Совет закон потэм бере, удмурт но ас кылызлы кузё луиз. Удмурт школаосын ӟуч кыл интые удмурт кыл пуксиз. Азьло инспектор ӟуч дышетӥсез удмурт школае пуктэ вал юри, удмурт дышетӥсез ӟучъёс доры интыя вал. Ӟуч калыкез удмурт калыкен эриктэм сура вал. Удмурт кылын вераськыны школаын уг лэзё вал. Удмуртъёс асьсэ кылын вераськымтэен кылзы пушлань кыстӥськем кадь улӥзы. Вордӥськем мусо кылзэс школаын соос ӧз поттылэ. Дышетӥсь но удмурт кылэз поттын уг лэзь вал уго.
Удмурт кылын вераськисез ӟуч мыскылляса улӥз. Соин удмурт ас кылзэ поттымтэеныз, асьсэ ачиз уллапал возиз. Аслэсьтыз адями санзэ быдтыса, туж возьдаськыса улӥз.
Дунне ужез тодын турттыса, солэн валамез ӧз луы, ӟуч кылэз умой валамтэысьтыз. Удмурт кылын нош валэктӥсь ӧй вал та дуннеысь законэз. Совет закон потэм бере удмуртъёслы но шунды ӝужаз. Школае но пиштэ солэн люгытэз. Вань школаын табере нылпиосыз асьсэ вордӥськем кылынызы дышето. Мусо анайзылэсь кылзэ бурместо.
Нылпиосыз азьло сярысь тодманы-ик уг лу ини. Мылкыдзы гинэ ӧвӧл — лулзы но воштӥськиз. Тулыс инвожо сяська кадь усьтӥськизы. Ваньзы туж валась луизы. Туж тыршись луизы. Дышетӥсьлэсь верам кылзэ, огзэ но вунэтытэк асьсэлы сабо. Аслад вордӥськем кылыд вань вылысь, муртлэн кылыныз дышетскыса улӥськом вал, шуо. Ӟуч дышетӥсь дыръя куака кадь улӥськом вал асьмес шуо. Тӥни удмурт кыллэсь пайдазэ-ке уд оскиське, кылдӥське нылпиостылэсь кылъёссэ. Соос тодо, соос умойгес валало удмурт кыллэсь ӟечсэ. Школа ик табере тодмантэм луиз: дышеськись пиналъёслэн отын мылысь-кыдысь кенешемзы кылӥське. Кулэм школаез улӟытӥзы, кынмем мае ке шунтӥзы. Ӟуч кылэз кысыса, удмурт кылэз ӝуатӥзы. Улэмъязы асьсэ кылзылэсь ӟечсэ шӧдо. Уката «Гудыри» газет потэмен, удмурт книгаос ванен, удмурт нылпиос мылкыдзэс виль сяин дышетӥськон борды ляко. Соос шӧдӥзы ини азьло дыръя, вуж закон дыръя йыромыса улэмзэс. Соос тодӥзы ини паськыт люгыт сюрес вылэ потэмзэс. Азьло выем мылкыдзэс ӝутӥзы ини соос. Соин эшъёсы, асьтэдыз асьтэс кур карыса эн возе. Ялан удмурт кылыныды куштонъяськыса, вераськылэ. Школаын удмурт кылмы быронтэм мед выжыяськоз шуэлэ.