Ванине (2011)/5
| ←IV пелькс | Ванине (2011) by , edited by Разгуляева Т. В. V пелькс |
VI пелькс→ |
| Нуянь Видяз. Ванине: роман. — Саранск, 2011. — с. 85—101 |
[85]
| V |
Кортыть: шкадо виев зыянонь-апаронь очобиця мезеяк арась. Седеяк лезды сон седеень-оймень орматнеде. Шка... Сон а неяви, а маряви, арась сонзэ танстезэ, арась чинезэ. Арась оймезэяк. Сон а ярсы, а сими... Те лангс апак вано, шкадонть виев мезеяк арась. Модалангонь ды менелень тевтнень теи киньгак апак кевкстне, теи чатьмонезь, ды виень апак путо. Сонзэ а кунсолыцят арасть. Сон чачты, сырелгавты, куловты, полавты, касты, ормалгавты, пичкавты... Паряк, Шкась улияк Пазось? Лиясто цяк сы ломанентень. Арси, сон домка, кельме латко чиресэ, седе тов а ков, пе. Я, юты шка, ды ормась, а кемевияк, полавтови шумбрачинь кеняркссо, «пенть» таркас кази поладкс, мезеяк од, оймень эждиця.
Шкась лездась Дораень Куляненьгак. Ковонь-кавтонь ютазь ёжонзо марямо кармась аламнеде лиякс, седе чуросто кармась сакшномо онозонзо Иван, седе чуросто марсевеме вайгелезэ, ушодсь, кадык чуросто, кургонзо содавтнеме мизолксонь кондямо. Кода а мизолдомс, зярдо сельметь икеле, элесэть, аволь пургонды, лопинеть нолды истямо мазый тарадке! Путсак лавсес, паро ёжодонть, бешоконь, ушоды ахолямо кеднесэнзэ, брикстиямо эчкине пильгинесэнзэ. Шкань-шкань кулдорды. Гулькине! Ванат вановлить! «Кодамо балягине тень казсь Иван, тундонь балягине», — а весть сакшность неть кецневтиця валтнэ-мельтне превезэнзэ. «Потякай эйкакшось — апак удо веть», — кортыть, тандавтнить лиясто аватне. Арась, истят веть Куля а соды. Лиясто, виде, савкшны вень куншкат стямс. Ушоды велявтнеме, носкомо, лиясто авардезеви. Кажось апокш. Максат поте эли полавтсак коськинесэ алкскензэ ды эйкакшось општ мери. Лиясто весть-кавксть савкшны люкштядемс лавсенть. Эрси истяяк. Каня те стакачи — чуродо весть сеземс удомат? Сень кис зяро валдо ёжомарямот, зяро эрьведемат рашты седейсэть! Васняяк андомстонзо. Педявтсынзе турвинензэ потезэть ды ушоды носкозь потямо. Марязь марят, кода тонь ламо иень перть таштазь виеть чудить мештезэть лекшкадозь эйдинентень. Потямодо мейле, зярс а матедеви, теке гулькине кулдорды.
Куля лемдизе эйдензэ тетянзо лемсэ — Ваня. Иван Иванович. Истя рузокс. Апаро, седеень сянгордыця тев, мерема, лиссь велень Советсэ цёрыненть чачома чинзэ тешкстамсто. Эрявсь, содави, сёрмадомс фамилиянзо. «Кода?» — аймельгавтызе, [86] пицизе кевкстемась Кулянь. Тетянь кувалма, кортамскак а мезть, — Каргин. Шожда меремс! Тетязо аванзо марто эрясть вельсоветсэ конёвсо апак кемекста, апак чиявто-урьваксто. Те ловови коень колсемакс. Секретаресь, кода улемс эзь сода.
— Сави, Куля патяй, тешкстамс сонзэ Вачаевкс, — мерсь покш стуворонть экшсэ аштицясь, сыцянть коряс ламоксть од ды вельть эчке сёрмалицясь, конань аравтызь истямокс аволь умок.
Куля аштесь икелензэ стядо. «Озак» валонть эзизе маря.
— Те а виде. Эйкакшось Каргинэнь пельде, — пелькстазевсь, эзь арсе потамо лемень путовтыцясь. — Секскак кандтнезэ тетянзо фамилиянть. Ансяк истя.
— Кода меремс... — кавтолдозь ёвтынзе валонзо ды чатьмонезевсь комсьветеешка иесэ «попось»: валдо чама, допрок «пиже» аваломанесь.
— Каня мон истятнэде — а содангак кинь пельде? — токавсь Кулянь каштанчизэ, мик лыказевсь, полавтызе чалгавксонзо, ды якстерьгадсь чамазо.
— Мон, Куля патяй, истя а арсян...
— Ну, мекс эно кирдят мель сёрмадомс Вачаев? Кодамо сон Вачаев? Сон — Каргин... — текень содась цёрыненть авазо.
— Вана мезе, гайневтянгак «верев», прявтон туртов, — лиссь стакачистэнть секретаресь. Саизе, теке басом, телефононь почконть, кочкась эрявикс номер.
Мезде кортасть, мезе мерсь «начальникезэ», содась ансяк конёвонь тевень ветицясь — артозь турва, ашо почаня пря авась.
— Мерсть сёрмадомс Каргинэкс, келя, кода авась мери.., — оймавтызе Кулянь нупалень прявтось ды кундась эрявикс конёвонь «пештеме».
«Лыкамс, лыкамс теть эряви! Якамс-пакамс... Ну, ков истя келейгадыть, ков?» — арсезевсь стуворонть тона ёно аштицянть лангс ванозь Куля.
Кода илязо уле — стака, шождыне, нусманя, ризкс, куш прят стенас чавтт, черть раздек, — шкась таргизе Кулянь седейстэ сыявтыця сардонть. Эзь правтово кажонь даволонтень. Сюкпря теть, Шка! Зяро паро, мейсэяк а онкставиця, мейсэяк а лововиця паро теят кедькоморсот кирдевиця эрицят туртов. Сюк, Шка! Тонстеметь, маряви, аволь эряво эрямоськак. Тон сонзэ чачтыцязояк.
