсо! Тов, содави, дёкушт, лавшо понкст, пелягайть эзть сайне. Улест цёратне дёр-одёрт. Лавтовонзо келеельть, сэрьс аволь сэрей, аволь алкине, кедь тулгонзо налксезь налксесть. Аволь цёра — мараля! Кодат чама тюсозо, сельмензэ-турванзо, черензэ иляст уле, тейтерень вановттнэ ваксканзо эзть ютне. Вана истямоль Важдаень Юрик-Рудик! Иневедьга шатамодонзо мейле сась кудов, важодсь вейсхозсо. Сеске тонадсь копорямо.
Умок те ульнесь. Ней? Течи? Тонсь вант! Ансяк эскельдясь [165] ведьгементнень трокс — атине. Лавтовонзо, теке кияк лепштинзе, теинеть, новольсть, сакалов чаманзо керсизь сормсевкст, прячерензэ сурсеме, арсезеват, эзть некшнеяк. Кургозо пейтеме. Тевенть, ков тердсызь, теи састыне. Эзть кадово а вий, а ливча-нячи. Молемстэ вить пильгензэ ускозь уски.
Важдаень юртонь прявттнэ, Рудикень тетязо-авазо, умок тоначисэть. Ниле тейтерь ютксо вейкине цёрынест лангс пельсть, чачома чистэнзэ саезь, лексемасткак. Юрыне ды Юрыне. Топавтсть эрьва мелензэ, вешеманзо, ордалеманзо ды иердеманзо. Суронь пачк вансть ланга лисниця эльнеманзо-кутякалеманзо лангс. Истятольть тевтне стувор, эзем алга чийнема шкастонзо саезь. Ней... Мезть теде кортамс! А тевть-мелявкст, а ни, чарькодеви, а тетяй мерицят, а ават. Весе, весе полавтынзе «палыцянть» лангс. Максызе сонензэ весемеде, кода кортави, питнеенть — шумбрачинть.
— Кунсолыдизь, ней тевс, — Палю путсь пе лабордоматненень. Коймесэнзэ ютавтсь-керясь буй, цётызе, кува чувома, ков ёртома луганаронть, ков — моданть, ков — сёвоненть. Теке басом кармась чувомо. Чатьмонезь кундасть поксарямо ялганзояк. Тевесь сыргась.
Чикуншка малава важодицятнень содавтынзе «шожда пильге», весенень паронь арсиця лагоря рунго, мизолк курго Палай сырькаесь. Латкось аноколь. Чувицянзо аштесть озадо секе марнэнть лангсо, кортнесть теде-тонадо, таргасть. Сыцясь мольсь седе малав, варштась теезь тевест лангс, вановтсонзо ютась калмонть потмакска, онкстызе текекс кувалмонзо-келензэ. Эзь ёвта валгак. Мелезэнзэ, неявсь, тусь.
— Истямо кудо «чапинек», арсян монськак эйзэнзэ зярскак мадемс, — вастызе-кецнявтызе Палю аванть шнамо валсо ды сеске видьстэ коняс: — Алтазенть туик?
— Туия, туия, раужо анамаз, — музгордезевсь, кода весе аватне, кежень невтнезь Палай сырькаесь, путызе юдминензэ мода лангс, панжизе ды таргизе эйстэнзэ учовиксэнть. — На кирдть!
— Сускомс мезеяк муят? — ледстизе конась-бути эйстэст.
— Муян, сускомскак муян, пазонь ломанть, — мерсь авась та-кода чумонь марязь, кансткестэнзэ кой-мезень таргамсто, сонсь арсезевсь: «Видеяк пазонь, сыненст а эрявить сюпавчить, кода ламотненень, конат мейсэяк а пештевить, сынь а содыть сельмень сявадома...»
— Те ва-вана тев! — макссь вайгель, кортазевсь Ванине. — [166] Ва-вачодо, Палай патяй, кулокшнынек. Учотано — а-арасят, учотано — а-арасят.
— Минь уш, истя улезэ, арсекшнынек: кудов тенк молемс, — чевте, беряньстэ марявикс вайгельсэнзэ, тандавтнезь, поладынзе ялганзо валтнэнь Рудик. — Тон, теня, пешторозот кедьгине кодамояк эзить путне?
