Гужем ӝыт вакыт.
Туж чебер шунды
Сьӧд нюлэс сьӧры
Кемалась пегӟиз.
Инлэн пум палаз
Лоптыро пилем
Горд-горд луыса
Чиляса улэ.
Со но кема ик
Тазьы ӧз улы,
Пеймытлы луса,
Чаляк сьӧдэктӥз.
Самой та вакыт
Милям гурт палась
Вал пыд куараос
Пелям кылӥськиз.
Кема ик ӧй ул —
Быдэс вал табун
Дуак ворттыса
Мон вӧзтӥ ортчиз.
Со валъёс вылын
Пиналъёс пуко;
Огзылэсь огзы
Ортчыны туртто.
Туж шум потыса
Валъёссэс возьман
Туннэ ӝыт соос
Возь вылэ мыно.
Тани вуизы,
Валзэс лэзизы;
Шудон серемлэн
Пумыз ик ӧвӧл.
Со куспын ик нош
Асьсэос соос
Кудзы пу нулдо,
Кудзы тыл потто.
Туж пиналъёс нош
Со тылэз витё
Котыраз солэн
Пелляса сыло.
Тыл бадӟым луиз,
Ёрос люгдӥськиз,
Кыдёкытӥ нош
Туж пеймыт луиз.
Табере соос
Жадем кадь луса
Тыллэн котыраз
Ваньзы пуксизы.
Вал возьман лыктэм.
Бадӟым муртъёслэсь
Вераськемъёссэс
Кылдӥсько ини.
Со куспын ческыт
Пыжем умо но
Пеньысь поттыса
Туж чаль кулэсме.
Туж кема ӵоже
Бадӟым муртъёслэсь
Вераськемъёссэс
Кылдӥсько соос.
Собере гинэ
Умзы потэмен
Богатыръёс кадь
Изьын выдыло.