Чачтома чистэнзэ саезь, Кулянь эрязь чинзэ-иензэ, телензэ-[87]кизэнзэ явовсть кавтов: Ванинеде икеле ды мейле. Ванинень моданть лангс самонзо марто весемесь велязевсь сонзэ перька. Кудосонть Кулянь таркас азорокс теевсь сон, мазыйне, теке налкшке, цёрынесь, топавтовсть вейкень пес васняяк сонзэ мел ензэ-вешеманзо.
Аволь шождыне Кулянень. Вант ды вант тякат мельга. Мадстема, андома, вельтяма, муськемат човсема... Сюлмазят мартонзо а юкстевиця сюлмосо. Теке марто «ускомат» авань ды цёрань тевтне. Ялатеке верьс ёзыця сивексэкс сынь эзть маряво, истямокс сынст эзь лово, тейсь та-кода апак редя, шождасто ды мелень витезь. Лиясто сакшны, котьми мартонзо, лезды, зяро лездави, авазо. Тенси-нардтни, лопавтни-муськи... Весемеде стакакс ульнесь скалонь кирдемась. Тикше Иван анокстакшнось. Теленть, а мезть кавтолдомс, ютавтсы. А вана сы иенень тикшень анокстамодо иля арсеяк. Кие карми пелюмасонть ахолямо, тикшень костямо-ускомо? Секскак Куля арсезевсь скалонть миемадо. Кирдевсь сеяк превсэнзэ: кода ловсовтомо трямс эйкакшонть? Рамсемс кинь кедьстэяк? Майсевтсь лияськак: кода улемс ферманть марто? Шка лисемс важодеме, учить эйсэнзэ. Учомс учить — кие лангс кадсак эйдинеть? Авать? Таго мелявкст, таго тевть, тевть... Чаракадат.
* * *
Ютасть вете иеть. Ветексть пачколесь Кузвелес, ветексть невтнизе коронзо телесь, ветексть кшувавтнизе сонзэ лембе вановтсонзо шалныця тундось. Ней ожо пулосонзо юхаи, азгонди виртнева-пиретнева, пря шны мазый тюссонзо сёксь. Васняяк сыреждеме кармасть укштортнэ, лангозост ванозь, аламонь-аламонь кундасть текекс оршнеме килейтне, пойтне, пекшетне... Пертьпельксэсь, мереват, каштангали, налкси ильтемань ожо, якстере ды тюжа тюссонзо.
Ванине сэрьс-келес велявтсь эйпаро цёрынекс, Ванякс. Ялатеке авазо лиякс меремадо эзь арсеяк — Ванине, ансяк Ванине. Седе, келя, важовсто гайги. Тонадовськак, мерема.
Оймамо а соды. Чийни, кирнявтни, кутяксни. Корты лодорсо. Човине вайгелезэ ливтнезь ливтни кудованть. Эйкакш, эно кода лиякс? Истя сон, яла кортыть, — касы. Те вадря. Теке марто, вант ды вант мельганзо, кодамояк зыян илязо лисе, илязо эце козоньгак. Сынст теке мазыст: весе эряви содамс, никсемс, неемс, варчамс, токшемс. Ды те пек паро! Эно кода лиякс теевемс [88] ламонь содыцякс ды шумбракс?
Нилешка иеде икеле, кадовсь Кулянь превс, зярдо Ванинень эрямо тарказоль лавсь, зярдо тонавтнесь стякшномо ды ушолесь, зярс ниле пильге лангсо, якамо, ваномс, якамс мельганзо седе шождынель.
Кулянень ферманть савсь кадомс. «Чумось» — Ванине. Ков тейсак сонзэ? Мартот сайнемс? Арсемскак а мезть. Кандтнема бабанстэнь.Теяк а тев. Валдаень эрить васоло, ды сырькаеськак уш аволь одтнэде, стака тензэ. Аволь иень-омбоцень эйде. Кизна, коське шкане, эно кодаяк ветневель. Кода улемс сёксень чопода рудазов шкатнестэ? Кода тельня? Снартнесь муемс ваныця. Велесь покш, а истямо ломань эзь муеве. Косто?.. Потявтыцятнень важодема чист ашти кавто пельксстэ: валскень ды чокшнень. Куш чачк явовт. Эль кенерят прядомо уштомань-панемань теветь, андомо-симдеме эсеть онгицятнень, парыцятнень, кекердицятнень, эряви чиемс вейсэнь тевс. Чокшне таго теке парось. Чоп сюлмазят. Кие карми зняронь шка аштеме-ваномо ве таркасо аштемань а содыця, певтеме трёнкаиця эйкакш марто? Тень кувалма савськак кадомс, кода кортыть Кузвелесэ, скалонь «фирманть». Кадомс ды прянек-пильгенек совамс эсь хозяйствань лакиця тевтнес, а нолдтнемс сельме икельде, ваномс, мельганзо якамс, трямс-кастомс Ванинень.
Весемеде стакальть колмо иетне. Мейле Кузвелесэ колхозось панжсь эйдень кужо. Сон веленть куншкасо, аволь косояк омбо песэнзэ. Ней Куля уш омбоце ие ветни цёрынензэ тов. Ён. Таргонь-кавтонь ютазь, кужонть панжомадо мейле, эстензэяк муевсь важодема тарка — школасо уряд мельга ваныцянь. Школась покш, кавто этажонь, кевень. Эйдень кужось чувтонь кудосо, ашти шабрацек. Кавонест перька чувтонь пирявкс ды прок ванстыть сынст ашо рунго, нуриця прячерь сэрей рацяня килейть. Весе, мезе эрявсь Кулянень. Яла мерить, чансть иля вешне те моданть лангсо, сонсь мутанзат. Те аволь педе-пес виде, аволь свал истя. Учок, мутанзат!