— Я, допрок стувтыя максомс! На, кирдть! — таргизе Палай патясь юдмастонзо истя эрявикс верень псилгавтомсто кедьгиненть ды венстизе Рудикнень. — Эно мон сырган, тевть, учодо.
Палай тусь. Цёратне ойсесть икелень тарказост.
— Ней учомскак, истя улезэ, шожда карми, — чапизе Рудик «суликанть» панжомсто. — Истя, цёрат?
— Кевкстнят...
— Тон седе курок эно...
...Калмонь чувицятнень, колмонест алятнень, озавтызь башка. Кой. Сонзэ коряс жо каясть тенст васенцекс сывельям. Стуворпрявтокс, ветицякс, эсь ютковаст аравтызь Чичавонсенть. Сон седе дока тень кувалма. Машты.
— Истя у-улезэ. Тон, Па-палю, ветяк кой, — мерсь Ванине ды венстизе тензэ бутылканть. Тона покшкавтнеме эзь карма, саизе керш кедезэнзэ ды витьсэнть, алдо эшкезь, ливтявтызе потомксонть. Нуртнизе стопкава колмов. Апак глянкае — калмамонь кой — нуртязенть сеске ильтизь ков эряви. Кундасть ямдо коршнеме. Пси. Лемев. Тантей. Седееть витеви.
Кашадо икеле «прявтось» вешсь омбоце пельлитрыне. Палай сырькаесь чеченанзо стявтнеме эзь карма, боцк путсь икелест омбоце. Сеньгак кончтамо шкас чемердизь, сеяк муизе тарканзо. Чамдызь икелест путозь каша ваканонть.
«Андыця ёнксось», ванан, а капши. Косо колмоцесь?» — арсезевсь итьмиця Палю, стопкава нуртницясь.
— Палай патяй! Варштака ёнонок, — эзь кирдеве, эзь сато нардезэ, прясонзо кирдевикс меленть теизе марявиксэкс.
— Мезе, Палю? — эскельдясь ваксозост яксяргокс чиремкшнезь якиця, лагоря рунго, тень лангс апак вано «шожда пильге» авась. Чамазо келей. Турвасонзо свал эль редявикс мизолкс.
— Содат мезе, Палай патяй? Калмонь чувицянь профессиясь ней Кузвелесэ — васень профессия. Дефицит. Содат? Содат. Секскак макст мартонок колмошка, эрьва пряс — вейке. Нейке тутано. Кода тон арсят, кундама лемензэ Нюрка сырькаенть? Кундама. Виде. Секскак...
[167] Палай эзь правто валгак. Сон аволь кортакшовтнестэ. Ансяк лепштинзе мизолдыця турванзо. Содась: лиякс неть «педлий тикшетне» а кшувавтовить. Аноколь нилеяк максомс, ансяк кинть тенст невтемс. Велявтсь нерницятнестэ, совась моргас ды цяр путсь икелест колмо «ашот».
— На, тонол, кирдть! Лиякс эйстэнк а менят. Ней — кшу тестэ. Азёдо.
Чувицятне эзть карма учомо кусляткак, мельцек-мельцек, пупорькшнезь, лиссть кудостонть.
...Ванине кудов эль пачкодсь. Валаня асфальтканть молемстэ зярыяксть пракшнось комадо. Марявсь, уш а стяви. Ялатеке, кедензэ лангс нежедезь, виензэ путозь, лексезь-пувсезь, лутнесь рунгонзо кинть лангсто ды, тей-тов тарт-турт кайсевезь, поладсь кинзэ. Юты зяро-бути, таго пилытнень илыкест маштыть, таго новоли, таго пстылямот-стямот ды аволь нардев эскельдямот — лып-лап, лып-лап — кудо ёнов. Пилытнень виест торлаяк арась, а кирдить, а кунсолыть, модань кияксось сындест виев.
Зяроксть пракшнось, зяроксть стякшнось, Ванине а соды, эзь лово. Човоркст пряудемсэнть, тортат. Кода-бути кирдевсь мельсэнзэ вейке: кудов, кудов. Сон аволь азгун, аволь лыткай, аволь кудонь кадныця Рудик, сонзэ, Ванинень, ули эрямо тарказо, эсензэ пизэзэ, кардазсо скалозо. Сон аволь, аволь Рудик... Кудозо сонзэ ули, авазо, секскак — кудов, кудов...
