Важӧн оліс-выліс сёкыр ручкӧд...

by Лыткин Георгий Степанович

Важӧн оліс-выліс сёкыр ручкӧд. Налӧн няньыс бырис. Сёкыр пондіс шуны: «Ручанӧй, ручанӧй! Вай пудъясьны, коднымӧс начкыны». Пудъясисны, пудъясисны, пуд усис сёкырӧс начкыны. Сёкыр шуас: «Мун тэ, ручанӧй, мун ветлы пан (ӧксы, тун, чадӧ) ордӧ пуртла». Руч мунас, пондас сьывны:

Пананӧй, пананӧй!

Вай тэ, вай тэ пурттӧ

Сёкырӧс начкыны,

Менӧ, ручӧс, вердны.

Пан шуис: «Менам пуртӧй ныж; тэ мун ветлы ен ордӧ зудла». Руч мунас, пондас сьывны:

Енманӧй, енманӧй!

Вай тэ, вай тэ зудтӧ

Пан пурт кеслыны,

Сёкырӧс начкыны,

Менӧ, ручӧс, вердны.

Ен шуас: «Менам зудӧй сьӧкыд; тэ мун тӧлысь ӧш вай». Руч мунас, пондас сьывны:

Тӧлысянӧй, тӧлысянӧй!

Вай тэ, вай тэ ӧштӧ

Ен зуд кыскыны,

Пан пурт кеслыны,

Сёкырӧс начкыны,

Менӧ, ручӧс, вердны.

Тӧлысь шуас: «Тэ мун, кор шонділысь зонсӧ; сытӧг менам ошкӧй оз мун». Руч мунас шонді ордӧ, пондас сьывны:

Шондіанӧй, шондіанӧй!

Вай тэ, вай тэ зонтӧ

Тӧлысь ӧшкӧд мунны,

Ен зуд кыскыны,

Пан пурт кеслыны,

Сёкырӧс начкыны,

Менӧ, ручӧс, вердны.

Шонді ыстас «Тэ, ручанӧй, ветлы кӧч ордӧ; менам зонмӧй тшыг, кӧч йӧвтӧг оз мун». Руч мунас кӧч ордӧ, пондас сьывны:

Кӧчанӧй, кӧчанӧй!

Вай тэ, вай тэ йӧвтӧ,

Шонді зонмӧс вердны,

Тӧлысь ӧшкӧд мунны,

Ен зуд кыскыны,

Пан пурт кеслыны,

Сёкырӧс начкыны,

Менӧ, ручӧс, вердны.

Кӧч шуас: «Менам лысьтан доз абу; абу кытчӧ лысьтынысӧ; мун тэ, ручанӧй, ветлы пипу ордӧ, кор сылысь лысьтан дозсӧ». Руч мунас пипу ордӧ, пондас сьывны:

Пипуанӧй, пипуанӧй!

Вай тэ, вай тэ лысьтан дозтӧ

Кӧч йӧв лысьтыны

Шонді зонмӧс вердны,

Тӧлысь ӧшкӧд мунны,

Ен зуд кыскыны,

Пан пурт кеслыны,

Сёкырӧс начкыны,

Менӧ, ручӧс, вердны.

Пипу шуас: «Менам абу мыйӧн лысьтан дозсӧ перйыны; мун тэ, ручанӧй, кор мойлысь пиньсӧ». Руч мунас мой ордӧ, пондас сьывны:

Моянӧй, моянӧй!

Вай тэ, вай тэ пиньтӧ

Пипу лысьтан доз перйыны,

Кӧч йӧв лысьтыны

Шонді зонмӧс вердны,

Тӧлысь ӧшкӧд мунны,

Ен зуд кыскыны,

Пан пурт кеслыны,

Сёкырӧс начкыны,

Менӧ, ручӧс, вердны.

Мой ыстас: «Мун тэ, ручанӧй, кор дорысьлысь перйыштансӧ (кыскӧдансӧ)». Руч мунас дорысь ордӧ, пондас сьывны сідз:

Дорысянӧй, дорысянӧй!

Вай тэ, вай тэ перйыштантӧ

Мой пинь перйыны,

Пипу лысьтан доз вӧчны

Кӧч йӧв лысьтыны

Шонді зонмӧс вердны,

Тӧлысь ӧшкӧд мунны,

Ен зуд кыскыны,

Пан пурт кеслыны,

Сёкырӧс начкыны,

Менӧ, ручӧс, вердны.

Дорысь дорис перйыштан. Сэк мой пинь перъясны, лысьтан доз вӧчасны, кӧч йӧв лысьтасны, шонді зонмӧс вердасны, тӧлысь ӧшкӧд мунасны, ен зуд кыскасны, пан пурт кесласны. Пондісны сёкырӧс начкыны: сылысь юрсӧ тшегӧс вылӧ пуктісны, пан пуртӧн кучкисны. Кыдзкӧ лӧсьыдтӧма вартісны (эз веськавны), пан пурт сачкысис тшегӧс помас: сёкыр повзис, пышйис; коньӧрӧй ручанӧй дзуглясигтырйи колис.