...Течи Кулянь кедьсэ удось авазо. Стясть чоподава. Ават-тейтерть котьмить-колдордыть каштомикеле, анокстыть валскень-чинь ярсамо. Куля чошкадизе каштомс ямдо пешксе стака чугунонть, лиссь голландканть тона ёндо ды варштась стенас понгавтозь «якинькайтнень» лангс. «Вай, — мерсь эсь пачканзо, — те мон мезе истя теян, шказо сыргозтемс». Лып-лап, нардынзе кедензэ, понгавтызе нуланть эскес ды ютась Ванинень [89] коникензэ ваксс — «сяткинензэ» пувтамо.
— Явась, какинем, удомнеть, а? — кевкстизе чевте-соланя вайгельсэ цёрынензэ лангс мельспаросо ванозь. — Стяк, дугинем, шказо сась!
— А-а, — панжинзе сельмензэ ды ве гайтьсэ ёвтызе мелензэ тодовстонть прянь апак кепеде «ламбамо» ононь неицясь.
— Ну, пекинесь эзь, эзь караво? — кевкстизе Куля, велькссэнзэ аштезь. Сельмесэнзэ кивчкаесть-налксесть вечкемань сяткинеть.
— А-аламнеде, — лия боканзо лангс велявтомсто тошкстась Ванине каршо ды одс конинзе сельмензэ.
— Ужо эно, иля эрязкале, иля лисе вельксэть потсто, кудосонть экше... Мон нейке...
Авась кандсь вишка эземне-табурет, путызе коникенть ёжос. Мейле моргасто ливтсь ванькс нардамо ды сравтызе эземненть ланга.
— Ванине, тонеть мезе? Ловсос кашине, ям, пряка? Паряк, алнэть рестамс? Мезе седе вечкат? — эльнезь кевкстнесь Куля, сонсь лип эзь тее, вансь таркасо, лембе велькс потсо сэставтниця цёрынензэ лангс.
— У-у-а-ах, — валонь таркас кувакасто автизе кургонзо Ванине. Мейле ёзынзе мокшнасонзо сельмензэ ды ёвтызе окойники сень, мезде кевкстневсь: — А-алнэть!
Аламос аштезь, авазо кандсь верек ойсэ рестазь, псиденть тыжныця чулгозь алт, пачалгиненть путызе «стуворонть» лангс. Тень веркасто теезь айгсь омбоце табурет ды озась мадезь аштиця «каканзо» ваксс, кармась андомонзо.
— Ну, озак эно, мадезь а андоват! Во-о, истя! Вана теть, кирдть, сянгине. Кши сайть. Седе пекеть пешкеди! Ярсак, ярсак...
Ванине саизе венстезь сянгиненть, весть-кавксть нерьгстызе ярсамонтень, сокардась ды путызе кедьёнкскенть мекев. Эзть туе мелезэнзэ рестазь алтнэ.
— Я, те мекс истя? Оно кодат тантейть! — Куля саизе сянгиненть ды, пачалгиненть недте кирдезь, човоринзе рестазь алтнэнь.
— А эрявить, а-а вечкан, — мельде-валдо, удомань пачк ёвтынзе валтнэнь Ванине.
— Паряк, цёрынем, велькс марто човорязь топине кандан? Ярсат?
— А-а, а карман, а вечкан.
— Ну, эно мезде ярсавлить?
— Кодамо, Ванине, чапамо эли ансяк потявтозь?
— Ламбамо.
— Сахар марто?
— Ага.
— Ловсось — симемка. Лиядо мездеяк ярсат?
— Арась.
— Ловсо пряник марто. Паро?
— Ага...
Куля кандсь якстере ланго пряникть, кечинесэ сахар марто човорязь ловсо ды вакашкесэ суронь кашине. Ловсонь копорязь, Ванине поринзе пряниктнень. Куля вансь лангозонзо. Учось.
— Варчика, кодамо тантей кашась! Несак пенкськесь кодамо тюжа, сонсь кургс эци! Во, истя эрявияк! — мерсь авазо ды пенчкесэ венстсь-эвкотась келейстэ панжадо, теке вачо нармукшт сексэнь, кургозонзо каша. Венстсь омбоце, колмоце... Ванине автнесь кургинензэ ды, марявсь, апак чевеля нильнесь кашанть.
Окойники Куля андызе-итьмавтызе пекень пештевемазонзо «покольнензэ», беньк путызе пенчкенть, ютась кенкш пелев, комась, венстизе кедензэ ды таргизе коник алдо венельдямо чакшкенть.
— Ну, стяк эно... Вай, кияксось экше! — авась, неть валтнэнь евтазь, каштланго чирестэ кандсь понань кемнеть, венстинзе цёранстэнь. — Кирдть, тонгить зярс лембть! Во! Ней чурак азё...
Куля кедте ветизе цёрынензэ моргас. Кепедизе лы стенас понгавтозь шлямкайсэнть ёрвалдызе-шлизе лембе веднесэ чаминензэ, нардызе чевте ванькс нардамосо. Мейле оршавтызеяк. Зярдо Ванине пурнавсь-сэрнявсь, капшазь ютась коникенть ваксс, витнизе ды пряпес путызе толгань тодовонть. «Ну, ава, маряви, теяк теевсь!» — лекстясь Куля мельспаронь кирдезь, путызе табуретэнть тарказонзо ды ютась моргав, кармась стуворонь пурнамо.
— Ванине, ливтика вень чакшкеть кудыкелев. Чине маряви, — тевензэ теемстэ кармавтызе Куля эйдензэ. — Ну, тон оршак мезеяк!
— Лимонадонь рамамс ярмакт максат? — апак кавтолдо, сеске серьгедсь аванстэнь Ванине.