...Валскестэнть, эль а чоподава, Ванине ношкстась сонсь а соды ков: Чичавнень, Дроба Вованень, Дунайнень, Важдаень Рудикнень эли, паряк, Солаень Миканень? Оно зяро ялганзо! Каня превсэ кирдеви, кинь кедьсэ меельцекс «рестасть»? Видьстэ меремс, кирдемскак а мезть — муемс, ансяк муемс, ну куш пенчешка, мадстемс потсо гувныця толонть. Мезеяк а эряви, мезеяк, ансяк витемс, тохмадемс рунгостонть рангиця орманть. Ютынзе ялганзо-оянзо весе. Лездась Дунаень Шурик. Симицяяк, вай-вай, ялатеке превензэ а симни. Машты, дейман! А стяко Кузвелесэ мерить тензэ Дипломат. Ёжов. Кодамо илязо лисе аванькс тев, яксевтьсы лиянь кедьсэ. Сонсь свал сулейсэ, свал кирди ютко. Кодамо илязо уле Шурик, кажос ялганзо эзизе кадо, мусь та-косто мезе эряви, оймавтызе майсевицянть орманзо.
Куроксто Ванине седе паро, одс вельмезень ёжосо мурдась кудов. Прась, мейсэ ульнесь, нуласо-валасо копачазь кудыкеле таркантень ды матедевсь, прок отьмас ваясь, кулось. Удось чикуншкас. Сыргозстизе атякшось. Панжинзе сельмензэ. [168] Кунсолозевсь. А куш а каш. Ледсь мелезэнзэ Шабай Нюрка сырькаенть калмамозо, калмонзо чувомась, мейле чувозь латконть марамось, снартнесь вельмевтемс кудостонзо лисемадо мейлень лытамост. Чик, ды ледстнематне капшазевсть лия янга, стясь икелензэ Инелей чиресь, лаймесь, тикшень сявордовкстнэ. Велькссэст сэрейдеяк сэрей, потмакстомо сэняжа ванькс менелесь, эзганзо састо-састо уиця пси вановт чипаесь ды ашо пель панкстнэ. «Колмоце чи ледезем коськени, эряви велявтнемс. Секень вант, штемескак кайсема...» — сась мельс.
Истя ледстнезь-арсезь озась коникенть чирес, ёзызе човонензэ ды стясь. Совась кудос. А куш а каш. Чаво. Ёрвалдызе симемадонть таргозезь, теине сельме, сакалов чаманзо. Кельме ведесь аламнеде полавтызе ёжонзо. Лиссь кардазс. Саиксэль ангорят. Таркасост арасть. Эзть муеве. «Авам, бешоконь, ковгак теинзе», — сась мельс. Савсь саемс сянго. Панжизе кардаз кенкшенть ды сыргась арсезенть топавтомо. Эзь ильведеве, лиссь арсеманзо коряс: авазо прядсь велявтнеманть. Сон ангоря недь песэнть апак капша, ингельёнт-мей кайсесь коське тикшенть. Видьстэ меремс, теемскак тень аволь эряво, пачк коськсь. Ванине апак корта верендясь, илязо маряво истя симницянь ормась, сянгсонзо пурнамо, штемес кандтнеме. «Коськсь, кошксекс кашторды, летьке сэльнедеяк, понгиндеряй, пелемс а мезде. А «кирвази», коськи... — кирдсь мельсэнзэ сянгонзо марто тей-тов якицясь. — Чопоньпелев, а почкодиндеряй менелесь, ускома. Сави вешнемс трактор. Кинень пшкадемс? Дипломатнэнь. Кинень лиянень? Сон яксевтьсы тевенть. Кеман. Содазь, аволь «мазый сельмень» кис. Сеске мери: путт! Курок авань пенсиянзо кандсызь. Максы. Эно кода? Трактористэнтень пандома ярмаксо. Се икеле ченькссэ пандтнесть, икеле стопкась «валютакс ульнесь» — тевтнень яксевтсь, ней илатне-кирдатне, кадык аволь педе-пес, полавтовсть, эрьвась норови амзордамс чондат. Венсть апак корта. Полавтовсть, мерема, полавтовсть шкатне икелень коряс...»
