Бушлыҡ… Буп-буш ҡалды кеүек йәнем... Фирүзә Абдуллина.

Бушлыҡ… Буп-буш ҡалды кеүек йәнем... (шиғыр)
автор Фирүзә Абдуллина

Ижад итеү ваҡыты: 21.11.2014.. Нәшер ителгән: 07.12.2014.. Сығанаҡ: “Бәйләнештә” сайтындағы “Ғәжәп донъя” төркөмөнән.

* * *

Бушлыҡ… Буп-буш ҡалды кеүек йәнем,
Янғын үткән дала шикелле…
Һөрөмдәре генә тороп ҡалған…
Йәшәү ҡалған микән? Икеле…

Күпме хыял-теләктәрем янды –
Ҡотҡарырлыҡ сара тапманым,
Күпме өмөттәрем юҡҡа сыҡты –
Мин уларҙы йылдар һаҡланым…

Ә шулай ҙа янғын үткән ерҙә
Ваҡыт үткәс, донъя йәшәрә,
Бөгөнгөһө ауыр, ә иртәгә
Көс табылыр әле йәшәргә!

…Бөгөнгөнөң баҫып көлдәренә,
Иртәгәгә өмөт бағлайым,
Киләсәгем матур булһын өсөн
Барыр юлды үҙем һайлайым!