— Максан, максан, — алтась Куля, вешицянть ёнов эзь велявтояк, стувор экшсэ печксесь кши.
— Се-сестэ, мамкай, ливтьса.
Цёрынесь марязденть кецнезь чийсь коникензэ ваксс, саизе [91] аксялдо аволь ламарькс качадыця кедьгенть ды, кавто кедьсэ сонзэ кирдезь, ливтизе ушов, Совамсто мерсь:
— Зя-зярдо, мамкай, макссыть ярмактнень? Течи эли ванды?
— Валык? — мелень ёвтамонь таркас Куля икельдизе цёранзо.
— Эзия.
— Валык азё, цёрынем...
— Э-э, се-ссстэ, мамкай, максат кавто лимонадс, — баягинекс гайгезевсь кенкш икеле аштиця Ванинень вайгелезэ. Сон учось, мезе мери авазо.
— Ну, кадык эно Тонькс ули, — учомс эзь саво, превень апак ютавто топавтызе эйкакшонть мелензэ.
Шлыгорк, мерсь кенкшесь. Ванине лиссь.
Окойники Куля ды сыре авазо прядызь валскень эвтемаст ды озасть стувор экшс. Ярсамсто, ули истямо кой, кортамс а мереви, илязо туе сускомось лия таркава. Содась теде Валдаень Клавдяяк. Шержей прясонзо, кувака иензэ перть а весть марсинзе неть видечинь кирдий валтнэнь. Секскак чатьмонсь. Прядызь ярсамост, ды тердизе тейтерензэ голландканть тона ёнов, моргас. Тесэ, илязо маря пакшась, нолдынзе оляс превсэнзэ кирдевикс мельтнень.
— Вельть уш, ванан, кольневтнят цёрынеть. Натой венелев якамо чакшкензэяк венстнят тензэ! Каня сонсь аволь лисеве ушов? Аволь потякай, — менсть валтнэ сыре Клавдянь кельпрясто. — Оршневтятак эйсэнзэ тонсь. Те каия тев? Кадык сонсь тонады оршнеме, повонь чочнеме. Тарканзояк мельганзо ацат. Тонавтома. Мезе тень эйсэ берянесь?
— Касы — тонады! — марясь Клавдя каршо, теке пря ланга мейсэяк лоштизь. Натой келезэяк кундатотсь.
Аламос теевсь општ.
— Тонь свал текесь: касы — тонады. А тонады! Кольневтемась, тейтерем, — тол марто налксема, — колызе општонть, эсь мель кирдсь Клавдя. Корты сон апак капша. — Мон содаса тень, ветененк тридизь.
— Те оно зярдо ульнесь. Ней лият койтне, — каясь каршо вал, содась эсензэ, «нежединзе сюронзо» Куля.
— Виде, умок. Тон арсят сестэ, тынк касомсто, а мейсэ ульнесь кольневтемс? И... Неень шкадонть кортамскак а мезть.
— Мезесэ пек уш кольневтян? — пшкадсь тень каршо Куля.
— А неят? — таго каятотсь, сыремсь, марявсь, Клавдянь аламнеде мотордыця кортамонь ёжозо.
— Берянь, бути а неят. Васькавтнемась, тагояк мерян, парс а вети. Мезекс кевкстнят — мезде ярсаволь, мезде симевель? Мезе ули, сень макст. Мезде тонсь ярсат, седе сонгак ярсазо. А мезть савтнемс... Эйдесь тонавтнезз тарканзо урядамо, чаманзо шлямо, оршнеме... Тень эйстэ ушодови весе, — ледстизе, превть макссь Кулянень шержей пря авазо.
— Тонады, — текень содась Куля.
— Тонады, тонады... лия мезеяк а содат. Ярмаконь пандозь? Те уш ковгак а маштови! Каня а чарькодят, мезе теят? Секень вант, венельдямонзо кискак карми вешеме ярмакт! — музгордсь авазо, — кольневтть, зярдо эйкакшось лавсьсэ уды, зярс сэрезэ эземень келесэ. Яла истя кортыть. Ды те виде.
— Авай, саты, аволь эйкакшан...
— Саты... А саты! Кунсоломак... Пелян пачкодят апарос... — кунсолось Клавдянь мештестэ лисиця эчке вайгелензэ аволь Куля, а каштомкургось.
Ават-тейтерть опамсть. Превс путыцясь кундась урядонь тееме, тейтерезэ оршнеме-карсеме, эсь прянзо пурнамо.
Ванине, оршнезь-пурназь, эзь маря мезде ды киде мольсь покштнень ютксо кортамось, налксесь вечкевикс налкшкесэнзэ — пиже пластикень якстере чаро тракторнэсэнзэ: урнозь «сокась-видсь», «усксесь» крандазкесэ эрьва кодат сталмот. Ансяк кой-кона, верьга вайгельть ёвтнезь валтнэ пачколесть пилезэнзэ.
— Ава-а-й, автомат тень рамат?! — лоткась налксицясь «сокамодо-урномадо», стясь кумажа лангсто ды серьгедсь аванстэнь.
— Раман, мекс а раман! Питней, мерема... — вал макссь, сонськак эзизе редя, авазо. Пурнызе-ацызе удома тарканзо, оршнесь, сайсь ведрат. Сыргась ведьс. Лисемадо икеле кармавтсь: — Ванине, тенсика кияксонть!
— Конфеткат тень кис рамат?
— Раман, раман!
— Шоколадонь?
— Раман истяткак.
— Сестэ тенсеса.
Куля совавтсь ведь, путынзе ведратнень каштомикеле эзементень. Цёразо ахолясь тенстьсэнзэ, топавтсь мерезенть.