Ютась час, омбоце. Ават-цёрат тевест прядызь. Аламнеде озазь коське штеметнестэ Ванине вачкась зярыя апокш капат. Истя седе ён, седе курок кепсеви тракторонь крандазс. Педе-пес ушодозенть апак прядо Ванине луньк-луньк — васолдо содави молевксэзэ — тусь тракторонь ды лездыцянь вешнеме. Дунаень Дипломат, Шурик-Мурик, кудосоль. Те уш пароль — алтась муемс «крандазнэ». Мейле чийсь Чичавнень. Палюнь кодамо-бути лытагай варма ковол салызе. Кудосо арасель. Вешник азё! Эзь [169] стардово Рудикак. Ней ков? Пачкодсь Солайтнес, Микайгак эзь понго. «Кува, идемевсь саевлинзе, якить-пакить? Ков орголесть чаулатне? Превс а саеви... — арсезевсь вешницясь Солаень аволь кудосто, варясто лисемстэ. — Эно седе ламотне, видьстэ меремс, а эрявитькак. Колмонекак изнясынек вачкамонть!»
«Варя»... Солай Микаень эрямо таркадонзо, алкукскак, лиякс а мереват. А велькст, а ацамот кониксэнть, а кияксонь шлямот-тенсемат. Эзганзо эскелямсто, секень вант, пупордят-прат. Мезть ансяк а усксевить! Голландкань-каштомонь почкось, неяви, потомсь содтонть, секс паро ладсо а поти. Уштомсто толось «палси» голландка кургонть верьксэнзэ, кудось пешкеди качамодо. Секс потолокось, стенатне вельтязь суронь эчксэ содсо. Серьгедят седе виевстэ — пры лангозот раужо лов. Стуворонть лангсо апак шля-ёрвалдо, сод потсо кастрюлят-вакант, пенчть... Мекс-бути ютксост ашти-оймси кедень рудазов каладозь кем. Эри, лемезэ, ломанесь... Цёраломанесь свал цёраломань. Сон пек а правты кирдемс уряд, ваньксчи, ламот а вечксызь тенстенть ды начко нуланть. Те — эсь мельсэ-превсэ эриця. Сестэ мезть кевкстнемс «гуй ведень» вечкицянть? Мезть учомс пельдензэ?
Кудонть, икелень чиденть манейстэ арсезь, путокшнызе ведьгеменьшка иеде икеле Микань тетязо, Солай Сёдор. Мелявксонь содыцяль цёрась, чевте седей, ванькс ойме. Урьвакстсь. Чиявтызе велень мазый, тевень вечкиця, пеедькшниця тейтеренть, Шурань. Мерсть тензэ Лёса. Пароль, мазыель, эрьва ёндо дошузоль. Каня арсекшнесь Сёдор урьвакстомстонзо берянде? Содавольгак, вечкевикс «цянавнезэ» Лёса... Иень ютазь чачтась. Цёра. Лемдизь Микакс. Омбоце эйкакш, зяро Сёдор эзь кармавто, эзь нерне, эзь нолда. Стака, келя, вейкенть мартояк. Апак удо веть, муськемат-човамот, кирьгава эрьва кодат мелявкст... Мезекс неть стакачитне? Ды тусь шожда киява — копорямо. Васня чуросто-весть — ярсамо молезэ, мейле седе сеедьстэ. Шкань ютазь... Мирдезэ Сёдор вий путсь кардамс. Мезе ансяк эзь тее, кодат кортамот эзь корта—стяко. Майсевсь истя кувать, аволь ие, аволь кавтояк. Мезе теемс, ков молемс? Кукольдемс дюм чопода анксемас? Килькш каямс? Арась, Сёдор тень таркас путсь пелькапряшка кудыне ды ютась эйзэнзэ эрямо. Сонсь. Ськамонзо. Цёрынезэ кадовсь симагай аванзо марто. Тетязо ялатеке бажась пирямс сонзэ апаротнеде. Косто, бути васень «тонавтыцякс» кадновсь чапамонь вечкиця авазо? Нулгодьксчитнеде, тюрематнеде, вейкине эйкакшонь кольневтнематнеде цёрынесь кассь, содави, аванзо ёнов [170] молицякс, сонзэ «тевензэ» поладыцякс. Сёвноматне-эрдекстамотне, кудосонть молиця нулгодькс тевтне вишка пингстэ саезь мерькасть пакшиненть оймензэ. Истя ютасть иеть. Сась урьвакстома шказо. Чиявтсь весть, омбоцеде. Кадовсть тетявтомо эйкакшт. Тетяст ней, Мика, — берлогань ды берлогасо эриця.
