Был ни хәл?(шиғыр). Абдулхаҡ Игебаев

Был ни хәл? (Шиғыр ) автор Абдулхаҡ Игебаев

.Нәшер ителгән: 1996 йыл. Сығанаҡ: "Уҡыу китабы" - 1 синыф өсөн дәреслек.-Өфө"Китап",1996 йыл

Был ни хәл?

 Түр бүлмәнең форточкаһын
 Барып асыуым булды —
 Йомшаҡ ҡына ҡар бөртөгө
 Усыма килеп ҡунды.
 — Ҡыш бабайҙан һиңә сәләм
 Алып килдем,— тине лә,
 Ҡар бөртөгөнөң, ниңәлер,
 Бөттө әйтер һүҙе лә,
 — Был ни хәл?— тип уға
                 баҡһам,
 Әллә ҡайҙа булған ул.
 Нәни генә ҡар бөртөгө
 Ирегән дә ҡуйған шул.

1996 йыл

---