— А покш машина, кодамо Палюнь, рамат? — одс серьгедсь, теке беряньстэ марнцяненъ, Ванине. Айгинзе тенстьсэнзэ [93] налкшкензэ ве ёнов, шлёрькадсь судынесэнзэ ды путызе тенстенть тарказонзо. А мезень теемадо кармась чийнеме кияксканть.
— Кужосто самсто соватано лавкас, вансынек, — ливтязь ливтясть Кулянь валонзо уштомикельде. Теке арасельгак «покш кортамост» аванзо марто, мезекскак эзизе путо, тейсь эсензэкс. Каштомсто таргизе лембе ведь чугунонть, каясь ваканонтень ведь, чатьмонезь кундась лакшт-лакшт пенчтнень-вакантнэнь шлямо.
— Те кодамо истямо покш машинась? — одс эзь кирдеве Клавдя. — Питнезэ зяро?
Куля ниле-вете валсо ёвтнизе мезе те истямось, зяро питнезэ.
— Вай, авакай! — абунгадсь, тей-тов чиремтнизе прянзо марязденть каршонзо аштиця авазо. — Те косто зняро ярмактнень сайсыть? Вай, вай, мезе теят! Мериндеряй теть рамамс алкуксонь машина, сестэ мезень тееме кармат? Мезе каршо мерят? Сестэяк ойметь лисемс кармат топавтомо мелензэ?
Куля неть валтнэнь, кодат видеть иляст уле, нолдынзе пиле вакска, теке ёвтазьгак арасельть. Сон содась эсензэ. «Сокорсто» вечкемань вийтне-ёжотне кирдсть эйсэнзэ полонсо. Мерят, пильгензэ пекстызь пелиласо, кершизь. «Те кода, кода истя, молемс эсь покольнеть каршо? — арсезевсь аванзо пельде марязденть. — Ну, кадык налкси! Чей, эйкакш... Палюнень рамасть, мекс, видеяк, монень а рамамс? Каня сындест берянян?!»
— Кинь кедьстэяк пандомга саян. Кадык налкси. Пиже эйкакш жо! Кадык, — поладынзе арсеманзо верьга вайгельть, седе парсте марязо авазо.
— «Кадык», «тонады»... — нусманясто, прянзо нулновтнезь мерсь чама тюсонь, сельмень-судонь коряс тейтерензэ ёнов молиця Клавдя. Валскень перть ботась, стомавсь. Озась стуворпес. Оймсесь ды вансь тейтерензэ-нуцьканзо пурнамост мельга.
Куля капшазь сюлмась шаль, оршизе ломань юткс лиснемань «кухайканзо», саизе цёрынензэ кедте, ды лиссть ушов. Сёксень экше коштось нолштынзе чамас, кармавтынзе эскелямо седе келейстэ ды эрязасто. Вальмалост аволь сыре, Миколень озавтовт рацяня килеесь штапськадсь, празь ожо лопанзо каштордсть пильге ало. Озавтомстонзо колмо тарадс чувтынесь велявтсь эйпаро чувтокс. Правтызь тюжа лопаст пиресэ умарькстнэяк. Талай сёксь... Кулянь мельс сась апак учо текень кондямо, экшесэ лексиця сёксень маней чись. Сестэ сынь Миколь марто [94] пеедькшнезь, эрдевикс ёжосо озавтокшнызь умарьчувтынетнень ды те, се шкастонть ломанде алкине, килеенть. Миколь чувнось латкинеть, озавтнесь, а Куля, теяк ванстовсь мельсэнзэ, кавто ведрасо якась лисьмас ведьс, валнось озавтозетнень. Кода умок те ульнесь! Ды теке исяк. Шкась моли, сонзэ эземезэ — озамс оймсеме — арась.
Ават-цёрат сыргасть эйдень кужов. Аволь ламо шкань ютазь ульнесть икелензэ. Вана сон, мейсэяк а явовиця веленсетнеде, кудось! Алкине кузтемпестэнть чопик-чопик совасть кудыкелев. Каршост чико-орк панжовсь раужо дерматинсэ лембелгавтозь кенкшесь. Лиссь прявтось, Кулядо од, ашо халатсо авась. Сэрьс аволь сэрей, ёлганя, валдо черь-чачо.
— Куля патяй, кортамом ули, — эзть кенере шумбракстнемеяк, пшкадсь, гайгезевсь лисицянть човине ванькс вайгелезэ. — Кадык сови пакшась. Сонтемензэ кой-мезе эряви ёвтамс.
— Ужо аламнес, васня кайсевтьса, — эзизе кунсоло прявтонть, ды юрк совасть кавонест кайсема таркантень.
Пацявтомо, валдо черь, шождасто оршазь эйкакшонь пизэнь прявтось кадовсь кудыкелев. Учось. Куля кайсевтизе Ванинень, понгавтынзе оршамопелензэ ды шапкинензэ тулос, таргинзе пилыстэнзэ кемнензэ ды ильтемстэ палызе чамаумарьс. Окойники лиссь.
— Тевесь, Куля патяй, вана мейсэ: исяк тонь Ванине сайсь мартонзо кужонь налкшке — раужо тюсонь, цивтордыця пистолет. Цёрынетнень вечкевикс таташкест...
— Минек Ванине? — гувк кирвазсь Кулянь чамазо, полгарьгадсть сельмензэ, ноцк витемсь рунгозо. — Арась-арась, истямо Ванине а теи. Зяр-до-як! Те кортамот. Сон аволь истятнэде. Теемс истямо нулгодькс тев? Арась. Арсемскак а мезть.
— Сон, монень маряви, путызе зепезэнзэ ды стувтызе. Эрси истя. Аволь ансяк вишкинетнень марто. Сон исяк чинь-чоп налксесь мартонзо. Варштытя, Куля патяй, зепензэ, — энялдозь макссь превть кастыцясь.
— Арась, арась. Зепсэнзэ мезеяк арасель. А лади чаво кулят нолдтнемс пакшадон, — марявсь, покордавсь, эсензэ мель кирдсь Ванинень авазо. — Сон монь аволь истямо.