Микань авазо кулось «кайсемадонть», кудос эль апак пачкоде прась ки чиресэ кирмалав потс, ды теке неевтезэ. Тетязояк седеень сэвиця ризкстнэде, майсематнеде шкадо икеле тусь вишка кудынестэнзэ Тоначив.
Яла кортыть: эрямонь лувсонть косто-бути верде максозь уцяска арась, эрьвась, келя, сонсь чапи вандынь ды вандыде мейлень эрямонзо, сонсь коды-сты эсь уцясканзо. Кой-кодамо видечи, паряк, кирдеви те меревкссэнть. Теке марто, ламо-мезе ломаненть эйстэ а ашти, аволь сонсь ацы ды витни эсь эрямо кинзэ. «Ацы» тензэ... УЦЯСКА-сь. Сон, васняяк, — эйкакшонть авазо, тетязо. Аволь чуросто сынь, аволь кить-бути, трясызь-кастсызь истямокс, кодат сынсь. «Тетят-ават а кочксить ды а кочкавить», — тень эйсэ ёвтави весе, неть валтнесэ панжови «уцяска» формулать зэмезэ. Кода мерекшнесь умонь-умонь ве фильмань откересь-героесь? «Лытыцянть цёразо карми лытыцякс!» Текеде корты лия содавикс валмеревксэськак: «Умаресь пры умарьксэнть малас». Эрси, содави, лиякскак. Ансяк сеедьстэ лисни самай истя... Солай Миканень а кона ёндо ульнесь учомс «ломанькс», чанстте пешксе эрямо. Неень кинть тензэ ушодызь-ацызь авазо ды тетязо чачома чистэнзэ саезь. Солай Лёсасто кассь Солай Мика, симагайстэ — симагай. Велесэ мезеяк а кекшат. Сась весть сыре Сёдор цёранзо-нинзэ содавтомо. Панжизе кенкшенть ды абунгадсь: киякс куншкасо Мика цёразо аванзо марто «налкси лишминесэ». Симагайть... Мезе лия пельдест учомс...
«...Ней ков? — ансяк прядовсть ледстнематне Микайде, таго тевде арсезевсь Ванине, — ялгат лемест... Ков срадсть, паряк, сынськак а содыть. «Дипломат», мон, авам, — кайсесь превсэнзэ мекев самсто лездыцянь вешницясь, — кодаяк уш изнясынек». Ды — на вана! Вастовсь якстере сакало Рудик.
Якстере-ожо менельпрявтось арси валгомо. Саты. Чоп псилгалесь. Прядовсть тевензэ. Модачиренть велькска лехакс таргавсь, толонь тюссонзо тандавтниця пель. Кортыть, манейчис. Цёратне капшазь вачкасть крандазонтень коське, медь чинесэ качадыця тикшенть, Вейкесь вере, крандазсонть, путнесь таркава, шешксь, кавтотне кавто ёндо кепсесть тензэ сянгсо, бажасть [171] понгомс пильгензэ малас, седе ён улезэ сравтнемс-шешкемс. Курок вачкавсь ламо. Вачкицянтень, Шурикнень, савсь валгомс — а нолажтомс крандазстонть тракторонть лия таркас ютамсто.
Тевест алятнень аволь мольсь — ардсь кополсо. Вачкасть эйпаро улав. Куроксто сыргасть велев. «Техникась» икелев, сынсь — Ванине, Дипломат ды Рудик, ангоряст-сянгост марто — мельганзо.
Куля самозост пурнась кой-мезе ярсамс. Рестась модамарть, путсь валскень чапавтозь, лембе каштомсо кирдевть чапамо ловсо, керсесь помидорт-чурькат. Танстень кис почодынзе салсо, човоринзе чиньжарамо ой марто. Керсесь кши. Путсь лакавтомо чаекс ведь. Музгордезь, безардезь мусь «ашо пря» суликаяк. «Ков молят, сави. Текень кис сакшностькак Рудик ды Дунаенсесь. А эсенсесь? — скирдызе стуворонь пурныцянть седеензэ, ды сон кувакасто таргизе оймензэ. — Тракторонь азорось, се эно кадык, кургскак а сайни, сенень ярмакт. Зяро, содамс, карми лутамо?»