Кужонь прявтось пелькстамо эзь карма. Кортамонть прядоманзо апак учо, чатьмонезь кундась кенкшнедентень ды совась «курос». Чарькодсь-марясь: стяко ёмсевти валонзо. Истят ават, вечкемань ормасо сэредицят, вастневить. Ды аволь чуросто.
[95] Кода лездамс Кулянень, эзь сода. Мезе мерят, мейсэ лездат пидицянь-паницянь дипломот марто? Лия, седе «покш» диплом мартотнененьгак аволь свал изнявкшны те ормась. Сон истя педси, а лутави мейсэяк. Тень туртов ёрокчи эряви, превть ды мариця седей.
Вановиця эйкакштнеде кужосонть аламо. Панжовськак аволь умок. Ламотнень пакшаст аштить покштяст-сырькаест марто кудосо. Сынь, тетядост-авадост башка, ваныцяст, превень максыцяст, парос тонавтыцяст. Ветсевить тей, вейсэнь кудос, аволь ансяк ве шкань чачовт. Вете-кото иесэтнень ютксо улить допрок вишкинеть. Човор. Мельгаст сакшныть чокшнень вете чассо. Ялатеке ваныцятненень савкшны кирдевемс: те а шкастонзо сы, тона... Велень тевть, сынст часост эсест. Секскак савкшны учнемс, зярдо сайнесызь эйкакштнень, лиясто мик кавто часто кувать.
Эйдень кужосто Куля ютась школав. Эйзэнзэ кавто-колмо эскелькст. Ней сонзэ лият тевензэ, аволь кода икеле, фермасо важодемстэ. Ней тензэ а эряви валскень чоподава, кудоютконь тевтнень уцор-ацор сявордозь, прянь-полдань синдезь чиемс потявтомо. Чопоньпелевгак а ков капшамс, скалтнэ а учить. Секскак аволь чуросто сакшны Ванинензэ мельга мик ниле чассо. Школась — аволь икеле шкань нежедема тарказо. Кандтни пенгть, уштсынзе класстнэнь, шлясынзе-нардасынзе киякстнэнь, начко нулынесэ ютасынзе партатнень, вальмаланготнень ды весе, олясат. Тесэ парыцят-рангицят арасть. Те «фирмасо»: а андсак — ранги, а симдьсак — паразь пары, а потявтсак — ушоды укстнеме.
Течияк кужов сась шкадо икеле. Школасто ютась тей. А мезть кудов-мекев ютконть онкстнемс. Серьгедизе Ванинень, озавтызе алкине-нурькине эземнес, тонгинзе пильгезэнзэ понань, кедьсэ кодазь цюлкинензэ, резинань сэнь тюс кемнензэ. Ливчанясто, штюпазь-капазь путсь нарамсто коклацень кадозь прязонзо понань, якстерьстэ артозь кодазь шапкине. Саизе шкафкестэнзэ пальтынензэ ды оршавтызе. Эрязасто чочнинзе повнетнень. Тонгинзе кедезэнзэ варьгинензэ.
Ваксозост, эзизь редяяк, ютась кужонь прявтось.
— Я, тынь уш кудов? Паро, паро... — кедензэ халат зепсэ кирдезь, вансь лангозост ёлганя рунго паронь арсицясь.
— Эно ков, тевень прядовсть, секскак...
— Куля патяй, миненек сакшнось школань тонавтыцясь Евгений Васильевич. Содасак. Сон тенек ёвтнесь трямонь-кастомань [96] койтнеде ды илатнеде. Мерсь: тонавтодо, келя, эйкакштнень эсь мельгаст якамо — оршнеме, карсеме,таркаст ацамо, налкшкест таркава путнеме... Вана истя. Тень эйстэ, келя, ушодови ломаненть вандынь чизэ. Истя мерськак. Пельчасонь малава кортнинек. Видеть валонзо, мезеяк а мерят. Сюк тензэ. Секскак...
— Тонады сонськак. Истя Ванине? — каясь Куля трокс вал, сертизе, эзизе максо кортыцянтень прядомс мелензэ. «Весе превть максыть!» — арсезевсь кежень сазь. Сон витизе Ванинень прясо якстере шапкиненть, вадяшизе. — Ну, ней вана аноктано! — Дёлязь эшкизе кутьмере ланга цёрынензэ, ды паро ёжосо лиссть эйдень кудостонть.
— Зярдо машина раматано? — ледстизе аванстэнь Ванине валскень кортамост.
— Эно ков мольтяно?
— Ков?
— Лавкав, Ванине, лавкав!
— А-а... Ма-машинань рамамо? Истя эдь, авай, истя?
— Вансынек... — арсезевсь Куля. Содась, ярмаконзо а сатыть, ды кода а топавтсак седейпелькскеть мелензэ?!
Лавкась, ков эскелясть ават-цёрат, эйдень кужодонть аволь васоло. Кузвелень «покш кудонзо» куншкасот, весе ве таркасот: школась, кужось, вейсхозонь прявткудось, лавкась. Ён. Мерть азё, прявттнэ, икелень ды неень, эзть арсе ды а арсить эрицятнеде? Эйдень кужодонть башка, весе кирьпецень.
— Шумбрачи! — лавкас кавонест совамсто арсесь Куля.
— Здрасте! — вастынзе совицятнень колоньгеменьшка иесэ, сэрьс-келес аволь покш, тейтерне ёнов молиця аваломань. Чама тюсозо, сельмензэ тюжат. Кувака човине судо. Лангсонзо талай апак муське, ансяк лемезэ ашо халат. Лався экшсэ аштицянть вайгелезэ эсензэ кондямо човине, теке пси чистэ цийниця тастань.
— Машинань рамамо вана сынек, — пештизе Куля микшнема кудонть потмо вайгельсэнзэ ды невтсь кедьсэнзэ лавсянть лангс, косо аравтнезь зярыя налкшкеть-машинат. — Эрьга оно сень, сехте покшонть.
Микшницясь кузсь мезе-бути лангс, валгстызе невтезенть ды чатьмонезь путызе рамсицятнень икелев.
— Вадря! — шнызе Куля ды путызе кияксс Ванинень икелев. — Ну, кода, сайсынек?
— А-арась. Ви-вишкине. Монень эряви покш, кодамо Чичав Палюнь. Якстере-якстере! — каятотсь, сась дёп, лавкасонть [97] Ванинень ванькс ды човине, теке тейтернень, вайгелезэ.
— Паряк, тонеть истямо эряволь? — микшницясь панжизе кенкшкенть, Ванинень совавтызе эсензэ пелев ды сурсо невтсь лия таркасо, киякссо, аштиця покш, якстерестэ артозь «шождынькай» машинанть лангс. Мельгаст совась тов Куляяк. Чарькодсь, кодамо рамамка перька чары-вели цёразо, кодамодо сэреди сонзэ пекезэ. Чарькодсь, ды зуйк мерсь седеезэ: «Питней, пелян а изняви...»
— Ёвтыка, зяро те «крандазкенть» питнезэ? — кевкстизе сон микшницянть, «шождынькаенть» лангс сельмень сявадозь ванозь.
— Питней... — мерсь чова рунгине, чентязь тюс чама микшницясь.
— Ра-рамик, а-авай, рамик. Мо-монень истямо эряви!
— Ну, паряк, васенценть рамасынек? Те вельть уш питней... — иергадсь нерницянть авазо.
— Монень те эряви...
— Ожоськак вадря. Оно зярошка, — бажась кемевтемс цёрынензэ Куля. — Мазый, «сельмензэ», вантая, кодат!
— А эряви. Мо-монень якстеренть рамик, — эсензэ содась Ванине.
— Ярмакон зяро арасть, — мерсь Куля лавсянть экшстэ цёранзо марто лисемстэ.
— Му-мук костояк...
— «Мук костояк»... — пеедькшнезь, мельде-валдо прасть аванть кельпрясто валтнэ. — Ну, косто муян, тонсь арсек, сынь а усксевить... — машнетезь поладынзе валонзо Куля. — Пандомга а макссак? — пшкадсь микшницянтень.
— Максса. Зярдо велявтсыть ярмактнень?
— Ковшкань ютазь... — арсезевсь, сускинзе турванзо ды ёвтызе шканть Куля.
— Арась, самай ламо — тарго.
— Вана мезе, — сась мельс рамсицясь, — кемень чинь ютазь пандса. Миян мезеяк...
— Те кувать, — нолдынзе турванзо «кемень» валонть марямсто машинань азоравась, — котошка чить а кандсыть — понги тень.
— Ну, куш кеменьшка... — педясь Куля нернеме.
— Арась. Чарькодемак, ревизия учан. Кото чить. А велявтсыть — каюк тень. Сайсак? Ва, илямак маня.
Микшницясь ускозь ливтизе лазонь пирявкскенть экшстэ якстерьсэ цитниця шожда машина ёнов молиця налкшкенть ды [98] клянць-клянць аравтызе Куля марто Ванинень икелев.
— Во! Ардтнеде. Лимузин, аволь машина, — мизолдозь мерсь, тейтерне ёнов молиця авась «товаронть» икелест аравтомсто.
Куля кавалалдо кепедизе цёрынензэ ды озавтызе мазыйстэ кувтолдыця машинанть озамкас, ветямчаронть экшс, невтизе-тонавтызе кода лепштнемс педальтнень, ардомс, кода, ков эряви ветямс «лимузинэнть».
— Ну, чарькодевсь? Вадря. Эрьга варчика. Ну-ну... — Куля комась, удалдо аламнеде тысмадизе, лездась сыргамс таркастонзо цёранстэнь.
Аватне чатьмонезь вансть цёрыненть лангс.
Машинынесь, конань ветямчаронзо экшсэ кеняркстонть кургонь апак пекстне аштесь Ванине, шаштсь кияксканть кавтошка метрат. Кода а кецнемс — ветямс истямо машина!
— Вадря? Вечкеви? — пшкадсь микшницясь, «пирявксонзо» трокс нучказь.
— Ну кода? Тусь мелезэть? — эзь кирдеве, мизолдозь кевкстизе авазояк.
— У-гу, — марявсь машинасонзо аштиця якстере шапка «шоферэнть» кургсто.
— Паряк, рамасынек тундо ёнов? Ну, ков ней лисят? Кува кармат ардтнеме? Сёксь. Рудаз. Якшамо. Ну, кадык эно. Кудосояк тарка муеви. Истя, Ванине? — янксезевсь Куля. Скирясь седеензэ пандома шкаськак.
— И-истя, — кемекстынзе Ванине аванзо валонзо «кабинастонзо» лисемстэ.
Куля максынзе, зяро ульнесть, ярмаконзо, саиксэлизе рамамопеленть кавалалов. Арась, эзь лисе. Покш, истя а кандови. Сталмозояк байтяк. Тевесь эно аволь теньсэ. Вельть уш покш, кундамскак а ён. Каня истямось кандови?
— Истя, Куля патяй, а пачтяви. Учок аламос.., — тюжала чама, чова рунго авась сокарясь-тейсь «хозяйствасонзо» ды таргась эчке нардев карькспе. Лиссь «пиринестэнзэ», комась, ушкс-трокс тапардызе якстере «автонть», сюлмизе ды кувака пенть максызе рамицянтень. — Эрь, кирдть. Каик лавтовот трокс, мон кепедьса, ды теке парось ули...