Сявордызь ускозь андомкаенть пире кенкш икелев. Ванды Ванине кандтнесы ды поладсы капанть. Ней вана азоравась серьгединзе ярсамо. Нолдызе, пандсь зяро вешсь, таркторонь азоронть. Мезе тусь каваницянть мельс, симсть аволь апештевемга. Пря ветясть та-кода питнень содазь. Ванине кайсесь-нуртнесь, кандтнесь азоркс. Те мезень симема — бутылка колмо пряс, налксема. Келетькак а начтови. Ливчакадомадо кортамскак а мезть! Виде, Дипломатнэнь савсь максомс мартонзо. Сон уш эсензэнть а менстясы! Муи валт, муи, машты ломаненть потс совамо. Кортавтсы эрьвань. А стяко истя лемдизь, а стяко Кузвелесэ ськамонзо кандтни истямо «покш» лем. Виде улевель, ведунгак тензэ меремс! Эли муниця... А ней — Дипломат! Кода пря а шнамс?
Эрьвань эсензэ молевксэзэ, кортавксозо, вановтозо, тюсозо, эрьвань эсензэ орманзо, эсензэ эрямонь паксязо, уцясказо. Секскак кортавтомс тень эли тонань — пежеть.
Секень вант, лиякс касоволь-теевель те самай «ведунось», авольть «ильведькшнеяк» тетязо-авазо. Сынст кувать арасель эйкакшост. «Вешнесть» кувать. Кинень ансяк эзть пшкале, ков эзть яка-ардтне! Стяко. Окойники, муизь сень, кинь вешнесть, Шурикень. Каня сон чумось, истя лиссь? Кецнематне эцесть Дунаень юртс кенкш алга, верьга, валмава, кудопотс эзть кельгекшне: зяро иеде мейле — цёра! Тетянзо-аванзо кургсто теке марявсь: Шурик ды Шурик! Потякшокс улема шкастонзо саезь топавтсть эрьва, мик чиньжарамо лукшкень турошка, стяконь мел ензэ-вешеманзо. «Си-симемам сась!» — цийнезевиль, [172] пештевиль кудопотмось вайгельдензэ. Сеске пиильть мельцек-мельцек ваксозонзо чачтыцянзо.
— Мезе теть, някинем, мезе? Ловсыне? Ламбамо чайне?
— Авай, пяник мелем, — кольнезь, «р»-нть нолдазь вешиль пряник.
— Вана теть, сяткинем, пяник. Ламбамо-ламбамо. Нолсек, — кенериль авазо каванямонзо.
— Те монень а эяви, — кольнезь-иердезь таго веши кодат-бути, ансяк сонсь соды, ламбаськайть.
— Эно кодамо, чипайнем?
— Якстее ла-лангине!
— Истят ней, Шурик, арасть.
— Лавкасо улить. Ямадо!
— Атя, а атя, косат? Чийнек седе курок лавкав. Рамак килошка якстере ланго пряникть, — каяты кудонть келес «чипайнень» аванзо пурьгинекс зэрниця вайгелезэ. Ды «атясь» шкань апак таргсе дубор-дабор сырги, кодамо илязо уле ушось, лавкав.
Ветешка-котошка иень перть, ды, содави, мейлеяк, прявтокс кудосонть ульнесь Шурик. Натой тетянзо лангсояк. Урсндясть, сюконякшность икелензэ тешксэнь-чапинень апак сода. Аволь ламо шкань ютазь тетязо чарькодекшнызе, мезес ветясть ды ветить певтеме цильнематне, буень а содыця анелямотне. Чарькодекшнызе седе тов теньгак: мезеяк уш а теят, мезеяк а витят, а полавтат. Паро куш Пазось пурнакшнызе сонзэ шкадо икеле, эзь саво, сюк-сюк, неемс тензэ Шурикень аксунгалеманзо ды седе тов нулгодькс, седеень пидевтиця «номерэнзэ». Паряк, вейкесэ авольть уле янксеманзо — вечкевикс цёразо, кодамо илязо уле, эзь понгоне пекстнема таркас, те улевель тензэ оймамо ёжокс.