...Кудосо Кулянь авазо арасель. Тусь, улема, эсензэ пизэс. Азоравась эйкакшонзо ды канстонзо марто увол-авол совась кудос, састыне, илязо порксаво, нолдызе рамавксонть кутьмерьстэнзэ киякс куншкас. Сеске Юкснинзе Ванинень пальтонь [99] повнетнень, кайсевтизе, саизе прястонзо шапканть ды оршамопельтнень, понгавтынзе тулос. Таргинзе пилыстэнзэ резинань кемнетненьгак ды венстсь тарказост понань. Меельцекс юкстизе рамавкстонть карьксэнть. Ансяк те урядось прядовсь, Ванине эцезь эцесь «шождынькаезэнзэ», ушодсь масторганть тей-тов «цюхаеме». «Ур-р-р, ду-ду, ур-р-р, ду-ду...» — кайсететсь кудонть келес.
Куля стясь кенкш икелев ды мельспародонть мизолдозь вансь пургондовкскензэ лангс. «Кодамо парыне цёрынесь, мазый...» — чипай налнэкс ютась пряванзо мелесь. Саизе вановтонзо, кайсесь ды понгавтынзе-путнинзе оршамопелензэ таркаваст. Ютась моргав.
— Ну, пекеть вачсь? Ямне каян? — каштомсто чугунонь таргамодо икеле кевкстизе цёранзо Куля.
— Э-э!
— Паряк, ловсос кашине?
— Э-э!
— Чай, ламбамо чай велькске марто а эряви?
— Э-э!
— Эно мезе теть эряви? Мезде ярсавлить? Мезе мелезэть ледсь? — нернесь Куля.
— Апельсинт, — аволь мерсь, ёртозь ёртсь машинасонзо «дудныцясь».
— Ну, ней косто саян апельсинт? Лавкасо, совсинек, арасть. Ванды, паряк, костояк муян.
— Мо-монень ней эрявить! Ду-ду-у-у... — марикскак эзь тее налксицясь.
— Вандыс, цёрам, цидярдт кодаяк. Муян, — кортавтсь, кемевтсь авазо.
— Арась. Мон ней ярсавлинь. Р-р-р, р-р-р. — иердемсь, содась эсензэ Ванине.
— Ну, вандыс. Ютан кой-кува, паряк, муян.
— Мо-мон ней ярсавлинь, — мезеяк эзь маря, вешсь масторга бырсэ ардтницясь. «Кодамо аеркс, мезеяк а кунсолы!» — Ютась Кулянь прява.
Сон эрязкалезь, выр-выр оршась фуфайка, каясь пряванзо лембе паця, тонгинзе каштлангонь чалгамо вакссто понань кемезэнзэ колошатнень ды ношкстась. Ков? Кинень? Ну, кие лезды? «Ютан аванень, — сась мелезэнзэ. — Аволь умок, Московов якамодо мейле, Люба ялганзо марто сакшнось аванень. Паряк, [100] усксесь зярыя казнекс?..»
Эскелясь Куля чоподас ваиця кудотнень юткова молиця киванть. Прясонзо, теке коткудавт, эвтсть эрьва кодат арсемат Кинзэ прядозь, сась мельс: авазо лездыцякс тензэ а ули, содасынзе вановтонзо-мелензэ.
Лиссь, кода арсесь.
Ютась чожк-чожк чопода кудыкельганть, совась чачома кудозонзо. Авазо, мекс-бути чокшнеланга, нартемксэнь тенстьсэ тенсесь истякак ванькс кияксонть.
— Я, тон косто? — пшкадсь талнозь. — Мезеяк эзь лисе? Ансяк валске ульнинь кедьсэнк. — Сон кадызе тенсеманзо, видемтизе рунгонзо.
— Мезеяк...
— Эно мекс истя чиезь чиить? Лексят, теке пенгть ускить.
— Ну, истяк. Кевкстеме сынь, — мельде-валдо, мокнозь, аванзо лангс ванозь, ёвтынзе валтнэнь.
Сыцясь икелев эзь юта. Авазояк эзизе терде. Аштесть карадо-каршо каштлангс чалгамонть вакссо.
— Мезень?
— Тонь косояк кавтошка апельсинэть арасть? Люба, паряк, тукшнось зярыя, — кевкстсь чокшнеланга якицясь талномадонть сорнозь вайгельсэ.
— Мезекс теть истя цяк эрявить? Чиить келень лисезь... — исковась Клавдя, бажась содамс тувталонть.
— Ды истяк. Ванинень мельс ледсть... — нолажтсь кельпрястонзо.
— Оно-о-о мезе... Неть ожо чапамо оскатнеде башка а мезде андомс эйкакшонть, а? Чоподава чиезь чиить... Визькс кисэть!
— Авай, тон таго...
— Мезе таго, мезе таго! — казякадсь аванзо вайгелезэ. — Каня а неят, пакшат прязот кузсь? Левштапокскак эйсэть а путы... Вай, вай, мезе теят!
— Мезеяк эзь кузе! — аварьгадсь Куля. Авазо потась киякс куншкас, тейтерезэ аштесь кенкш икеле.
— Кода эзь кузе?.. Веленть келес чоподава чийнят, правтат савтомс эйкакшонтень эрьва мейсэ, — кежень сазь уш, машнетезь, мерсь сыречиденть кукорькай Клавдя. — Прок варма прев зярдояк араселить, Мезе лиссь мартот?!
Куля чатьмонсь. Начко сельмензэ сурсо нардтнезь, поладызе текень, ушодозенть:
— Улить. Максомс, тейтерем, а максан. Кежень илить савтне. Истя савтнемс, кольневтемс, эльнемс-цильнемс эйкакшонть марто, ковгак а маштови. Те ней, вете иесэ, лангсот ардтни! Мезе ули седе тов? Иля энялдткак, а максан.
— Авай...
— Иля пшкалеяк. Паряк, сови прязот, чарькодьсак, мезе теят! А максан.
Куля велявтсь кудов ёжонь колазь ды чавонь кедть.